Иуан 15
15
ЯПШӀЫКӀУТФЭНЭРЭШЪХЬ
Сэнэшъхьэ къулэ шъыпкъэр – Исус
1– Сэнэшъхьэ къулэ шъыпкъэр сэры, сэнэшъхьэшӀэри ся Т ары. 2Сикъутамэхэм ащыщэу зи къызпымыкӀэрэр пеупкӀы. Сыдрэ къутамэуи къызпыкӀэрэр еукъэбзы, нахьыбэ къыпыкӀэным пае. 3ГущыӀэхэу шъосӀуагъэхэмкӀэ шъо шъугухэр укъэбзыгъахэх. 4Сэ шъугухэм сарыжъугъэлъ зэпыт, шъори сыгу шъуилъ зэпытыщт. Къутамэр сэнэшъхьэ къулэм пымытмэ, зи къызэрэпымыкӀэшъущтым фэдэу, шъори шъугухэм сарышъумыгъэлъ зэпытмэ, шӀугъэ къышъупыкӀыщтэп. 5– Сэнэшъхьэ къулэр сэры, къутамэхэри шъоры. ЦӀыф горэм ыгу сэ силъ зэпытэу, ежьыри сыгу илъ зэпытмэ, а цӀыфым бэу шӀугъэ къыпыкӀыщт; сыда пӀомэ, сэ сышъуимыгъусэмэ, зи шъушӀэн шъулъэкӀыщтэп. 6ЦӀыф горэм ыгу симылъ зэпытмэ, къутамэм фэдэу ар чӀадзыжьынышъ, гъужьыщт. Ащ фэдэ къутамэхэр аугъоинхэшъ, машӀом падзэнхэшъ, агъэстыжьыщтых. 7Шъо шъугухэм сарылъ зэпытэу, сигущыӀэхэри шъугухэм арылъ зэпытхэмэ, сыдми шъузыфаемкӀэ ся Тэ шъуелъэӀу, ащыгъум шъузэрелъэӀурэри шъуиӀэ хъущт. 8ЦӀыфмэ сэ ся Тэ щытхъушхо зэрэфяжъугъэшӀыщтыр шъо бэу шӀугъэ къызэрэшъупыкӀырэр ары. Аущтэу сигъогу шъузэрэрыкӀорэр къэжъугъэлъэгъощт.
9– Ты лъапӀэм шӀу сызэрилъэгъугъэм фэдэу, сэри шъо шӀу шъуслъэгъугъ. СишӀулъэгъуныгъэ зыхэшъумыгъэн. 10Сиунашъохэр зыжъугъэцакӀэхэкӀэ, шӀу шъуслъэгъу зэпытыщт, сэри ся Тэ иунашъохэр зэрэзгъэцэкӀагъэхэм пае, ащ шӀу сызэрилъэгъу зэпытрэм фэдэу. 11А Ӏофхэр къызфышъосӀуагъэхэр сигушӀуагъо шъугухэм арылъынышъ, шъуигушӀуагъуи икъугъэ хъуныр ары. 12Мыры сиунашъо: Сэ шӀу шъузэрэслъэгъугъэм фэдэу, шъори шӀу шъузэрэлъэгъун фае. 13ЦӀыфэу ежь иныбджэгъухэм апае зыпсэ зытырэм ишӀулъэгъуныгъэ нахь шӀулъэгъуныгъэшхо щыӀэп. 14Сиунашъохэр шъогъэцакӀэхэмэ, шъори шъусиныбджэгъу. 15Джы шъо ӀофтабгэхэкӀэ сышъоджэжьрэп, сыда пӀомэ, Ӏофтабгэм ежь итхьэматэ игухэлъ ышӀэрэп. Сэ шъо синыбджэгъухэкӀэ сышъоджагъ, сыда пӀомэ, ся Тэ къыӀохэу зэхэсхыгъэхэр зэкӀэ къышъуфэсӀотэжьыгъэх. 16Шъо сэ сыкъыхэшъухыгъэп, ау шъо шъукъыхэсхыгъ. Шъо шъукӀонышъ, шӀугъэ къышъупыкӀынышъ, а шӀугъэри къэнэжьынэу згъэнэфагъэ. Джащыгъум сэ сцӀэкӀэ сыд щыщкӀи Ты лъапӀэм шъуелъэӀумэ, къышъуфишӀэщт. 17ШӀу шъузэрэлъэгъуныр ары унашъоу къышъуфэсшӀырэр.
Дунаим ицӀыфхэм Исус игъогу рыкӀохэрэр зэрауджэгъухэрэр
18– Дунаим ицӀыфхэм шъуауджэгъумэ, шъо шъуауджэгъуным ыпэкӀэ, сэри сызэрауджэгъугъэр зыщышъумыгъэгъупш. 19Мы дунаим шъущыщыгъэмэ, мы дунаим ицӀыфхэм ежьхэм афэдэу шӀу шъуалъэгъущтыгъ. Джы зэрэщытымкӀэ, мы дунаим шъущыщэп, ау мы дунаим шъуиӀахь хэмылъынэу шъо шъукъыхэсхыгъ. Джары дунаим ицӀыфхэм шъузыкӀауджэгъурэр. 20Сэ къышъосӀогъэ гущыӀэхэр зыщышъумыгъэгъупшэх: Ӏофтабгэр итхьэматэ нахьи нахь инэп. Сэ къин сагъэщэчыгъ, шъори къин шъуагъэщэчыщт. Сэ сигущыӀэхэм ядэӀугъэхэмэ, шъо шъуигущыӀэхэми ядэӀущтых. 21Ау сэ сцӀэ зэрэжъугъэлъапӀэрэм пае, а бзэджагъэ пстэури къышъуашӀэщт, сыда пӀомэ, сэ сыкъэзгъэкӀуагъэр ашӀэрэпышъ ары. 22Сэ сыкъакӀуи, сигущыӀэхэр ясымыӀуагъэхэмэ, псэкӀод яӀэщтыгъэп, ау джы псэкӀодэу ашӀагъэхэм апае фэгъэгъу зи яӀэп. 23Сэ сызыуджэгъурэм ся Ти еуджэгъу. 24Сэщ нэмыкӀ зыми ымыгъэцэкӀэгъэ Ӏофышхохэр ахэмэ апашъхьэ щысымышӀагъэхэмэ, ахэмэ псэкӀод яӀэщтыгъэп. Ау джы а Ӏофышхохэу сэ сшӀагъэхэр алъэгъугъэхэ пэтми, сэри ся Ти тауджэгъу. 25Ау аущтэу зыфэхъун фаер мы гущыӀэхэу ахэмэ я Тэурат хабзэ итхэр#15:25 я Тэурат хабзэ итхэр – яплъ Орэд ЛъапӀэхэм 68:5. къэшъыпкъэжьынхэр ары: «Сэ лажьэ симыӀэ пэтми, сауджэгъугъ».
26– Ау Ты лъапӀэм дэжь къикӀэу шъуигукъао Шъушъхьэщызыхыжьрэр къышъуфезгъэхыщт. Ар Ты лъапӀэм дэжь къикӀэу, Тхьэм ы Псэ ЛъапӀэу цӀыфхэм шъыпкъэр язгъашӀэрэр ары. Ар къызыкӀокӀэ, шыхьат сэ къысфэхъущт. 27Шъори шыхьат шъукъысфэхъущт, сыда пӀомэ, апэм щегъэжьагъэу шъусигъусагъэшъ ары.
Selectat acum:
Иуан 15: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
