JUAN 1
1
Ang Polong Nangin-unud
1Sa ginsuguran amo ang Polong, kag ang Polong kaupud sa Dios, kag ang Polong Dios. 2Sia sa ginsuguran kaupud sa Dios; 3ang tanan nga butang ginhimo niya, kag sa wala sia walay bisan ano nga nahimo sang ginhimo. 4Sa iya yara ang kabuhi, kag ang kabuhi amo ang kapawa sang mga tawo. 5Ang kapawa nagasilak sa kadudulman, kag ang kadudulman wala makadaug sini.
6May tawo nga ginpadala gikan sa Dios, nga ang iya ngalan si Juan.#Mat. 3:1; Mar. 1:4; Luc. 3:1-2. 7Sia nagkari nga saksi, agud nga magsaksi sia sa kapawa, agud nga ang tanan magtoo paagi sa iya. 8Sia indi amo ang kapawa, kondi nagkari agud nga magsaksi sia sa kapawa.
9Ang matuud nga kapawa nga nagaiwag sa tagsa ka tawo nagakari sa kalibutan. 10Sa kalibutan sia, kag ang kalibutan ginhimo niya, apang ang kalibutan wala makakilala sa iya. 11Nagkari sia sa iya kaugalingon nga puluy-an, kag ang iya gid katawohan wala magbaton sa iya. 12Apang sa tanan nga nagbaton sa iya, nga nagtoo sa iya ngalan, ginhatagan sila niya sing gahum sa pagkamangin-anak sang Dios; 13nga natawo, indi sa dugo ukon sa kabubut-on sang unud ukon sa kabubut-on sang tawo, kondi sang Dios.
14Kag ang Polong nangin-unud kag nagpuyo sa tunga naton, puno sang bugay kag kamatooran; nakita naton ang iya himaya, ang himaya nga iya sang bugtong nga Anak sang Amay. 15(Si Juan nagsaksi sa iya, kag nagsinggit, “Ini amo sia nga nahanungud sa iya ginsiling ko, ‘Ang nagasonod sa akon nahauna sa akon, kay una sia sa akon.’”) 16Kag gikan sa iya kabug-osan kita tanan nakabaton, bugay sa bugay. 17Kay ang kasogoan ginhatag paagi kay Moises; ang bugay kag kamatooran nag-abut paagi kay Jesu-Cristo. 18Wala gid sing tawo nga nakakita sa Dios; ang bugtong nga Anak, nga yara sa sabak sang Amay, nagpahayag sia sa iya.
Ang Pagpamatuud ni Juan Bautista
(Mat. 3:1-12; Mar. 1:1-8; Luc. 3:1-20)
19Kag ini amo ang panaksi ni Juan, sang nagpadala ang mga Judio sing mga sacerdote kag mga Levita gikan sa Jerusalem sa pagpamangkot sa iya, “Sin-o bala ikaw?” 20Nagtu-ad sia, wala sia magpanghiwala, kondi nagtu-ad, “Indi ako ang Cristo.” 21Kag nagpamangkot sila sa iya, “Niyan ano bala? Ikaw bala si Elias?#Mal. 4:5.” Nagsabat sia, “Indi ako.” “Ikaw bala ang manalagna?”#Deut. 18:15, 18. Kag nagsabat sia, “Indi.” 22Niyan nagsiling sila sa iya, “Sin-o bala ikaw? Hatagi kami sing sabat sa mga nagpadala sa amon. Ano bala ang ginasiling mo sang imo kaugalingon?” 23Nagsiling sia, “Ako amo ang tingug sang isa nga nagasinggit sa kamingawan, ‘Tadlonga ang dalanon sang Ginoo,’ subong sang ginsiling ni Isaias nga manalagna.”#Isa. 40:3.
24Karon ginpadala sila gikan sa mga Fariseo. 25Nagpamangkot sila sa iya, “Niyan ngaa bala nagabautiso ka, kon ikaw indi ang Cristo, ukon si Elias, ukon ang manalagna?” 26Si Juan nagsabat sa ila, “Ako nagabautiso sa tubig; apang sa tunga ninyo nagatindug ang isa nga wala ninyo makilala, 27bisan sia nga nagasonod sa akon, ang higot sang iya sandalias indi ako takus sa paghubad.” 28Ini nahanabu sa Betania sa unhan sang Jordan, diin si Juan nagabautiso.
29Sa adlaw nga madason nakita niya si Jesus nga nagapakara sa iya, kag nagsiling, “Yari karon, ang Cordero sang Dios, nga nagakuha sang sala sang kalibutan! 30Ini amo sia nga nahanungud sa iya nagsiling ako, ‘Nagasonod sa akon ang isa ka tawo nga nahauna sa akon, kay una sia sa akon.’ 31Wala ako akon nakakilala sa iya; apang agud nga mapahayag sia sa Israel, sa sini nagkari ako nga nagabautiso sa tubig.” 32Kag si Juan nagsaksi, “Nakita ko ang Espiritu nga nagakunsad subong sang salampati gikan sa langit, kag nagpabilin ini sa ibabaw niya. 33Wala ako akon nakakilala sa iya; apang ang nagpadala sa akon sa pagbautiso sa tubig nagsiling sa akon, ‘Sa iya nga makita mo ang Espiritu nga nagakunsad kag nagapabilin, ini amo sia ang nagabautiso sa Espiritu Santo.’ 34Kag nakakita ako kag nakasaksi nga ini amo ang Anak sang Dios.”
Ang Nahaunang mga Gintoton-an
35Liwat sa adlaw nga madason si Juan nagatindug kaupud sang duha sang iya mga gintoton-an; 36kag nagtolok sia kay Jesus sang nagalakat sia, kag nagsiling, “Yari karon, ang Cordero sang Dios!” 37Ang duha ka gintoton-an nakabati sa iya nga naghambal sini, kag nagsonod sila kay Jesus. 38Si Jesus nagbalikid, kag nakita sila nga nagasonod, kag nagsiling sa ila, “Ano bala ang ginapangita ninyo?” Kag nagsiling sila sa iya, “Rabbi (kon sayoron Manunudlo), diin ka bala nagadayon?” 39Nagsiling sia sa ila, “Kari kag tan-awa.” Nagkadto sila kag nakita nila kon diin sia nagadayon; kag nagpabilin sila upud sa iya sadtong adlaw, kay mga ikapulo nga takna sadto. 40Ang isa sang duha nga nakabati kay Juan, kag nagsonod sa iya, amo si Andres, utud ni Simon Pedro. 41Ginpangita niya anay ang iya utud nga si Simon, kag nagsiling sa iya, “Nakita namon ang Mesias” (kon sayoron Cristo). 42Gindala niya sia kay Jesus. Si Jesus nagtolok sa iya, kag nagsiling, “Ikaw gali si Simon nga anak ni Juan? Tawgon ka Cefas”#1:42 Gikan sa polong nga bato sa Arameo. (kon sayoron Pedro).#1:42 Gikan sa polong nga bato sa Griego.
Si Felipe kag si Natanael Ginatawag
43Sa adlaw nga madason nagtapat si Jesus sa pagkadto sa Galilea. Kag nakita niya si Felipe kag nagsiling sa iya, “Sonod sa akon.” 44Karon si Felipe taga-Betsaida, banwa ni Andres kag ni Pedro. 45Ginpangita ni Felipe si Natanael, kag nagsiling sa iya, “Nakita namon sia, nga nahanungud sa iya si Moises sa kasogoan kag ang mga manalagna man nagsulat, si Jesus nga taga-Nazaret, ang anak ni Jose.” 46Si Natanael nagsiling sa iya, “May makagowa bala nga bisan ano nga maayong butang gikan sa Nazaret?” Si Felipe nagsiling sa iya, “Kari kag tan-awa.” 47Nakita ni Jesus si Natanael nga nagapakara sa iya, kag nagsiling nahanungud sa iya, “Yari karon, ang totoo nga Israelnon, nga sa iya walay limbong!” 48Si Natanael nagsiling sa iya, “Paano bala nga nakilala mo ako?” Si Jesus nagsabat sa iya, “Sa wala pa si Felipe magtawag sa imo, sang ikaw yadto sa idalum sang higuera, nakita ko ikaw.” 49Si Natanael nagsabat sa iya, “Rabbi, ikaw ang Anak sang Dios! Ikaw ang Hari sang Israel!” 50Si Jesus nagsabat sa iya, “Bangud nga nagsiling ako sa imo, nakita ko ikaw sa idalum sang higuera, nagatoo bala ikaw? Makita mo ang dalagku pa nga mga butang sa sini.” 51Kag nagsiling sia sa iya, “Sa pagkamatuud, sa pagkamatuud, nagasiling ako sa inyo, makita ninyo ang langit nga nabuksan, kag ang mga manugtunda sang Dios nga nagakayab kag nagakunsad#Gen. 28:12. sa ibabaw sang Anak sang tawo.”
Selectat acum:
JUAN 1: ABHIL82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Ang Biblia ©1982 Philippine Bible Society
