Иуан 18
18
ЯПШӀЫКӀОЕНЭРЭШЪХЬ
Исус зэраубытыгъэр
(Маттэ 26:47-56; Марк 14:43-50; Лука 22:47-53)
1Исус а гущыӀэхэр къызеӀохэ ужым, дэкӀи, игъогу рыкӀохэрэр игъусэхэу Кедрон зыцӀэ къуладжэм зэпырыкӀыгъ. Ащ дэжьым хатэ горэ Ӏулъыгъ. Исусрэ игъогу рыкӀохэрэмрэ а хатэм дэхьагъэх.
2Иудэу Исус тетыгъо зиӀэхэм язгъэубытыщтым а чӀыпӀэр ышӀэщтыгъ, сыда пӀомэ, Исусрэ игъогу рыкӀохэрэмрэ а чӀыпӀэм бэрэ щызэӀукӀэщтыгъэх. 3Джаущтэу дзэлӀ купрэ къэрэгъулэ купэу дин пэщэшхохэми фарисейхэми агъэкӀуагъэмрэ Иудэ зыдищагъэх. Ахэр машӀо зыхэгъэнэгъэ бэщхэри, остыгъэхэри, Ӏашэхэри аӀыгъхэу къэкӀуагъэх.
4Исус къехъулӀэщтыр зэкӀэ ешӀэти, апэгъокӀи, яупчӀыгъ:
– Хэта шъузлъыхъурэр?
5– Назарет щыщ Исус ары, – къыраӀуагъ ахэмэ.
– Сэры ар, – ариӀуагъ Исус. Иудэу Исус ахэмэ язгъэубытыщтыр ахэтыгъ.
6«Сэры ар», – Исус зареӀом, зэкӀакӀохи, ахэмэ чӀыгум зырадзыхыгъ.
7– Хэта шъузлъыхъурэр? – яупчӀыгъ джыри зэ Исус.
– Назарет щыщ Исус ары, – къыраӀожьыгъ ахэмэ.
8– Сэры ар шъосӀуагъэба? – ариӀуагъ Исус. – Сэрымэ шъузлъыхъурэр, сигъусэхэм зи яшъумышӀэу, орэкӀожьых!
9Исус аущтэу зыфиӀуагъэр ежь мы гущыӀэхэу Ты лъапӀэм риӀогъагъэхэр къэшъыпкъэжьынхэр ары:
– О сӀэ къиплъхьэгъэ цӀыфхэм ащыщэу зи згъэкӀодыгъэп.
10Симон Петрэ чатэ зыдиӀыгъыгъэти, ар къырихи, дин пэщэшхом иунэӀут еуи, иджабгъу тхьакӀумэ гуиупкӀыгъ. А унэӀутым ыцӀагъэр Малх.
11– Чатэр сапӀэм илъхьажь, – риӀуагъ Петрэ Исус. – Ты лъапӀэм къыситыгъэ къиным ишъуалъэ итым сешъон фаеба?
Исус дин пэщэшхом ыпашъхьэ зэрэращагъэр
(Маттэ 26:57-58; Марк 14:53-54; Лука 22:54)
12ЕтӀанэ дзэ пащэр ягъусэу дзэлӀ купымрэ джурт къэрэгъулэхэмрэ Исус аубыти, Ӏэхъу тыралъхьагъ. 13Ыпэ рапшӀэу Аннэ#18:13 Аннэ – Исус къызэхъу нэужым я 6-15 илъэсхэм къакӀоцӀ Аннэ дин пэщэшхуагъ. Кайафэу Аннэ ыпхъу илӀ я 18-36 илъэсхэм къакӀоцӀ дин пэщэшхуагъ. зыцӀэм дэжь ащагъ. Кайафэу а илъэсым дин пэщэшхуагъэм ишӀупщыгъ Аннэр. 14А Кайафэ ары адрэ джуртхэм агурызгъаӀозэ, моущтэу языӀогъагъэр: «Тэ тлъэпкъ зэкӀэ лӀэным нахьи, нэбгырэ закъо лӀэмэ, нахьышӀу».
Петрэ Исус зыщыщыр ымышӀэу къызэриӀуагъэр
(Маттэ 26:69-70; Марк 14:66-68; Лука 22:55-57)
15Симон Петрэрэ Исус игъогу рыкӀохэрэм ащыщэу нэмыкӀ горэмрэ Исус кӀэлъыкӀощтыгъэх. А лӀэу Исус игъогу рыкӀорэр дин пэщэшхом инэӀосагъэти, Исус игъусэу дин пэщэшхом ищагу дэхьагъ. 16Ау Петрэ дэмыхьэу, къэлэпчъэ кӀыбым къэнагъ. Ащ нэужым Исус игъогу рыкӀорэ лӀэу дин пэщэшхом инэӀуасэр къыдэкӀыжьи, пчъэӀут пшъашъэм дэгущыӀи, Петрэ щагум дищагъ.
17– Ори а лӀым игъогу рыкӀохэрэм уащыщба? – къыриӀуагъ пчъэӀут пшъашъэм Петрэ.
– Хьау, сэ ахэмэ сащыщэп, – ыӀуагъ Петрэ.
18ЧъыӀагъэти, унэӀутхэмрэ адрэ лӀыхэмрэ шӀомыкӀ машӀо ашӀыгъэу, зырагъэоу щытыгъэх. Петри ахэмэ задыригъэоу ахэтыгъ.
Дин пэщэшхор Исус зэреупчӀыгъэр
(Маттэ 26:59-66; Марк 14:55-64; Лука 22:66-71)
19Джащыгъум дин пэщэшхор Исус къеупчӀыгъ:
– О уигъогу рыкӀохэрэр хэтха? Ӏофхэу цӀыфхэм ябгъашӀэхэрэр сыдха?
20– Шъэф хэмылъэу дунаим ицӀыфмэ садэгущыӀэщтыгъ, – джэуап ритыжьыгъ Исус. – Синэгогуми, Тхьэм иунэшхуи, джуртхэр зэкӀэ зыщызэӀукӀэхэрэми, цӀыфхэм Тхьэм игущыӀэхэр щязгъэшӀэ зэпытыщтыгъ. Шъэфэу зи сӀуагъэп. 21Сыда сэ укъызкӀысэупчӀырэр? ГущыӀэхэу ясӀуагъэхэр зэхэзыхыгъэмэ яупчӀ. Ахэмэ гущыӀэу сӀуагъэхэр ашӀэба?
22Исус аущтэу къызеӀом, къэрэгъулэхэм ащыщэу пэгъунэгъум, Исус къенэпэшъуауи, ыӀуагъ:
– Дин пэщэшхом сыдэущтэу удэгущыӀэра?
23– Мыхъун къэсӀуагъэмэ, къысэгъэлъэгъу, – риӀуагъ Исус. – Ау шъыпкъэр къэсӀуагъэмэ, сыд пае укъысаора?
24Исус Ӏэхъу телъэу дин пэщэшхоу Кайафэ дэжь Аннэ дзэлӀхэм итӀанэ аригъэщэгъагъ.
Петрэ Исус зыщыщыр ымышӀэу джыри зэ зэриӀуагъэр
(Маттэ 26:71-75; Марк 14:69-72; Лука 22:58-62)
25Ащ нэсыфэ Симон Петрэ машӀом Ӏутэу зыригъэущтыгъ.
– Ори а лӀым игъогу рыкӀохэрэм уащыщба? – къыраӀуагъ адрэхэм.
– Хьау, сэ ахэмэ сащыщэп, – ыӀуагъ Петрэ афемыуцолӀэжьэу.
26Дин пэщэшхом иунэӀутхэм ащыщэу зытхьакӀумэ Петрэ гуиупкӀыгъэм иблагъэ горэм къыӀуагъ:
– А лӀым уригъусэу хатэм удэслъэгъуагъэба?
27– Хьау, ар шъыпкъэп, – ыӀуи, Петрэ джыри зэ еуцолӀэжьыгъэп. Ардэдэм атакъэр къэӀуагъ.
Исус Пилат Ӏэшъхьэтетым ыпашъхьэ зэрэращагъэр
(Маттэ 27:1-2, 11-14; Марк 15:1-5; Лука 23:1-5)
28Ащ нэуж Кайафэ иунэ Исус ращыжьи, рим Ӏэшъхьэтетым иунэшхоу преторие зыцӀэм чӀащагъ. Нэф шъыгъагъэ. А джуртхэр преторием чӀэхьагъэхэп, сыда пӀомэ, Ӏутыжъ мэфэкӀ мэфэшхо пчыхьэшъхьашхэр ашӀышъуным пае, мыкъабзэ зашӀыным фэягъэхэп#18:28 мыкъабзэ зашӀыным фэягъэхэп – джуртхэм ядин зымылэжьырэ цӀыф горэм иунэ зихьэхэкӀэ, мыкъабзэ хъугъэхэу ашӀошӀы.. 29Арыти, Ӏэшъхьэтет Пилат#18:29 Пилат – рим цӀыфхэм ащыщэу, Понтый Пилат, Исус къызэхъу нэужым я 26-36 илъэсхэм къакӀоцӀ, хэкухэу Иудей, Самарие, Идумей яӀэшъхьэтетыгъ. преторием къычӀэкӀи, къяупчӀыгъ:
– Мы лӀыр сыда зэрыжъугъэмысэрэр?
30– Мы лӀым бзэджагъэ ымышӀагъэмэ, уадэжь къэтщэщтыгъэп, – раӀожьыгъ ахэмэ.
31– Шъо шъущэжьи, шъуихабзэ тетэу ышӀагъэм фэшъуашэу хьыкум тешъушӀыхь! – къариӀуагъ Пилат.
– Тэ зыгорэм укӀ тетлъхьан тыфитэп, – раӀуагъ джуртмэ Пилат. 32Аущтэу зыкӀэхъугъэр Исус лӀакӀэ фэхъущтыр#18:32 лӀакӀэ фэхъущтыр – рим цӀыфхэм къащхэм атыраӀулӀэхэзэ, бзэджашӀэхэр агъалӀэщтыгъэх. Еплъ 3:14. «ЦӀыф Лъэпкъым ы Къо аӀэтын фае» Исус зыфиӀогъэ гущыӀэхэм къаригъэкӀыгъэр ежь къащым зэрэтыраӀулӀэщтыр ары. Джуртхэм гъэлӀакӀэу яӀагъэр мыжъохэмкӀэ еохэзэ, агъэлӀэныр арыгъэ. агуригъэӀоным пае, къыӀогъэгъэ гущыӀэхэр къэшъыпкъэжьынхэр ары.
33Джащыгъум Пилат джыри преторием чӀэхьажьи, Исус чӀаригъащи, риӀуагъ:
– Джуртхэм уряпачъыхьа?
34– Ар ор-орэу къэоӀуа, хьауми нэмыкӀхэр къыбдэгущыӀэхэзэ, сэ къысэхьылӀагъэу аӀуагъа? – къыӀожьыгъ Исус.
35– Сэ сыджурта? – джэуап къытыжьыгъ Пилат. – О плъэпкъырэ дин пэщэшхохэмрэ укъысфащагъ. Сыда пшӀагъэр?
36– Сипачъыхьагъу мы дунаим щыщэп, – пэгъокӀ къытыжьыгъ Исус. – Сипачъыхьагъу мы дунаим щыщыгъэмэ, джуртхэм саӀэкӀэмыфэным пае, къысфэлажьэхэрэр заощтыгъэх. Ау сэ сипачъыхьагъу мы дунаим щыщэп.
37– О упачъыхь ащыгъум? – еупчӀыгъ Пилат Исус.
– Ары, къызэрэпӀорэм фэд#18:37 «Ары, къызэрэпӀорэм фэд сэ сыпачъыхь» – е «о пшъхьэкӀэ къэоӀо сэ сызэрэпачъыхьэр»., сэ сыпачъыхь, – къыӀожьыгъ Исус. – Шъыпкъэ, сэ сыкъызфэхъугъэри, дунаим сыкъызфытехьагъэри шъыпкъэр къэсыушыхьатыныр ары. Хэтми шъыпкъэм ыуж итыр сигущыӀэ къедэӀущт.
38– Шъыпкъэу зыфапӀорэр сыда? – еупчӀыгъ Исус Пилат.
Исус укӀ зэрэтыралъхьагъэр
(Маттэ 27:15-31; Марк 15:6-20; Лука 23:13-25)
Пилат ар къызэреӀоу, джыри джуртмэ адэжь чӀэкӀи, ариӀуагъ:
– Мы лӀыр зэрызгъэмысэн езгъотылӀэрэп. 39Ау Ӏутыжъ мэфэкӀ мэфэшхо къэс, хьапсчӀэс горэ къышъуфэстӀупщыжьыныр шъуихабзэ. Арышъ, «Джуртхэм япачъыхь» зыфаӀорэр къышъуфэстӀупщыжьыным шъуфая?
40– Мы лӀыр арэп тызыфаер, Бараббэ шъхьафит къытфэшӀыжь! – аӀозэ къэзэрэгъэкууагъэх ахэр. Бараббэ зыцӀэр хъункӀэкӀуагъ.
Selectat acum:
Иуан 18: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
