Gẹnẹsisi 9
9
1JIWHEYẸWHE sọ dona Noa, po visunnu etọn lẹ po, bo sọ dọ hlan yé, dọ, Mì yín sinsẹ́nnọ, bo sugege, bo sọ gò aigba mẹ. 2Osí mítọn po avosisa mítọn po nasọ tin to gbékanlin he to aigba ji lẹpo ji, podọ to ohè he to aga lẹpo ji; to onu he nọ lìn to aigba ji lẹpo, podọ to owhèvi he to ohù mẹ lẹpo ji, alọ mítọn mẹ wẹ yè yí yé do. 3Onú he nọ lìn he to ogbẹ̀ lẹpo na yín núdùdù na mì; di omá omú wẹ yẹn yí onú lẹpo na mì. 4Ṣigba olàn po ogbè etọn po, yèdọ ohùn etọn, wẹ mì ma na dù. 5Nugbonugbo ohùn mítọn mẹtọnmẹtọn wẹ yẹn na yiahósuna: to alọ gbékanlin dopodopo tọn mẹ wẹ yẹn na yíahòsu nẹ̀ te, podọ to alọ gbẹtọ tọn mẹ, to alọ mẹmẹsunnu mẹdopodopo tọn mẹ wẹ yẹn na yíahọ̀su ogbẹ̀ gbẹtọ tọn te. 6Mẹdepope hẹn ohùn gbẹtọ tọn sàkònyìnai, gbọn gbẹtọ dali wẹ yè na hẹn ohùn etọn sàkònyìnai, na obosiọ Jiwheyẹwhe tọn mẹ wẹ ewọ basi gbẹtọ do. 7Podọ mìwlẹ, mì ni yín sinsẹ́nnọ bo sawẹ̃n to aigba ji gégé, bo so sudeji to e mẹ.
8Jiwheyẹwhe sọ dọ hlan Noa, podọ hlan visunnu etọn lẹ, po e po, dọmọ, 9Yẹn, dayi e go, yẹn hẹn alènu ṣie lódo hẹ we podọ hẹ okún towe lẹpo to godo towe; 10podọ hẹ onú tẹgbè lẹpo he tin hẹ we, ohẹ̀ lẹ, whékanlin lẹ, po gbékanlin he to aigba ji hẹ we lẹ po; núsọha he tọ̀nyì sọn aki lọ mẹ, yèdọ gbékanlin aigba tọn lẹ dopodopo. 11Yẹn na hẹn alẹnu ṣie lódo hẹ we; yè ma nasọ sán nútẹgbè lẹpo sẹ̀ gbọn osìn gigọ tọn dali ba gba, mọwẹ osìn gigọ̀ ma nasọ wá, nado và aigba súdo ba.
12Jiwheyẹwhe sọ dọmọ, Ehe wẹ ohia alènu tọn he yẹn basi to yẹn po hiẹ po ṣẹnṣẹn, po nútẹgbè he tin to de we lẹpo po, na owhẹndo doitẹgbẹ̃: 13yẹn yí aidowhẹ̀do ṣie do aslọ mẹ, é nasọ yín ohia alènu de tọn to yẹn po aihọn po ṣẹnṣẹn. 14E nasọ wá jọ whenuena yẹn hẹn aslọ wá aigba ji, bọ yè nasọ mọ aidowhẹ̀do lọ to aslọ mẹ, 15bọ yẹn na flin alènu ṣie he tin to yẹn po hiẹ po ṣẹnṣẹn, podọ núdidá gbigbọnọ dopodopo nútẹgbè lẹpo tọn; osìn ma to nasọ lẹzun gigòfia nado và nútẹgbè lẹpo súdo ba. 16Aidowhẹ̀do lọ na tin to aslọ mẹ; yẹn na nọ pòn ẹn, na yẹn nido nọ flin alẹ̀nu madopòdo lọ to Jiwheyẹwhe po núdidá gbigbọnọ dopodopo nútẹgbè lẹpo tọn po ṣẹnṣẹn he tin to aigba ji. 17Jiwheyẹwhe sọ dọ hlan Noa, domọ, Ehe wẹ ohia alènu lọ tọn, he yen ko hẹn lódo to yẹn po nútẹgbè he tin to aigba ji lẹpo po tọn ṣẹnṣẹn.
18Visunnu Noa tọn lẹ, he tọ́njẹgbonu sọn aki mẹ, wẹ Ṣẹm, Ham, po Jafẹti po: Ham wẹ otò Kenani tọn. 19Ehelẹ wẹ visunnu atọ̀n Noa tọn lẹ; yé de wẹ aigba lẹpo vùn sọn.
20Noa glepọ̀tọ lọ sè bo sọ dó vẹ̃ngle de: 21ewọ sọ nù sọn ovẹ̃n lọ mẹ, bo sọ yín númúmẹnọ bo so klọnnúsọn ede go to gohò etọn mẹ. 22Ham otò Kenani tọn sọ mọ omé otò etọn tọn, bo dọ na nọvisunnu etọn awe lẹto gbonu. 23Ṣẹm po Jafẹti po sọ yí avọ̀kọdo bo sọ li abò yé omẹ awe lẹtọn ji, bo zọn agọ̀agọ̀ bo sinyọn do omẹ̀ otọ̀ yetọn tọn; nukunmẹ yetọn to ola, yé ma mọ omè otò yetọn tọn gba.
24Noa sọ fọ́n sọn ovẹ̃n etọn mẹ, bo yọ̀n onú he visunnu etọn pẹvi lọ ko wà hlan ẹn. 25E sọ dọmọ,
Mẹhodẹ̀do Kenani ni yín,
Gbọ e ni yín mẹmẹsi mẹmẹsi lẹ tọn de hlan mẹmẹsunnu etọn lẹ.
26E sọ dọmọ,
Donanọ OKLUNỌ yín, Jiwheyẹwhe Ṣẹm tọn;
Bo sọ gbọ Kenani ni yín mẹmẹsi etọn.
27Jiwheyẹwhe nì hẹn Jafẹti klo,
Bo gbọ ewọ ni nọnọ̀ ogohọ̀ Sẹm tọn lẹ mẹ;
Bo sọ gbọ Kenani ni yín mẹmẹsi etọn.
28Noa sọ nò, to osìn gigò godo owhè fọdekantọ̀ngbàn: 29azán Noa tọn lẹpo sọ yín owhè fènẹkantòngbàn: é sọ kú.
Selectat acum:
Gẹnẹsisi 9: BWL23
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Holy Bible in Gun-Alada © Bible Society of Benin and Bible Society of Nigeria, 1923.