LUCAS 21

Ang Dolot sang Babaying Balo

(Mar. 12:41-44)

1Nagtukhayaw sia kag nakakita sang mga manggaranon nga nagabutang sang ila mga dolot sa bahandi-an; 2kag nakita niya ang imol nga babaying balo nga nagabutang didto sing duha ka lepta.#21:2 Isa ka lepta, kubus sa isa ka ikap-at sang isa ka centimos. 3Kag nagsiling sia, “Matuud gid nagasiling ako sa inyo, ining imol nga babaying balo nagbutang sing labi pa sa ila tanan; 4kay sila tanan nag-amut gikan sa ila kabuganaan, apang sia sa iya kinawad-on nagbutang sang tanan nga inugpangabuhi niya.”

Ang Tanda sang Paglaglag sang Templo

(Mat. 24:1-8; Mar. 13:1-8)

5Kag sang nagpamolong ang iban nahanungud sa templo, kon paano nga napunihan ini sing matahum nga mga bato kag mga halad, nagsiling sia, 6“Nahanungud sining mga butang nga inyo ginatan-aw, magaabut ang mga adlaw nga walay mabilin diri nga isa ka bato sa ibabaw sang isa nga indi malumpag.” 7Kag nagpamangkot sila sa iya, “Manunudlo, san-o bala magakahanabu ini, kag ano bala ang tanda kon ini malapit na mahanabu?” 8Kag nagsiling sia, “Mag-andam nga dili kamo pagpatalangon; kay madamu ang magakari sa akon ngalan, nga nagasiling, ‘Ako amo sia!’ kag, ‘Ang tion malapit na!’ Dili kamo magsonod sa ila. 9Kag kon makabati kamo sang mga inaway kag mga kinagubut, dili kamo magkakugmat; kay ini kinahanglan mahanabu anay, apang ang katapusan indi pa sa gilayon.”

Mga Paghingabut nga Palaabuton

(Mat. 10:16-25; Mar. 13:9-13)

10Niyan nagsiling sia sa ila, “Ang pungsud magatindug batok sa pungsud, kag ang ginharian batok sa ginharian; 11may mabaskug nga mga linog, kag sa nagakalainlain nga mga duug mga tiggulutum kag mga kamatay; kag may mga kakugmat kag dalagku nga talandaan sa langit. 12Apang sa wala pa ini tanan dakpon kamo nila kag hingabuton kamo, nga nagatugyan sa inyo sa mga sinagoga kag mga bilanggoan, kag dalhon kamo sa atubangan sang mga hari kag mga pangolo-puud bangud sa akon ngalan. 13Ini manginkahigayonan ninyo sa pagsaksi. 14Busa ipaturuk ini sa inyo mga tagiposoon, nga indi magpainoino anay kon paano ang pagsabat; 15kay hatagan ko kamo sing baba kag kaalam, nga ang tanan ninyong kasumpung indi sarang makasupuk ukon makapamatok.#Luc. 12:11-12. 16Itugyan kamo bisan sang mga ginikanan kag mga utud kag kahimataan kag mga abyan, kag ang iban sa inyo ipapatay nila; 17dumtan kamo sang tanan bangud sa akon ngalan.#Mat. 24:9. 18Apang walay bohok sang inyo olo nga madula. 19Sa inyo pagbatas maangkon ninyo ang inyo mga kabuhi.#Mat. 24:13.

Ang Kamusmusan sang Jerusalem

(Mat. 24:15-22; Mar. 13:14-20)

20“Apang kon makita ninyo ang Jerusalem nga nalikupan sing mga hangaway, niyan kilalaha ninyo nga yara na ang iya kamusmusan. 21Niyan ang mga sa Judea magpalagyo sa mga bukid, kag ang mga sa sulud sang banwa maggowa, kag ang sa kaumhan dili magsulud sa iya; 22kay mga adlaw ini sang pagtimalus,#Os. 9:7. agud nga ang tanan nga nasulat matuman. 23Kailo ang mga nagadala kag ang mga nagapasoso sa sadtong mga adlaw! Kay may dakung kasisit-an sa duta kag kasingkal sa sining katawohan; 24magakapukan sila sa sulab sang espada, kag dalhon nga bihag sa tanan nga kapungsuran; kag ang Jerusalem tapakon sang mga Gentil, tubtub nga ang mga panag-on sang mga Gentil matuman.

Ang Pagkari sang Anak sang Tawo

(Mat. 24:29-31; Mar. 13:24-27)

25“Kag may mga tanda sa adlaw kag sa bulan kag sa mga bitoon,#Isa. 13:10; Ezeq. 32:7; Joel 2:31; Bug. 6:12-13. kag sa duta kasisit-an sang kapungsuran sa kalisang bangud sang dinaguhub sang dagat kag sang mga balud, 26ang mga tawo nagakapunaw sa kahadluk kag sa kalangkag sa magaabut sa kalibutan; kay ang mga kagamhanan sang mga langit uyugon. 27Kag niyan makita nila ang Anak sang tawo nga nagakari sa panganud#Dan. 7:13; Bug. 1:7. nga may gahum kag dakung himaya. 28Karon kon ining mga butang magsugud sa pagkahanabu, maghangad kamo kag bayawa ang inyo mga olo, kay ang pagtubus sa inyo nagapalapit.”

Ang Leksion gikan sa Higuerang Nagapanglumbay

(Mat. 24:32-35; Mar. 13:28-31)

29Kag nagpamolong sia sa ila sing paanggid: “Tan-awa ang higuera, kag ang tanan nga kahoy; 30sang nagapanalingsing na sila, makita ninyo ini kag mahibaloan sa inyo kaugalingon nga malapit na ang tingadlaw. 31Subong man, kon makita ninyo nga nagakahanabu ining mga butang, makilala ninyo nga malapit na ang ginharian sang Dios. 32Sa pagkamatuud, nagasiling ako sa inyo, indi magtaliwan ining kaliwatan tubtub nga ang tanan mahanabu. 33Ang langit kag ang duta magataliwan, apang ang akon mga polong indi magtaliwan.

Busa Magbantay

(Mat. 24:42-44; Mar. 13:32-37)

34“Apang andam kamo sa inyo mga kaugalingon basi ang inyo mga tagiposoon mabug-atan sang patuyang kag kahologbon kag mga paghimud-os sining kabuhi, kag yadtong adlaw magaabut sa inyo sing hinali subong sang siod; 35kay magaabut ini sa tanan nga nagapuyo sa nawung sang bug-os nga duta. 36Apang magbantay kamo sa tagsa ka dag-on, nga nagaampo nga makasarang kamo sa pagpalagyo sa sini tanan nga butang nga mahanabu, kag sa pagtindug sa atubangan sang Anak sang tawo.”

Si Jesus Nagapanudlo sa Templo

37Kag sa adlawadlaw nagapanudlo sia sa templo,#Luc. 19:47. apang sa gab-igab-i naggowa sia kag nagpabilin sa bukid nga ginatawag Olivo. 38Kag ang tanan nga katawohan nagduguk sa iya sa templo sa aga pa sa pagpamati sa iya.

Selectat acum:

LUCAS 21: ABHIL82

Evidențiere

Partajează

Copiază