Апостолхэм ашӀэгъэ Ӏофхэр 4
4
ЯПЛӀЭНЭРЭШЪХЬ
Тхьэмэтэ Хэсэшхом ыпашъхьэ Петрэрэ Иуанрэ зэрэращагъэхэр
1Петрэрэ Иуанрэ цӀыфхэм адэгущыӀэхэзэ, дин пащэхэр, Тхьэм иунэшхо икъэрэгъулэхэм ятхьэматэ, саддукейхэр#4:1 саддукейхэр – дин пащэхэм ащыщхэу, диныр зылэжьхэу лӀагъэхэр къызэрэтэджыжьыщтхэр зышӀошъ мыхъухэрэ тхьэмэтэ купыгъ. Ахэмэ тхылъ лъапӀэхэу алъытагъэхэр Тэурат хабзэм ит тхылъитфыр ары ныӀэп. лъэшэу губжыгъэхэу итӀум къабгъодэхьагъэх; 2сыда пӀомэ, Петрэрэ Иуанрэ цӀыфхэм Тхьэм игущыӀэхэр арагъашӀэхэу, Исус лӀагъэхэм къызэрахэтэджыкӀыжьыгъэм пае, лӀагъэхэр къызэрэтэджыжьыщтхэмкӀэ макъэ агъэӀущтыгъэти ары. 3Аущтэу ахэмэ Петрэрэ Иуанрэ аубытхи, пчыхьэ хъугъахэти, ятӀонэрэ мафэм нэс хьапсым чӀагъэсыгъэх. 4Петрэрэ Иуанрэ къэбарэу агъэӀурэр зэхэзыхыгъэхэм ащыщхэу бэмэ ИсускӀэ шӀошъхъуныгъэ яӀэ хъугъэ. Ахэмэ япчъагъэ нэбгырэ минитф фэдиз хъугъэ.
5ЯтӀонэрэ мафэм джурт тхьэматэхэр, нахьыжъхэр#4:5 нахьыжъхэр – лъытэныгъэ зиӀэ джурт дин тхьэмэтэ купыгъэх. Ахэмэ ащыщхэу заулэ Тхьэмэтэ Хэсэшхом хэтыгъэх., Тэурат егъэджэкӀо пащэхэр#4:5 Тэурат егъэджэкӀо пащэхэр – Тэурат хабзэм итхэмрэ джуртхэм адрэ тхылъ лъапӀэхэу яӀэхэм арытхэмрэ цӀыфхэм агурызгъаӀощтыгъэ пащэхэр ары. Ерусалим щызэӀукӀагъэх. 6Дин пэщэшхоу#4:6 дин пэщэшхор – дин пащэхэм ятхьэмэтагъ, Тхьэмэтэ Хэсэшхоми итхьэмэтагъ. Аннэ#4:6 Аннэ – Исус къызэхъу нэужым я 6-15 илъэсхэм къакӀоцӀ дин пэщэшхуагъ. зыцӀэр ащ дэжьым щыӀагъ, етӀанэ Кайафэ#4:6 Кайафэ – Аннэ имахъулъ, Исус къызэхъу нэужым я 18-36 илъэсхэм къакӀоцӀ дин пэщэшхуагъ., Иуан, Александр, нэмыкӀ лӀыхэу дин пэщэшхом иунагъо щыщхэр ащ щыӀагъэх. 7Ахэмэ Петрэрэ Иуанрэ утыгум къыращэхи, яупчӀыгъэх:
– Сыд фэдэ лъэкӀыкӀэ е хэт ыцӀэкӀэ а лӀыр хъужьыгъа?
8Ар заӀом, Тхьэм ы Псэ ЛъапӀэ Петрэ ыгу инэу илъ хъуи, ариӀуагъ:
– Шъо тэ тлъэпкъ итхьэматэхэри, инахьыжъхэри! 9ЛӀэу зылъакъохэм атеуцон зымылъэкӀыщтыгъэм тэ шӀоу фэтшӀагъэм иӀоф шъухаплъэзэ, «Сыдэущтэу ар хъужьыгъа?» шъуӀозэ, непэ шъукъытэупчӀы. 10Арышъ, шъо зэпстэуми, Израиль лъэпкъым зэкӀэ мыр зэжъугъашӀэ: къалэу Назарет щыщ Исус Христос ыцӀэ илъэкӀ ары мы лӀыр зыгъэхъужьыгъэр, ащ ишӀушӀэкӀэ ар шъуапашъхьэ ит. Исус ары къащым тешъуӀулӀагъэр, ау Тхьэм ар лӀагъэхэм къахигъэтэджыкӀыжьыгъ. 11Ежьыр ары «Унэ зышӀыхэрэм зэрамыпэсэу чӀадзыжьыгъэ мыжъор
унэр зыӀыгъырэ лъэпсэ дэдэ хъугъэ»#4:11 Яплъ Орэд ЛъапӀэхэм 117:22..
12– ЦӀыфхэр мыкӀодхэу къэзгъэнэжьырэ закъор Исус ары. Тхьэм уашъом ычӀэгъ чӀэт цӀыфхэм аритыгъэу ащ ыцӀэ нэмыкӀ тымыкӀодэу тыкъэзгъэнэжьын зылъэкӀын зи щыӀэп.
13Джурт тхьэматэхэм Петрэрэ Иуанрэ ягушхоныгъэ залъэгъум, лӀы къызэрыкӀохэу гъэсэныгъэ зэрямыӀэм гу зылъатэм, агъэшӀэгъуагъ, Исус зэригъусагъэхэри къашӀэжьыгъ. 14Ау а лӀэу агъэхъужьыгъэр ахэмэ ягъусэу ащ дэжьым щытэу алъэгъугъэти, ащ нахьыбэ араӀожьын алъэкӀыгъэп. 15Аущтэу зэхъум, Синедрион#4:15 Синедрион – Тхьэмэтэ Хэсэшхор ары. Дин Ӏофхэм яхьылӀагьэу хьыкум зышӀэу, анахь тетыгъошхо зиӀэ хасэу джуртхэм яӀагъэр ары. Тхьэмэтэ нэбгырэ 70-рэ Тхьэмэтэ Хэсэшхом хэтыгъэх. А хэсэшхом итхьэмэтагъэр дин пэщэшхор арыгъэ. хэсэ унэм Петрэрэ Иуанрэ чӀагъэкӀыжьхи, ежьхэр зэупчӀыжьхэу аублагъ. 16ЗэупчӀыжьхэзэ, моущтэу зэраӀожьыгъ:
– Мы лӀитӀум сыда ятшӀэщтыр? Ерусалим дэс цӀыф пстэуми ахэмэ Ӏофышхо гъэшӀэгъон зэрашӀагъэр ашӀэ. «Ӏофышхо ашӀагъэп» тэ тӀо хъущтэп. 17Ау хъугъэм икъэбар ащ нахьи нахьыбэу цӀыфмэ ахэмыхьаным пае, «Исус ыцӀэкӀэ зы цӀыф горэм шъудэгущыӀэмэ, къиныбэ шъодгъэщэчыщт» тӀонышъ, мы лӀыхэм афэдгъэпытэн фае.
18ЕтӀанэ Петрэрэ Иуанрэ хэсэ унэм къычӀащэжьхи, Исус ыцӀэкӀэ зи къамыӀожьынэуи, цӀыфхэм зи арамыгъэшӀэжьынэуи афагъэпытагъ. 19Ау Петрэрэ Иуанрэ ахэмэ араӀожьыгъ:
– Тхьэм тедэӀуным нахьи, шъо тышъодэӀуныр ТхьэмкӀэ тэрэза, мытэрэза, шъор-шъорэу хьыкум тешъушӀыхьан фае. 20Ау тэ Ӏофхэу тлъэгъугъэхэмрэ зэхэтхыгъэхэмрэ къэтымыӀо хъущтэп.
21ЕтӀанэ джурт тхьэматэхэм, «ШъукъытэмыдэӀумэ, къиныбэ шъодгъэщэчыщт» аӀуи, джыри зэ афагъэпыти, къатӀупщыжьыгъэх. Ахэмэ къин арагъэщэчынэу ушъхьагъу агъотыгъэп, сыда пӀомэ, а хъугъэ-шӀагъэм пае, цӀыф пстэуми Тхьэм щытхъу фашӀыщтыгъэти ары. 22Мы Ӏофышхо гъэшӀэгъонымкӀэ апостолхэм агъэхъужьыгъэ лӀым ыныбжь илъэс тӀокӀитӀум ехъущтыгъ.
ШӀошъхъуныгъэ зиӀэхэр Тхьэм зэрелъэӀугъэхэр
23Петрэрэ Иуанрэ къызатӀупщыжьхэм, ягъусэхэм адэжь агъэзэжьи, дин пэщэшхохэмрэ нахьыжъхэмрэ къараӀуагъэр аӀотэжьыгъ. 24Ахэмэ ар зызэхахым, зэдаштэу амакъэ инэу къаӀэти, Тхьэм елъэӀугъэх:
– Зиусхьан, уашъори, чӀыри, хыри, ахэмэ ащыӀэ пстэури къэзгъэхъугъэр оры. 25Тятэжъышхо Даутэ ыӀупэкӀэ о укъэгущыӀагъ. Ар о уиӀорышӀагъ, о п Псэ ЛъапӀэ илъэкӀыкӀи мы гущыӀэхэр ащ ебгъэӀуагъэх#4:25-26 мы гущыӀэхэр ащ ебгъэӀуагъэх – яплъ Орэд ЛъапӀэхэм 2:1-2.:
«Хымэ лъэпкъхэр сыда зыкӀэгубжыхэрэр? ЦӀыфхэм пкӀэ зимыӀэ гухэлъхэри сыда зыкӀашӀыхэрэр?
26Дунаим ипачъыхьэхэм зыкъаӀэтыгъ, пащэхэри зэрэугъоихи, Зиусхьанэу Тхьэмрэ Ащ и Хэхи#4:26 Ащ и Хэхи – Христос ары. апэуцунхэу зэгурыӀуагъэх».
27– А гущыӀэхэр шъыпкъэх, сыда пӀомэ, пщы Иродрэ#4:27 пщы Ирод – Ирод Антип ары. Исус къэхъуным ыпэкӀэ я 4-рэ илъэсым щегъэжьагъэу Исус къызэхъу нэужым я 39-рэ илъэсым нэс ар Галилей хэкумрэ Перей хэкумрэ япщыгъ. Еплъ Лука 23:7-11. Ӏэшъхьэтет Понтый Пилатрэ хымэ лъэпкъхэмрэ израиль цӀыфхэмрэ ягъусэхэу, о п Къо лъапӀэ Исусэу дагъэ зыщыпфагъэм пэуцунхэу мы къалэм щызэрэугъоигъэх. 28О пкӀочӀэшхокӀи, уигухэлъ тетэуи хъун фэегъэ Ӏофхэу ыпэкӀэ бгъэнэфагъэхэр ахэмэ агъэцэкӀагъэх. 29Джы, Зиусхьан, «ШъукъытэмыдэӀумэ, къиныбэ шъодгъэщэчыщт» аӀозэ, ахэмэ къызэраӀорэм еплъ, уигущыӀэхэр гушхоныгъэ пстэури тиӀэу дгъэӀунхэу тэ, уиӀорышӀэхэм, кӀуачӀэ къытэт. 30Арышъ, п Къо лъапӀэу Исус ыцӀэкӀэ сымаджэхэр бгъэхъужьынхэуи, нэшэнэ гъэшӀэгъонхэр къэбгъэлъэгъонхэуи, Ӏофышхо гъэшӀэгъонхэр пшӀэнхэуи о пӀэ къэщэй.
31Тхьэм зелъэӀухэ ужым, чӀыпӀэу зыщызэрэугъоигъэр къэсысыгъ. Тхьэм ы Псэ ЛъапӀэ зэкӀэмэ агухэм инэу арылъ хъуи, гушхокӀэ Тхьэм игущыӀэхэр агъэӀоу рагъэжьагъ.
ШӀошъхъуныгъэ зиӀэхэм ямылъку зэрэзэфэдагъэр
32ИсускӀэ шӀошъхъуныгъэ зиӀэхэр зэкӀэ зыгу-зыпсэу зэхэтыгъэх. Зыми имылъку ехьылӀагъэу «Мыр сэсый» ыӀуагъэп, зэкӀэ язэфэдагъ. 33Апостолхэр Исус лӀагъэхэм къызэрахэтэджыкӀыжьыгъэм лъэкӀышхокӀэ шыхьат фэхъугъэх, Тхьэм ынэшӀуи зэкӀэми инэу къащифэщтыгъ. 34ЩыкӀагъэ зиӀэ цӀыф зи ахэтыгъэп; сыда пӀомэ, е чӀыгу, е унэ зиӀэ пстэуми ахэр ащэжьхэти, ахъщэу къыкӀэкӀыгъэр къахьыти, 35апостолхэм апашъхьэ ралъхьэщтыгъ. А ахъщэм щыщэу апостолхэм хэти ищыкӀагъэм фэдиз ратыщтыгъ.
36Кипр хыгъэхъунэм щыщэу, Лэуй лӀакъом щыщэу лӀы горэ щыӀагъ. А лӀым Юсыф ыцӀагъ. Апостолхэр ащ Бар-НаббэкӀэ еджэщтыгъэх. (Бар-Наббэ зыфаӀорэ лӀыцӀэм къикӀырэр «ЦӀыфхэр Зыгъэгушхорэр» ары.) 37Ащ хьасэу иӀагъэр ыщи, ахъщэр къыхьи, апостолхэм апашъхьэ къырилъхьагъ.
Selectat acum:
Апостолхэм ашӀэгъэ Ӏофхэр 4: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
