LUCAS 11

Ang Amay Namon

(Mat. 6:7-15)

1Nagapangamuyo sia sa isa ka duug, kag sang nag-untat sia, ang isa sang iya mga gintoton-an nagsiling sa iya, “Ginoo, tudloi kami sa pagpangamuyo, subong nga si Juan nagtudlo sang iya mga gintoton-an.” 2Kag nagsabat sia sa ila, “Kon magpangamuyo kamo, magsiling:

“Amay [namon nga yara sa langit], pakabalaanon ang imo ngalan. Magkari ang imo ginharian. [Paghimoon ang imo kabubut-on, subong sang sa langit, amo man sa duta.] 3Hatagi kami sa adlawadlaw sang amon kalan-on sa inadlaw; 4kag patawara kami sang mga sala namon, kay nagapatawad man kami sa tagsatagsa nga nakautang sa amon; kag dili kami pagdalha sa panulay.”

Isa ka Abyan sa Tungang Gab-i

(Mat. 7:7-12)

5Kag nagsiling sia sa ila, “Sin-o bala sa inyo ang may abyan, nga magkadto sa iya sa gab-i kag magsiling sa iya, ‘Abyan, pahulama ako sing tatlo ka tinapay; 6kay ang abyan nakon nag-abut sa akon gikan sa panlakatan, kag wala ako sing ibutang sa atubangan niya’; 7kag sia gikan sa sulud magsabat, ‘Dili ako paggamoha; natakup na ang ganhaan, kag ang akon kabataan nagahigda upud sa akon; indi ako makabangon kag makahatag sa imo’? 8Nagasiling ako sa inyo, bisan indi sia magbangon kag maghatag bangud nga abyan niya sia, apang bangud sang iya tama gid nga pagpilit magabangon sia kag magahatag sa iya sono sa kinahanglan niya. 9Kag nagasiling ako sa inyo, Pangayo, kag kamo hatagan; pangita, kag kamo makakita; panoktok, kag kamo pagabuksan. 10Kay ang tagsatagsa nga nagapangayo nagabaton, kag ang nagapangita makakita, kag ang nagapanoktok pagabuksan. 11Sin-o bala sa inyo nga amay, nga kon pangayoan sang iya anak [sing tinapay, hatagan niya sia sing bato; ukon] sing isda, sa baylo sang isda hatagan niya sia sing man-ug; 12ukon magpangayo sia sing itlog, hatagan bala niya sia sing iwiiwi? 13Niyan kon kamo, nga malaut, makahibalo maghatag sing maayong mga dolot sa inyo mga anak, daw ano pa gid bala nga ang inyo Amay nga langitnon magahatag sang Espiritu Santo sa mga nagapangayo sa iya?”

Si Jesus Ginasumbong nga May Gahum paagi kay Beelzebub

(Mat. 12:22-32; Mar. 3:19-30)

14Karon nagsobol sia sang yawa nga apa; sang nakagowa ang yawa, ang apa nakahambal, kag natingala ang mga kadam-an. 15Apang ang iban sa ila nagsiling, “Paagi kay Beelzebub nga principe sang mga yawa nagasobol sia sang mga yawa”;#Mat. 9:34; 10:25. 16samtang ang iban, nga nagatilaw sa iya, nagpangita sa iya sing tanda gikan sa langit.#Mat. 12:38; 16:1; Mar. 8:11. 17Apang sia, nga nakahibalo sang ila mga hunahuna, nagsiling sa ila, “Ang tagsa ka ginharian nga napihak batok sa iya kaugalingon mamusmus, kag ang panimalay batok sa panimalay nagakapukan. 18Kag kon si Satanas man napihak batok sa iya kaugalingon, paano bala ang pagtindug sang iya ginharian? Bangud nga nagasiling kamo nga nagasobol ako sang mga yawa paagi kay Beelzebub. 19Kag kon ako paagi kay Beelzebub nagasobol sang mga yawa, paagi kay sin-o bala nagasobol sa ila ang inyo mga anak? Gani manginhukom ninyo sila. 20Apang kon ako paagi sa tudlo sang Dios nagasobol sang mga yawa, niyan ang ginharian sang Dios nag-abut na sa inyo. 21Kon ang makusug nga tawo, nga nalupit, nagabantay sang iya kaugalingon nga puluy-an, ang iya mga pagkabutang malinong; 22apang kon ang makusug pa sa iya maggubat sa iya kag madaug sia, ginaagaw niya sa iya ang iya bug-os nga hinganib nga ginsaligan niya, kag nagabahinbahin sang iya mga inagaw. 23Ang wala nagaupud sa akon batok sa akon,#Mar. 9:40. kag ang wala nagapanipon upud sa akon nagapa-aplaag.

Ang Pagbalik sang Espiritung Dimatinlo

(Mat. 12:43-45)

24“Ang espiritu nga dimatinlo sang nakagowa sia sa tawo, nagalagaw sa mga duug nga walay tubig nga nagapangita sing kapahuwayan; kag sang wala makakita nagasiling sia, ‘Magabalik ako sa akon balay nga ginhalinan ko.’ 25Kag kon mag-abut sia makita niya ini nga nasilhigan kag napahamtang sing nagakaigo. 26Niyan nagalakat sia kag nagadala sing iban nga pito ka espiritu nga malaut pa sa iya, kag nagasulud sila kag nagapuyo didto; kag ang kaolihian sadtong tawo manginmalaut pa sang sa nahauna.”

Ang Matuud nga Kabulahanan

27Sang nagasiling sia sini, may babayi sa kadam-an nga nagsinggit kag nagsiling sa iya, “Bulahan ang tiyan nga nagdala sa imo, kag ang mga soso nga imo ginsosohan!” 28Apang nagsabat sia, “Hinonoo bulahan ang mga nagapamati sang polong sang Dios kag nagabantay sini!”

Ang Malaut nga Kaliwatan Nagapangita sing Tanda

(Mat. 12:38-42)

29Sang nagatipon ang mga kadam-an sa iya, nagsugud sia sa pagsiling, “Ining kaliwatan malaut nga kaliwatan; nagapangita ini sing tanda,#Mat. 16:4; Mar. 8:12. apang walay tanda nga ihatag sa sini kondi ang tanda ni Jonas. 30Kay subong nga si Jonas nangintanda sa mga taga-Ninive,#Jon. 3:4. amo man ang Anak sang tawo sa sining kaliwatan. 31Sa paghukom ang hara sa Bagatnan magatindug upud sa mga tawo sining kaliwatan kag magatagudili sa ila; kay nagkari sia gikan sa kaukbungan sang duta sa pagpamati sang kaalam ni Salomon,#1 Hari 10:1-10; 2 Cron. 9:1-12. kag yari karon, ang daku pa kay Salomon yari diri. 32Sa paghukom ang mga tawo sang Ninive magatindug upud sining kaliwatan kag magatagudili sa iya; kay naghinulsul sila sa pagwali ni Jonas,#Jon. 3:5. kag yari karon, ang daku pa kay Jonas yari diri.

Ang Suga sang Lawas

(Mat. 6:22-23)

33“Walay tawo sang nakasindi sia sing suga nga nagabutang sini sa talagoan ukon sa idalum sang sulukban, kondi sa ibabaw sang tulungtungan,#Mat. 5:15; Mar. 4:21; Luc. 8:16. agud nga ang mga nagasulud makakita sang kapawa. 34Ang suga sang imo lawas amo ang imo mata; kon ang imo mata maayo, ang bug-os mo nga lawas man puno sang kapawa; apang kon malaut ini, ang imo lawas man puno sang kadudulman. 35Busa tatapa nga ang kapawa nga yara sa imo indi manginkadudulman. 36Busa kon ang bug-os mo nga lawas puno sang kapawa, nga walay bahin nga madulum, ini mangin-masanag sing bug-os, subong nga ang suga nagaiwag sa imo sang iya kasanag.”

Si Jesus Nagapakamalaut sang mga Fariseo kag mga Mangin-alamon sa Kasogoan

(Mat. 23:1-36; Mar. 12:38-40; Luc. 20:45-47)

37Sang nagapamolong sia, isa ka Fariseo nag-agda sa iya sa pagpaniaga upud sa iya; gani nagsulud sia kag naglingkod sa pagkaon. 38Sang nakita ini sang Fariseo natingala sia nga wala sia anay magpanghinaw sa wala pa ang paniaga. 39Kag ang Ginoo nagsiling sa iya, “Karon kamo nga mga Fariseo nagatinlo sang nagowa sang tagayan kag sang pinggan, apang ang sa sulud ninyo puno sang paglugus kag kalautan. 40Kamong mga buangbuang! Indi bala ang naghimo sang nagowa naghimo sang nasulud man? 41Apang ihatag ninyo nga limos inang mga butang nga yara sa sulud; kag yari karon, ang tanan nga butang matinlo sa inyo.

42“Apang kailo kamo mga Fariseo! kay nagahatag kamo sing ikapulo sang hierbabuena kag sang ruda kag sang tagsa ka gamhon,#Lev. 27:30. kag ginbayaan ninyo ang katarungan kag ang gugma sang Dios; ini sila amo ang dapat ninyo kuntani himoon, kag indi pagbayaan ang iban. 43Kailo kamo mga Fariseo! kay nagahingamo kamo sang pinasulabi nga lingkoran sa mga sinagoga kag sang mga pag-abiabi sa mga balaligyaan. 44Kailo kamo! kay subong kamo sang mga lulubngan nga indi makita, kag ang mga tawo nagalakat sa ibabaw nila nga wala makahibalo.”

45Ang isa sang mga mangin-alamon sa kasogoan nagsabat sa iya, “Manunudlo, sa imo pagsiling sini nagapasipala ka sa amon man.” 46Kag nagsiling sia, “Kailo kamo mga mangin-alamon sa kasogoan man! kay ginapapas-an ninyo ang mga tawo sing mga lulan nga maiwat dalhon, kag kamo inyo wala nagatandug sang mga lulan sang isa sang inyo mga tudlo. 47Kailo kamo! kay nagapatindug kamo sang mga lulubngan sang mga manalagna nga ginpamatay sang inyo mga ginikanan. 48Gani mga saksi kamo kag nagapasugot sa mga buhat sang inyo mga ginikanan; kay sila nagpamatay sa ila, kag kamo nagapatindug sang ila mga lulubngan. 49Busa nagasiling man ang Kaalam sang Dios, ‘Magapadala ako sa ila sing mga manalagna kag mga pinadala, kag ang iban sa ila patyon nila kag hingabuton,’ 50agud nga ang dugo sang tanan nga manalagna, nga gin-ula kutub sang pagtukud sang kalibutan, pagasukton sa sining kaliwatan, 51kutub sa dugo ni Abel#Gen. 4:8. tubtub sa dugo ni Zacarias,#2 Cron. 24:20-21. nga napatay sa gin-utlan sang halaran kag sang santuario. Hoo, nagasiling ako sa inyo, nga sukton ini sa sining kaliwatan. 52Kailo kamo mga mangin-alamon sa kasogoan! Kay ginkuha ninyo ang yabi sang ihibalo; kamo inyo wala magsulud, kag ang mga nagasulud ginasablagan ninyo.”

53Sang nakagowa sia didto, ang mga escriba kag ang mga Fariseo nagsugud sa pag-ipit gid sa iya, kag sa pagpasikut sa iya sa paghambal sang madamung butang, 54nga nagabantay sa iya, sa pagsiod sa iya sa mga polong niya.

Selectat acum:

LUCAS 11: ABHIL82

Evidențiere

Partajează

Copiază