Лука 7
7
Ӏисайи сагъ акьуная эскерарин хӀекиман лукӀ
1Халкьдис джалла пас ккандеттар пехаб, Ӏиса адиная Кафернагьумдиди. 2Римдин са эскерарин хӀекиман ппара ккане лукӀ Ӏайи иттай аккихьуна ахьуная. 3Ӏисайихъас унихьуна, эскерарин хӀекима гьикуная Ӏисайилди джугьутӀарин хӀа къуджабур тӀалаб акьас Тикес, шаб пуна учин лукӀ сагъ акьас. 4ХӀа къуджабури адина Ӏисайилди ппара Ӏайи миннат акьуна пуная:
– Те лайикь иде инсан э, Вун кумак акьас. 5Тис хье халкь кканве, дуьгӀебур хура халла кехӀей алихьуная ти хьес.
6Ӏиса ушуная къуджабурихъай. Ӏиса гьучарукьагуна, эскерарин хӀекиман хулагьди, хӀекима гьикуная Гилди учин дусттар, пас:
– Вун бизар мева, зе хӀаф. Вун зе хулади ачадес, зун лайикьлу инсан дава. 7Зун Ваалди душуф гьемихъас э, зун лайикьлу инсан давахӀела. Вун Ӏаре са гаф уп – зе лукӀ сагъ хьасе. 8Зунна хӀуькуматтис мутӀеӀ иде инсан э, амма зе гъиликкра ккея эскерар. Сайис агъа зун: «Ях» – ге ве; сасрайис: «Мич шаб» – ге гьучаве; лукӀус агъа: «Акье гьеме гьеме» – ги аркьа.
9Ге гафар унихьугуна, Ӏиса муьхӀтал хьуная, алдаркуна учин кьабахъай вея инсанарилди, Ги пуная:
– Зун чвас агъая миштти хъугъуна инсан Зас Ӏизраилдира кехӀей гьучархьуна адава.
10Эскерарин хӀекима гьикунаттар хулади адегуна, гебурис агуная лукӀ сагъ хьуна.
11Са чӀукь вахттунилас Ӏиса ушуная Наин агъа шагьурдиди. Гихъай ахьуная Учин ученикара, ппара халкьра. 12Ӏиса шагьурдин къапубуригьди гьучарукьугуна, шагьурдиас аттгъай хьуная ашкӀин бабахъ хъая са кӀиркӀан майит. Шагьурдиас бабахъай вей хьуная ппара инсанара. 13Ге баб агугуна, баб Ӏегвал хьуна Ӏисайи пуная:
– МеӀеша.
14Гьучушуна, гъил кирхӀуная Ӏисайи суьрик. Суьри гъая инсанар гъузуная. Ӏисайи пуная:
– Е джигьил идеми, Зун вас агъая, гъайш!
15КӀинаф гъайшина гъургъуная. Ӏисайи хаб йиная бабас кӀиркӀ. 16Джаллабуриъ гучӀ архьуная, гебури шукур аркьай Аллагьдис агъай хьуная:
– ЧагӀди зурба пайгъамбар адиная! Аллагь Учин халкьдилди адиная!
17Ӏисайин ад архьуная кӀилди Ягьудея дерейиъра кӀилди Ягьудея дерейин багулив фая мукьвариъра.
Пайгъамбар ЯхӀъяйи гьикуная Ӏисайилди учин инсанар
18ЯхӀъяйис учин ученикари ахъакьуная кӀилди ге курарихъас. 19ЯхӀъяйи унахъуна учин Ӏу ученикдис, гьикуная гебур Ӏисайилди хабар гъушанас: «Вун эв – Те, чаалди адина ккандеф, хъара чин сасрайихъ гъузуна ккандеяв?»
20Ученикари адина Ӏисайилди пуная:
– ХьеттигӀ гӀучӀуна гӀайчӀва гӀедат аркьа ЯхӀъяйи гьикунаттар э чин Ваалди хабар гъушанас: «Вун эв – Те, чаалди адина ккандеф, хъара чин сасрайихъ гъузуна ккандеяв?»
21Те вахттуни Ӏисайи сагъ аркьай хьуная итталар кея инсанар, гӀанаъ шейтӀанар аяттар, сукъурар. 22Ӏисайи джуваб йиная гьикунаттарис:
– Ушуна ахъакь ЯхӀъяйис джалла чвас агуттара, чвас унихьуттара:
сукъурарис – Ӏекв аргвая,
хъурунаттар – вея,
кабкар кеяттар – мертт вея,
карабурис – унихьая,
кӀинаттарик – джан керхьая,
гӀеджизарис – иджвелин хабар аркьая.
23Бахттлу инсан э те, Захъ хъугъуф.
Пайгъамбар ЯхӀъяйихъас Ӏисайи пунаеф
24ЯхӀъяйи гьикунаттар ушугуна, Ӏисайи пуная халкьдис ЯхӀъяйихъас:
– Фи агвас ушунаттари чун къумариди? Кулаки къамиш фиштти турттанчин агвас эв? 25Фи агвас ушунаттари чун? Багьа кунар але инсан агвас пуна эв? Багьа кунар але инсанар, ухьтанди ешемиш веттар, паччагьарин къалабуриъ э аяф.
26Фуш агвасе пуна юркӀураъ уйи чве? Пайгъамбар эв? Э, чвас пайгъамбар э агуф, Зун агъая чвас, те пайгъамбардиласра хӀаф э. 27ЯхӀъяйихъас Гирами Китабиъ ликӀиная: «Магьа Зун гьикая Ве удигьай Зе хабар фаяф, Ве удигь, Вас рекъ хӀезур акьас». 28Зун агъая чвас, джилил але инсанаригӀ, ЯхӀъяйилас хӀа пайгъамбар гӀадава. Амма Аллагьдин Паччагьвелдиъ джаллабурилас бицӀифра кехӀей хӀаф э, те далара.
29КӀилди халкьди ЯхӀъяйил юркӀв алихьуная. Налукар завал аркьаттарира кехӀей, Аллагь хӀекь акьуная, адина ЯхӀъяйилди хьеттигӀ гӀучӀуна гӀайчӀва гӀедат акьас. 30Фарисеярина Ӏелимари ЯхӀъяйин гӀедат дакьуна, Аллагьди чиппис акьуна ният кьабул акьуна адава.
31Ӏисайи пуная:
– Гьинахъай фачикӀа Зун ме гьалдин инсанар? Фушар суманттар э мебур? 32Мебур гимил экьуна бицӀи шиникквар суман э, са сайис гьараяр аркьай: «Чин чвас суьретӀ йирхӀуне, чун лихъундава, чин Ӏешалар акьуне, чун Ӏешундава».
33Адине ЯхӀъя, ги я гуни Ӏелдава, я чехир ухайдава – чун агъа: «Гиъ шейтӀан ая!» 34Адине Инсандин КӀиркӀ, Ги Ӏелдира э, ухайра э – чун агъа: «Хъуттурфен, тагьа фунтай, чехир ухас кканеф, налукар завал аркьаттаринна сасра гунагьар кеяттарин дустт». 35Аллагьдин хӀа Ӏекьул аргвая Гин Ӏекьул фацунаттариъ.
Ӏисайи гъил гъушуная гунагьар кея дишагьлилас
36Са фарисея шаб пуная Ӏисайис учихъди гуни ӀуьтӀанас. Ӏиса адина фарисеян хулади, са багулихъди къархьил ирхӀуна экьуная суфрайихъ. 37Гьеге шагьурдиъ ая гунагьар кея са хьирас ягӀархьуная Ӏиса фарисеян хулаъ аяф. Ге хьир адиная тисади Ӏачин бицӀи гаджини ая батӀар ниъ хъая ччамра фай. 38Кьабахъас Ӏисайин лекарикк ккерхуна, Ӏешуная ге. Гин негъвар алавей хьуная Ӏисайин лекарилди, учин чӀарарилди джикай хьуная ги Ӏисайин лекар. Лекарис мачар икӀай, батӀар ниъ хъая ччам китӀиршанди хьуная ги Ӏисайин лекарик.
39Гьегиштти агугуна, Ӏиса хъаттфайшуна фарисеяйи, фикир акьуная: «Эгер ме инсан хӀекьданди пайгъамбар ичин, Мис ягӀай ахьаси, Учик гъилар кирхӀая хьир, гунагьар кеяф идеф». 40Ӏисайи пуная фарисеяс:
– Е Симон, Зас вас са чӀал пас ккандея.
– Уп, МегӀелим, – пуная ги.
41Ӏисайи пуная:
– Ӏу инсандик кехьуная са эессин бурдж. Сайик кехьуная гӀифуверш арсуран манат, сасрайик – гӀифцӀур. 42Гебурифас бурдж ес девехӀела, Ӏударисра бурджар хуьлал акьуная эесси. Магьа гебурикес гьинас ппара кканхьасе эесси?
43Симона джуваб йиная:
– Зун фикир аркьа, те ппара бурдж хӀуьлал акьуттис.
– Вун дузди фикир акьуне, – пуная Ӏисайи.
44Ӏисайи, алдаркуна ге хьиралди, пуная Симонас:
– Аргваяв вас ме дишагьли? Зун ве хулади адегуна, вун зас хьед йиндава лекар Ӏуьччанас. Ппай ме дишагьли учин негъварилди Ӏуьччуна Зе лекар, учин чӀарарилди джикуне. 45Зун ачадегуна, вун Зас мач икӀундава. Ппай ме дишагьли, Зун мисаъ а вахттунилас мич, гьайчӀундава Зе лекарис мачар икӀай. 46Вун ччам Зе кӀилик китӀишиндава, ппай ме дишагьли батӀар ниъ хъая ччам Зе лекарик китӀишине. 47Зун вас пасе фас ичин: Ме дишагьлин ппара гунагьарилас гъил гъушуная, дехӀела э мис ппара кканди аяф. Гьиналас чӀукь гъил гъушуна айчин, тис чӀукь кканди ая.
48Дишагьлис Ӏисайи пуная:
– Гъил гъушуная ве гунагьарилас.
49Гихъай экьуна сасра гӀулари чаб чиппикди агъай хьуная: «Фуш эгьан Ме, гунагьариласра гъил гъуландеф?»
50Ӏисайи пуная ге дишагьлис:
– Ве хъугъувелди вун ухӀуне. ЮркӀв сакинди ях.
Selectat acum:
Лука 7: AGU
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Библия тарджума аркьа институт, Москва, 2005
