Марк 14

Иса рекьиз кӀан хьун

(МатӀай 26:2-5; ЛукӀа 22:1-2)

1Песагь ва ТӀили фарин суварар алукьдалди кьве югъ амай. ЧӀехи хахамарни тавратдарар чпи Иса кьуна рекьидай чинебан са рекьихъ къекъвезвай.

2– Ам сувар юкъуз кьуна виже къведач, халкьдин арада наразивал гьатда, – лугьузвай абуру.

Иса Бетан хуьре

(МатӀай 26:6-13; ЛукӀа 7:37-38; Ягь. 12:1-8)

3Иса Бетанда, жузам азарди кьунвай Симунан кӀвале суфрадихъ ацукьнавайла, Адан патав атана са папа, хъенчӀин къапунин кӀуф хана, гьада авай багьа атирар Адан кьилел илична. 4Хъел атай са бязибуру чпи чпик лугьуз хьана:

– А атирар вучиз гьакӀ серфна вара-зара ийизва? 5Ам пуд виш динардилайни#14:5 300 динар гьакъи яз къачун патал адетдин зегьметкешди 300 юкъуз кӀвалахун лазим жезвай. багьаз маса гана, а пул кесибрин арада пайиз жедай.

Абуру папаз ахмурар ийиз хьана. 6Амма Исади лагьана:

– Ам секиндиз тур, куьн вучиз адал гьавалат хьанва? Ада Зун патал хъсанвал авуна. 7Кесибар датӀана квехъ галаз амукьда, квевай абуруз гьар квез кӀан хьайила хъсанвилер ийиз жеда, амма Зун квехъ датӀана галамукьдач. 8А папа вичивай жедайвал авуна: Зал атирар илична, ада Зун сура динжарун патал гьазурна.

9За квез рикӀивай лугьузва: Шад Хабардикай вязер ийидай кьван чкайра и папа авур хъсан кардикай рахаз жеда, ам инсанрин рикӀерилай алатдач.

Ягьуда Иса маса гун

(МатӀай 26:14-16; ЛукӀа 22:3-6)

10Исадин цӀикьвед илчидикай сад тир Искарият Ягьуд, Иса маса гуз кӀанз, чӀехи хахамрин патав фена. 11Адан къаст чир хьайила, хахамриз хвеши хьана ва абуру а кардай адаз пул гун хиве кьуна. Ягьуд, Иса гьикӀ маса гудатӀа лугьуз, са къулай вахтунихъ къекъвез хьана.

Песагь суварин тӀуьн-хъун

(МатӀай 26:17-29; ЛукӀа 22:7-23; 1-Кар. 11:23-25)

12ТӀили фарин суварин сад лагьай юкъуз, адет тирвал, Песагьдин тукӀвадай кӀел къурбанддиз акъудна гьазур хьайила, тилмизри Исадиз лагьана:

– Ваз Песагь суварин суфрадихъ гьина ацукьиз кӀанзава? Чна фена тӀуьн гьазурда.

13Вичин тилмизрикай кьвед рекье твадайла, Исади абуруз лагьана:

– Куьн шегьердиз алад. Квел ана цив ацӀай квар гвай са инсан гьалтда; куьн адан гуьгъуьна аваз алад. 14Ам гьи кӀвализ гьахьайтӀа, гьадан иесидиз «Муаллимди Вичин тилмизрихъ галаз санал Песагь суварин суфра авай кӀвал гьина ава лугьуз хабар кьазва», – лагь. 15Ада квез вини гьавада авай дигирнавай чӀехи тавдин кӀвал къалурда. Гьана чаз Песагьдин тӀуьн гьазура.

16Адан тилмизар фена шегьердиз акъатна. Абуруз Исади лагьайвал жагъана. Абуру гьана Песагьдин тӀуьн гьазурна.

17Няни хьайила, Ам цӀикьвед илчини галаз атана. 18Суфрадихъ ацукьна фу незвайла, Исади лагьана:

– За квез рикӀивай лугьузва: Исятда Захъ галаз санал фу незвай квекай сада Зун хаинвилелди маса гуда.

19Абур пашман хьана.

– Зун яз тахьуй гьа? – са-сада хабар кьуна Адавай.

20– Ам Захъ галаз хуьрекдик кягъиз незвай цӀикьвед касдикай сад я, – лагьана Исади.

21 Инсандин Хци Вичин уьмуьр Каламда кхьенвайвал тухузва, амма Инсандин Хва маса гудайдан кьилел къведайди ма́са гуж я! А касдиз дуьньядал атаначиртӀа гена хъсан тир.

22Абур тӀуьник квайла, Исади фу къачуна, хийир-дуьа ийиз-ийиз, ам кӀус-кӀус авуна, тилмизриз пайна.

– Ма, къачу, им Зи Беден я! – лагьана Ада.

23Ахпа Ада сукӀра къачуна, хийир-дуьа авуна, ам абурув вугана. Вирида анай хъвана.

24– Им Зи Икьрардин иви я, – лагьана Исади. – Ам гзафбур хилас хьун патал авахьда. 25За квез рикӀивай лугьузва: къенин йикъалай эгечӀна За мад чехир – ципицӀрин миже хъвадач. ЦӀийи чехир За анжах Аллагьдин Пачагьлугъда хъвада.

Петруди кьил къакъудуникай

(МатӀай 26:30-35; ЛукӀа 22:32-34; Ягь. 13:37-38)

26Шукурдин манияр яна, Исани тилмизар Зейтун пелел экъечӀна. 27Ана Исади тилмизриз лагьана:

– Къе йифиз куьн садни Зи иман гваз амукьдач. Каламда кхьенвай «За Чубан яна кьейила, лапагар гьар сад санихъ чкӀида»#Зекери 13:7. лугьудай гафар Зи кьилел къведа.

28Зал чан хтайла, Зун квелайни вилик Галилейдиз атана акъатда.

29Петруди Адаз лагьана:

– Амайбур Ви иман гвачиз амукьайтӀани, зун Ви имандал аламукьда.

30– За ваз рикӀивай лугьузва, – жаваб гана Исади, – къе йифиз кӀекре кьведра гьарайдалди вуна Закай пудра кьил къакъудда. 31Амма Петруди рикӀивай лугьуз хьана:

– Зун Вахъ галаз санал рекьидай чкадал атайтӀани, Вакай за са чӀавузни кьил къакъуддач.

Гьа ихьтин гафар амай тилмизрини лагьанай.

Гетсеман багъда Исади дуьа авун

(МатӀай 26:36-46; ЛукӀа 22:39-46)

32Ахпа абур Гетсеман лугьудай чкадиз атана.

– За дуьаяр ийидалди куьн инал хьухь, – лагьана Исади Вичин тилмизриз. 33Ада Вичихъ галаз Петру, Якьуб ва Ягья тухвана. Гьана Адак кичӀевални дарихвал акатна.

34– Зи рикӀ ажалдин тӀалди незва, куьн, ксун тавуна, инал хьухь, – лагьана Ада тилмизриз.

35Са тӀимил анихъ фена, Исади, чинихъди ярх хьана, мумкин кар ятӀа, а пис чӀав Вичелай алатрай лугьуз, дуьаяр авуна.

36– Абба! Буба чан! – лугьуз хьана Ада. – Валай алакь тийидай кар авач; и гъам-пияла Зав хъваз тамир; ятӀани, Заз кӀандайвал ваъ, Ваз кӀандайвал хьурай.

37Элкъвена хтайла, Адаз тилмизар ахварал фенваз акуна.

– Я Симун! – лагьана Ада Петрудиз. – Вун ксанвани? Вавай са сятда уяхдиз акъвазиз хьаначни?

38Уях хьухь, куьн темягьра гьат тавурай лугьуз, дуьаяр ая, руьгьдиз кӀан хьайитӀани, беден зайиф яз амукьда.

39Исади, мад къерех хьана, виликдай лагьай гафар тикрар хъийиз, дуьаяр авуна.

40Ам хтайла, Адаз абур мад ксанваз жагъана. Абур юргъун хьана, вилер чеб-чпелай ахвариз физвай. Абур вуч жаваб гудатӀа чин тийиз амай.

41Пуд лагьай гъилера атана, Ада абуруз лагьана:

– Куьн мад ксана амани? Ял язавани? Бес я! Вахт атана агакьнава. Ингье, Инсандин Хва гунагькаррин гъиле гьатзава. 42Къарагъ, ша: ангье, Зун маса гузвайди мукьва хьанва.

Иса маса гун ва кьун

(МатӀай 26:47-56; ЛукӀа 22:47-53; Ягь. 18:3-11)

43Гаф мецел аламаз, Адан цӀикьвед илчидикай сад тир Ягьуд атана акъатна. Адахъ чӀехи хахамри, тавратдарри ва агъсакъалри ракъурнавай гзаф инсанар галай. Абурув турарни вагьрамар гвай. 44Хаинди вичихъ галайбур Иса маса гунин ишарадин гъавурда туна:

– Низ за салам гана темен гайитӀа, Ам Гьам жеда. Вегьена, Ам яхъ. Килиг, Ам тухудайла, Адалай вил алудиз тахьуй, мукъаят хьухь.

45Атанмазни Ягьуда, Исадиз мукьва хьана, «Муаллим!» лагьана, Адаз темен гана. 46Гьа инал Ягьудахъ галайбуру вегьена Иса кьуна. 47Амма Исадихъ галайбурукай сада вичин тур акъудна, кьилин хахамдин са лукӀ яна, адан яб галудна.

48И чӀавуз Исади атанвайбуруз лагьана:

– Зун кьун патал, куьн, къачагъ кьаз фидайвал, турарни вагьрамар гваз атанва хьи? 49Зун гьар юкъуз чирвилер гуз квехъ галаз санал Аллагьдин КӀвале жедай, амма ана куьне Зак кязавачир. Гила къуй Каламда кхьенвайди Зи кьилел атурай!

50Гьа вахтунда вири тилмизар, Ам гьанал туна, катна. 51КьецӀил жендекдал анжах шаршав алчуднавай са жегьил Исадин гуьгъуьна аваз физвай. Инсанри ам вегьена кьуна. 52Амма ам хъуткьунна, абурун гъиле шаршавни туна, кьецӀила катна.

Исадик тахсирар кутун

(МатӀай 26:57-68; ЛукӀа 22:54-55, 63-71; Ягь. 18:12-13, 19-24)

53Иса кьилин хахамдин патав гъана. Анал чӀехи хахамар, тавратдарар ва агъсакъалар вири кӀватӀ хьанвай.

54Петру яргъалай хьиз абурун гуьгъуьна аваз, кьилин хахамдин гьаятдиз кьван атана; гьана ада, цӀун патав нуькеррин арада ацукьна, вичиз чим акъудзавай.

55ЧӀехи хахамарни вири Меслягьат, Иса кьиникьиз акъудун патал, Адаз акси делилрихъ къекъвезвай, амма абуруз Адак кутадай тахсирар жагъизвачир.

56Гзафбуру Адаз акси тапан шагьидвилер ийизвай, амма абур сад садахъ галаз кьан тийидайбур тир. 57Са бязибуру, къарагъиз, ихьтин тапан делилар гъизвай:

58– Чаз Ада «Инсандин гъилералди эцигнавай и Аллагьдин КӀвал чӀурна, пуд йикъалай За инсандин гъил галукь тавур масад эхцигда»#Ягья 2:19., – лугьуз ван хьана.

59Абурун шагьидвилерни сад садав кьунвайбур тушир.

60Ахпа кьилин хахам юкьвал экъечӀна.

– Вучиз вун чуькьни тавуна акъвазнава? – хабар кьуна ада Исадивай. – Ваз лугьудай гаф авачни? Абур Ваз акси яз экъечӀзава эхир!

61Амма Ада сивяй са гафни акъуднач.

– Шукур хьайи Аллагьдин Хва Месигь Вун яни? – мад хабар кьуна кьилин хахамди.

62– Зун я, – жаваб гана Исади. – Инсандин Хва цаваллай цифераллаз, шукур хьайи Къудрат Авайдан эрчӀи патавай ацукьнаваз квез аквада.

63Инал кьилин хахамди вичел алай пекер къазунна.

– Мад чаз шагьидар герек яни кьван? – лагьана ада. – 64Адан аси ихтилатар квез ван хьана. Куь фикир гьихьтинди я?

Абуру вирида Ам кьиникьиз акъуддай чкадал атанва лагьана.

65Са бязибуру Адан чиниз тфуяр вегьена, Адан вилер кутӀуниз, чин ягъиз, Адавай «Ягъайди вуж я, пайгъамбар?» лугьуз хабар кьазвай. Нуькеррини Адан чиниз лапӀашар вегьизвай.

Петруди Исадикай кьил къакъудун

(МатӀай 26:69-75; ЛукӀа 22:54-62; Ягь. 18:15-18, 25-27)

66Гьа чӀавуз Петру гьаятда авай. Адан патав кьилин хахамдин къаравушрикай сад атана, 67цӀун патав вичиз чим акъудзавай Петру акуна, адаз килигна, лагьана:

– Назаретви Исадихъ вунни галай.

68Амма Петруди Исадикай кьил къакъудна.

– Абур заз чидай крар туш, я вуна вуч лугьузватӀани зун гъавурда гьатзавач, – лагьана ада.

Ам экъечӀна вилик квай гьаятдиз фена. И арада кӀекре гьарайна.

69Ам мад садра ахкур гьа къаравушди инал акъвазнавайбуруз «Имни гьабурукай я» лагьана. 70Ада мад Исадикай кьил къакъудна. Са герендилай анал акъвазнавайбуру Петрудиз мад хълагьна:

– Якъин вун гьабурукай я; вун Галилейдай я.

71– Куьне лугьузвай Инсан заз чидайди туш, – кьин кьуна ада.

72И чӀавуз кӀекре кьвед лагьай гъилера гьарайна. Петрудин рикӀел вичиз Исади лагьай гафар хтана: «КӀекре кьведра гьарайдалди вуна Закай пудра кьил къакъудда». Петру шехьиз эгечӀна.

Selectat acum:

Марк 14: ЛезПК

Evidențiere

Partajează

Copiază