ЛукӀа 5

Инсанар кьадай гъетягъар

(МатӀай 4:18-22; Мрк. 1:16-20; Ягь. 1:35-51)

1Садра Иса Генисарат вирин къерехдал алайла, Аллагьдилай атай гафарихъ яб акализ Адал халкь алтӀуш хьанвай. 2Исадиз вирин къерехдал кьве луьткве акуна; гъетягъри луьтквейрай эвичӀна чилер чуьхуьзвай. 3Иса и луьтквейрикай Симунан луьткведа акьахна, адавай вирин къерехдивай са тӀимил анихъ гьалун тӀалабна; Ада луьткведа ацукьна халкьдиз чирвилер гана. 4Чирвилер гана куьтягьайла, Ада Симуназ лагьана:

– Луьткве дерин чкадал гьала ва чил вегь.

5– Устаз, – жаваб гана Симуна, – чун йифди алахъна, амма чаз гьатай затӀни хьанач. Амма гьа Вуна лагьайвал чна чил вегьида.

6ГьакӀ авурла, абуруз гзаф гъетер гьатна, чил са тӀимил пад хьанвай. 7Чпиз куьмек гун патал, абуру ишарайралди муькуь луьткведа авай юлдашризни эверна. Абур атана, кьве луьтквени гъетерив акӀ ацӀурнай хьи, луьтквеяр цин кӀаниз ягъиз са тӀимил амай. 8Симун-Петрудиз и кар акурла, ам Исадин кӀвачерик ярх хьана ва лагьана:

– Закай яргъаз хьухь, зи Агъа! Зун гунагьар квай инсан я!

9Ада икӀ авиляй лагьанай хьи, адазни адахъ галаз гъетер кьазвайбуруз кьунвай кьван гъетерин булвал акурла, хаф янавай. 10Симун-Петруди юлдашризни – Зебедеян рухваяр тир Якьубазни Ягьядизни – кичӀе хьанвай.

– КичӀе жемир, – лагьана Исади, – къенин йикъалай вакай инсанар кьадай гъетягъ жеда.

11Кьве луьтквени къерехдиз акъудна, алай-алайвал туна, абур Исадихъ галаз фена.

Жузам азар квайди сагъар хъувун

(МатӀай 8:1-4; Мрк. 1:40-45)

12Садра Иса са шегьерда авайла, Адан патав жузам азарди кьунвай са кас атана. Ам Исадин вилик ярх хьана, Адаз минетна:

– Я Агъа! Ваз кӀан хьайитӀа, Вавай зун сагъар хъийиз жеда эхир!

13– КӀанзава Заз, сагъ хъхьухь! – адак гъил кяна лагьана Исади.

Адакай гьасятда жузам хкатна.

14– Килиг, – лагьана Исади, – гьич садазни чуькьмир, амма, хахамдин патав фена, жува жув гьадаз къалура. Ви азар хкатунин сагълугъдай Мусадин Къанундив кьадайвал, къурбандни гъваш. Гьа идалди вун дири хъхьанвайди чир хьурай.

15ЯтӀани, къвердавай Исадикай ван-сес гегьеншдиз чкӀана. Гзаф кьадар инсанар, Адаз яб гуз ва чпик квай азарар хкудун патал, Адан патав къвез хьана. 16Амма Ам дуьаяр авун патал кьурумдиз фидай.

Фалужди янавайди сагъар хъувун

(МатӀай 9:1-8; Мрк. 2:3-12)

17Исади чирвилер гузвай са юкъуз Галилейдинни, Ягьудатдин вири хуьрерай ва Ярусалимдай атанвай фарисеярни Къанундин муаллимар Адан патав ацукьнавай. Реббиди Адаз инсанар сагъар хъийидай къуватни ганвай. 18Гьа чӀавуз са шумуд касди фалужди янавай инсан занбурагдал алаз гъана. Ам абуруз кӀвализ тухвана Исадин вилик эцигиз кӀан хьана. 19Гзаф инсанар хьуниз килигна, чпивай ам кӀвализ тухуз тахьайла, къавал акьахна, абуру чепейрин арадай ам месел алаз кӀвалин юкьвал Исадин вилик авудна. 20Абурун иман акурла, Исади а касдиз лагьана:

– Эй инсан, ви гунагьрилай гъил къахчунва.

21 Тавратдаррини фарисейри чпин арада лугьуз хьана:

– Ихьтин аси ихтилатар ийиз им вуж хьурай? Тек са Аллагьдилай гъейри, гунагьрилай нивай гъил къахчуз жеда?

22Исадиз абурун фикир чир хьайила, Ада абуруз жаваб яз лагьана:

– Вучиз куьне куь рикӀера ихьтин фикирар тунва? 23Вуч лугьун регьят я: «Ви гунагьрилай гъил къахчунва», я тахьайтӀа: «Къарагъ, ахлад?» 24Амма Инсандин Хцихъ виридан гунагьрилай гъил къахчудай ихтияр авайди квез чир хьун патал За и фалужди янавайдаз лугьузва: «Къарагъ, жуван месни къахчуна кӀвализ ахлад!»

25Амни гьасятда къарагъна, вич алаз гъайи шалтани къахчуна, Аллагьдиз шукур ийиз-ийиз, виридан виликай тӀуз вичин кӀвализ хъфена. 26Анал алайбур гзаф мягьтел хьана. Абуру кичӀела Аллагьдиз шукурар ийиз лагьана:

– Къе чаз аламатдин крар акуна.

Левидикай Исадин тилмиз хьун

(МатӀай 9:9-13; Мрк. 2:13-17)

27Инлай Иса къарагъна хъфидайла, Адаз харж кӀватӀдай чкадал ацукьнавай Леви акуна.

– Зи гуьгъуьна аваз ша, – лагьана адаз Исади.

28Амни, вири алай-алайвал туна, къарагъна Исадин гуьгъуьна аваз фена. 29Левиди вичин кӀвале Адаз хъсан тӀуьн-хъун гьазурна. Ана харж кӀватӀдайбур ва абурухъ галаз жуьреба-жуьре инсанарни атана ацукьнавай. 30Тавратдаррини фарисейри наразивал ийиз, Адан тилмизриз лагьана:

– Куьне вучиз харж кӀватӀдайбурухъни гунагькаррихъ галаз санал ацукьна тӀуьнар-хъунар ийизва?

31Исади абуруз жаваб яз лагьана:

– Жерягь сагъбуруз ваъ, начагъбуруз герек я; 32Зун гьахъ-михьибуруз ваъ, гунагькарриз «Аллагьдин рекьел ша» лугьуз атанвайди я.

Сив хуьникай

(МатӀай 9:14-17; Мрк. 2:18-22)

33Тавратдаррини фарисейри Исадиз лагьана:

– Ягьядин ва гьакӀни чи тилмизри мукьвал-мукьвал сив хуьз дуьаяр ийизва, бес вучиз Ви тилмизар нез-хъваз гьатнава?

34– Чам галай мехъерин мугьманрив сив хуьз тун мумкин яни? – лагьана Исади. – 35Амма са чӀав атана, чпивай чам къакъуддайла, абуру сив хуьда.

36Инал Ада абуруз са кьиса ахъайна:

– ЦӀийи пекиникай атӀана цӀуру пекиниз пине садани ядач, цӀийидини къазунда, цӀийидакай атӀанвай пине цӀуру пекинихъ галаз кьадач. 37Гьич садани цӀийи чехир куьгьне целериз цадач; чехирди куьгьне цел хъиткьинарда – чехирни авахьда, целни барбатӀ жеда. 38Амма цӀийи чехир цӀийи целце цун лазим я. 39Куьгьне чехир хъваз вердиш хьанвай са касдизни цӀийиди хъваз кӀан жедач, абуру лугьуда: «Гена куьгьнеди хъсан я».

Selectat acum:

ЛукӀа 5: ЛезПК

Evidențiere

Partajează

Copiază