Апостолхэм ашӀэгъэ Ӏофхэр 5
5
ЯТФЭНЭРЭШЪХЬ
Ананыйрэ Сапфирэрэ якъэбар
1Ананый ыцӀэу лӀы горэ щыӀагъ. Ежьыррэ ишъхьэгъусэу Сапфирэрэ мылъку горэ ащагъ. 2Шъузым ышӀэзэ, Ананый мылъкум кӀэкӀыгъэм щыщ ежь пае тӀэкӀу хихи, къэнагъэр апостолхэм апашъхьэ рилъхьагъ.
3– Ананый, – къыӀуагъ Петрэ, – Тхьэм ы Псэ ЛъапӀэ пцӀы фэуусынэуи, чӀыгум ыуасэ щыщ ощ пае хэпхынэуи шэйтаным угу къырилъхьанэу сыдэущтэу хъугъа? 4ЧӀыгур пщэным ыпэкӀэ орыба зиягъэр? Зыощэм ыуж ахъщэм узыфаер епшӀэн плъэкӀыщтыгъэба? Мыщ фэдэу пшӀэнэу сыд пае угу къэбгъэкӀыгъ? ПцӀы зыфэуусыгъэр цӀыфхэр арэп, Тхьэр ары нахь.
5Ананый а гущыӀэхэр зызэхехым, зэхафи, ыпсэ хэкӀыгъ. Хъугъэ-шӀагъэр зэхэзыхыгъэхэр зэкӀэ щынэгъошхом хэфагъэх. 6КӀэлэ ныбжьыкӀэ куп къакӀуи, ихьадэ чэфын ращэкӀи, унэм рахыжьи, къэхалъэм щычӀалъхьажьыгъ.
7Сыхьэтищ фэдиз тешӀагъэу, къэхъугъэр ымышӀэу Ананый ишъхьэгъусэ унэм къихьагъ.
8– КъысаӀу, – риӀуагъ Петрэ, – чӀыгур мыщ фэдиз ахъщэкӀэ шъущагъа?
– Ары, ащ фэдиз ахъщэр ары зэрытщагъэр, – къыӀуагъ бзылъфыгъэм.
9– Сыд пае Зиусхьаным ы Псэ ЛъапӀэ шъууплъэкӀунэу шъузэрэгъэгугъэжьыгъа? – риӀуагъ Петрэ. – Еплъ, уилӀ ихьадэ къэм чӀэзылъхьажьыгъэхэр пчъэӀупэм Ӏутых, о уихьади рахыжьыщт.
10Ардэдэм бзылъфыгъэр Петрэ ылъакъохэм адэжь щызэхафи, ыпсэ хэкӀыгъ. КӀэлэ ныбжьыкӀэхэр къызехьэхэм, ари лӀагъэу щылъыгъ. Ихьадэ унэм рахыжьи, дахи, ишъхьэгъусэ бгъодэлъэу чӀалъхьажьыгъ.
11Чылыс зэӀукӀэм щыщ пстэури, хъугъэ-шӀагъэхэр зэхэзыхыгъэ пстэури щынэгъошхом хэфагъэх.
Апостолхэм Ӏофышхо гъэшӀэгъон Ӏаджи зэрашӀагъэр
12Апостолхэм цӀыфхэм апашъхьэ нэшэнэ гъэшӀэгъон Ӏаджи къыщагъэлъагъощтыгъ, Ӏофышхо гъэшӀэгъон Ӏаджи щашӀэщтыгъ. ШӀошъхъуныгъэ зиӀэ пстэуми зэдаштэу, пачъыхьэ Сэлмэн ыцӀэкӀэ заджэхэрэ щагоу шъхьэ зытелъ къэлапчъэхэр зиӀэм щызэӀукӀэщтыгъэх. 13ШӀошъхъуныгъэ зиӀэхэм ахэхьанхэу цӀыфхэм загъэгушхощтыгъэп, ау лъытэныгъэ афыряӀагъ. 14Ащ имызакъоу, цӀыф нахьыбэ, хъулъфыгъэхэми бзылъфыгъэхэми, ЗиусхьанымкӀэ шӀошъхъуныгъэ яӀэ хъоу, агохьэ зэпытыщтыгъэх. 15Арышъ, Петрэ зыблэкӀыкӀэ, зи мыхъуми, иныбжьыкъу сымаджэхэм ащыщхэм къатыридзэным пае, цӀыфхэм ясымаджэхэр пӀэхэми пӀуаблэхэми ателъхэу къахьыхэти, урамхэм къатыралъхьащтыгъэх. 16Ерусалим игъунэгъу къалэхэми цӀыфыбэхэр къарыкӀыхэти, ясымаджэхэмрэ джынэпцӀэ Ӏаехэм рагъэзыгъэхэмрэ къахьыщтыгъэх. Апостолхэм ахэр зэкӀэ агъэхъужьыщтыгъэх.
Джурт тхьэматэхэм апостолхэм къин зэрарагъэщэчыгъэр
17ЕтӀанэ дин пэщэшхомрэ дин пэщэшхом игъусэ пстэухэмрэ шъугъоныр агу къихьагъ. Дин пэщэшхом игъусэхэр диныр зылэжьырэ цӀыф купэу саддукей купкӀэ заджэхэрэм щыщыгъэх. 18Апостолхэр аубытхи, къалэм ихьапс чӀадзагъэх. 19Ау чэщым Зиусхьаным имэлэӀич хьапсым ипчъэхэр Ӏуихыхи, ахэр къычӀищыжьхи, къыӀуагъ:
20– ШъукӀожьи, Тхьэм иунэшхо шъучӀахьи, мы щыӀэныгъэ лъапӀэм икъэбар зэкӀэ цӀыфмэ яшъуӀуат.
21Апостолхэр едэӀухи, нэф къызэшъым, Тхьэм иунэшхо чӀахьэхи, а къэбарыр цӀыфхэм арагъашӀэу аублагъ. Дин пэщэшхомрэ ащ игъусэхэмрэ къызэкӀохэм, Тхьэмэтэ Хэсэшхом хэтхэм (израиль цӀыфмэ янахьыжъхэр ары) къяджэхи, апостолхэр къащэнхэм пае къэрэгъулэхэр хьапсым агъэкӀуагъэх. 22Ахэр хьапсым зэкӀохэм, апостолхэр агъотыгъэхэпти, къагъэзэжьи, къаӀуагъ:
23– Хьапсыр пытэу гъэпытагъэу, къэрэгъулэхэри пчъэхэм аӀутхэу къэдгъотыгъ, ау пчъэхэр Ӏутхи, тызычӀахьэм, зи чӀэдгъотагъэп.
24Тхьэм иунэшхо икъэрэгъулэхэм ятхьэматэмрэ дин пэщэшхохэмрэ ар зызэхахым, зыфахьын ашӀагъэп.
25Джащыгъум зыгорэ къакӀуи, хъугъэр ахэмэ къариӀуагъ:
– Шъо хьапсым чӀэшъудзэгъэгъэ лӀыхэр Тхьэм иунэшхо чӀэтхэу, цӀыфхэр Исус икъэбар фагъасэх.
26Ар зареӀом, лӀыхэр игъусэу къэрэгъулэхэм ятхьэматэ кӀуи, апостолхэр къащагъэх, ау лӀыгъэкӀэ къащагъэхэп, сыда пӀомэ, цӀыфхэр мыжъохэмкӀэ къяонхэшъ, аукӀынхэм щыщынэщтыгъэхэти ары.
27Апостолхэр къащэхи, Тхьэмэтэ Хэсэшхом ыпашъхьэ ращагъэх. Дин пэщэшхор яупчӀэу ыубли, моущтэу ыӀуагъ:
28– «Мы лӀым ыцӀэкӀэ цӀыфхэм зи яшъумыгъашӀ!» тӀуи, унэшъо пытэ къышъуфэтшӀыгъэба? Ау шъо цӀыфхэр зыфэжъугъасэхэрэ къэбархэр Ерусалим диз шъушӀыгъэ. Джы мы лӀым ылъ къыттежъугъэфэн шъугу хэлъ.
29– ЦӀыфхэм анахьи Тхьэм нахь тедэӀун фае, – пэгъокӀ къатыжьыгъ Петрэрэ адрэ апостолхэмрэ. 30– Тятэжъхэм я Тхьэ Исус лӀагъэхэм къахигъэтэджыкӀыжьыгъ. Ар шъо пкъэум ешъуӀулӀи, шъуукӀыгъэ. 31Исус израиль цӀыфхэр япсэкӀодшӀагъэхэм афыкӀигъэгъожьынхэшъ, къафэгъунхэм пае, Тхьэм Исус Зиусхьанэу ыкӀи КъэгъэнэжьакӀоу уашъом дищэежьи, ежь иджабгъукӀэ зыгуигъэтӀысхьагъ. 32Тэри Тхьэм ы Псэ ЛъапӀи мы Ӏоф пстэуми тыряшыхьат. Тхьэм ежь ы Псэ ЛъапӀэ ежь фэӀорышӀэрэ цӀыфхэм агухэм къарелъхьэ.
33Тхьэмэтэ Хэсэшхом хэтхэм ар зызэхахым, къызэкӀэплъыхьэхи, апостолхэр аукӀы ашӀоигъо хъугъэх. 34Ау фарисей горэ, Гамалиил ыцӀэу, цӀыф пстэуми лъытэныгъэ зыфыряӀэ Тэурат егъэджэкӀо пащэр Тхьэмэтэ Хэсэшхом хэсэу къэтэджи, апостолхэр унэм тӀэкӀукӀэ чӀащынхэу унашъо ышӀыгъ. 35ЕтӀанэ Тхьэмэтэ Хэсэшхом хэтхэм ариӀуагъ:
– Израиль лӀыхэр, мыхэмэ яшъушӀэщтымкӀэ шъузфэсакъыжь, 36сыда пӀомэ, бэмышӀэу Фебдэ ыцӀэу, лӀы горэ щыӀагъ. Ежь лӀы инэу цӀыфхэм ашӀуигъэшӀэу, нэбгырэ шъиплӀ фэдиз гъусэ къыфэхъугъ, ау цӀыфхэм ар аукӀыгъ, игъусэхэри зэбгырыкӀыжьхи, кӀодыжьыгъэх. 37Ащ къынэуж цӀыфхэм япчъагъэ залъытэм, Иудэ зыцӀэ лӀэу Галилей хэкум щыщыр къэтэджи, цӀыф Ӏэджи гъусэ къыфэхъугъ. ЦӀыфхэм ари аукӀыгъ, игъусэ пстэури зэбгырыкӀыжьыгъэх. 38Джы мыр шъосэӀо: «Мы лӀыхэм ауж шъуикӀыжьи, шъутӀупщыжьых. Ахэмэ ягухэлъри яӀофи къызхэкӀырэр цӀыфыр арымэ, кӀодыжьыщт. 39Ау яӀоф къызхэкӀырэр Тхьэр арымэ, ахэр жъугъэуцунхэ шъулъэкӀыщтэп. Шъузфэсакъыжь, Тхьэм шъупэуцоу къычӀэкӀынкӀи мэхъу».
40Аущтэу Гамалиил къыӀуагъэхэм ядэӀугъэх. ЕтӀанэ апостолхэм къяджэжьхи, къамыщкӀэ яуагъэх. Ащ нэужым Исус ыцӀэкӀэ цӀыфмэ зи арамыӀонэу унашъо афашӀи, атӀупщыжьыгъэх.
41Аущтэу Исус ыцӀэкӀэ лые къарахынэу Тхьэм къызэрафигъэшъошагъэм щыгушӀукӀхэу, апостолхэр Тхьэмэтэ Хэсэшхо унэм къычӀэкӀыжьыгъэх. 42Мафэ къэси Тхьэм иунэшхуи унэхэми цӀыфхэм Тхьэм игущыӀэхэр щарагъашӀэ зэпытыщтыгъ, къэбарышӀоу Исусыр зэрэ Христосри цӀыфхэм арагъэӀу зэпытыщтыгъ.
Selectat acum:
Апостолхэм ашӀэгъэ Ӏофхэр 5: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
