Иуан 7
7
ЯБЛЭНЭРЭШЪХЬ
Исус ышхэм яшӀошъмыхъуныгъ
1Ащ нэужым Исус Галилей хэкум къыщикӀухьэщтыгъ. Ежь аукӀынэу джуртхэр ыуж итыгъэхэти, Иудей хэкум къыщикӀухьанэу фэягъэп. 2Джурт мэфэкӀ мэфэшхохэу цӀыфхэр чэлхэм зыщачӀэсхэрэр#7:2 Джурт мэфэкӀ мэфэшхохэу цӀыфхэр чэлхэм зыщачӀэсхэрэр – джуртхэр Мысырым къызекӀыжьыхэ ужым, илъэс тӀокӀитӀо шъоф нэкӀыр къакӀухьэу чэлхэм зэрачӀэсыгъэхэр илъэс къэс мэфэ заулэрэ чэлхэм ачӀэсхэу, агу къагъэкӀыжьы. Еплъ Пегъымбар Мусэ ящэнэрэ тхылъэу ытхыгъэм 23:33-43. къэблэгъагъэх.
3Арыти, ышхэм Исус къыраӀуагъ:
– Ӏофышхо гъэшӀэгъонхэу пшӀэхэрэр уигъогу рыкӀохэрэм алъэгъунхэм пае, мыщ дэжьым ӀукӀыжьи, Иудей хэкум кӀожь. 4ЦӀыфхэм зязгъэшӀэнэу фаем шъэфэу Ӏоф ышӀэрэп. Мы Ӏофышхо гъэшӀэгъонхэр огъэцакӀэхэмэ, дунаим ицӀыфхэм зягъэлъэгъу.
5Сыда пӀомэ, ыш дэдэхэми ИсускӀэ шӀошъхъуныгъэ яӀагъэп.
6Арыти, Исус ахэмэ ариӀуагъ:
– ШъоркӀэ сыдигъуи игъу, ау сэ сигъо къэсыгъэгоп. 7Дунаим ицӀыфхэм шъо шъуауджэгъун алъэкӀыщтэп, ау сэ сауджэгъу. Ахэмэ Ӏофхэу ашӀэхэрэр зэрэбзаджэхэмкӀэ сэ шыхьат сызэрэхъурэр ары сызкӀауджэгъурэр. 8Шъо мэфэкӀ мэфэшхохэм апае Ерусалим шъукӀу. Сэ а мафэхэм апае сыкӀощтыгоп, сыда пӀомэ, сигъо къэсыгъэгопышъ ары.
9Исус аущтэу ариӀуи, Галилей хэкум къинагъ.
МэфэкӀ мэфэшхохэр ыгъэмэфэкӀэнхэм пае, Исус Ерусалим зэрэкӀуагъэр
10Ау мэфэкӀ мэфэшхохэр агъэмэфэкӀынхэу Исус ышхэр зэкӀохэм ыуж, Исуси кӀуагъэ, ау цӀыфмэ амышӀэу, къамылъэгъоу. 11А мэфэкӀ мэфэшхохэм джуртхэр, «Исус тыдэ щыӀа?» аӀозэ, лъыхъущтыгъэх. 12ЦӀыф купышхохэм Исус игугъу бэрэ ашӀэу зэӀушъашъэщтыгъэх. Ахэмэ ащыщхэм аӀощтыгъ:
– Ар цӀыф дэгъу.
– Хьау, ар цӀыф дэгъоп, цӀыфхэр гъогу занкӀэм тырещых, – аӀощтыгъ адрэхэм. 13Ау джуртхэм зэращыщынэщтыгъэхэм пае, цӀыфмэ апашъхьэ зыми Исус игугъу щишӀыщтыгъэп.
14А мэфэкӀ мэфэшхохэм азыныкъо зыблэкӀым, Исус Тхьэм иунэшхо чӀахьи, цӀыфхэм Тхьэм игущыӀэхэр аригъашӀэхэу ыублагъ.
15– Мы лӀыр емыджагъэу, мыщ фэдиз шӀэныгъэ тыдэ къырихыгъа? – агъэшӀагъозэ, аӀуагъ джуртхэм.
16– ЦӀыфхэм язгъашӀэрэ гущыӀэхэр садэжь къикӀыхэрэп, сэ сыкъэзгъэкӀуагъэм дэжь къекӀыхэ нахь. 17Тхьэр зыфаер зыгъэцэкӀэнэу фаем гущыӀэхэу сэ цӀыфхэм язгъашӀэхэрэр Тхьэм дэжь къикӀыхэми, сэ садэжь къикӀыхэми ышӀэщт. 18Ежь ыцӀэкӀэ къэгущыӀэрэр ежь ышъхьэ ищытхъу ыуж ит, ау къэзгъэкӀуагъэм ищытхъу ыуж итым шъыпкъагъэ иӀ, мышъыпкъагъи хэлъэп. 19Пегъымбар Мусэ Тэурат хабзэр къышъуфигъэнагъэба? Ау щытми, Тэурат хабзэм итхэр зыгъэцакӀэрэ цӀыф къышъухэтэп. Сыда сышъуукӀынэу сауж шъузкӀитыр? – ариӀуагъ Исус ахэмэ.
20– ДжынапцӀэ о пхэс, – къаӀожьыгъ цӀыфхэм. – Хэта о узыукӀынэу уауж итыр?
21– Ӏофышхо гъэшӀэгъон закъо шэмбэт мафэм зэрэсшӀагъэм пае, шъо зэкӀэми шъогъэшӀагъо, – ариӀожьыгъ Исус ахэмэ. 22– Шъуеплъ, пегъымбар Мусэ сунэт шӀыныр хабзэу къышъуфигъэнагъэшъ, (ау, шъыпкъэмкӀэ, сунэт шӀыныр зыдэжь къикӀыгъэр Мусэп, тятэжъышхохэр ары нахь), шъо шэмбэт мэфэ дэдэми цӀыфыр сунэт шъошӀыба? 23Джы, пегъымбар Мусэ и Тэурат хабзэ ит унашъоу сунэт шӀыным ехьылӀагъэм шъуемыдэӀоу шъумыхъуным пае, шэмбэт мэфэ дэдэми цӀыфыр сунэт шъушӀын шъуфит. Аущтэу зыхъукӀэ, сыд пае шъукъысфэгубжыра, лӀы горэ шэмбэт мафэм зэрэзгъэхъужьыгъапэм пае? 24Теплъэу иӀэм шъуеплъэу хьыкум шъумышӀы, ау шъыпкъэм тетэу хьыкум шъушӀы.
Исус шъуӀуа Христосыр?
25Джащыгъум Ерусалим щыщ цӀыфхэм ащыщхэм аӀуагъ:
– АукӀынэу зыуж итхэр мырба? 26Шъуеплъ, цӀыф пстэуми апашъхьэ къызэрэщыгущыӀэрэм, ау щытми зи раӀорэп. Тэ титхьэматэхэм ар зэрэ Христосыр#7:26 Христос – еплъ 1:20. зэрагъэшӀагъэ шъуӀуа? 27Тэ мыр зыщыщыр тэшӀэ. Ау Христос къызыкӀокӀэ, зыщыщыр зыми ышӀэщтэп.
28Джащыгъум Исус Тхьэм иунэшхо чӀэтэу, цӀыфхэм Тхьэм игущыӀэхэр аригъашӀэхэзэ, мэкъэшхокӀэ къыӀуагъ:
– Сэ сышъошӀэ, сызыщыщыри шъошӀэ. Сэр-сэрэу мыщ дэжьым сыкъэкӀуагъэп, сэ сыкъэзгъэкӀуагъэм шъыпкъагъэ иӀ. Ар шъо шъушӀэрэп, 29ау сэ ар сэшӀэ, сыда пӀомэ, сэ ащ сыщыщ, ежьыр ары сыкъэзгъэкӀуагъэри.
30Исус ар къызеӀом, аубытынэу фежьагъэх, ау зыщаубытыщтым игъо къэсыгъэгопти, цӀыф зи ӀэкӀэ нэсыгъэп. 31Ау цӀыф купышхом щыщхэу бэмэ ежьыркӀэ шӀошъхъуныгъэ яӀэ хъугъэ.
– Мы лӀым нахьи нахьыбэу нэшэнэ гъэшӀэгъонхэр, Христос къызыкӀокӀэ къыгъэлъэгъошъун шъуӀуа? – аӀощтыгъ ахэмэ.
Фарисейхэмрэ дин пэщэшхохэмрэ Исус аубытынэу Ӏофтабгэхэр зэрагъэкӀуагъэхэр
32ЦӀыф купышхор ащ фэдэу Исус ехьылӀагъэу Ӏушъашъэхэу фарисейхэм зызэхахым, ахэмрэ дин пэщэшхохэмрэ Исус арагъэубытынэу Ӏофтабгэхэр агъэкӀуагъэх.
33Ау Исус къыӀуагъ:
– Сэ тӀэкӀурэ сышъухэтыщт, етӀанэ сыкъэзгъэкӀуагъэм дэжь сыкӀожьыщт. 34Шъукъыслъыхъужьыщт, ау сыкъэжъугъотыжьыщтэп, сыздэщыӀэми шъукъэкӀон шъулъэкӀыщтэп.
35– Тыда ар дгъотын тымылъэкӀынэу зыдэкӀонэу ыгу хэлъыр? – аӀуи, джуртхэм зэраӀожьыгъэ. – Тэ тицӀыфхэу алыджхэм#7:35 алыджхэр – грек цӀыфхэр ары. ахэгощагъэхэу псэухэрэм адэжь кӀонышъ, алыджхэм Ӏофхэр аригъэшӀэщт шъуӀуа? 36«Шъукъыслъыхъужьыщт, ау сыкъэжъугъотыжьыщтэп, сыздэщыӀэми шъукъэкӀон шъулъэкӀыщтэп» зыфиӀуагъэм сыда къыригъэкӀыгъэр?
Псыхъохэу цӀыфхэм щыӀэныгъэ шъыпкъэ яӀэ зыгъэхъухэрэр
37МэфэкӀ мэфэшхохэм ащыщэу аужырэ мафэу анахь мэфэ лъапӀэм Исус къэуцуи, мэкъэшхокӀэ къыӀуагъ:
– ПсыфалӀэ лӀэрэр садэжь къэрэкӀуи, ерэшъу. 38Тхьэм игущыӀэ тхыгъэхэм зэрарытым фэдэу, «СэркӀэ шӀошъхъуныгъэ зиӀэм псыхъохэу щыӀэныгъэ шъыпкъэ иӀэ зыгъэхъухэрэр ыгу къичъыщтых».
39Исус зыфиӀуагъэр ежьыркӀэ шӀошъхъуныгъэ зиӀэхэм Тхьэм ежь ы Псэ ЛъапӀэу агухэм къарилъхьащтыр ары. Ащ нэсыфэ Тхьэм ежь ы Псэ ЛъапӀэр шӀошъхъуныгъэ зиӀэхэм агухэм къарилъхьэгъагъэгоп, сыда пӀомэ, Исус ищытхъушхо джыри иӀэ хъугъагъэгоп.
ЦӀыфхэр Исус ехьылӀагъэу зэрэзэгурымыӀуагъэхэр
40А гущыӀэхэр зызэхаххэм, цӀыф купышхом хэт заулэмэ аӀощтыгъ:
– ШъыпкъэмкӀэ, мыры пегъымбарыр.
41– Джары Христосыр, – аӀощтыгъ адрэхэм. Ау нэмыкӀхэми аӀощтыгъ:
– Христосыр Галилей хэкум щыщыщтэп, арыба? 42Тхьэм игущыӀэ тхыгъэхэм арытба,#7:42 Тхьэм игущыӀэ тхыгъэхэм арытба – еплъ Пегъымбар Михэ тхылъэу ытхыгъэм 5:2. Христос Даутэ къытекӀыгъэ цӀыфхэм зэращыщыщтри, Даутэ зыщыщ къалэу Бет-Лэхьэм#7:42 Бет-Лэхьэм – Ерусалим километрийкӀэ пэчыжьэу, икъыблэ лъэныкъо ит. зэрэщыщыщтри?
43Аущтэу Исус ехьылӀагъэу цӀыфхэм куп-купэу загощыгъ. 44Ахэмэ ащыщэу зы купым Исус ыубытыным фэягъ, ау зыгори ащ ӀэкӀэ нэсыгъэп.
Тетыгъо зиӀэхэм яшӀошъмыхъуныгъ
45Аущтэу а Ӏофтабгэхэр дин пэщэшхохэмрэ фарисейхэмрэ адэжь къэкӀожьыгъэх. КъызэкӀожьхэм, адрэхэм яупчӀыгъэх:
– Сыд пае Исус къыздэшъумыщагъа?
46– А лӀыр къызэрэгущыӀэрэм фэдэу зы цӀыф егъашӀэми гущыӀагъэп, – аӀуагъ Ӏофтабгэхэм.
47– Ащыгъум шъори шъудихьыхыгъэба? – араӀожьыгъ фарисейхэм. 48– Тэ титхьэматэхэм ащыщэу зыгорэми, фарисейхэм ащыщэу зыгорэми ИсускӀэ шӀошъхъуныгъэ иӀэ хъугъа? 49Ау мы цӀыф купышхоу пегъымбар Мусэ и Тэурат хабзэ зымышӀэрэм Тхьэм ынае къащифагъ.
50Фарисейхэм ащыщэу Никодим (ары Исус дэжь чэщым къэкӀогъагъэр) адрэмэ ариӀуагъ:
51– Ыпэ рапшӀэу емыупчӀэу, ышӀэрэр тэрэзэу зэримыгъашӀэу, цӀыфым хьыкум тырешӀыхьа тихабзэ?
52– Ори Галилей хэкум ущыща? – къыраӀуагъ Никодим. – Тхьэм игущыӀэ тхыгъэхэм ахаплъи, пегъымбар горэ Галилей зэрэщымыщыр къэпшӀэщт.
53Ахэр зэбгырыкӀыжьхи, хэти ядэжь кӀожьыгъэ етӀанэ.
Selectat acum:
Иуан 7: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
