Jean 3

Yeesu nì Niikoodeem

1Uninja ubɔ nìn bí, bi yíì-u Niikoodeem. U nìn bí Fariisab jandi pú ní ki sá Juuda yab kpiliu ubɔ. 2Ukpilee nìn dɔ́miń Yeesu cee kunyeeu kubɔ ní ki bí-u yii: «Ukpil, ti nyí yii Unimbɔti di túnní-si á dāan̄ kí dàkà-ti. Di sá yii, Unimbɔti yaa kaa bí unil cee, waa ŋūǹ kí ŋá maamaacib kii bin a ŋáań nee.» 3Ní Yeesu kíí-u yii: «Ibaamɔn ní m tùkù-si, Unimbɔti yaa kaa fātìi màl̄ unil mpɔm, u kpá kí ká Unimbɔti Beel.» 4Ní Niikoodeem bālifì-u yii: «Mimmee, mana ní bi gíti ŋūǹ kí màal̀ unil un púĺee mpɔm? Unil ŋūǹ kí fàtīí gíti kɔ́ u-na poon bí màal̀-uaaa?» 5Ní Yeesu gíti bí-u yii: «Ibaamɔn, ibaamɔn ní m tùkù-si, ubɔ kaa ŋūǹ kí kɔ́ Unimbɔti Beelin bi yaa kaa fātìi màl̄ udaan mpɔm nì nnyim nì Unimbɔti Famin. 6Bin binib màal̀ee di sá nnibiyaamu, ní bin Unimbɔti Fam màal̀ee mun sá ŋfam. 7M nín bí yii: <Ni-kɔkɔ máaǹ Unimbɔti ń fàtīí màal̀-ni mpɔmee>, án taa bàkatīǹ-si. 8Kubuŋu jītí ki cá laakin pú ku yaa lèe, ní a gbìl̀ ku-wooku pu ní kaa nyí laakin pú ku nyáńeeyaaa, kaa nyí laakin pú ku cée mun, míǹ ní an ŋáań bin kɔkɔ Unimbɔti Fam màal̀ee.»

9Ní Niikoodeem bí-u yii: «Mana ní an ŋūǹ kí ŋá míǹ?» 10Ní Yeesu fātìi kíí-u yii: «Sii un sá udakakpaan ki dàkà Isirayeel yabee di kaa nyí tin bí neeee? 11Ibaamɔn, Ibaamɔn ní m tùkù-si nee, ti sòoǹ nì ni tin ti nyée nì tin ti kée, ní naa là kí fōō tin ti lèe. 12M sòon̄ nì ni taapu doo bɔti tin báà ŋma nyée, ní naa là kí fōō kí kíí, kin m yaa láa póotì ki bíi sòoǹ yilpu bɔti tin naa wāĺee, ni dāa ŋáań mana kí fōō tíǹ kí kíí? 13Báà ubɔ kaa láá pée jɔ́m̀ yilpu, asee man Kinibiki kin nyánní yilpu ki sīntìńee#3.13 Dūú ŋmàntī nì Alaŋ 30.4, Room 10.6.. 14«Kii Mooyiisi nín nìn lúntì kukoonaŋu ndɔ pu kuteeun#3.14 Kpèè Dikà 21.9. binib kpèé ki pɔ́ɔkée, míǹ mbaantiim ní bi làá dāá dū man Kinibiki kí lúntí yilpu, 15án nín làá ŋá pu un sá kamaa yaa láa fōō-mi ki kííyee ń dāá ká dimaŋfal din kaa cáá dikúntilee. 16Kun puee Unimbɔti néeń kitiŋ pu nib kɔkɔ tikpil, míǹ pu ní u dū u-Jipɔmbaabil ki tīī, án nín làá ŋá pu un sá kamaa yaa fōō-u ki kííyee ń taa kpú, ama ú ká dimaŋfal din kaa cáá dikúntilee. 17Unimbɔti nín túnní u-Jipɔɔn duulinyan doo nee, an kaa sá u là kí kpɔ̀ binib bɔti, ama u là bi-kɔkɔ ń ká difiil u-Jipɔɔn pu ní. 18Unimbɔti kaa dāa gíti kù bin fōō u-Jipɔɔn gbanti ki kííyee bɔti, ama un kaa fōō-u ki kííyee bɔti kpíì, u nín kaa fōō Unimbɔti Jipɔmbaabil ki kííyee pu. 19Kun cāabìń dibɔkpilee sèé: di sá yii ŋwalifee dɔ́miń duulinyan doo, ní binib là dibɔmbɔndi, kaa là ŋwalifi, kun puee bi tūǹ atuŋkpiti. 20Un sá kamaa yaa ŋáań ikpitee ná ŋwalifi ní kaa cá ŋwalifin, kun puee u fàŋkí yii ŋwalifi làá bìitī u-tuŋkpitiŋ pu. 21Ama un nóó ibaamɔnee cá Unimbɔti walifiŋun ní bí ká yii Unimbɔti pu ní u tūǹ atummɔnti.»

Yoowaneesi nì Yeesu

22Míǹ boonee ní Yeesu nì u-boonnooliibi búntì Juudee watil pú ki kāl̀ niin ki fùul̀ binib Unimbɔti nyim. 23Yoowaneesi mun nìn bí Eenoon, Saaliim caŋin, ki fùul̀ binib Unimbɔti nyim, kun puee nnyim nìn dɔ̄ niin tikpil. Niin ní binib nìn cá bi fùul̀-bi. 24Ŋyunti gbantee, baa láá cúú Yoowaneesi ki pīiǹ kudii#3.24 Kpèè Maat 14.3, Maar 6.17, Luuki 3.19-20..

25Niinee ní Yoowaneesi boonnooliibi biba nì Ujuudaja ubɔ bíi kpákà bi-marab bin sá yii bí nīn fíntí bi-ba ki kpáaǹ tiwan kɔkɔee pu. 26Ní bi cūtì Yoowaneesi cee ki bí-u yii: «Ukpil, sii nì un nìn bí Jɔɔdan gbandi lapu puee, un pu a nìn sòon̄ yii u sá unikpaanee, báà ŋma di yíkí sii cee ki cá u-cee u fùul̀-bi Unimbɔti nyimee.» 27Ní Yoowaneesi kíí-bi yii: «Unil kaa ŋūǹ kí nīn cáá tiba Unimbɔti yaa kaa tīī-u kudɔŋu. 28Nimbi ni-ba ni gbìl̄ m nín nìn lī yii: <Man di kaa sá Meesiya, bi túnní man ń lìntīń u-nyɔkɔpuee#3.28 Kpèè 1.20. Dūú ŋmàntī nì Mala 3.1..> 29Un cáá unimpucaanee, unimpucaan cal dee, ama unimpucaan cal bɔɔ bí niin ki pílifí u-bɔɔ neen, ní an mɔ̄ǹ-u tikpil. An mɔŋŋuee di sá man yɔŋu nee. 30An máaǹ úǹ nyooti ń nīn wīintí ní man yati ń nīn bàtī!»

Un nyánní yilpuee

31Di sá un nyánní yilpuee di tɔ́kɔ́ tikɔkɔ pu. Un bí taapu dooyee di sá taapu yɔu ní ki sòoǹ taapu doo bɔti. Un nyánní yilpu ki tɔ́kɔ́ tikɔkɔ puee 32di sòoǹ tin u kée nì tin u gbìl̄ee, ní báà ubɔ kaa fōō u-bɔti ki kíí. 33Un di yaa fōō u nín lī puee ki kííyee, udaan dàkà yii Unimbɔti sá mbaamɔndaan dee, 34kun puee un Unimbɔti túnnée sòoǹ Unimbɔti bɔti ní. Di sá Unimbɔti tìì-u u-Fam ní an kaa cáá bí dūú ŋmàntī. 35Unimbɔti néeń u-Jipɔɔn ki dū tikɔkɔ ki ŋá u-ŋaan. 36Un yaa fōō u-Jipɔɔn gbanti ki kííyee kāntí dimaŋfal din kaa cáá dikúntilee. Un yíì kaa fōō-u ki kííyee kaa kāntí dimaŋfal gbanti. Unimbɔti ŋuul làá nīn pée dàn̄ udaan pu ní.

Selectat acum:

Jean 3: BASSARDC

Evidențiere

Partajează

Copiază