Matai 8

Jesu ikʉmmbʉmbʉlʉsya ʉnkoma

(Maalɨka 1:40-45; Lʉʉka 5:12-16)

1Jesu bo asulwike ʉkʉfuma pa kyamba kɨla, ɨfilʉndɨlo ɨfinywamu ɨfya bandʉ filɨnkʉnkonga. 2Po alɨnkwisa ʉmundʉ jʉmo ʉnkoma, alɨnkʉfugama nkyeni mwa Jesu, alɨnkʉtɨ, “Gwe Ntwa, lɨnga gwiganile ʉkʉmbalamaasya, ʉbagiile ʉkʉʉnyeelʉsya.” 3Jesu alɨnkʉgolosya ɨkɨboko kyake, alɨnkʉmpalamaasya,#8:3 Alɨnkʉmpalamaasya ABajuuta kwalɨ mwiko ʉkʉmpalamaasya ʉnkoma. Lɨnga ʉmundʉ ampalamaasiisye kwalɨ mwiko ʉkʉbʉʉka kʉkwipuuta. alɨnkʉtɨ, “Niiganile, elʉkaga!” Nakalɨnga ʉmundʉ jʉla alɨnkʉbʉmbʉlʉka. 4Jesu alɨnkʉmmbʉʉla ʉmundʉ jʉla alɨnkʉtɨ, “Ʉlɨngammbʉʉlaga ʉmundʉ najʉmo ɨnongwa ɨsi! Looli ʉbʉʉke ʉkiinangɨsye kʉ mpuuti. Kangɨ ʉtwale iikemo kʉ tempeli, ʉkʉnangɨsya ʉkʉtɨ ʉbʉmbʉlwike, bo muno sikʉlagɨla ɨndagɨlo sya Moose.”#8:4 Bala kalata gwa Abanyaleebi 14:1-32.

Ʉlwitɨko lwa nkʉlʉmba gwa basikali baa Balooma

(Lʉʉka 7:1-10; Johani 4:43-54)

5Jesu bo ingiile nkaaja akaa mu Kapelinaʉmu, ʉndongosi jʉmo ʉgwa basikali baa Balooma alɨnkwisa kʉkʉsʉʉma ʉbʉtʉʉli kwa Jesu, 6alɨnkʉtɨ, “Gwe Ntwa, ʉmbombi gwangʉ alalile, ikʉtaamigwa fiijo.” 7Jesu alɨnkʉmmwamula alɨnkʉtɨ, “Nikwisa kʉkʉmmbʉmbʉlʉsya.” 8Looli ʉndongosi jʉla alɨnkʉmmbʉʉla alɨnkʉtɨ, “Hɨmma, gwe Ntwa! Ʉne ngabagɨsya ʉkʉtɨ ʉgwe gwingɨle nnyumba jangʉ. Looli ʉjobe lyene iisyʉ, ʉmbombi gwangʉ ikʉbʉmbʉlʉka. 9Paapo na niine ndɨ gwa paasi, ngʉlagɨligwa, kangɨ ndɨ nabo abasikali aba balɨ paasi pamyangʉ. Lɨnga nʉmmbʉʉlile jʉmo ndile, ‘Bʉʉka!’ ikʉbʉʉka. Kʉ jʉngɨ lɨnga ndile, ‘Isaga!’ ikwisa. Na kʉ ntʉmwa gwangʉ lɨnga ndile, ‘Bomba ɨsi!’ ikʉbomba.”

10Jesu bo apɨliike amasyʉ ago, aaswigile fiijo, alɨnkʉbabʉʉla abandʉ aba bankongaga, alɨnkʉtɨ, “Nalooli nikʉbabʉʉla nikʉtɨ, mBanyaisilaɨli boosa, ngammbonamo sikʉ ʉmundʉ ʉjʉ alɨ nʉ lwitɨko ʉlʉnywamu bo ʉlʉ! 11Nikʉbabʉʉla nikʉtɨ, abandʉ bingi aabikwisa ʉkʉfuma kʉfibafu fyosa ɨfya kiisʉ. Bikwisa kʉlya pamopeene na biisʉkʉlʉ bɨɨtʉ baa Abulahamu, Isaka na Jaakobo mBʉnyafyale bwa kʉmwanya. 12Looli aBanyaisilaɨli bingi aba bapaapiigwe ʉkʉja baa Bʉnyafyale ʉbo, abo bikwisa kʉtaagigwa panja mu ngiisi, ʉko bikwisa kʉlɨlaga nʉ kʉsyegetula amiino kʉnongwa jaa ndaamyo.”

13Po Jesu alɨnkʉmmbʉʉla ʉndongosi jʉla alɨnkʉtɨ, “Bʉʉkaga! Sikʉjaga bo muno lʉjɨɨliile ʉlwitɨko lwako.” Nakalɨnga, ʉmbombi gwake jʉla alɨnkʉbʉmbʉlʉka kʉkabalɨlo kalakala.

Jesu ikʉbabʉmbʉlʉsya ababine bingi

(Maalɨka 1:29-34; Lʉʉka 4:38-41)

14Po Jesu alɨnkwingɨla nnyumba jaa Peeteli, alɨnkʉmmwaga ʉnna gwa nkasi gwa Peeteli, aalambaleele pa kɨtala, aalɨ nɨ sekema. 15Po Jesu alɨnkʉmpalamaasya ɨkɨboko, nakalɨnga ɨsekema jɨla jɨlɨnkʉsookamo. Ʉnkiikʉlʉ jʉla alɨnkwɨma, alɨnkwanda ʉkʉmmbombela Jesu.

16Namajolo, balɨnkʉntwalɨla Jesu abandʉ bingi aba baakoliigwe nɨ mbepo ɨnyali, Jesu alɨnkʉsikaga kwi isyʉ lyake. Kangɨ alɨnkʉbabʉmbʉlʉsya boosa aba baalɨ babine. 17Syabombiigwe ɨsi ʉkʉtɨ iisyʉ lɨla lɨboneke, ɨlɨ lyajobiigwe nʉ nkunguluka Jeesaja ʉkʉtɨ, “Ʉmwene eegile ʉboonywa bwɨtʉ, abʉpɨmbile ʉbʉbine bwɨtʉ.”#8:17 Bala kalata gwa Jeesaja 53:4.

Ɨsi sikʉlondigwa kʉlɨ aba bikʉnkonga Jesu

(Lʉʉka 9:57-62)

18Jesu bo aagile ɨkɨlʉndɨlo ɨkya bandʉ abingi bansyʉngʉʉtiile, alɨnkʉbalagɨla abafundigwa baake ʉkʉtɨ, baloboke sʉmbɨ, babʉʉke kwi isɨɨlya. 19Ʉmmanyisi jʉmo ʉgwa ndagɨlo sya Moose alɨnkʉsegelela kwa Jesu, alɨnkʉtɨ, “Gwe Mmanyisi, ʉne nikʉkʉkongaga koosa kʉno kʉbʉʉka ʉkʉtɨ nje mfundigwa gwako!” 20Jesu alɨnkʉmmwamula alɨnkʉtɨ, “Ʉtʉmbwe tʉlɨ nɨ mbako nɨ njʉni silɨ nɨ fifufumbwa, looli ʉne Nnyamundʉ#8:20 Nnyamundʉ Bala kʉ Ɨsyakʉlɨngaania. ngaja nʉ bʉjo ʉbwa kʉlambalala!”

21Po ʉmfundigwa ʉjʉngɨ alɨnkʉmmbʉʉla Jesu, alɨnkʉtɨ, “Gwe Ntwa, leka taasi mbʉʉke ngansyɨle taata.” 22Jesu alɨnkʉmmwamula alɨnkʉtɨ, “Ʉgwe ʉngongege! Baleke abafwe babasyɨlege abafwe baabo.” 

Jesu ikʉgʉkemela ʉmbelo na majɨga

(Maalɨka 4:35-41; Lʉʉka 8:22-25)

23Po Jesu alɨnkwipakɨla mwi ibooti, abafundigwa baake balɨnkʉnkonga. 24Po bo balɨ mwa sʉmbɨ, nakalɨnga gʉlɨnkwisa ʉmbelo ʉgwa mpetapeta, amajɨga galɨnkwanda ʉkʉliibɨsya iibooti. Looli Jesu aagonile ʉtʉlo. 25Po abafundigwa baake balɨnkʉbʉʉka kwa Jesu, balɨnkʉnndembʉsya, balɨnkʉjwega balɨnkʉtɨ, “Gwe Ntwa! Tʉpoke, tukʉfwa!”

26Jesu alɨnkʉbabʉʉla alɨnkʉtɨ, “Fiki mukʉtiila ʉmwe mwe baa lwitɨko ʉlʉnandɨ?” Po alɨnkwɨma, alɨnkʉgʉkemela ʉmbelo na sʉmbɨ jʉla, kʉlɨnkʉja mye jonjolo. 27Abafundigwa baake balɨnkʉnyomoka fiijo, balɨnkʉtɨ, “Mundʉ nki ʉjʉ, ʉmbelo na sʉmbɨ fyope fikʉntiila?”

Jesu ikʉbabʉmbʉlʉsya aba baalɨ nɨ mbepo ɨnyali

(Maalɨka 5:1-20; Lʉʉka 8:26-39)

28Jesu bo alobwike sʉmbɨ, aafikile nkiisʉ kya Bagatala. Po balɨnkwaganila nagwe abandʉ babɨlɨ aba baalɨ nɨ mbepo ɨnyali, aba baafumile kʉ mapʉmba. Abandʉ bala baalɨ bakalɨ fiijo, akaaliko ʉmundʉ ʉjʉ aagelaga ʉkwenda kʉno baliko.

29Po ɨmbepo ɨnyali silɨnkʉjwega fiijo silɨnkʉtɨ, “Gwe Mwana gwa Kyala, tʉlɨ bʉki ʉgwe na nuuswe? Bʉle, gwisile kʉkʉtʉfunda bo akabalɨlo akaa kʉpyutigwa kakaalɨ ʉkʉfika?” 30Pabʉtalipo, gwatiimigwaga ʉntiimo ʉnnywamu ʉgwa ngʉlʉbe. 31Po ɨmbepo ɨnyali sila silɨnkʉmpyelesya Jesu silɨnkʉtɨ, “Lɨnga kʉtʉkaga, ʉtʉtʉme mu ntiimo gʉla ʉgwa ngʉlʉbe.”

32Jesu alɨnkʉsikemela alɨnkʉtɨ, “Namubʉʉkege!” Po ɨmbepo ɨnyali silɨnkʉsookamo mmbandʉ bala, silɨnkwakwingɨla mu ngʉlʉbe. Silɨnkʉsibopesya ɨngʉlʉbe syosa ʉkʉsuluka ndʉpanga, mpaka mwa sʉmbɨ, silɨnkʉmilwa.

33Abatiimi baa ngʉlʉbe balɨnkʉbopa ʉlʉbɨlo, balɨnkʉbʉʉka nkaaja. Balɨnkwakʉbalɨngaania abandʉ syosa ɨsi sibombiigwe kʉ bandʉ bala aba baalɨ nɨ mbepo ɨnyali. 34Abandʉ boosa abaa nkaaja, balɨnkʉbʉʉka kʉkwaganila na Jesu. Po bo bammbwene, balɨnkʉmpyelesya ʉkʉtɨ asookemo nkiisʉ kyabo.

Selectat acum:

Matai 8: NYAK

Evidențiere

Partajează

Copiază