Иуан 9
9
ЯБГЪОНЭРЭШЪХЬ
Нэшъоу къэхъугъэ лӀы горэ Исус зэригъэхъужьыгъэр
1Исус къыкӀухьэзэ, нэшъоу къэхъугъэ лӀы горэ ылъэгъугъ. 2Игъогу рыкӀохэрэр ежь къеупчӀыгъэх:
– Рабби, мы лӀыр нэшъоу къэхъунэу хэта псэкӀод зышӀагъэр, ежьыра, ятэ-янэхэр ара?
3– Мы лӀыри ятэ-янэхэри арэп зилажьэр, ау нэшъоу къызкӀэхъугъэр ежь къехъулӀэрэмкӀэ Тхьэм иӀофхэр нафэ къэхъунхэр ары, – пэгъокӀ ытыжьыгъ Исус. 4– Мафэу щэтыфэ, сыкъэзгъэкӀуагъэм иӀофхэр згъэцэкӀэнхэ фае. Чэщыр къэсыщт. Чэщыр къызысыкӀэ, зыми зи ышӀэн ылъэкӀыщтэп. 5Дунаим сытетыфэкӀэ, дунаим инэфынэр сэры.
6Исус ар къызеӀом, чӀыгум теужъунтхи, ӀупсыкӀэ етӀагъо зэхишӀыхьи, зэхишӀыхьагъэр нэшъум ынэмэ ащифагъ.
7– Силоам псыхъурэе зыгъэпскӀыпӀэм кӀуи, зыщытхьакӀ, – риӀуагъ Исус нэшъум. (Силоам къикӀырэр «АгъэкӀуагъэр» ары.) Нэшъур кӀуи, зитхьакӀи, ылъэгъу хъугъэу къэкӀожьыгъ.
8Гъунэгъухэми, ар зэрэнэшъугъэр зылъэгъугъагъэхэми аӀуагъ:
– ЛъэӀуакӀоу щысыщтыгъэр арыба мыр?
9– Ары, – ыӀуагъ зы купым.
– Хьау, арэп, ащ фэд ныӀэп, – аӀуагъ нэмыкӀхэм.
– Сэры ар, – ыӀуагъ ежь.
10– О унэхэр сыдэущтэу къаплъэхэу хъугъа? – еупчӀыгъэх ахэр.
11– Исус зыцӀэ лӀым етӀагъо зэхишӀыхьи, а зэхишӀыхьагъэр сынэмэ къащифи, «Силоам псыхъурэе зыгъэпскӀыпӀэм кӀуи, зыщытхьакӀ» къысиӀуагъ. Аущтэу сыкӀуи, зызысэтхьакӀым, сынэхэр къаплъэхэу хъугъэ, – къариӀожьыгъ а лӀым.
12– Тыдэ щыӀа ар? – къеупчӀыгъэх ахэр.
– СшӀэрэп, – къариӀожьыгъ ащ.
Исус Ӏофышхо гъэшӀэгъонэу ышӀагъэр фарисейхэм зэрагъэунэфыгъэр
13Джащыгъум а лӀэу нэшъугъэр фарисейхэм адэжь ащагъ. 14Ау Исус етӀагъо зэхишӀыхьи, нэшъум ынэхэр къызигъэплъэгъэ мафэр шэмбэт мэфагъ. 15Арыти, фарисейхэр а лӀым къеупчӀыгъэх:
– Сыдэущтэу унэхэр къаплъэхэу хъугъэ?
– ЯтӀэ сынэхэм ащ къатырилъхьи, зызысэтхьакӀым, слъэгъу хъугъэ, – къариӀожьыгъ а лӀым.
16– Мы лӀыр Тхьэм дэжь къикӀырэп, – аӀуагъ фарисейхэм ащыщ заулэмэ, – сыда пӀомэ, шэмбэт мафэр ыгъэлъапӀэрэп#9:16 шэмбэт мафэр ыгъэлъапӀэрэп – шэмбэт мафэм етӀагъо зэхэпшӀыхьэ хъущтыгъэп. Джуртхэм ар ӀофшӀэным фагъадэ..
– ПсэкӀодышӀэ лӀы горэм ащ фэдэ нэшэнэ гъэшӀэгъонхэр ышӀэн ылъэкӀына? – аӀуагъ нэмыкӀхэм. Аущтэу ахэмэ куп-купэу загощыгъ.
17– О унэхэр ары ащ къыгъэплъагъэхэр. А лӀым сыда епӀуалӀэрэр? – джыри еупчӀыгъэх нэшъугъэм.
– Ар пегъымбар гор, – пэгъокӀ ытыжьыгъ а лӀым.
18Ау щытми, а лӀэу зынэхэр къэплъэжьыгъэм ятэ-янэхэр къарагъащэхэу яупчӀыфэхэ, ар зэрэнэшъугъэри, ынэхэр къаплъэхэу зэрэхъугъэри джуртмэ ашӀошъ хъугъэп.
19– Шъо шъукъоу нэшъоу къэхъугъэу зыфашъуӀорэр ара мыр? – яупчӀыгъэх ахэмэ. – Сыдэущтэу ылъэгъу хъугъа?
20– Мыр тэ зэрэткъори, нэшъоу къызэрэхъугъэри тэшӀэ, – къаӀуагъ ятэ-янэмэ. 21– Ау джы ылъэгъу зэрэхъугъэри, ынэхэр къэзгъэплъагъэри тшӀэрэп. Ежь шъуеупчӀ, ежь ышъхьэкӀэ джэуап къышъуитыжьынэу ыныбжь икъугъ.
22Ятэ-янэхэм аущтэу къызкӀаӀуагъэр джуртхэм ащыщынэщтыгъэхэти ары; сыда пӀомэ, хэт щыщми Исус зэрэ Христосыр зыдагъэр синэгогум чӀафынэу#9:22 синэгогум чӀафынэу – цӀыф горэ синэгогум чӀафымэ, Тхьэм илъэпкъ щымыщэу алъытэ. джуртмэ зэдаштагъэти ары. 23Джары, «Ыныбжь икъугъ, ежь шъуеупчӀ» къызкӀаӀуагъэр ятэ-янэхэм.
24Арыти, джуртхэр нэшъугъэм ятӀонэрэу къежэхи, раӀуагъ:
– Тхьэм щытхъу фэшӀ. Мы лӀыр зэрэпсэкӀодышӀэр тэ тэшӀэ.
25– Ар лӀы псэкӀодышӀэми сшӀэрэп, – къыӀожьыгъ нэшъугъэм. – Ау мы зыр сэшӀэ, сэ сынэшъугъ, джы слъэгъу хъугъэ.
26– Сыд къыуишӀагъэр? – еупчӀыгъэх етӀани. – Сыдэущтэу унэхэр къыгъэплъагъэха?
27– ШъосӀогъах, ау шъукъедэӀугъэп, сыд пае джыри зэ зэхэшъухынэу шъуфая? – къариӀуагъ нэшъугъэм. – Шъори ащ игъогу шъурыкӀонэу шъуфая?
28Аущтэу къызареӀом, ехъоныхи, раӀуагъ:
– О мы лӀым игъогу рыкӀохэрэм уащыщ, ау тэ пегъымбар Мусэ игъогу рыкӀохэрэм тащыщ. 29Тхьэр пегъымбар Мусэ къызэрэдэгущыӀагъэр тэшӀэ, ау мы лӀыр къыздикӀыгъэр тшӀэрэп.
30– Ар къыздикӀыгъэр зэрэшъумышӀэрэр арыба гъэшӀэгъоныр, ау ащ сынэхэр къыгъэплъагъэх, – къариӀуагъ лӀым. 31– Тхьэр псэкӀодышӀэ цӀыфхэм зэрямыдэӀурэр тэшӀэ, ау Тхьэм шӀолӀыкӀ фызиӀэу, Тхьэм игъоу ылъытэрэ Ӏофхэр зыгъэцакӀэрэр ары Тхьэр зэдэӀурэр. 32Ау цӀыф горэм нэшъоу къалъфыгъэр къыгъэплъагъэу егъашӀэми цӀыфмэ зэхахыгъэп. 33Мы лӀыр Тхьэм дэжь къимыкӀыгъэмэ, ащ зи ыгъэцэкӀэн ылъэкӀыщтгъэп.
34– О хъурэябзэу упсэкӀодышӀэу укъалъфыгъ, – раӀожьыгъ ахэмэ. – Зыгорэ о тэбгъэшӀэщт, ара? ЕтӀанэ синэгогум къычӀафыгъ.
Фарисейхэм янэшъугъ
35А лӀыр синэгогум къызэрэчӀафыгъэр Исус зэхихыгъ, ащ нэужми ар зелъэгъум, риӀуагъ:
– Тхьэм ы КъокӀэ шӀошъхъуныгъэ уиӀа?
36– Тхьэматэ, – пэгъокӀ къытыжьыгъ а лӀым, – шӀошъхъуныгъэ фысиӀэнэу хэта зыфапӀорэр, къысаӀу!
37– Ар о плъэгъугъэ, джы къыбдэгущыӀэрэр ары, – риӀуагъ Исус.
38– ШӀошъхъуныгъэ сиӀэ хъугъэ, Зиусхьан, – ыӀуи, а лӀыр Исус ыпашъхьэ лъэгонджэмышъхьэкӀэ итӀысхьагъ.
39– Зымылъэгъухэрэм алъэгъу хъужьынэу, зылъэгъоу зышӀошӀыхэрэм амылъэгъужь хъуным пае, цӀыфхэм хьыкум атесшӀыхьанэу мы дунаим сыкъытехьагъ, – къыӀуагъ Исус.
40Фарисейхэм ащыщхэу Исус игъусагъэхэм Исус ар къыӀуагъэу зызэхахым, къеупчӀыгъэх:
– Тэри тынэшъоу ара зыфапӀорэр?
41– Шъунэшъугъэмэ, псэкӀод шъуиӀэщтыгъэп, ау «тэлъэгъу» шъоӀошъ, шъуипсэкӀод къышъутенэжьы, – ариӀожьыгъ Исус.
Selectat acum:
Иуан 9: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
