Luc 23

Bi cáá Yeesu Piilati cee

(Kpèè Maat 27.1-2,11-14, Maar 15.1-5, Yoow 18.28-38)

1Ní bikpilibee kɔkɔ yíkì ki yōoǹ Yeesu ki cáa cūnnì gɔmina Piilati cee, 2ní ki bíi mɔ́ntí ki tūntí u-pu yii: «Ti ká kijapaai nee bíi gáatí ti-nib yiliŋ yii bí taa pà lampoo kí tīī gɔminakpaan Seesaar, ní ki bí yii úǹ u-ba sá Meesiya, ubɔti.» 3Ní Piilati bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Sii di lī#23.3 Sii di lī: kpèè Maat 27.11..» 4Niinee ní Piilati bí bisaraaŋakpilib nì binib kɔkɔ yii: «Maa ká kijapaai nee pu tikpitil báà tiba.» 5Ní bi yíì, ki mɔ̀tīi sòoǹ mpɔn yii: «U yìiǹ ní ki dàkà ki gáatí binib ń taa nín̄ tɔ́ gɔmina. U kíliń Galiilee ní ki dɔ́miń ki jítì Juudee tiŋki kɔkɔ poon ní ki dāa bāań timbi cee doo.»

Bi cáá Yeesu Eeroodi cee

6Ŋyunti ŋun Piilati gbìl̄ mimmee, ní u bālifì yii: «Kijapaai nee sá ugaliileeja níii?» 7Bi nín kíí-u yii Yeesu lafun nyánní Galiilee kitiŋ kin ni Eeroodi sá ubɔtee, ní u dū Yeesu ki tīī Eeroodi un nìn dɔ́miń Jeerusaleem ŋyunti gbantee. 8Eeroodi nín ká Yeesuee, an mɔ́ɔkiǹ-u tikpil, di sá yii u nìn gbìl̄ bi sòoǹ Yeesu pu an yúntì, u bàà pée nyàab̀ kí ká-u ú ŋá maamaaci ubɔ ú ká. 9Ní u bālifì-u anyɔɔbun tikpil, ama Yeesu kaa kíí-u báà dinyɔɔbumbaantiil. 10Bisaraaŋakpilib nì bimaradakaliibi nìn bí niin ki sòoǹ mpɔn ki mɔ́ntí ki tūntí u-pu. 11Ní Eeroodi nì u-soojab kíĺ ki bíi bèel̄-u ki kpèé-u fám, ní ki dū dibɔkutinyaandi diba ki pēeǹ-u mbɔtiyaamin ní ki fātìi gíiǹ-u ki tīī Piilati. 12Ŋwiin gbantee ní Piilati nì Eeroodi kansikin mɔ́ɔkì ní bi kpántì bibɔɔtiibi, dooooyee baa nìn kpí.

Bi sòon̄ kí kpɔ̀ Yeesu dulim

(Kpèè Maat 27.15-26, Maar 15.6-15, Yoow 18.39–19.16)

13Niinee ní Piilati kóoǹ bisaraaŋakpilib nì biyidambi nì samaa kɔkɔ ki kpáfì, 14ní ki bí-bi yii: «Ni cáań-mi unil nee yii u bíi gáatí binib, ní m bālifì-u ni-kɔkɔ nimbiin tibɔkpitil tin ni bí yii u ŋée, ama man kaa ká báà tiba u-pu. 15Eeroodi mun kaa ká u-bɔkpil, an pu ní u gíiǹní-u ki tīiń-ti. Kijapaai nee kaa ŋá tiba tin máaǹ ŋkúmee. 16Míǹ puee m làá yàntī bí gbá-u anaalab ní kí gíiǹ-u kí líí.» [ 17Dilákatil jiŋaaliu kamaayee an nìn sá Piilati ń líí-bi usarkadaan ubɔ#23.17 Uyakatikaa nee kaa bí tigbɔŋkpikil tikpil poon. Kpèè Maat 27.15, Maar 15.6..] 18Ní bi-kɔkɔ kíĺ ki bíi tátí dicilpu yii: «Bí kpɔ̀ kijapaai nee kí gíiǹ Baaraabaasi kí líí.» 19- Bi nìn cúú Baaraabaasi gbanti ki tɔ́ sarkan kun puee u nìn yíkì kí já nì gɔmina ní ki kūū unil mun. - 20Piilati nìn nyàab̀ kí líí Yeesuee, an pu ní u nìn gíti būsì ki sòon̄ nì samaa. 21Ama ní bi bíi kūuntí yii: «Bí kpáá-u ndɔpuntikaa pu, bí pée kpáá-u ndɔpuntikaa pu.» 22Ní Piilati fātìi tí lī ntataatiim yii: «Tibɔkpitil tilati ní u baasii ŋá ní? Man kaa ká diyìntil diba u-pu din pu ní u máaǹ ŋkúmee. Míǹ puee m làá yàntī bí gbá-u anaalab kí gíiǹ-u kí líí.» 23-24Ama ní bi yíì, ki mɔ̀tīi pée tátí mpɔn yii bí kpáá-u ndɔpuntikaa pu. Bi-tantatii nìn yāntì Piilati gīī ní ki fōō bi-nyɔkɔ. 25Ní u gíiǹ uninja, un nìn yíkì ki jáà nì gɔmina ki kūū unil muee ki líì, ní ki dū Yeesu ki tīī-bi bí ŋá-u bi nín là puee.

Bi kpáá Yeesu ndɔpuntikaa pu

(Kpèè Maat 27.32-44, Maar 15.21-32, Yoow 19.17-27)

26Bi yōoǹ Yeesu ki cáǹ kí kpááyee, ní ki dūu tú Siimɔn un sá Siireen tiŋkinee, u nìn nyánní kusaau. Ní bi cúú-u ní ki dū ndɔpuntikaa ki būkuǹ-u ú nīn bùkū ki pá Yeesu boon. 27Dinikitikpaandi nìn dī Yeesu, ní binimpoobi mun nìn sūǹ ki yáliŋkí u-pu. 28Ní Yeesu fātìi bí-bi yii: «Jeerusaleem nimpoobi, taa nín̄ sūm̀maan man pu, nín̄ sūm̀maan nimbi ni-ba nì ni-biyaamu pu. 29Kun puee ŋyunti bí ki dòoń ŋun ni bi dāa lì yii: <Biŋmaŋŋmantiibi bin kaa pée màl̄ ki kée, bin mbiyaamu kaa ŋáam̀ bi-biiŋee bí mmɔnneeee!> 30Ní binib dāa lì ajoon yii: <Lítímaan ti-pu!> Ní kí lì ŋgbantamu yii: <Nyìkim̄maan ti-pu!> 31Bi yaa ŋá man un sá bususɔmbuee mimmee, kin nimbi bin sá isukulimee fáà?»

32Soojab cáań bininjab bili, bi sá digaŋgam dambi ki kútì Yeesu pu kí kpɔ̀ bi mun. 33Bi bàn̄ laakin bi yíì kuyikpabikuee, ní ki dū-u ki kpáá ndɔpuntikaa pu úǹ nì digaŋgam dambi bilee, ubɔ u-ŋaŋgiil pú, un kíǹee u-ŋaŋgan pú. 34Ní Yeesu bí yii: «M-Baa, dūú pɔ̄-bi, kun puee baa nyí tin bi bíi ŋáań nee taapu.» Ní bi tɔ́ kasi bi-kansikin ki yākatì u-bɔkutiŋ#23.34 Uyakatikaa nee nín kúntì puee: kpèè Ilan 22.19.. 35Ní kunipaau yú ki kpèé, ní Juuda yab yidambi bí ki bèel̄-u#23.35 Kpèè Ilan 22.8-9. yii: «U fīī bin kíǹee, u yaa lafun sá Meesiya, un Unimbɔti lēēyee, ú fīī u-ba mun.» 36Ní soojab mun bí ki bèel̄-u, ní ki cáań ndaam min gàm̀ee ki tīī-u ú nyɔ̀#23.36 Kpèè Ilan 69.22., 37ní ki bí-u yii: «A yaa sá Juuda yab bɔtiu, á fīī a-ba.» 38Ní bi ŋmàn̄ u-yilpu yii: «Un bí nee di sá Juuda yab bɔtiu.»

39Ní digaŋgam dambi bin bi kpáá ki kútì u-puee ubɔ mun bí ki sìí-u yii: «Sii di kaa sá Meesiyaaa? Fīī a-ba kí fīī kí kpáaǹ ti-muaa!» 40Ní u-juti bíi wòoǹ-u yii: «Sii nì úǹ kɔkɔ bí ditafadaabaantiilin ní, aa fàŋkí Unimbɔtaaa? 41Timbi nín máaǹ puee di sá ditafadaaldi din poon ti bí nee, kun puee digaŋgam tuuŋŋi ŋin ti ŋáańee paati dee. Ama un bí nee, úǹ kaa ŋá digaŋgam ubɔ.» 42Ní u bí Yeesu yii: «A yaa láa gítìń kí jī dibeelee, á dāá téetí m-pu.» 43Ní Yeesu kíí-u yii: «Ibaamɔn ní m tùkù-si, díǹ gba man nì si di làá nīn bí Unimbɔti Beelin.»

Yeesu kúm

(Kpèè Maat 27.45-56, Maar 15.33-41, Yoow 19.28-30)

44Kuwiŋkuluu nyɔkɔmee, ní ŋwìiń wáŋkì ní dibɔmbɔndi jéetì kitiŋ kɔkɔ pu ki tin sāā tikúti tita. 45Ní sata un bi nìn dūu pītì kunimbɔtidii#23.45 Kpèè Disa 26.31-33. poon ki gāntì laakin bi yíì circir páaa laŋkee nì laan kíǹee cúu cátì kansikin nì kansikin. 46Ní Yeesu fáá mbiil mpɔn yii: «M-Baa, m dū m-Fam ki ŋá a-ŋaan#23.46 Ilan 31.6..» U lī mimmee, ní ki kpíì. 47Room soojakpiliu ká mimmee ní ki bíi pàkà Unimbɔti, ní ki bí yii: «Ibaamɔn, kijapaai nee sá unimɔnti ní.» 48Kunipaau kun nìn dɔ́miń kí kpèè bi nín kpáá Yeesu puee nín ká mimmee, ní bi fàtīi kùǹ ki fátí bi-biŋŋi nì kunimbaakpaaŋŋu. 49Yeesu bɔɔbi kɔkɔ nì binimpoobi bin nìn céeǹní-u doooo Galiileeyee nìn yú kudandaŋu#23.49 Dūú ŋmàntī nì Ilan 38.12. ní ki kpèé tin kɔkɔ bíi jītée.

Bi nín síb́ Yeesu puee

(Kpèè Maat 27.57-61, Maar 15.42-47, Yoow 19.38-42)

50Uninja ubɔ nìn bí, bi yíì-u Jooseefi. U nìn sá bibɔsoonliibee kansikin ubɔ ní ki sá unimɔnti ki yú deedee. 51Uninjee nìn sá Juuda yab tiŋki kin bi yíì Arimateeyee#23.51 Kpèè Maat 27.57. ní ki nìn kā ki cí Unimbɔti Beel. Waa nìn yú bibɔsoonliibi bin kíǹee boon, ní kaa nìn bí tin bi bɔ́ntì kí ŋée poon. 52Úǹ di cūtì Piilati cee ki mēē-u nsan kí yòon̄ Yeesu wunti. 53U pú-u nsanee, ní u cūtì ki kpáatì Yeesu wunti ndɔpuntikaa pu, ní ki dū ŋŋaapiin ki fìn̄-u ki cáá-u ki bíl̀ dikaakul din bi nìn lùkū ditaŋkpalinee. Baa nìn dáá síb́ báà ubɔ dikaakul gbanti poon. 54An nìn sá ŋwiin ŋun jooku ŋwiŋŋuŋfikaa kífée, ní ŋwìiń tóob́ kí jēetí. 55Binimpoobi bin nìn céeǹní Yeesu doooo Galiileeyee táá Jooseefi ki cūtì ki ká dikaakul nì bi nín bíl̀ u-wunti puee. 56Bi nìn fātìi nín kùǹ, ki dɔ́miń ki bɔ́ntì ikpafi nì talaalub kí dāá cáań kí yàaǹ utaŋkpiil pu, ní ki kāl̀ ŋwiŋŋuŋfikaa, kii bi-marau nín sá puee#23.56 ikpafi nì talaalub: kpèè Maar 14.8. - kii bi-marau nín sá puee: kpèè Disa 20.10, Ditee 5.14..

Selectat acum:

Luc 23: BASSARDC

Evidențiere

Partajează

Copiază