Luc 19

Yeesu nì Jaasee bɔti

1Yeesu bàn̄ Jeeriikooyee, ki bíi còom̄ ki jītí kitiŋin. 2Uninja ubɔ nìn bí niin, bi yíì-u Jaasee. U nìn sá bifɔtiliibi kpiliu ní ki sá ugaaja. 3Kijapaayee bàà pée nyàab̀ kí wāl̀ un ní Yeesu baasii sée, ama u nín sá kinigiŋgiŋee puee, waa nìn ŋūǹ kí wāl̀-u, kun puee binib nìn múkú Yeesu pu tikpil. 4Ní u sáǹ ki līntì nyɔkɔpu ki cūtìi jɔ́m̀ busubu pu kí wāl̀ Yeesu, kun puee Yeesu làá nìn jītí niin ní. 5Yeesu dūu bāań niinee, ní ki wáaǹ yilpu ní ki bí-u yii: «Jaasee, kpákatiń malaa, kun puee sii dumpu ní m làá kɔ́ díǹ.» 6Ní Jaasee ŋá malaa malaa ki kpákatìń ní ki fōō Yeesu ki cūnnì u-dumpu nì dipɔɔpindi. 7Bin nìn bí niin ki ká mimmee nìn bíi gbùkum̄ yii: «Uninja nee cūtì ki kɔ́ unikpiti dumpu dee.» 8Ní Jaasee síl̀ ti-Dindaan nimbiin ní ki bí yii: «Ti-Dindaan, kpèè, m làá lēē m-gaajati dijandi kí tīī bisoodambi, ní m yaa nìn mūul̀ ubɔ ki fōō animbil u-cee, m làá téeǹ-u min m mūul̀-uee minaa pu#19.8 Dūú ŋmàntī nì Disa 21.37, 2 Sami 12.6, Alaŋ 6.31..» 9Ní Yeesu bí-u yii: «Difiil kɔ́nní kudii nee poon díǹ, kun puee uninja nee mun sá Abraam maaliŋun ní. 10Di sá yii man Kinibiki dɔ́miń kí nyàab̀ kí fīī bin nìn wáŋkèe ní.»

Bitɔntɔnliibi bita biba bɔŋmantikaati

(Kpèè Maat 25.14-30)

11Ní Yeesu gíti kútì tibɔŋmantikaal nee ki lī bin nìn bí ki pílifíǹ-uee, kun puee bi nìn dàkafī yii u nín tóob́ Jeerusaleem nee, Unimbɔti làá dū-u kí kàan̄ Dibeel kɔŋkɔnnee ní. 12Ní u lī yii: «Uninja ubɔ di sá ubɔti maaliŋun, ní ki yíkì ki búntì kitiŋ kiba poon ndandati kí cù kí fōoń dibeel, kí gítiń u-tiŋki pu kí dāá kàl̄ tibɔtiil. 13Kí wàatī ú nín yīkèe, u yíiń u-tɔntɔnliibi kansikinee saalaa ní ki tīī bi-kɔkɔ kinimbifɔŋ kiba kiba bí nīn cáa bàntī ú dāan̄. 14Ama ní u-tiŋkin nib kaa là u-bɔti. U yíkì kpalaayee, ní bi tú binib u-boon bí cùú lì yii: «Timbi kaa là kijapaai nee ń nīn sá ti-bɔtiu.» 15Ama u nín cūtì bi kāaǹní-u dibeel u fātìńee ní u yíiń u-tɔntɔnliibi saalaa bin u nìn tīī animbil bí nīn cáa bàntēe kí kpèè yii bi bāntì ki ká mana. 16Ní upeepeekaa dɔ́miń ki bí yii: <Ukpil, a nín tīī-mi animbil ḿ dūú bàntēe, m bāntì ki ká míǹ saalaa mun ki kútì.> 17Ní u-kpiliu bí yii: <Mbòó, a sá utɔntɔmmɔnti, kun puee m tīī-si tiwan fiii ní a ŋúb́-tì nì deedee. An puee m kāaǹ-si á nīn sá ntimu saalaa bɔtiu.> 18Ní uliliiti mun bāań ní ki bí yii: <Ukpil, a nín tīī-mi animbil ŋiŋyee, m dūu bāntì ki ká míǹ miŋmoo pu ki kútì.> 19Ní ukpilee bí yii: <Si mun ń nīn sá ntimu muŋmoo bɔtiu.> 20Ní ubɔ mun bāań, ní ki bí yii: <Ukpil, kpèè a-nimbiliŋ sɔ̀. M dūu kúĺ kiŋaabikin ki yóoǹ-si. 21M fāŋkì-si, kun puee a sá unil un bɔti pɔ̄ɔ̄yee. Kun saa yóoǹee, kúǹ ní a yòontí, ní ki cēē kun saa búĺee.> 22Ní ubɔtee bí-u yii: <Utɔntɔŋkpiti ní a sá. Tin tin a sòon̄ee, tíǹ ní m làá gíiǹ kí dūú kpɔ̀ a-bɔti. A nyí m sá unil un bɔti pɔ̄ɔ̄yee, ní kun maa síiǹee ní m yòontí, ní ki cēē kun kun maa búĺee. 23Kin, ba pu ní aa cáá m-nimbiliŋ kí ŋá baŋkan, m yaa láa fātìi gítìńee, ḿ bàà fōō m-nimbiliŋ nì ipaati?> 24Ní u bí bin bí niinee yii: <Fōōmaan animbil u-cee kí dūú kūtì un cáá saalaayee.> 25Ní bíǹ bí yii: <Ukpil, u cáá saalaayaa!> 26Ní u kíí-bi yii: <M tùkù-ni yii, un kamaa yaa ŋúb́ tin u cááyee tiŋanee, bi dāa kútí-u ní. Ama un kamaa yaa kaa ŋúb́ tin u cááyee tiŋanee ní bí dāá fōō fiii un u cááyee. 27An yaa kíǹ m-nannanliibi bin bí yii baa là ḿ nīn sá bi-bɔtiuee, cáaḿmaan-bi kí kpɔ̀-bi m-nimbiin doo.>»

Yeesu kɔ́ Jeerusaleem nì inyɔŋki poon

(Kpèè Maat 21.1-11, Maar 11.1-11, Yoow 12.12-19)

28Yeesu sòon̄ míǹ ki dóòyee, ní ki līntì bin táá-uee nyɔkɔpu ki búntì Jeerusaleem. 29U nín tóob́ Beetifagee nì Beetanii, kigbantaŋ kin bi yíì Ɔliifi sufii joolee caŋinee#19.29 Kpèè Maar 11.1., ní u dū u-boonnooliibi bili ki tú u-nyɔkɔpu ki tùkū-bi yii: 30«Nín̄ cámaan kitimbilii kin bí ti-nyɔkɔpu nee. Ni yaa bàn̄ ki kɔ́ ki-nee, ni làá ká dimampɔmbil diba gbìn̄, din pu báà ubɔ kaa láá kāl̀ee, ní gbìntīmaan-dì kí cáań-mi. 31Ubɔ yaa bālifì-ni yii: <Ba pu ní ni gbìntī-dèe?> ní kíí-u yii: <Ti-Dindaan di nyàab̀ kimaŋ.>»

32Bin Yeesu túee búntì ní ki bàn̄ ki ká kii u nín tùkūń-bi puee deedee. 33Ŋyunti ŋun bi bíi gbìntī kimaŋee ní ki-dindambi bālifì-bi yii: «Ba pu ní ni gbìntī-kì?» 34Ní bi kíí-bi yii: «Ti-Dindaan di nyàab̀ kimaŋ.» 35Bi cáań dimampɔmbilee Yeesu cee ní ki pēetì bi-wampeeŋkaati ki páaǹ di-pu ní ki yāntì Yeesu kāl̀#19.35 Dūú ŋmàntī nì Saka 9.9.. 36Yeesu còom̄ ki cée, ní binib kpátí bi-wampeeŋkaati ki bīil̀ nsan pu#19.36 Dūú ŋmàntī nì 2 Bib 9.13.. 37U bíi kpákatí Ɔliifi sufii jool pu ki tóobiń Jeerusaleemee, u-boonnooliibi kpáfì dinikitikpaandi an mɔ̄ǹ-bi tikpil bi fàal̀ ki pàkà Unimbɔti mpɔn maamaacib bin bi nìn ká Yeesu ŋáaǹee pu. 38Ní bi lì yii: «Ti-Dindaan ń bìin̄ ubɔti un dòoń u-yindi puee boon. Ŋgbansɔŋfi bí yilpu ní tinyool sá ki tīī Unimbɔti#19.38 Dūú ŋmàntī nì Ilan 118.26, Luuki 2.14.!»

39 Fariisab biba nìn bí kunipaaun, ní ki bí Yeesu yii: «Ukpil, tùkù a-boonnooliibi yii bí ŋmīĺee!» 40Ní Yeesu kíí-bi yii: «M tùkù-ni ibaamɔn ní, báà bi nee yaa ŋmíl̀aaa, ataŋkpee làá kūuntì.»

Yeesu súń Jeerusaleem pu

41Yeesu nín tóobiń kí kɔ́ Jeerusaleem ki wál̀ kitiŋee ní u bíi sūǹ ki-nib pu, 42ní ki bí yii: «Díǹ wiiŋŋu nee ni yaa bàà ŋūǹ kí béé kun ŋūǹ kí cáań-ni ŋgbansɔŋfee, ama kɔŋkɔnnee an bí-ni dibalin. 43An puee iwiin iba dòoń ni-nannanliibi làá dāan̄ kí bíĺ ataŋkpuku kí màntīí tū ni-tiŋki, ní kí lùtīí gɔ́ń-kì kí táká-ni. 44Bi làá kúntí ni nì ni-tiŋki kɔkɔ, kí taa kíń báà kudigbuŋu, kun puee naa béè ŋyunti ŋun Unimbɔti dɔ́miń kí jòoń-nee.»

Yeesu jìn̄ biwannyafiliibi kunimbɔtidiin

(Kpèè Maat 21.12-17, Maar 11.15-19, Yoow 2.13-22)

45Yeesu bāań Jeerusaleemee, ní ki kɔ́ kunimbɔtidiin, ki kíĺ ki bíi jì biwannyafiliibi, 46ní ki tùkū-bi yii: «An ŋmàn̄ Unimbɔti gbɔŋkun yii: <M-diiku làá nīn sá ŋwimmeem diiku ní, ama ní nimbi dū-ku ki kpántì kunaayudii#19.46 Dūú ŋmàntī nì Yees 56.7, Yeer 7.11.!>»

47Yeesu nìn kíǹ ki bí baabadal kunimbɔtidiin ki dàkà Unimbɔti bɔti, ní bisaraaŋakpilib nì bimaradakaliibi nì bitindaŋkpilib bíi nyàab̀ bi nín làá dī pu kí kpɔ̀-uee. 48Ama baa nìn nyí min ní bi làá ŋée, kun puee kunipaau kɔkɔ nìn bí ki pílifíǹ Yeesu kaa là kí lóó u-nyɔɔbundi báà diba.

Selectat acum:

Luc 19: BASSARDC

Evidențiere

Partajează

Copiază