PIENCILNA 3
3
Mawna Masapen le Danpiehna
(Rom 5:12-21)
1Tu-in Topa Pasien bawlsa gamsa cinteng sangin gulpi a pilkhel pen ahi hi. Ama in numei kungah, “Pasien in, ‘Um sunga singga khat beh ne lo ding,’ ang ci amah?” a ci hi.#Kln 12:9; 20:2 2Numei in gulpi kungah, “Um sunga singgate ka ne thei uhi; 3ahi vangin Pasien in, ‘Um laikima singga pen neh zong na neh lo ding uh, khoi zong na khoi lo ding uh ahi hi. Tua bang na bawl uleh na si ding uhi,’ ei ci hi,” a ci hi. 4Ahi vangin gulpi in numei kungah, “Na si sih ding uhi; 5bangzieh ahei cile tua singga na neh ciengun na mit uh kihongin a sie le a pha thei-in Pasien#3:5 Ahi sihle “pasien-te” tawh na kibah ding lamtah uh Pasien in thei hi,” a ci hi. 6Tuaci’n numei in tua singkung a mu ciengin neh dingin tuituohsa a, a mit zong a la mama hi. Tuale mi pilsah dingin tua singkung a deihuoi lam a mu ciengin tua nu in a ga loin a ne hi; tua nu in ama tawh a omton a pasal zong themkhat pie a, a pasal in zong a ne hi. 7Tua ciengin a nipi-un a mit uh kihong a, a guohtanga a op lam a kithei uhi; tuale ama gel in theina khui-in ama gel adingin puon a bawl uhi.
8Nitah lam nidai hunin um sungah Topa Pasien peina huging ama gel in a za vua, tuale Topa Pasien’ opna panin mipa le a zinu, umlai singkungte lahah a kiphuol uhi. 9Ahi vangin Topa Pasien in mipa hlanin ama kungah, “Nang hei-a om na hei?” a ci hi. 10Ama in, “Um sungah na huging ka za a, ka guohtanga ka op ziehin zau-in ka kiphuol hi,” a ci hi. 11Ama in, “Guohtanga na op lam koi hing gen ahiei? Ne si’n, kang ci tua singga na ne ta amah?” a ci hi. 12Mipa in, “Kithuopi dinga nei pieh numei in singga ei pie a, ka ne hai ta hi,” a ci hi. 13Tua ciengin Topa Pasien in numei kungah, “Bang dinga hici gamtat na hiei?” a ci hi. Numei in, “Gulpi in ei sol a, ka ne hai ta hi,” a ci hi.#2Cor 11:3; 1Tim 2:14 14Topa Pasien in gulpi kungah,
“Tam bangin gamta zo na hi ziehin,
ganhing zosiete le
gamsa zosiete lahah
samsiet na thuoh ding hi;
na awm tawh na kithol ding a,
na hin sung tungtawnin
leivui na ne ding hi.
15Nang le numei kikal le
na suonlehlahte le
tua nu suonlehlahte kikalah
kilangneina ka omsah ding hi;
ama in na lutang
ang tuoncil ding a,
nang in ama’ ketul
na tuhpieh ding hi,” a ci hi.#Kln 12:17
16Ama in tua numei kungah,
“Naupaaina-ah gimnate
nasie tahin ka khangsah ding a,
a thuohla pipi-in nau na suoh ding hi.
Hinanle na pasal ma na
lunggul bembom ding a,
ama in nang tungah
ang uh ding hi,” a ci hi.
17Tuale mipa#3:17 Ahi sihle “Adam kungah” kungah,
“Nang in na zi thugen mangin,
‘Na ne sih ding hi,’ ci-a kang thupieh
singga ne zo ta na hi ziehin,
nangma vangin
leitang kisamsie hi;
na hin sung tungtawnin
gim le tawlin na semin
an na ne ding hi;
18nang adingin ling le khaute
hing po ding a,
nang in gamlaha ante lohingte
na ne ding hi.#Heb 6:8
19Lei-ah na peikia masangsie
na maitangah opsakai-in
an na ne ding hi,
bangzieh ahei cile nang pen
leivui pana ang kila na hi hi;
nang leivui na hi a,
leivui ma ah na peikia ding hi,” a ci hi.
20Mipa in a zi pen mihing zosie’ nu ahi ziehin a min Eve#3:20 Heb ah Eve pen “a nungta” ci kammal tawh kibang hi. vaw hi. 21Tuale Topa Pasien in mipa#3:21 Ahi sihle “Adam ading” le a zi adingin savun puon bawlpiehin ama gel a silsah hi. 22Tua ciengin Topa Pasien in, “En un, mipa pen eite khat tawh kibang a, a sie le a pha a thei ta hi; tu-in mipa in hinna singga lo hinlen hing ne kha mawh leh ang nungta den ta ding hi,” a ci hi.#Kln 22:14 23Tua ahi ziehin Topa Pasien in mipa pen a pienna leitang hlo dingin Eden um panin a sawl hi. 24Ama in mipa a notmang hi; ama in hinna singkung zuotna lampi a cing dingin Eden um nisuona lamah meikuong namsau tawh Cherub-te a pangsah hi.
Selectat acum:
PIENCILNA 3: ZBOTF01
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Zo Bible © Bible Society of Myanmar, 2018.