Baɗitari 8
8
Yimər Avava Ku Baɗitə Shiwa
1Amma Hyel ku ɗangtə Nuhu ka shanga mwaɓiyayeri ar mtaku kəga na ar kəi na adzə ni akwa shar ni. Antə Hyel ku hara tə shambar fya ata kəra duniya, antə yimi ni ku kəmtadzi. 2Antə kur səɓəlar yimi na zurang ata di ka gulayeri ar yimi na amtazi ku hartədzi, tsuwa yimərhyel ku thləthlata. 3Antə yimi ni ku ləkəma ka kəmtadzi ka hangkal ka ləghəi. Aghəla vir aru pal ka ntəfkumari antə yimi ni ku kəmtadzi. 4Akwa vir na kumnya murfəkur ar thliya na murfəkur, antə shar ni thləthlata ata kəra garayeri ar Ararat. 5Tsuwa yimi ni ku ləkəma ka kəmtadzi har ka mwanta akwa thliya na kumkur. Akwa vir na kumkantangkur ar thliya na kumkur antə mdə baɗitə wutə kəra garayeri. 6Aghəla vir nfwarkumari antə Nuhu kəlar windauwur shar natə tsa namtə ni, 7ka thlentə zəlaku. Antə zəlaku ni ku ləkəma akwa mwari ka ngka, har tə yimi ni ku shiwa ata di. 8Antə tsa thlentə bukəl laga na adzə ni ka tsa ra wuli wala nuhum yimi ni ku jaktə kəmtadzi ata di, 9amma bukəl ni aɗi wutə vəi tə ka tsa pwa ata wa, kamnyar tə ba kulini yimi tsu ata kəra duniya. Antə tsa ngka adzə ni akwa shar ni. Antə Nuhu haɓəla tsiyari, ka tamtə bukəl ni, ka jaktə vu ni akwa shar ni adzə ni. 10Aghəla tə tsa jaktə ɗar səkari mnyar vir murfa, antə tsa jaktə thlentə bukəl na akwa shar ni. 11Antə bukəl ni ngka adzə Nuhu ka mnya tahaku, tsuwa tsa si ka thlali nfur zaitun na haɗa ɗəɗa akwa mnyari. Atar apani antə Nuhu nggaɓəla abbər yimi ku kəmtadzi ata kəra duniya. 12Aghəla tə tsa jaktə ɗar səkari mnyar vir murfa, antə tsa jaktə thlentə bukəl ni. Amma akwa saka ngəni tsa aɗi jaktə ngka kəra wa.
13Akwa vir na ntangkəma ar thliya na ntangkəma, akwa məva na aru ngkwa ka pal aghəla yaɓəladzər Nuhu antə yimi ni ku shuwumtadzi ata di. Antə Nuhu famta kəra shar ni, ka wuta abbər kəra di akwa ula. 14Akwa thliya na suɗkur ka virari sərkumari ka murfa antə di ulantədzi.
15Antə Hyel pəla aka Nuhu, 16“Ka gə səɓəla akwa shar ni, ga ka mwalankiri, ka maɗa' nga, ka mwankir maɗa' nga. 17Ka gə fwaɓəla shanga su na ka mpika na adzə nga. Fwaɓəla shanga ɗikayeri, ka mwaɓiyayeri, ka shanga su na ana mwa ka yimər kuta ɗa ata di, kamnyar ka da yatədzi ka hara hang akwa duniya.”
18Antə Nuhu ku səɓəla ata kəma duku kəga maɗa'ni, ka mwalankiɗa, ka mwankir maɗa'ni. 19Antə shanga mwaɓiyayeri ar mtaku, ka shanga su na ana mwa ka yimər kuta ɗa, ka shanga ɗikayeri, ka shanga su na ana mwa ata di, ku səɓəla akwa shar ni ata ata, atar jiliyir ɗa.
Hyel Ku Hara Alkawal Aka Nuhu
20Antə Nuhu həntə bagaɗi ar hamta saɗaka aka MTHLAKU, ka fwaɓəla akwa nca shanga mwaɓiyayeri na kəcəkəcari, ka ɗikayeri na kəcəkəcari, ka hamta ɗa saɗaka mbamba kəgari ata bagaɗi ni. 21Sakatə MTHLAKU ku nggatə msərakur shiwurari, antə tsa pəla akwa ɗəffari abbər, “I aɗi ata jaktə shuwumta di kamnyar su tə mdə hara kəra wa, wala tə dzam na akwa ɗəffa mda an ɗimi təng akwa ngkyarkurərni. Tsuwa I aɗi ata jaktə shamta su na ka mpika apatə I hara ni kəra wa.
22“Har ka vədza aka kurər duniya,
sakar thləka ka sakar thlari,
sakar shambar ka sakar vəi ufu
fakəu ka vəya,
pci ka viri
aɗi ata thlamtadzi wa.”
Selectat acum:
Baɗitari 8: KNB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.