ULÚKU 11

Ujísɔ̄si nwū Ayíkpó kú nū ɔwɛ nēé í gbɔ̄ɔkɔ ā

1Ɛ̄cī éyi, Ujísɔ̄si yɔ̄ ī gbɔ̄ɔkɔ lɛ Ɔwɔicō ɛga éyi. Eko nōó lɛ ɔkɔ ā gbā kwɛyí ā, anɔ́ɔ ɔyíkpó kú nū éyi da ɔ́ kahíníī, “Óndú, nwū alɔ ɛlā nɛ̄ alɔ cíkā ō ka eko nɛ̄ alɔ í gbɔ̄ɔkɔ lɛ Ɔwɔicō ā, ɛ́gɛ́nɛ̄ Ujɔ́ni nwū ayíkpó kú nū ā.” 2Ujísɔ̄si da uwá kahíníī, “Eko nɛ̄ aá ī gbɔ̄ɔkɔ lɛ Ɔwɔicō, aá kɛ̄la nēe bá ā.

‘Ádā, alɔ ī gbɔ̄ɔkɔ kú ācɛ kéē lɛ ojīlīmā ce uwɔ abɔ̄yī uwɔ nōo wɛ Ɔwɔicō ɔkwɛyi ā.

Wā í cɔ̄cɛ cɛ́ɛ́ ká ā gbo odúúdú ɛcɛ ā.

3Le ɔ́ yá tɔ́ɔtɛ lɛ alɔ kú alɔ lɛ ɔdōlé nōo ce alɔ ɛgbá ɛ̄cī dóódu ā lɛ. 4Kwú ɔdōōbɔ̄bí nɛ̄ alɔ yá uwɔ ā ú yá alɔ ɛhi, ɛ́gɛ́nɛ̄ alɔ je ɔdōōbɔ̄bí nɛ̄ ɛjɛ̄ɛ̄jī ācɛ yá alɔ ā yá uwā ɛhi ā.

Ā cɛ̄ lɛ alɔ ga ipú ojámá olɔfú ŋ́.’”

5Anɔ́ɔ ó da ayíkpó kú nū kahíníī, “Ɔ̄cɛ í jé ŋ́, anɔ́ɔ éyi kú aá le yɛ tá ɛgiyí oklóbīya nū ahāpōtú gaá da ɔ́ kahíníī, “Oklóbīya um, lɛ igbō ɛtá kplá um káá. 6Oklóbīya um éyi nōo ŋmá iyāwu ā le yɛ ce ɔlɛ́ um, ń kē lɛ ɔdōlé dúú nɛ̄ n ge je lɛ ɔ́ lé ŋ́. 7Anɔ́ɔ ɔ̄cɛ í jé ŋ́, nɛ̄ oklóbīya awɔ lɛ ohi tá ŋmá ipú inu kahíníī, “Ā je unwalu ga um ŋ́! Ɔwɛ ā le gwu ɛɛ́, ayípɛ̄ ɔlɛ́ um mɛ́mla um bá agōdō, ń nyāŋjɛ gaá je ɔdā dúú ga awɔ glá ŋ́!” 8Ɔdí nɛ̄ aá gbɛlá koó géē yá mɛ́ɛ̄ ā? “N da aá, ó lɔfú wɛ ɔkwɛ̄yi koó gáā cɛ̄ nyāŋjɛ je igbo ā gā awɔ ohígbū ka awɔ mɛ́mla anú wɛ oklóbīya nɛɛ ŋ́. Amáŋ ó géē cāŋ́jɛ í je odúúdú ɔdā nɛ̄ a cɛgbá ā ga uwɔ ohígbū ka á yúwēyī o yɔ̄ ī bā odée ā piyóo ŋ́.” 9Ohígbū ɔ́ɔmā, aá ba Ɔwɔicō ɔdā nōo ce aá ɛgbá ā, ó kē í je lɛ aá. Aá tíne odée ŋmó ɛgiyí Ɔwɔicō, a kē í lɛ ɔ́. Aá lɛ abɔ̄ gbo ɔ̄wɛ ā, é kē í nwūla ɔ́ lɛ aá. 10Ohígbū ka Ɔwɔicō gē je ɔdā nɛ̄ ɔ̄cɛ ba ā lɛ ɔ́, ɔ̄cɛ nōo tíne odée ā géē lɛ ɔdā ɔ́ɔmā, é kē í nwūla ɔwɛ lɛ ɔ̄cɛ nōo lɛ abɔ̄ gbo ɔwɛ ā. 11Aá nēe wɛ aádā ā, eko nɛ̄ ɔyí aá lɛ ɛbéenyi ba ŋmá abɔ̄ aá, aá géē je ɛgwā lɛ ɔ́ nɛɛ? 12Kɛ̄ɛ ka aá í je ɛna ocɔ̄cɛ lɛ ɔyí aá nōo ba aá ayīgwū? 13Nááná nɛ̄ aá wɛ ācɛ o yá ɔdōōbɔ̄bí ā, aá je ɛ́gɛ́nɛ̄ aá gē je ɔdā olɔhi lɛ ɔyí aá. Ó lɛ ā, Ádā nōo yɔ̄ ɔkpáncō ā í gáā je Alelékwū Ihɔ lɛ ācɛ nēe bá ŋmá ɛgiyí nū ā ŋ́ nɛɛ?

Ujísɔ̄si mɛ́mla Ubéélsēbul

14Ujísɔ̄si yɔ̄ ī nū alelékwū obɔ̄bí odokónu éyi tɛ́ɛ́cɛ, anɔ́ɔ eko nɛ̄ alelékwū obɔ̄bí ā le bɛ̄cɛ ā, ɔ̄cɛ odokónu ā gbɔɔ́ ō kɛlā. Ɛwa kú ācɛ ā le kpó hídáagó. 15#Umát 9.34; 10.25Amáŋ ācɛ ōhī kahíníī, “Ubéélsēbulu, otrɛyí kú aálelékwū obɔ̄bí ā je ɔfú lɛ ɔ́ ɛ́ɛ́ nōó ī nū uwā tɛ́ɛcɛ á.” 16#Umát 12.38; 16.1; Umák 8.11Ācɛ ohile tine ō lɛ ukpa jē lɛ Ujísɔ̄si, anɔ́ɔ é da ɔ́ ka ɔ́ɔ lɛ ɔdā ohídáagó éyi yá lɛ aá ŋmá ɛgiyí Ɔwɔicō. 17Amáŋ Ujísɔ̄si le ɔdā nēé bá yɔ̄ ī gbɛlá nū ipú ɔtū kú uwā ā jé, anɔ́ɔ ó da uwá kahíníī, ipɔ́lɛ́ dúú nōo le kɔ̄ ígwíígwu yɔ̄ gē nunu tá iyī uwā, í gáā lɛ́ɛcɛ glá ŋ́. Ipɔ́ɔ́nū dúú nōo kē le kɔ̄ ī bɛyíkwu iyī uwā í gáā yɔ̄ glá ŋ́. 18Ɔ́dāŋ ka ajɔ̄ɔ̄cɛ́ kú ebilíi le kɔ̄ ígwíígwu yɔ̄ ī bɛ́yíkwu īyī uwā, ɔwɛ nyá nēé í bá tɔ̄há piyóó glá ā? Aá ka ami ɔ́ɔ gē nū alelékwū obɔ̄bí tɛ́ɛcɛ ohígbū ka Ubéélsēbulu jé ɔfú gā um á. 19Ɔ́dāŋ ka ɔwɛ ɛ́gɛ́nyā nɛ̄ n gē nū uwā tɛ́ɛcɛ á nɛ̄, ɛ́gɛ́nyā nɛ̄ ācɛ nēe wɛ ɔwa kú aá ā gē nū uwā tɛ́ɛcɛ ā? Ācɛ nēe wɛ igwú kú aá piií ā gáā ŋmó aá ɛpɔ̄bí á. 20Amáŋ ɔ́dāŋ ka n bī ɔfú kú Ɔwɔicō yɔ̄ ī nū alelékwū obɔ̄bí tɛ́ɛcɛ, ayíka ɛ̄nyā í mafú lɛ aá ka Ɔwɔicō gaá cɔcɛ́ í gbō ācɛ ɔlɛ́ nū ɛɛ́. 21Eko nɛ̄ ɔ̄cɛ olɔfú lɛ odúúdú iyɔ́fú kpó tīiyē yɔ̄ gē gbō ɔlɛ́ nū, odúúdú agbénú kú nū bá ɛbɔ́ lɛ ɔ́. 22Amáŋ eko nɛ̄ ɔ̄cɛ olɔfú fíyɛ́ ɔ̄ gaá tū ɔ̄ iyē, lɛ ɔ́ yálé, cɛ́ɛ́ ó le odúúdú iyɔ́fú kú nū nōó lɔtūcē ā kpó ŋmá ɛgiyí nū, lɛ ɔ́ agbénú kpó kɔ̄ ŋmáajɛ. 23#Umák 9.40Ɔ̄cɛ dúúmā nōó yɔ̄ pí um ŋ́, ayíka ɔ̄cɛ ɔ́ɔmā ī bɛyíkwu um ɔkwɔ̄ɔ̄kwɛ̄yi. Ɔ̄cɛ dúúmā nōó yɔ̄ ī kpó ācɛ gé um ŋ́, ayíka ó yɔ̄ gē fíyɛ́ uwā ákátā.

Alelékwū obɔ̄bí kwúcē wā ɔlɛ́ nū

(Umát 12.43-45)

24Eko nēé lɛ alelékwū obɔ̄bí nū ŋmá ipú iyē kú ɔ̄cɛ nɛɛ, alelékwū obɔ̄bí ā gē yɛ ajɛ ikpākpla gē tíne ɛga kóō nyɔ̄ í lā. Ɔ́dāŋ koó má odúúmā ŋ́, ó da iyī nū kahíníī, “N géē kwúcē ga ɔlɛ́ um nɛ̄ n ŋmá ā.” 25Eko nōó kwúcē igbīhi gaá lɛ ɔlɛ́ ā má, ó le yēŋēē, ɔdā dóódu bá lɔhi. 26Anɔ́ɔ ó nyɛ̄ɛ̄ le tɛ́ɛcɛ gaá lɛ aálelékwū obɔ̄bí ahāapa nēe kē bɔ̄bíipú fíyɛ́ anú abɔ̄yī nū kpó, anɔ́ɔ é gā gaá lā abɔ́ɔ. Anɔ́ɔ āhɔ̄ kú igbīhāajɛ kú ɔ̄cɛ ɔ́ɔmā klla bɔ̄bí fíyɛ́ āhɔ̄ aflɛ́yí ā.”

Ɔhá ɔkwɔ̄ɔ̄kwɛyi

27Eko nɛ̄ Ujísɔ̄si le ɛlā nyā ka ā, ɔnyā éyi lɛ ɔkɔ cɛyí lɛ ɛlā ka ŋmá ipú ɛwa kú ācɛ ā kahíníī, “Ákú ɛ́nɛ́ nōo ma uwɔ klla bī uwɔ jɛ̄ ā lɔhi íbí oo n!” 28Amáŋ Ujísɔ̄si tá ɔ̄ ohi kahíníī, “Amáŋ ákú ācɛ nēe le ɛlā kú Ɔwɔicō pó, bī ɔ̄ le yúklɔ́ ā lɔhi fíyɛ́ á!”

Ujísɔ̄si tá ka anúɔ í gáā yá ɔdohídáagó ŋ́

(Umát 12.28-42)

29 # Umát 16.4; Umák 8.12 Abɔ̄ ɛwa kú ācɛ lɛ Ujísɔ̄si yɛjīlatá biílí ā, ó gbɔɔ́ ō ka kahíníī, “Ācɛ nēe yēeyī abālɔbányā ā bɔ̄bíipú íbí! É dɔɔ̄kā ɔdōcābɔ̄ ohídáagó, amáŋ é gáā yá ɔdōcābɔ̄ ohídáagó dúú lɛ aá ŋ́. Ɔdā nēé géē je lɛ aá ōfōōfūnū ā wɛ ɔdōcābɔ̄ kú Ujóna á. 30#Ujón 3.4Ɔwɛ ékpónú nɛ̄ Ujóna, ɔ̄comɛ́ɛbɛ ā wɛ ɔdōcābɔ̄ lɛ ācɛ Unínīfɛ ā, nɛ̄ Ɔyínɔnyilɔ kú Ɔ̄cɛ géē wɛ ɔdōcābɔ̄ lɛ ācɛ kú eko nyā á. 31#1 Aɔ́cɛ́ 10.1-10; 2 Úklɔ́ 9.1-12Ɛ̄cī nɛ̄ Ɔwɔicō í kɛpɔ̄ tū ɛcɛ ā, ɔcányā kú Ussɛ́ba géē héyī cɛ́ɛ́ kóō lɛ ijáalí cɛ̄ tū ācɛ nēe yēeyī eko nyā ā. Ohígbū koó yɛ ŋmá ɛga oligbó nɛ̄ɛ̄nɛ̄hi gaá jāhɔ̄ lɛ ɔdā kú íjééyī nɛ̄ Usólōmɔn gē nwū ā. N kē da aá ka odée yɔ̄ amānyā nōo fíyɛ́ Usólōmon. 32#Ujón 3.5Ɛ̄cī nɛ̄ Ɔwɔicō í kɛpɔ̄ tū ɛcɛ ā, ācɛ kú Unínīfɛ géē héyī kē í ŋmó aá ɛpɔ̄bí, ohígbū kéē le pīyabɔ̄ ŋmá ɔdōōbɔ̄bí kú uwā abɔ̄ é lɛ ɛlā nɛ̄ Ujóna ka lɛ uwá ā pó ā. Amáŋ ɔ̄cɛ éyi yɔ̄ amānyā nōo fíyɛ́ Ujóna!

Ikpēyī wɛ ɔlá ofiyajɛ kú iyē á

33 # Umát 5.15; Umák 4.21; Ulúk 8.16 “Ɔ̄cɛ dúúmā í gē lɛ ɔlá hɛ́ kwu agege ī kwú ɔ̄ ú tayínū ámāŋ kóō kwú ɔgālā í pīya klá anú ŋ́. Ikɔkɔ ɔ́ɔmā ó gē je ɔ́ ce ɛyí ɔdā olɛ agege ce ɔ́. Cɛ́ɛ́ kú ācɛ kéē mɛ́ɛbɛ eko nēé lē bēhé wā ipú inu. 34Ikpēyī kú ɔ̄cɛ lɛbɛ̄ɛka agege kú iye ā. Eko nɛ̄ ikpēyī kú uwɔ le gēdēē, odúúdú iyē kú uwɔ le mū mla ɔlá ofíyajɛ. Amáŋ eko nɛ̄ ikpēyī kú uwɔ í lɔhi ŋ́, ɛjɛ̄ɛ̄jī iyē kú uwɔ géē yɔ̄ ipú ajɛ odobū. 35Aá híīī cɛ̄ ka ɔlá ofíyajɛ nɛ̄ a lɛ ipú aá, kóō le pīya ajodobū ŋ́. 36Ɔ́dāŋ ka ɛjɛ̄ɛ̄jī iyē kú uwɔ le mu mla ɔlá ofíyajɛ nɛ̄ ābɔ̄ dúú í yɔ̄ ajodobū ŋ́, ó lɛ ā ɛjɛ̄ɛ̄jī iyē kú uwɔ géē fíyajɛ nɛ̄ɛ̄nɛ̄hi bɛ̄ɛka eko nɛ̄ agege gē bī ɔfú kú ɛ́gɛ́nɛ̄ ó fíyajɛ lɛ glá gē fíyajɛ gā uwɔ ā.

Ujísɔ̄si ŋmó ācɛ Ufarísīi mɛ́mla aúítíca kú íne okónu

37Eko nɛ̄ Ujísɔ̄si lɛ ɛlā ka kwɛyí ā, ɔ̄cɛ Ufarísīi éyi lɛ ɔ́ hīgwú kóō wā í le ɔdōlé lé ɔlɛ́ nū. Anɔ́ɔ ó le bēhé ga ipú inu gaá cīce kóō lé ɔdōlé á. 38Ó le hɛ́ ɔ̄cɛ Ufarísīi ā idáagó abɔ̄ Ujísɔ̄si í na abɔ̄ ɛ́ɛ́ nōó gbɔɔ́ ō lé ɔdōlé ā ŋ́ mā ā. 39Anɔ́ɔ Óndú ā da ɔ́ kahíníī, “Aá nēe wɛ ācɛ Ufarísīi ā, aá gē nyā iyɛ̄cɛ kú ikókwū mɛ́mla ocíbú kú aá. Amáŋ eyīpú kú aá le mu mla ɔdābɔ̄fú mɛ́mla ɔbíipú. 40Aólíla, ó wɛ Ɔwɔicō nōo yá iyɛ̄ɛcɛ ā yá eyīpú dúú ā ŋ́ nɛɛ? 41Amáŋ aá je ɔdā nōo yɔ̄ ipú ikókwū mɛ́mla ocíbú ā yá ācogbɛhá ɛhi, cɛ́ɛ́ ɛjɛ̄ɛ̄jī ɔdā dóódu kú aá le kpó yá yēŋēe lɛ aá.

42 # Ulīf 27.30 Aá le jí ɛɛ́, aá, ācɛ Ufarísīi! Aá gē je éyi ŋmá ipú igwó kú aépū ligiligi ō lɛ ɔdōlé kpócu lɛ Ɔwɔicō, amáŋ aá leyī gwō o yá ɔdā olɔhi lɛ aɔ́mpa aá tá. Aá klla leyī gwō íne kú ihɔtū o yá tū Ɔwɔicō tá. Aá yá aɔ́dā olɔhi nēe bá nyā, amáŋ, aá leyī gwō ohile bónū ŋ́. 43Aá le jí ɛɛ́, aá, ācɛ Ufarísīi! Ɛga ocíce olɔhi fíyɛ́ dúú ipú ɛgogbɔ̄ɔkɔ ā, mɛ́mla okónu ojīlimā nēé ī hɛ́ tā aá ɔɔ́pu ā ī he aá ɔtū á. 44Aá le jí ɛɛ́, aá, ācɛ Ufárisīi! Aá lɛbɛ̄ɛka únóji nēé fukɔ̄ ŋ́ nɛ̄ ācɛ í kē jé ɔ́ ŋ́, gē yɛ ɛyí nū gē je iyī uwā tēelihɔ ā.”

45Éyi kú aútíca kú íne ā da ɔ́ kahíníī, “Utíca, ɛlā nɛ̄ a ka nyā, ɛcá nɛ̄ a cá alɔ dúú á ā!” 46Ujísɔ̄si tá ɔ̄ ohi kahíníī, “Aá le jí ɛɛ́, aá nēe ī nwū íne ā! Aá gē kpó aɔ́dā ogbɛnú nɛ̄hi kú íne ā ce ācɛ kóō wɛ úklɔ́ kú uwā kéē lɛyītáajɛ lɛ uwá, amáŋ aá abɔ̄yī aá í gáā yá aíne ā tɔ́ɔtɛ́ lígíí lɛ uwá kéē lɛyītáajɛ lɛ uwá ŋ́. 47Aá le jí ɛɛ́! Aá lɛ únóji olɔɔlɔhi ma lɛ ācomɛ́ɛbɛ nɛ̄ aádáádā aá kpó ŋmó ā. 48Ucē kú aá mafú ka aá ce ɔdā nɛ̄ aádáádā aá yá ā. É lɛ ācomɛ́ɛbɛ kpó ŋmó, anɔ́ɔ aá ke lɛ únóji kú uwā kpó ma á. 49Ɛ̄nyā nɛ̄ Ɔwɔicō bī íjééyī kú nū kɛlā lɛyíkwu aá. Ó kahíníī, “N géē tū ācomɛ́ɛbɛ mɛ́mla ācotɛ̄hɔ̄ fu uwá. É géē ŋmó aóhī kú uwā, é kē í kɛpɔ̄ tū ācɛ ohile. 50Ɔwɔicō géē yá ācɛ kú eko nyā italā ohígbū ācomɛ́ɛbɛ nēé kpó ŋmó ŋmífī nōó yá ɛcɛ ā. 51#Ohút 4.8; 2 Úklɔ́ 24.20,21Ŋmá eko nēé ŋmó Ébɛ̄lu gā eko nēé ŋmó Usɛkaríya, ɔtāhɛ̄ kú ɛyí ede mɛ́mla ɛga otīihɔ ā. Ɔkwɔ̄ɔ̄kwɛ̄yi, n da aá keé géē yá ācɛ kú eko nyā italā ohígbū odúúdú ācɛ ā. 52Aá le jí ɛɛ́, aá nēe wɛ aútíca kú íne ā! Aá kwú ɔyígodó nōo géē nwūla odūngwɔ̄wɛ kú inu nɛ̄ ɔdōojé lɛyíkwu ɔdā nɛ̄ Ɔwɔicō cɛ̄ ā yɔ̄ ā. Aá abɔ̄yī aá í bēhé ga ipú nū ŋ́, aá ke cɛ̄ lɛ ācɛ nēe bá yɔ̄ gē cēyītīkwū kéē bēhé ā bēhé ŋ́!”

53Eko nɛ̄ Ujísɔ̄si nyɛ̄ɛ̄ ŋmá abɔ́ɔ ā, aútíca kú íne ā mɛ́mla ācɛ Ufarísīi gbɔɔ́ ō ŋmó ɔ̄ okónu lɔfú lɔfú. É klla da ɔ́ ɔ̄kā lɛyíkwu aɔ́dā alɛwa. 54É bá ī cēyītīkwū yɔ̄ gē yá kú Ujísɔ̄si kóō lɛ odée ka cɛ́ɛ́ kéē lɛ ɛlā kpó ce ɔ́ koó lɛ íne kú Umósīsi bīya ɛɛ́.

Selectat acum:

ULÚKU 11: IFBCL

Evidențiere

Partajează

Copiază