JUAN 10
10
Ang Paanggid nahanungud sa Toril
1“Sa pagkamatuud, sa pagkamatuud, nagasiling ako sa inyo, ang wala nagasulud sa ganhaan sang toril sang mga carnero kondi nagataklas sa iban nga alagyan, inang tawo makawat kag buyong; 2apang ang nagasulud sa ganhaan amo ang manugpahalab sang mga carnero. 3Sa iya nagabukas ang manugbantay sang gawang; ang mga carnero nagapamati sang iya tingug, kag ginatawag niya ang iya kaugalingon nga mga carnero sa ngalan kag ginapagowa niya sila. 4Sang napagowa niya ang tanan nga iya kaugalingon, nagauna sia sa ila, kag ang mga carnero nagasonod sa iya, kay nakilala nila ang iya tingug. 5Sa dumuloong indi sila magsonod, kondi magapalagyo sa iya, kay wala sila makakilala sang tingug sang mga dumuloong.” 6Ining paanggid ginpamolong sa ila ni Jesus, apang wala sila makahangup sang iya ginpamolong sa ila.
Si Jesus ang Maayong Manugpahalab
7Gani si Jesus nagsiling sa ila liwat, “Sa pagkamatuud, sa pagkamatuud, nagasiling ako sa inyo, ako ang ganhaan sang mga carnero. 8Ang tanan nga nagkari sing una sa akon mga makawat kag mga buyong; apang ang mga carnero wala magpamati sa ila. 9Ako amo ang ganhaan; kon ang bisan sin-o nga tawo magsulud paagi sa akon, maluwas sia, kag magasulud kag magagowa kag makakita sing halalbon. 10Ang makawat wala nagakari kondi sa pagpangawat kag pagpamatay kag pagpanglaglag; ako nagkari agud nga may kabuhi sila, kag may kabugana sini. 11Ako ang maayong manugpahalab. Ang maayong manugpahalab nagahatag sang iya kabuhi tungud sa mga carnero. 12Ang sinoholan kag indi manugpahalab, nga indi tag-iya sang mga carnero, nakakita sang lobo nga nagapakara kag nagabiya sang mga carnero kag nagapalagyo; kag ginaagaw sila sang lobo kag ginapaaplaag sila. 13Nagapalagyo sia bangud nga sinoholan sia kag wala nagakabalaka sa mga carnero. 14Ako ang maayong manugpahalab; kilala ko ang akon kag ang akon nakakilala sa akon, 15subong nga ang Amay nakakilala sa akon kag ako nakakilala sa Amay;#Mat. 11:27; Luc. 10:22. kag ako nagahatag sang akon kabuhi tungud sa mga carnero. 16Kag may iban ako nga mga carnero, nga indi sa sining toril; sila man dapat ko dalhon, kag magapamati sila sa akon tingug. Gani mangin-isa ang panong, isa ang manugpahalab. 17Busa ang Amay nagahigugma sa akon, bangud nga ako nagahatag sang akon kabuhi, agud nga mabawi ko ini. 18Walay nagakuha sini sa akon, kondi ginahatag ko ini sing kinaugalingon. Ako may gahum sa paghatag sini, kag ako may gahum sa pagbawi sini; ining sogo nabaton ko sa akon Amay.”
19May pagbinahinbahin liwat sa mga Judio bangud sining mga polong. 20Ang madamu sa ila nagsiling, “May yawa sia, kag sia buang; ngaa bala nagapamati kamo sa iya?” 21Ang iban nagsiling, “Ini indi mga polong sang may yawa. Makapamuklat bala ang yawa sang mga mata sang bulag?”
Si Jesus Ginasikway sang mga Judio
22Tion sadto sang piesta sang Paghalad sa Jerusalem; 23tigtulugnaw sadto, kag si Jesus nagalakatlakat sa templo, sa portico ni Salomon. 24Gani ang mga Judio nagtipon sa palibut niya kag nagsiling sa iya, “Tubtub pa bala san-o ang pagpahawathawat mo sa amon? Kon ikaw ang Cristo, sugiri kami sing maathag.” 25Si Jesus nagsabat sa ila, “Ginsiling ko sa inyo, kag wala kamo magtoo. Ang mga buhat nga akon ginahimo sa ngalan sang akon Amay, sila nagasaksi sa akon; 26apang wala kamo magtoo, bangud nga kamo indi sa akon mga carnero. 27Ang akon mga carnero nagapamati sang akon tingug, kag nakilala ko sila, kag nagasonod sila sa akon; 28kag nagahatag ako sa ila sing kabuhi nga walay katapusan, kag indi na gid sila mawala, kag walay isa nga makaagaw sa ila sa akon kamut. 29Ang akon Amay, nga naghatag sa ila sa akon, daku pa sa tanan, kag walay makaagaw sa ila sa kamut sang Amay. 30Ako kag ang Amay isa.”
31Ang mga Judio nagpulut liwat sing mga bato sa pagbato sa iya. 32Si Jesus nagsabat sa ila, “Madamu nga maayong buhat ang ginpakita ko sa inyo gikan sa Amay; diin bala sadtong mga buhat ginabato ako ninyo?” 33Ang mga Judio nagsabat sa iya, “Indi tungud sa maayong buhat nagabato kami sa imo kondi tungud sa pasipala;#Lev. 24:16. bangud nga ikaw, nga tawo, nagapaka-Dios.” 34Si Jesus nagsabat sa ila, “Wala bala masulat sa inyo kasogoan, ‘Ako nagsiling, mga dios kamo’#Sal. 82:6.? 35Kon gintawag niya nga mga dios sila nga gin-abutan sang polong sang Dios (kag ang kasulatan indi mabungkag), 36nagasiling kamo nahanungud sa iya nga ginpakabalaan sang Amay kag ginpadala sa kalibutan, ‘Ikaw nagapasipala,’ bangud nga ako nagsiling, ‘Ako ang Anak sang Dios’? 37Kon wala ako nagahimo sang mga buhat sang akon Amay, niyan dili kamo magpati sa akon; 38apang kon nagahimo ako sa ila, bisan wala kamo magpati sa akon, magpati kamo sang mga buhat, agud nga inyo mahibaloan kag mahangpan nga ang Amay sa akon kag ako sa Amay.” 39Nagtinguha liwat sila sa pagdakup sa iya, apang sia nakalikaw sa ila mga kamut.
40Nagkadto liwat sila sa unhan sang Jordan sa duug diin si Juan nagbautiso anay,#Juan 1:28. kag nagpabilin sia didto. 41Kag madamu ang nagkadto sa iya; kag nagsiling sila, “Si Juan wala maghimo sing tanda, apang ang tanan nga ginpamolong ni Juan nahanungud sining tawo matuud.” 42Kag didto madamu ang nagtoo sa iya.
Selectat acum:
JUAN 10: ABHIL82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Ang Biblia ©1982 Philippine Bible Society
