Иуан 6

ЯХЭНЭРЭШЪХЬ

Исус нэбгырэ минитф зэригъэшхагъэр

(Маттэ 14:13-21; Марк 6:30-44; Лука 9:10-17)

1Ащ нэуж Галилей псыхъураем#6:1 Галилей псыхъураер – Галилей хэкум ит псыхъурай. ИкӀыхьагъэ километрэ 21-рэ мэхъу, инахь шъомбгъуапӀэр километрэ 13 мэхъу. (Тибериадэ зэраӀорэ псыхъураер ары) Исус къуашъомкӀэ зэпырыкӀыжьыгъ. 2Сымаджэхэр ыгъэхъужьхэзэ, нэшэнэ гъэшӀэгъонхэу Исус къыгъэлъэгъуагъэхэр зэралъэгъугъэхэм пае, цӀыф купышхо ыуж итэу кӀощтыгъ. 3Исус Ӏуашъхьэм дэкӀоягъ, ащ тетӀысхьагъ, игъогу рыкӀохэрэр игъусэхэу. 4Джуртмэ ямэфэкӀ мэфэшхоу Ӏутыжъ зыцӀэр къэблэгъэщтыгъ.

5Исус ынапӀэхэр къыӀэти, цӀыфыбэхэр ыдэжь къакӀохэу зелъэгъум, игъогу рыкӀохэрэм ащыщэу Филипп зыцӀэм риӀуагъ:

– Мы цӀыфхэм ядгъэшхынэу хьалыгъу тыдэ къыщытщэфыщта?

6Исус ар зыкӀиӀуагъэр Филипп ыгъэунэфынэу ары; сыда пӀомэ, ежь ышӀэн фаер ышӀэщтыгъ.

7– Хэти тӀэкӀу ышхынэу динар#6:7 динар – а уахътэм ар зы мэфэ лэжьапкӀэщтыгъ. шъитӀур хьалыгъу уасэ икъущтэп, – пэгъокӀ ритыжьыгъ Филипп.

8Исус игъогу рыкӀохэрэм ащыщэу Симон Петрэ ышэу Индрыс къыӀуагъ:

9– Хьэ хьалыгъуитфырэ пцэжъыитӀурэ зыӀыгъ кӀэлэцӀыкӀу къытхэт, ау мыщ фэдиз цӀыфмэ ар сыдэущтэу афикъуна?

10– ЦӀыфхэр ежъугъэтӀысэхых, – къыӀуагъ Исус. А чӀыпӀэр уц къэшхъуагъ. ЕтӀысэхыгъэ хъулъфыгъэхэр минитф фэдиз хъущтыгъэх. 11ЕтӀанэ Исус хьалыгъухэр къыштэхи, Тхьэм щытхъу фишӀи, игъогу рыкӀохэрэм аритыгъ. Ахэми цӀыфхэу щысхэм афагощыгъ, пцэжъыехэми ащыщэу хэти зыфаем фэдиз ратыгъ. 12ЗызагъэшхэкӀыхэм, Исус игъогу рыкӀохэрэм ариӀуагъ:

– Зи хэмыкӀодэжьыным пае, къялыжьыгъэ хьалыгъу такъырхэр шъуугъоижьых.

13Аущтэу хьэ хьалыгъуитфым щыщэу шхагъэмэ къялыжьыгъэ такъырхэр мэтэ пшӀыкӀутӀумэ арызэу аугъоижьыгъ. 14Нэшэнэ гъэшӀэгъонхэу Исус къыгъэлъэгъуагъэр цӀыфмэ залъэгъум, аӀуагъ:

– Дунаим къэкӀон фэе пегъымбарыр#6:14 пегъымбарыр – еплъ 1:21. шъыпкъэу мырын фаеба?

15Ау цӀыфхэр къэкӀонхэшъ, ежь аубытынышъ, лӀыгъэкӀэ пачъыхьэ ашӀынэу агу зэрэхэлъыр Исус ешӀэти, ӀукӀыжьи, изакъоу Ӏуашъхьэм дэкӀоежьыгъ.

Исус псы кӀыӀум тетэу зэрэкӀуагъэр

(Маттэ 14:22-27; Марк 6:45-52)

16Пчыхьэр къызэсым, Исус игъогу рыкӀохэрэр псыӀушъомкӀэ ехыгъэх. 17Ащ дэжьым къуашъом итӀысхьэхи, псыхъураем зэпырыкӀхэу КапернаумкӀэ ежьагъэх. Мэзахэ хъугъэхагъ, ау Исус ахэмэ адэжь джыри къэкӀожьыгъагъэгоп. 18Псыхъураер ыгъэуалъэу жьыбгъэшхо къепщэщтыгъ. 19Стадие#6:19 стадие – метрэ 192-рэ мэхъу. тӀокӀырэ тфырэ-щэкӀ фэдиз къуашъор зафым ыуж, псы кӀыӀум тетэу Исус къакӀоу, къуашъом пэгъунэгъу къэхъоу алъэгъугъ. Ар залъэгъум, къэщтагъэх. 20Ау Исус къариӀуагъ:

– Сэры ар, шъумыщын!

21Джащыгъум Исус къуашъом къырагъэтӀысхьанэу фэягъэх, ардэдэми къуашъор зыдэкӀощтыгъэ псыӀушъом нэсыгъ.

Исус – цӀыфхэм щыӀэныгъэ язытырэ хьалыгъу

22ЯтӀонэрэ мафэм цӀыф купышхоу псыхъураем иадрабгъу щытхэм Исус игъогу рыкӀохэрэр зэрытӀысхьэгъэгъэ къуашъом нэмыкӀ къуашъо горэ ащ дэжьым зэрэӀумытыгъэм гу лъатагъ. Исус а къуашъом игъогу рыкӀохэрэм адимытӀысхьэгъагъэу, язакъоу ахэр зэрэӀукӀыгъагъэхэми гу лъатагъ. 23ЕтӀанэ Зиусхьан Исус Тхьэм щытхъу зыфешӀым ыуж, цӀыфмэ хьалыгъухэр зыщашхыгъэгъэ чӀыпӀэм пэгъунэгъоу, къалэу Тибериадэ#6:23 къалэу Тибериадэ – Галилей псыхъураем итыгъэ къохьэпӀэ Ӏушъом Ӏут. къикӀыгъэхэу, нэмыкӀрэ къуашъохэр къыӀухьагъэх. 24А цӀыф купышхом Исуси игъогу рыкӀохэри а чӀыпӀэм щымыӀэжьхэу залъэгъум, ежьхэр къуашъохэм арытӀысхьэхи, Исус лъыхъухэу къалэу Капернаум#6:24 къалэу Капернаум – еплъ 2:12. кӀуагъэх.

25Исус псыхъураем иадрабгъу щыӀэу къызагъотым, къыраӀуагъ:

– Рабби, сыдигъо мыщ укъэкӀуагъа?

26– Шъыпкъэ дэдэр шъосэӀо, – ариӀуагъ Исус ахэмэ, – шъо нэшэнэ гъэшӀэгъонхэр зэрэшъулъэгъугъэхэр арэп шъукъызкӀыслъыхъурэр, хьалыгъухэм ащыщ шъушхи, зыжъугъэшхэкӀыгъэти ары нахь. 27Шхынэу кӀодырэм ыуж шъуимыт, шхынэу мыкӀодэу цӀыфмэ мыкӀодыжьын щыӀэныгъэ яӀэ зыгъэхъурэм ыуж шъуит нахь. А шхыныр ары ЦӀыф Лъэпкъым ы Къо къышъуитыщтыр; сыда пӀомэ, Тхьэу Ты лъапӀэм ЦӀыф Лъэпкъым ы Къо зэриштэрэм имыхъур къытырилъхьагъ.

28Джащыгъум Исус къеупчӀыгъэх:

– Адэ, Тхьэр зыфэе Ӏофхэр дгъэцэкӀэнхэм пае, тэ сыда тшӀэн фаер?

29– Тхьэм къыгъэкӀуагъэмкӀэ шӀошъхъуныгъэ шъуиӀэныр ары Тхьэр зыфэе Ӏофыр, – ариӀуагъ Исус ахэмэ.

30– Сыд фэдэ нэшэнэ гъэшӀэгъон тэбгъэлъэгъуна, ар тлъэгъоу, оркӀэ шӀошъхъуныгъэ тиӀэным пае? Сыда пшӀэщтыр? – къыраӀожьыгъ ахэмэ. 31– Тятэжъхэм шъоф нэкӀым мэнн зыцӀэ шхыныр#6:31 мэнн зыцӀэ шхыныр щашхыштыгъ – израиль цӀыфхэр Мысырым къикӀыжьхи, шъоф нэкӀым къыщакӀухьэу зетхэм, шхынэу Тхьэм аригъэшхыщтыгъэр ары. Еплъ Пегъымбар Мусэ ятӀонэрэ тхылъэу ытхыгъэм 16:4-15. щашхыщтыгъ, Тхьэм игущыӀэ тхыгъэхэм зэрарытым фэдэу,#6:31 Тхьэм игущыӀэ тхыгъэхэм зэрарытым фэдэу – яплъ Орэд ЛъапӀэхэм 77:24. «Уашъом къикӀырэ хьалыгъу ашхынэу Тхьэм къаритыгъ».

32– Шъыпкъэ дэдэр шъосэӀо, – ариӀуагъ Исус, – пегъымбар Мусэр арэп уашъом къикӀырэ хьалыгъур къышъозытыгъагъэр, сэ ся Тэ ары уашъом къикӀырэ хьалыгъу шъыпкъэр къышъозытырэр; 33сыда пӀомэ, уашъом къехэу, дунаим ицӀыфмэ щыӀэныгъэ къязытырэр ары Тхьэм ихьалыгъу.

34– А хьалыгъур къытэт зэпыт, тхьэматэ, – къыраӀуагъ ахэмэ.

35– ЦӀыфмэ щыӀэныгъэ язытырэ хьалыгъур сэры, – ариӀуагъ Исус. – Садэжь къакӀорэр мэлакӀэ лӀэжьыщтэп, сэркӀэ шӀошъхъуныгъэ зиӀэр егъашӀэми псыфалӀи лӀэжьыщтэп. 36Ау къызэрэшъосӀуагъэм фэдэу, сэ сышъулъэгъугъэ пэтми, шӀошъхъуныгъэ шъуиӀэ хъурэп. 37Ты лъапӀэм къыситырэ цӀыф пстэухэри садэжь къэкӀощтых, хэт щыщми садэжь къакӀорэри ӀузгъэкӀыжьыщтэп. 38Сыда пӀомэ, сэ сызыфаер згъэцэкӀэнэу арэп уашъом сыкъызфехыгъэр, сыкъэзгъэкӀуагъэр зыфаер згъэцэкӀэныр ары нахь. 39Сэ ся Тэу сыкъэзгъэкӀуагъэр зыфаер ежь цӀыфэу къыситыгъэхэм ащыщэу зи мыкӀодынэу ары, ахърэт мафэми а цӀыфыр къэзгъэтэджыжьыныр ары. 40Шъыпкъэ, хэт щыщми Къо лъапӀэр зылъэгъоу, ежьыркӀэ шӀошъхъуныгъэ зиӀэм мыкӀодыжьын щыӀэныгъэ иӀэ зэрэхъущтыр ары ся Тэ зыфаер; ахърэт мафэми а цӀыфыр къэзгъэтэджыжьыщт.

41«Уашъом къехыгъэ хьалыгъур сэры» Исус зэриӀуагъэм пае, джуртхэм ар агу римыхьэу, 42аӀуагъ:

– Юсыф ыкъоу Исус арыба мыр? Ятэрэ янэрэ тэшӀэ. «Уашъом сыкъехыгъ» ыӀоу, сыдэущтэу къыӀон ылъэкӀыра?

43– Сэ къэсӀуагъэм сыда шъугу зыкӀемыӀурэр? – ариӀуагъ Исус. 44– Ты лъапӀэу сыкъэзгъэкӀуагъэм къысфимыщэмэ, зы цӀыфи садэжь къэкӀон ылъэкӀыщтэп. Садэжь къакӀорэри ахърэт мафэм къэзгъэтэджыжьыщт. 45Пегъымбархэм моущтэу атхыгъ#6:45 пегъымбархэм моущтэу атхыгъ – еплъ Пегъымбар Ешайа тхылъэу ытхыгъэм 54:13.: «Тхьэм зэкӀэмэ ахэмэ шъыпкъэр аригъэшӀэщт». Хэт щыщми Ты лъапӀэм къыӀохэрэм ядэӀоу, ахэр зэзгъашӀэрэр садэжь къэкӀощт. 46Тхьэм щыщ Исус нэмыкӀ Ты ЛъапӀэр зыми ылъэгъугъэп. Ежьыр ары Ты лъапӀэр зылъэгъугъэр. 47Шъыпкъэ дэдэр шъосэӀо, сэркӀэ шӀошъхъуныгъэ зиӀэ хъурэм мыкӀодыжьын щыӀэныгъэ иӀэ хъугъэ. 48ЦӀыфмэ щыӀэныгъэ язытырэ хьалыгъур сэры. 49Шъуятэжъхэм шъоф нэкӀым мэнн гъомылыр щащхыщтыгъ, ау щытми лӀагъэх. 50Ау уашъом къехыгъэ хьалыгъур мары. Зыгорэм ар ышхымэ, лӀэжьыщтэп. 51ЦӀыфмэ щыӀэныгъэ язытырэ хьалыгъоу уашъом къехыгъэр сэры. А хьалыгъум щыщ зышхырэр егъашӀэми щыӀэщт. Дунаим ицӀыфхэм щыӀэныгъэ яӀэ згъэхъуным пае, хьалыгъоу стыщтыр сэ спкъы ары.

52– Мы лӀым ыпкъ сыдэущтэу тигъэшхын ылъэкӀыщт? – аӀуи, джуртхэм лъэшэу зэнэкъокъухэу аублагъ.

53– Шъыпкъэ дэдэр шъосэӀо, – ариӀуагъ Исус ахэмэ, – ЦӀыф Лъэпкъым ы Къо ыпкъ шъумышхэу, ылъи шъуемышъомэ, щыӀэныгъэ шъухэлъыщтэп. 54Сэ спкъы зышхэу, слъи ешъорэм мыкӀодыжьын щыӀэныгъэ иӀэ хъугъэ, ахърэт мафэми сэ ар къэзгъэтэджыжьыщт. 55Сыда пӀомэ, сэ спкъы шхын шъыпкъ, сэ слъи шъон шъыпкъэшъ ары. 56Сэ спкъы зышхэу, слъи ешъорэм ыгу силъ зэпытыщт, ежьыри сыгу илъ зэпытыщт. 57ЩыӀэныгъэ шъыпкъэ къыздикӀырэ Ты лъапӀэм сыкъыгъакӀуи, ищыӀэныгъэ ежь дэжь къызэрикӀырэм фэдэу, сэ спкъы зышхырэм ищыӀэныгъэ садэжь къикӀыщт. 58Мыры уашъом къехыгъэ хьалыгъур. А хьалыгъур шъуятэжъхэм ашхыщтыгъэ мэнн гъомылэм фэдэп. Ар ашхыщтыгъэми, лӀагъэх, ау мы хьалыгъур зышхырэр егъашӀэми щыӀэщт.

59Исус къалэу Капернаум дэт синэгогум чӀэтэу, цӀыфхэм Тхьэм игущыӀэхэр аригъашӀэхэ зэхъум, а гущыӀэхэр къыӀуагъ.

ЦӀыфхэм мыкӀодыжьын щыӀэныгъэ яӀэ зыгъэхъурэ гущыӀэхэр

60Исус къыӀуагъэхэр зызэхаххэм, игъогу рыкӀохэрэм ащыщхэу бэмэ къаӀуагъ:

– Мыщ къыӀохэрэр сыдэу гущыӀэ къинха! Хэт ахэмэ ядэӀун зылъэкӀырэр?

61Исус къыӀуагъэхэм ахэмэ агухэр зэремыӀухэрэр ыгукӀэ ешӀэти, ариӀуагъ:

– Сэ къэсӀуагъэхэр шъугу рихьырэп, ара? 62Ау ЦӀыф Лъэпкъым ы Къо ыпэкӀэ зыдэщыӀагъэм дэкӀоежьэу шъулъэгъумэ, сыда етӀанэ шъуӀощтыр? 63Тхьэм ы Псэ ЛъапӀ ары цӀыфхэм мыкӀодыжьын щыӀэныгъэ къязытырэр. Сэ спкъы шъозгъэшхынэу арэп зыфасӀорэр. Ащ ишӀуагъэ къакӀорэп. ГущыӀэхэу къышъосӀуагъэхэм Тхьэм ы Псэ ЛъапӀи мыкӀодыжьын щыӀэныгъи шъуиӀэхэ къашӀы. 64Ау шӀошъхъуныгъэ зимыӀэхэр къышъухэтых. Исус аущтэу зыкӀиӀуагъэр ахэмэ ащыщхэу шӀошъхъуныгъэ зимыӀэхэри, тетыгъо зиӀэхэм ежь язгъэубытыщтри апэм щегъэжьагъэу ышӀэщтыгъэти ары. 65ЕтӀани Исус къыпигъэхъожьыгъ:

– Джары, «Ты лъапӀэм римыгъэлъэкӀмэ, зы цӀыфи садэжь къэкӀон ылъэкӀыщтэп» зыкӀэсӀуагъэр.

66Ащ щегъэжьагъэу Исус игъогу рыкӀохэрэм ащыщхэу бэхэр игъогу текӀыжьхи, гокӀыжьыгъэх.

67Аущтэу зэхъум, Исус игъогу рыкӀорэ нэбгырэ пшӀыкӀутӀумэ ариӀуагъ:

– Шъори шъузбгъодэкӀыжьынэу шъуфая?

68– Зиусхьан, хэт дэжь тыкӀона, адэ? – къыриӀуагъ Симон Петрэ Исус. – МыкӀодыжьын щыӀэныгъэ тиӀэ зыгъэхъурэ гущыӀэхэр о уиӀэх, 69Христосэу щыӀэныгъэ шъыпкъэ къыздикӀырэ Тхьэм узэры Къор тшӀошъ хъугъэ ыкӀи тшӀагъэ.

70– Шъо пшӀыкӀутӀур, сигъогу шъукъырыкӀонэу шъукъыхэсхыгъэба? Ау щытми, шъуащыщэу зыр джынапцӀ, – ариӀуагъ Исус ахэмэ. 71Исус зыфиӀуагъэр Симон Искариот ыкъоу Иудэ ары. Ар Исус игъогу рыкӀорэ нэбгырэ пшӀыкӀутӀумэ ащыщыгъэми, нэужым Исус тетыгъо зиӀэхэм язгъэубытыщтыр ары.

Selectat acum:

Иуан 6: AdgNT14

Evidențiere

Partajează

Copiază