Luc 14

Yeesu cáaǹ ucùúdaan ubɔ

1 Ŋwiŋŋuŋfikaa ŋubɔ dalee, ní Fariisab kpilib ubɔ yíiń Yeesu ú dāan̄ u-dumpu bí jī tijin. Yeesu bàn̄ee, ní bin bí niinee kā ki cɔ́ŋkí-u. 2Ucùúdaan ubɔ nìn kā u-nimbiin. 3Ní Yeesu bālifì bimaradakaliibi nì Fariisab yii: «Ti-marau pú nsan tí cáaǹ ubunli ŋwiŋŋuŋfikaa dalaaa, an kaa pú?» 4Ní baa kíí-u tiba. Ní u cúú ubunlee ŋal ní ki cáaǹ-u ní ki bí yii ú nīn kùǹ. 5Míǹ boonee ní Yeesu bí-bi yii: «Ni-kansikin ubɔ di yaa cáá jipɔɔn àá unaa, ní u yaa jéetì lɔkɔn ŋwiŋŋuŋfikaa dal, waa lèekī-u malaaa?» 6Ní baa ŋúń ki kíí-u an bɔti.

Unil nín máaǹ kí kàl̄ laakin jiŋaalbinee

7Yeesu dáań ki ká yii bin bi yíiń bí dāan̄ kí jī tijinee bíi nyàab̀ ikakaamɔnti, ní u dū tibɔŋmantikaal ki sòon̄ nì bi-kɔkɔ ki lī yii: 8«Bi yaa yíiń-si tinimpucan jim ní a yaa bàn̄ee, taa kàl̄ nyɔkɔpu jal pu, an yaa yíì, bi yíiń unikpaan un jítiǹ-see mun. 9A dāa kpèéyee, un yíiń nimbi liitilee bāań a-cee ní kí bí-si yii: <Yīkì kí pɔ̄ ukpil nee mpaan.> Ní á yīkì nì icoo gbòooo kí nīn gítí boon boon kí cùú kàlīń. 10Míǹ puee, bi yaa yíiń-si njimee, cùú kàlīń boon, ní un yíiń-see yaa bāań ki ká-si a kāń boonee, ní ú bí-si yii: <M-bɔɔ, dāá kàl̄ nyɔkɔpu dijamɔntiil pu#14.10 Dū B. 8-10 kí ŋmàntī nì Alaŋ 25.6-7..> Niinee an sá diyindi ní ki tīī-si, sii nì bin kɔkɔ bí niin kí jēe nimbiin. 11Míǹ mbaantiim ní un kamaa yaa yōoǹ u-ba yilpuee, Unimbɔti làá sìntīǹ-u taapu, ní un yaa sīntì u-ba taapuee, Unimbɔti làá yòon̄-u yilpu.»

12Ní Yeesu fātìi bí un yíiń-uee yii: «A yaa làá yíiń binib bí dāan̄ a-dumpu kí jī tijinee, taa yíiń a-bɔɔbi nì a-nabiyaamu, nì bin nàaǹ-see nì a-gaajajutiibi, kun puee bi mun ŋūǹ kí dāá ŋá míǹ kí yíiń-si mun. Mimmee bi pàn̄-si tin a nìn ŋá ki tīī-bee dee. 13Ama a yaa ŋá tijin ki làá yíiń binib bí dāan̄ a-dumpu kí jēe, á yíiń bisoodambi, bideembi, bifaliŋfaambi nì bijɔfub. 14A yaa ŋá mimmee, a làá nīn bí mmɔnni kun puee an nibee kaa ŋūǹ kí téeǹ-si, ní daliŋkin Unimbɔti yaa láa fīkitì deedeedambee, ní ú dāá pà-si.»

Njiŋkpaammi bɔŋmantikaati

(Kpèè Maat 22.1-10)

15Bin nì Yeesu nìn kā ki jīǹee kansikin ubɔ nín gbìl̄ an bɔtee, ní u bí Yeesu yii: «Un làá dāá jī Unimbɔti Beelin jikaatee bí mmɔnneeee!» 16Ní Yeesu kíí-u yii: «Unimbɔti Beel nín náań nì kuŋyee sèé: Kijapaai kiba di nìn bɔ́ntì njiŋkpaammi miba ní ki yíiń binib tikpil. 17Njimee yuntiŋu bāańee, ní u tú u-tɔntɔnliu yii ú cùú tùkù bin u yíińee yii: <Dāam̄maan, an kɔkɔ bɔ́ntì#14.17 an kɔkɔ bɔ́ntì: kpèè Maat 22.4..> 18Ní bi-kɔkɔ bíi tìì inaakpal fám kun pu ní baa làá ŋmā kí cùee. Upeepeekaayee bí yii: <M cíkitì-si kifuulii, maa làá ŋmā kí dāan̄, kun puee m dá kusaau kubɔ, m máaǹ kí cùú kpèè-ku.> 19Ní ubɔ mun bí yii: <M cíkitì-si kifuulii, maa làá ŋmā kí dāan̄, di sá yii m dá inaa in bi cáa kù tikpaalee saalaa. M làá cáá-i kusaau kí màkan̄-i kí kpèè.> 20Ní ubɔ mun tí bí yii: <M dáá pée cáá unimpucaan dee, an puee maa làá ŋmā kí dāan̄.> 21Ní utɔntɔnlee gítìń ki tùkū u-kpiliu binibee nín kíí-u puee. Niinee ní ukpil fōō diŋuul ní ki bí-u yii: <Nín̄ cá malaa kitiŋin sampaambi pu nì adan pu kí cáań bisoodambi nì bideembi nì bijɔfub nì bifaliŋfaambi!> 22An kútì fiiiyee, ní utɔntɔnlee gítìń ki bí yii: <A nín bí yii ḿ ŋá puee, m ŋá míǹ, binib tikpil dɔ́miń, ama mpaan dáá gbíntìi bí.> 23Ní ukpil bí-u yii: <Nín̄ cá isaasan pu nì ikpaabuku. A yaa pée ká binib biŋyee, á páb́-bi bí dāan̄ án nín làá ŋá pu m-diiku ń gbée. 24Ibaamɔn ní m sòoǹ nì ni, bin kɔkɔ m bàà péé péé ki yíińee, báà ubɔ kaa làá dáká m-jinti nee.>»

Unil ń fá tikɔkɔ kí nóó Yeesu

(Kpèè Maat 10.37-38)

25Dinikitikpaandi diba nì Yeesu nìn táá ki còom̄. Ní Yeesu fātì ki bí-bi yii: 26«Un yaa dɔ́miń man cee ki là kí kpántí m-boonnooliuee, see ú nīn néeń man ki jítiǹ u-baa nì u-na nì u-nimpuu nì u-biyaamu nì u-nabiyaamu, ní kí nīn néeń man ki jítiǹ úǹ u-ba. 27Sii un yaa kaa yōoǹ a-dɔpuntikaaŋu ki túǹ kí nīn nóó-mee kaa ŋūǹ kí nīn sá man boonnooliu. 28Ni-kansikin ŋma di yaa làá mā kudikpaaŋŋu, kaa kāl̀ ki cɔ́tì kunimbiŋmiiu kí béé animbil ŋin u cááyee yaa làá bà ú mā an diiku. 29An yaa sá fám, u cōontí kudii ní kí dūú gbèen̄, kaa ti ŋūǹ kí púntí, ní bin kɔkɔ jītí ki wāĺ-kuee kíǹ ki bèel̄-u yii: 30<Kpèè, kijapaai nee bàà kíĺ ki bíi māā kudii dee ní ŋŋmam kaa ti bí-u ú púntí.> 31Àá, ubɔti ulɔu di yaa làá cùú jáǹ u-bɔtijuti waa kàal̀ kí kpèè yii u-nib kutukub saalaa yaa ŋūǹ kí cùú jáǹ ubɔti un dòoń kí jáǹ-u nì binib kutukub mmuŋkuee. 32U yaa kpēē yii waa làá ŋmēe, ŋyunti ŋun ubɔti un béeyee dáá bíń ndan ki dòońee ní ú tɔ̄ binib ń cù kí gbàam̀-u yii: <A là ḿ ŋá mana ní ŋgbansɔŋfi ń dāan̄ ti-kansikin ní?>» 33Ní Yeesu gíti lī yii: «Míǹ mbaantiim ní ni-kansikin un yaa là kí nīn sá man boonnooliuee ń fá tin kɔkɔ u cááyee.»

Ŋyaam yaa fá mi-mɔŋŋuee, maa ti bí tiban

(Kpèè Maat 5.13, Maar 9.50)

34«Ŋyaam sá tiwammɔntiil ní, ama ŋyaam yaa kpíìyee, mana ní bi làá ŋá ní mí fàtīí mɔ̄ɔkì? 35Màa ŋān̄ bí dūú bíĺ kitiŋ án tīī ntiŋkpamaaa, kaa tí ŋān̄ bí dūú bíĺ tiwambɔlkaal taapu án lòoǹ mun. Asee bí dūú fá ditampundi pu. Un yaa cáá ditafalee ń pīlifì.»

Selectat acum:

Luc 14: BASSARDC

Evidențiere

Partajează

Copiază