Luk 11

Yiesu wɑnn niib Yenmiɑlu

(Mɑɑtieo 6.9-13; 7.7-11)

1Dɑɑsiɑl k Yiesu din be siɑl po k mei Yennu. Wɑɑ miɑl gbenn yuo nbɑ, k u *puolpoweitieb yenɔ tɑn yet’ɔ ɑ: «Yonmdɑɑnɔ, wɑnt’t tɑɑ sii mei Yennu biɑnŋ nbɑ nɑn Sɑn nbɑ mun din wɑnn u puolpoweitieb biɑnŋ nbɑ nɑ.»

2K Yiesu yet’b ɑ: «Yɑɑ tuu sii mei Yennu biɑnŋ nbɑ e nɑ:

Bɑɑ, ɑ sɑnn n lɑ dontl.

Ŋɑɑnt k ɑ nɑɑn n bɑɑl.

3Tul’t mɑnn dɑɑl kul

4Nyikn cɑb t biit

nɑn tɑɑ mun nyikt k cɑbt bin nbɑ biil’t nɑ.

A dɑɑ te k t kuɑ jɑnmi ni.»

5Yiesu biɑ yet’b ɑ: «T sɑɑ yet ɑ i yenɔ mɔk u yuɑk k sɑɑn u ŋɑɑk ni nyiɑɔk tɑnsuuni k yet’ɔ ɑ: ‹N yuɑk, kpentl’n pɑɑni ŋɑntɑ, 6k mɑɑn n yuɑs nbɑ ni yenɔ nyii sɔnu k bɑɑl n ŋɑɑk ni, ŋɑɑn k n k mɔk siɑl k sɑɑ tul’ɔ.› 7K wun nbɑ be ŋɑɑk ni jiin ɑ: ‹Dɑɑ muks’n. N ponŋ kpɑl gɑnn ɑ, k min nɑn n wɑɑs biɑ duɑl ɑ. N kɑn fit fiil k tul’ɑ pɑɑnu.› 8Gotl, n yien’i e, u kɑn sɑk fiil k tul’ɔ jiet mɑnŋ, wɑɑ tie u yuɑk nɑ pɑɑk, ŋɑɑn wɑɑ k tiin fei k biɑ mei’ɔ nɑ, sie k u tɑn tɑt fiil k tul’ɔ biɑnŋ nbɑ k u luon.

9«L pɑɑk, n biɑ yien’i, miɑt mɑn, k b sɑɑ tul’i. Lomin mɑn, k i sɑɑ lɑ wɑɑ. Kpɑɑn gɑnn mɑn, k b sɑɑ luot k tul’i, 10k mɑɑn wun nbɑ kul mei, gɑɑn e, k wun nbɑ mun luon, u lɑɑt e, k wun nbɑ kpɑɑn gɑnn, b luotl tien’ɔ. 11Yinm bɑɑnbɑ, i ŋmee k u bijɑ sɑɑ miɑl’ɔ jɑnŋ k wun jii wɑɑɔk k tul’ɔ? 12Ami ŋmee k u sɑɑ miɑl’ɔ jenn k wun jii nɑnŋ k tul’ɔ? 13K l i tie k yinm nbɑ tie biitdɑnm nɑ mi biɑnŋ nbɑ k i sɑɑ tul i wɑɑs bonŋɑnɑ, k i Bɑɑ Yennu nbɑ be sɑnpɑɑpo nɑ ŋɑnin kɑn jii Foŋɑnm k tul bin nbɑ mei’ɔ l po nɑ ɑɑ?»

Yiesu nɑn Beelsebuul lɑbɑɑl

(Mɑɑtieo 12.22-30; Mɑɑlk 3.20-27)

14Yiesu din nyint nɑlnbiiuk nbɑ din be jɑsuɑ ni k tien’ɔ muuk nɑ. Yuo nbɑ k nɑlnbiiuk nɑ nyii u ni k gbenn, k juɑ nɑ muut k piin k piɑk. K l bɑkt nibul nɑ bonciɑnn. 15Ŋɑɑn k yenm din yet ɑ: «Nɑlnbiit bɑt Beelsebuul e tien’ɔ yiikuo k u nyint nɑlnbiit niib ni.» 16Ŋɑɑn k yenm mun din luon k bin bikn Yiesu, k yɑɑ ɑ wun wɑnn’b *nyinn nbɑ nyii *Yendɔunŋ ni. 17K Yiesu bɑnn bɑɑ duki lin nbɑ, k yet’b ɑ: «Nɑɑn niib i ŋmɑt k kɔn tuokt b lieb, b nɑɑn mɑnŋ sɑɑ biil ɑ, k ŋɑɑk niib i mun i ŋmɑt kɔn nɑn lieb, l kɑn set. 18Tɔn, l i tie k *Sɑɑtɑn ŋmɑt kɔn nɑn u lieb, nlee k u nɑɑn sɑɑ set i? N yet nnɑ k mɑɑn i yɑɑ ɑ Beelsebuul e tien’n yiikuo ɑ mii nyint nɑlnbiit niib ni. 19L i tie k n nyint nɑlnbiit niib ni nɑn Beelsebuul yiikuo nɑ, ŋmee yiikuo ni e k i mɔnŋ mɔnŋ wɑɑs nyint nɑlnbiit niib ni i? Ŋɑnn e k b tuonɑ wɑnt nɑn i k mɔk mɔni. 20Ŋɑɑn l i tie k l tie Yennu yiikuo ni k n nyint nɑlnbiit niib ni, l wɑnt nɑn Yennu nɑɑn ponŋ bɑɑl i buol ni wɑɑ.

Yiesu pɑnŋ nbɑ gɑl Sɑɑtɑn yɑl lɑbɑɑl

21«Jɑwɑktl nbɑ tien siil nɑn u jɑtiɑt k guu u ŋɑɑk, u bonsiɑl kul kɑn sii, 22ŋɑɑn u pɑɑlɔ mun i tɑnŋ i pikn’ɔ k pɑɑk’ɔ, u sɑɑ fɑt u jɑtiɑt nbɑ k u dɑɑn l pɑɑk nɑ e, k biɑ jii u mɔktuk k tol niib.

23«Wun nbɑ k sie n puol, u kɔn nɑn’n e, k wun nbɑ mun k tiki niib k tien’n, u yɑt’b e.»

Nɑlnbiiuk jenu lɑbɑɑl

(Mɑɑtieo 12.43-45)

24«L i tie k nɑlnbiiuk tɑn nyii nilɔ ni, u tuu yiek e k lin mɔkuounŋ ni, k luon fuonbuol, ŋɑɑn k k lɑɑt. L pɑɑk, u tuu tɑn yet u mɔnŋ e ɑ: ‹N sɑɑ ŋmɑt sɑɑn ŋɑɑk nbɑ ni k n dɑɑn nyii nɑ ni e.› 25U ji kii ŋmɑt tɑn bɑɑl, wun lɑ k b piɑl k ŋɑnm ɑ, 26u ji sɑɑ ŋmɑt nyi e k sɑɑ yiin nɑlnbilieb bɑnlole, bin nbɑ bi k cie u pɑɑk, k bɑɑl nɑn’m, k bin kuɑ k lɑkn be, k nilɔ mɑnŋ binbenŋ ji sii bi bonciɑnn k gɑl wɑɑ dɑɑn tuu be sinsinn biɑnŋ nbɑ nɑ wɑɑ.»

Mɔmɔnm pɑlpienn lɑbɑɑl

27Yiesu nbɑ din dɑɑ yien nnɑ mɑnŋ, k puosuɑ nnɑ be nibul nɑ ni, k yet sɑnpɑɑpo wɑɑ ɑ: «Puo nbɑ mɑl’ɑ k muɑn’ɑ nɑ, pɑlpienn tie u yɑl e.» 28K Yiesu jiin yet’ɔ ɑ: «Bin nbɑ gbiɑ Yennu mɑɑn k sɑɑk’l, ŋɑnm e k pɑlpienn tie b yɑl.»

Bin nbɑ luon bin lɑ nyinn nɑ lɑbɑɑl

(Mɑɑtieo 12.38-42)

29Nibul nbɑ din gbin Yiesu buol ni yuo nbɑ nɑ, k u yet’b ɑ: «Mɔtɑɑnɑ nigbounŋ nɑ tie biitdɑnm e, k mɑɑn b luon bin lɑ nyinn, ŋɑɑn b kɑn lɑ nyinsiɑl, l i kii tie Suonɑ nyinn nɑ i kɑɑ. 30Biɑnŋ nbɑ k Suonɑ din tien nyinn k tul Niiniif tieb nɑ, l biɑnŋ e mun k *Nisɑɑlk Bijɑ mun sɑɑ tien nyinn k tul mɔtɑɑnɑ nigbounŋ nɑ. 31Buut dɑɑl, puosuɑ nbɑ din tie kpɑnbɑl nbɑ din nyii gɑnŋ po nɑ tɑn sɑɑ set wɑnn nɑn mɔtɑɑnɑ tingbounŋ nɑ niib mɔk biit, k mɑɑn u din nyii digbɑnbɑnfɔkl e wɑɑ k tɑn bɑɑl ɑ wun gbiint kpɑnbɑl Sɑɑlomɔn yɑnfuon nɑ pinpɑɔk, k gotl mɑn, wun nbɑ cie Sɑɑlomɔn nɑ be nnɑ. 32Buut dɑɑl, Niiniiftieb#Gotl Mɑɑtieo 12:41. tɑn sɑɑ set wɑnn nɑn mɔtɑɑnɑ nigbounŋ nɑ mɔk biit, k mɑɑn Suonɑ muɑnti pɑɑk k b din mɔ kuɑŋɑɑn k lebt binbenŋ, k gotl mɑn, wun nbɑ cie Suonɑ be nnɑ.»

Gbɑnɑnt yentu lɑbɑɑl

(Mɑɑtieo 5.15; 6.22-23)

33«B k jokt fitl ŋɑɑn jikt k tie wuol ni, ɑmi k liknt bokt l pɑɑk. Sie k b jii’l k tuɑnn bonsiɑl nbɑ fɔk nɑ pɑɑk k lin yent, k niib i jik i kuɑ yuo nbɑ, bii lɑɑt yentu nɑ. 34A ninbinɑ e tie ɑ gbɑnɑnt fitl. A ninbinɑ i ŋɑn, ɑ gbɑnɑnt kul sii mɔk yentu, ŋɑɑn ɑ ninbinɑ i kii ŋɑn, ɑ gbɑnɑnt kul sii be bunbɔnn ni e. 35Ii mi mɑn k yentu nbɑ be i ni nɑ dɑɑ kpɑntl tie bunbɔnn. 36Tɔn, ɑ gbɑnɑnt kul i yien bonŋɑnn k siɑl po k be bunbɔnn ni, l sii yien e k nyili pilpilpil, k nɑɑn nɑn fitl nbɑ yien k tien’ɑ yienŋɑnu nɑ.»

Yiesu tɑɑl Fɑɑliisiɑnnbɑ nɑn *senniwɑntieb

(Mɑɑtieo 23.1-36; Mɑɑlk 12.38-40)

37Yuo nbɑ k Yiesu pɑk gbenn nɑ, k Fɑɑliisiɑnsuɑ din yet’ɔ ɑ wun wei’ɔ k bin sɑɑ di jiet. K u din wei sɑɑn k sɑɑ kuɑ k kɑl ɑ wun di. 38K l din tien Fɑɑliisiɑn mɑnŋ bɑktnɔunŋ wɑɑ lɑ k Yiesu k fobt nɑn b kɑɑl nbɑ tie bɑnnu nbɑ nɑ, ŋɑɑn yɑɑ wun di nɑ. 39K Yonmdɑɑnɔ yet’ɔ ɑ: «Yinm Fɑɑliisiɑnnbɑ nɑ, i tuu soki ŋmɑni nɑn seni puolpo kuukuɑ e, ŋɑɑn k i pɑlɑ ni gbie nɑn fɑtu nɑn bonbiil. 40Yinm jɑtt nɑ. Wun nbɑ din nɑn puolpo nɑ, ŋuɑ kɑɑ din nɑn nuɑk ni mun ii? 41Tuln tɑlɑs-dɑnm lin nbɑ be i ŋmɑni ni nɑn i seni ni, k i nɑn-yel po nɑn nuɑk ni kul sii yien.

42«Yinm Fɑɑliisiɑnnbɑ, l sii bi i pɑɑk. I jikt ment nɑn luu#L tie kpint e. L din k kpɑɑ tɑlɑs nɑn bii tie l bɔktu piik, ŋɑɑn Fɑɑliisiɑnnbɑ din gɑɑnt e, ɑ bin wɑnn nɑn b cɔln Yennu k tien l mun ɑ bɔktu piik ni yenn nɑn kpinliet nbɑ k b buul gungounŋ ni l buolu kul ni bɔktu piik ni bɔkyenn kuɑ, k tien Yennu, ŋɑɑn bɑkn lin nbɑ tuok, k biɑ k luon Yennu. L bo sii ŋɑn k yii tuun ŋɑnn, k dɑɑ nyikt lin nbɑ tenn.

43«Yinm Fɑɑliisiɑnnbɑ, l sii bi i pɑɑk, k mɑɑn i luon nijɑɑnɑ kinkɑɑni boɑ *Suifnbɑ jɑɑnti diet ni, k biɑ luon niib i fuont’i nɑn nibɑɑkl fuonti dɑi ni. 44L sii bi i pɑɑk. I tie nɑn kɑɑt nbɑ k niib tuu ŋmɑɑ k do l pɑɑk ŋɑɑn kɑn bɑnn’l nɑ e.»

45Ŋɑnn e k *senniwɑntɔyenɔ yet’ɔ ɑ: «Wɑntuɑ, fɑɑ yet nnɑ nɑ, ŋɑnn ɑ sukl’t e nɑ mun.» 46K Yiesu jiin yet’ɔ ɑ: «Yinm *senniwɑntieb, l sii bi i pɑɑk mun, k mɑɑn i jint niib jik-kpiɑtɑ nbɑ pɑɑl nɑn bin jii, ŋɑɑn i mɔnŋ k sɑɑk k yii siin jikɑ mɑnŋ kii sonmt’b. 47L sii bi i pɑɑk, k mɑɑn i mɑɑ sɔkniinbɑ kɑɑt k sent bonŋɑnn. Ŋɑnm mɑnŋ e tie sɔkniinbɑ nbɑ k i yejɑnm din kpii’b mɑnŋ. 48Yɑɑ tuun lin nbɑ mɑnŋ, ŋɑnn e wɑnt niib nɑn i set sɑk i yejɑnm nbɑ din tun biɑnŋ nbɑ nɑ wɑɑ. Ŋɑnm e din kpii sɔkniinbɑ mɑnŋ, k i mun sɑɑn sɑɑ mɑɑ b kɑɑt mɑnŋ. 49L pɑɑk, k Yɑndɑɑnɔ Yennu din yet ɑ: ‹N sɑɑ tun sɔkniinbɑ nɑn tuomiinbɑ b buol ni, k b sɑɑ kpi siɑb ŋɑɑn muks lieb,› 50ɑ mɔtɑɑnɑ nigbounŋ n tɑn lɑ tubdɑtu sɔkniinbɑ kul kpinu nɑ pɑɑk. Kpinu mɑnŋ din piin *dulnyɑ nɑmu yuo e wɑɑ, 51Kɑɑen nbɑ din kpii Abel#U din tie Kɑɑen ninjɑ e. yuo nbɑ nɑ, k l jii k tɑn bɑɑl Sɑɑkɑɑli kpinu, wun nbɑ k b din kpii’u Yennu *mɑnnu binbintl nɑn Yennu jɑɑnti ŋɑsɑɑkɑk sinsuuk ni nɑ. N yien’i nɑn bɑlmɔni e, mɔtɑɑnɑ nigbounŋ nɑ tɑn sɑɑ lɑ tubdɑtu lin nbɑ nɑ kul pɑɑk.

52«Yinm *senniwɑntieb, l sii bi i pɑɑk, k mɑɑn i mɔk pienu nbɑ sɑɑ fit luot minu gɑnn. I k kuɑ lenŋ k i biɑ k cɑb bin nbɑ luon bin kuɑ.»

53Yiesu nbɑ siet lenŋ mɑnŋ, k senniwɑntieb nɑn Fɑɑliisiɑnnbɑ wutuol ji din duo bonciɑnn, k b ji din piin boi’ɔ buboit k jikt sɑɑ lɑbɑɑl bonciɑnn po, 54k b lek din kol ɑ bin lɑ u mɔbonkpetl k fit tɑɑl’ɔ.

Selectat acum:

Luk 11: MOBANT07

Evidențiere

Partajează

Copiază