ЛукӀа 7
7
Вач-хъша сагъар хъувун
(МатӀай 8:5-13)
1Яб гузвай халкьдиз лугьудай гафар рахана куьтягьна, Иса Кефернагьумдиз фена. 2Римдин аскеррин кьиле авай садан рикӀ алай вач-хъша начагъ хьана рекьидай гьалда авай. 3Адаз Исадикай ван хьайила, атана вичин вач-хъша сагъар хъия лугьуз, ада чувудрин агъсакъалар Исадин кьилив ракъурна. 4Исадин патав атана, абуру Адавай кӀевелай тӀалабна:
– И инсан Вуна куьмек авуниз лайих авай кас я. 5Адаз чи халкь кӀанда ва ада чаз синагуг эцигна.
6Иса абурухъ галаз фена, амма Ам кӀвализ мукьва хьайила, аскеррин кьиле авайда Адан патав вичин дустар ракъурна ва Адаз икӀ ая лагьана:
– Икрагь жемир, зи Агъа, Вун зи кьилив зи кӀвализ атуниз зун лайих туш. 7Я Ви патавни зун атанач, вучиз лагьайтӀа Ви вилик экъечӀизни зун лайих авай кас туш. ЯтӀани зи вач-хъша сагъ хъийидай са гаф лагь. 8Зун масадан гъилик квай инсан ятӀани, захъ жуваз табий аскерарни ава; абурукай садаз за «Алад» лагьайтӀа, ам фида; муькуьдаз «Инал ша» лагьайтӀа, ам къведа; зи вач-хъшадиз «И кар ая» лагьайтӀа, ада ам гьасятда ийида.
9И гафар ван хьайи Иса мягьтел хьана ва элкъвена Вичихъ галаз къвезвай инсанрин кӀеретӀдиз лагьана:
– За квез лугьузва хьи, Исраилдани заз икьван Захъ иман ийизвай са касни акунач.
10Исадин патав ракъурнавайбур кӀвализ хтайла, абуруз азарди кьунвайди сагъ хъхьанваз жагъана.
Исади хендедадин хцел чан хкун
11Са кьадар йикъарилай Иса Наин шегьердиз фидайла, Адахъ галаз Адан тилмизар ва инсанрин зурба са кӀеретӀни рекье гьатна. 12Ам шегьердин варарин мукьув агакьайла, са хендедадин авай-авачир хва магьфедал алаз тухузвай; дидедихъ гзаф шегьерэгьлияр галай. 13Диде акурла, Реббидиз адан язух атана.
– Шехьмир, – лагьана Ада.
14Исади фена магьфедик гъил кяна; магьфе тухузвайбур акъвазна.
– Эй, жегьил, – лагьана Исади, – За ваз къарагъ лугьузва.
15Кьенвайди хкаж хьана ацукьна ва рахаз эгечӀна. Исади ам вичин дидедив вахгана.
16Виридак кичӀ акатна; инсанри Аллагьдиз шукурар ийиз, лугьуз хьана:
– Чи арада чӀехи пайгъамбар пайда хьанва. Аллагь Вичин халкьдиз куьмек ийиз эгечӀнава.
17Ихьтин гафар-чӀалар Адакай Ягьудатда ва патав гвай вири чкайрани чкӀана.
Ягья пайгъамбардин тилмизар
(МатӀай 11:2-19)
18Исадин крарикай Ягьядин тилмизри хтана чпин муаллимдал хабар агакьарна. 19Ягьяди вичин тилмизрикай кьведаз эверна, абур Исадивай: «Атана кӀанзавай Месигь Вун яни, я тахьайтӀа чна масад вилив хуьдани?» – лагьана хабар кьаз ракъурна. 20Исадин кьилив атана, абуру лагьана:
– Чун Ягья пайгъамбарди Ви патав ракъурнавайбур я. Ада Вавай: «Атана кӀанзавай Месигь Вун яни, я тахьайтӀа чна масад вилив хуьдани?» – лугьуз хабар кьазва.
21И чӀавуз Исади азаррикайни маса тӀалрикай гзафбур сагъар хъийизвай, гзафбурукай жинерар хкуднавай, гзаф буьркьуьбуруз экуь дуьнья къалур хъийизвай.
22– Ягьядин патав хъфена, квез акурдакайни ван хьайидакай лагь, – жаваб гана тилмизриз Исади, – буьркьуьбуруз цӀийи кьилелай аквазва, кьецӀибур кӀвачел ахкьалтзава, жузам азар квайбур михьи хъжезва, бишибуруз ван хквезва, кьейибурал чан хквезва; саилризни Шад Хабардин ван къвезва. 23Зал шак тегъизвай кас бахтавар я.
24Ягьяди ракъурай ксар хъфейдалай кьулухъ, Иса Ягья дикай халкьдиз ихтилатар ийиз эгечӀна:
– Куьн кьурумдиз куьз тамашиз фенвай? Гару юзурзавай нацӀариз килигиз фейиди яз тахьуй гьа? 25ГьакӀ туштӀа, бес куьн куьз килигиз фенвай? Багьа пекер алукӀнавай инсандиз килигиз фенвайни? ЧӀагай пекер алукӀна, кеф чӀугваз уьмуьр гьалзавайбур пачагьрин кӀвалера жеда. 26АкӀ хьайила, куьн куьз килигиз фенвайбур тир? Пайгъамбардиз? Эхь, лугьузва за квез. Ам пайгъамбардилайни виневайди я. 27Адакай Каламдани икӀ кхьенва: «Килиг, Валай вилик За Зи чархачи ракъурзава, Ада Ви вилик Ви рехъ гьазурда»#Малахи 3:1.. 28За квез лугьузва: папа ханвайбурун арада Ягьядилай зурбади авач; амма Аллагьдин Пачагьлугъда авай виридалайни агъада авай кас гьа Ягьядилайни вине жеда.
29Ягьядиз яб гайи вири халкьди ва харж кӀватӀзавайбуру Аллагьдин ниятар дуьзбур яз гьисабна ва абур Ягьядин патав цик акахьун къачуз атана. 30Амма фарисейрини тавратдарри Ягьядин жуьреда цик акахьун къачун кваз кьунач ва гьадалди абуру Аллагьдин чпиз талукь къастарни негь авуна.
31– Чи девирдин инсанар За нив гекъигда? Яраб абур низ ухшар ятӀа? – давамарна Исади. – 32Абур аялриз ухшар я.
Аялри, базардин майдандал къугъвадайла, сада садаз лугьуда: «Чна квез кфилдай макьамар ягъайла, куьне кьуьлерначир, чна кьейибурухъ лугьунар авурла, куьн шехьначир».
И девирдин инсанарни гьакӀ я. 33Ягья пайгъамбар атанва, ада я фу незвач, я чехир хъвазвач, амма инсанри: «Адак чӀуру жин ква», – лугьузва. 34Инсандин Хва атанва – Ада ненни ийизва, хъунни. Ам акур инсанрини лугьузва: «ХупӀ тӀуьнрални хъунрал рикӀ алай кас тушни, Вични харж кӀватӀдайбурунни гунагькаррин тай-туьш хьанва». 35Аллагьдин Камал кӀандай ксари Ам гьахъ-михьиди тирди краралди къалурзава.
Гунагькар са папалай гъил къахчун
(МатӀай 26:6-13; Мрк. 14:3-9; Ягь. 12:1-8)
36Фарисейрикай сада Исадиз вичихъ галаз фу нез ша лагьана. Ада фена фарисейдин кӀвале суфрадихъ чка кьуна. 37Гьа вахтунда а шегьерда авай гунагькар са папаз, Иса фарисейдин кӀвале авайдакай хабар хьайила, ада гьаниз хъенчӀин къапуна аваз атирдин ни галай гъери гъана. 38Ам Исадин кьулухъай акъвазна, шехьна, Адан кӀвачерилай накъвар авадариз, кӀвачер вичин чӀараралди михьиз, Адан кӀвачериз теменар гана ва чӀем гуьцӀна. 39И кар акур ва Иса илифарнавай кӀвалин иесиди фикирна: «Ам пайгъамбар тиртӀа, Адаз Вичик гьихьтин папа гъил кязаватӀа чир жедай. И паб гунагькар я эхир».
40Амма Исади, адахъ элкъвена, лагьана:
– Симун! Захъ ваз лугьудай са гаф ава.
– Лагь, Муаллим, – лагьана ада.
41– Буржуна пулар вугудай са касдик кьве касдин бурж квай, – лагьана Исади, – са касдин – вад виш динар, муькуьданни – яхцӀурни цӀуд. 42Абурухъ буржар вахгудай мумкинвал тахьуниз килигна, ада кьведазни а пулар гьалална. Лагь кван садра, абурукай ам гьидаз гзаф кӀан жеда?
43– Заз чиз, чӀехи бурж алайдаз, – жаваб гана Симуна.
– Вуна дуьз фикирна, – лагьана Исади.
44Папахъ элкъвена, Исади Симуназ лагьана:
– Ваз и паб аквазвани? Зун ви кӀвализ атайла, вуна Заз кӀвачер чуьхуьдай яд гъваш лагьана эмирнач; и папа вичин накъваралди Зи кӀвачер чуьхвена, абур ада вичин кьилин чӀараралди кьурурна. 45Вуна Зун теменралди кьабулнач, амма ада, Зун атайдалай кьулухъ акъваз тавуна, Зи кӀвачериз теменар гузва. 46Вуна, кӀвалин иесидиз адет хьанвайвал, Зи кьиливай зейтундин чӀем хьайитӀани гуьцӀнач, амма ада Зи кӀвачеривни кваз лап багьа гъери гуьцӀна. 47ГьакӀ хьайила, За ваз лугьузва: адан пара кьадар гунагьрилай гъил къахчурвиляй адахъ гзаф муьгьуьббат ава. Нин гунагьрилай тӀимил гъил къахчунватӀа, гьадахъ кӀанивални гьакьван жеда.
48А папазни Исади лагьана:
– Ви гунагьрилай гъил къахчунва.
49Исадихъ галаз суфрадихъ галайбуру чпи чпикди лугьуз хьана:
– Гунагьрилайни гъил къахчудай ихьтинди Им вуж хьурай?
50Исадини и папаз лагьана:
– Ви иманди вун хиласна; алад, саламат хьурай вун.
Selectat acum:
ЛукӀа 7: ЛезПК
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2010-2024
