Лука 14

Фарисеян хулаъ

1Сагелай киш ягъа Ӏиса адиная гуни ӀуьтӀанас фарисеярин хӀекиман хулади. Фарисеярин улар Ӏисайил алхьуная, Ги фиркьайчугас. 2Ӏисайигьди гьучадаркуна экьуна ахьуная иттали акетӀагӀуна инсан. 3Ӏисайи хабар гъушуная Ӏелимарифасна, фарисеярифас:

– Ахттигьар аяв сагъ акьас киш ягъа хъара аду?

4Гебур буӀуная. Ӏисайи Учигьди гьучафайдина, сагъ акьуная иттаф, 5ппай гебурис пуная:

– Нагагь чве кӀиркӀ, я чве вец къуйдиъ архьухаб, гьеге сеӀетти аттивастту чун, киш ягъ ичира?

6Гебурифас фера пас хьуна адава.

Хулан эессисна гин гӀуларис Ӏисайи пуная

7Ӏисайис агуна, гӀалашувари гьертти чиппис идже мукьвар фацанас алучӀаяф, ахъакьуная гебурис мисала:

8– Нагагь вас маджлисилди унахъунахаб, идже мукь фамарцана, белекин валасра хӀуьлматлуйис унахъуна ахьури. 9Хулан эесси, ачадина, пасе вас: «Ле мукьуйил ме инсан экьурай!» Тегуна вас неч хьуна, ке ахиран мукьуйилди вес алчархьасе. 10Вас шаб пунагуна, ушуна экьве раккаригӀ гӀая мукьуйил, эесси гӀуларигьди аттегуна, вас пасе: «Дустт, гьара мич гӀайчӀуна экьве!» Тагьа тегуна вас сасра гӀуларин удигь алтухъ хӀуьлмат хьасе. 11Учис уч хӀайи аргваф, ахтт хьасе, уч бицӀи аргваф, вартт хьасе.

12Хулан эессис Ӏисайи пуная:

– Вун вахъди абкьанттар я Ӏуьшанттар акьас хъаттгъарегуна, шаб магъа я дусттарис, я чуппарис, я багунттарис, я девлетлу къуншибурис. Гебурифас хаб вунна хъаттгъас агърукьасе, хаб ве пай хъатӀас. 13Шаб уп вахъди гӀеджизарис, хъурмутӀарис, Ӏаттеттарис, сукъурарис. 14Тагьа тегуна вафас вун бахттлу хӀисаб акьас хьасе. Гебурифас хаб вас фера иджвел акьас агърукьай адава, дехӀела вас Аллагьди есе иджвелин пай, Уч юркӀурал але инсанар джан керхьуна гъайши ягъа.

Мисала зурба маджлисихъас Аллагьдин паччагьвелдиъ

15Гебур унихьугуна, са гӀалашува пуная Ӏисайис:

– Бахттлу э Аллагьдин Паччагьвелдиъ гуни Ӏеле инсан!

16Ӏисайи пуная гис:

– Са инсанди шаб пуна ахьуная учихъди ацӀуна гӀуларис. 17Вахтт хъучадегуна, эесси гьикуная учин лукӀ унахъунаттарилди пас: «Шаб, че джалла хӀезурдея». 18Джаллабури, чӀал сад акьунаттари суман, гъил гъушен агъай хьуная. Садпетти пуная гис: «Зун ху гъушуная, зун хъуттурфанас ушуна ккандея тихъ. Гъил гъушен сара заалас». 19Ӏудпетти пуная: «Зун йицӀу вец гъушуная, гебурихъ хъуттурфуна кканде иджеттар ичугвас. Гъил гъушен сара заалас». 20Хьибудпетти пуная: «Зун хьир акьуная, зафас адес вей адава». 21ЛукӀу адина кӀилди пуная эессис. Тегуна хулан эесси хъел адина пуная лукӀус: «ТегӀди ях шагьурдин куьчабуригӀди, тураригӀди, завал акьуна гӀеджизар, хъурмутӀар, сукъурар, Ӏаттеттар, хъай шаб мич». 22ЛукӀу пуная эессис: «ХӀаф, вун зас буюрмиш акьу кар, зун акьуне, амма хъара Ӏаре мукьар аме». 23Эесси пуная учин лукӀус: «Ушуна шагьурдин къирагъарихъ хъая куьчабуриди, джалла вас гьучархьеттар, мич верегъилди акье, зе хал гӀулари ацӀас. 24Зун чвас агъая, те зун шаб пуна уйиттарикес, садра ахьасттава зе суфрайихъ!»

Гьинафас хьасичин Ӏисайин ученик хьас

25Ӏисайихъай вей хьуная ацӀуна инсанар. Алдаркуна, Ӏисайи пуная гебурис:

26– Нагагь Заалди аде инсандис, Зун ппара дакканхаб дадалас, бабалас, хьиралас, шиниккварилас, чуппарилас, чиярилас, учин Ӏуьмурдилас, – тифас хьасттава Зе ученик хьас. 27Захъай вереттифас, хьасттава Зе ученик хьас Учин гӀезабарин къакъ дагъа хаб. 28Чвакес гьинас хьунара хӀа гьава къала алихьас ккандеячин, сагелай экьуна учин харджар хӀисаб акьастту ги, фидегьен ачевесичин къала алихьас. 29Хандагар ихьуна, аме курар гифас ккиркӀвас девеячин, джаллабур гил элхъенди ахьасе, 30агъай ахьасе: «Магьа ме, къала алихьуна ккиркӀвас дахьу инсан!» 31ДегӀви акьас вес кканди ая паччагьдира, сагелай экьуна фикир акьуна кканде, хьасичин учифас, учин йицӀу агъзур эскер хъай дегӀви акьас, сасра къа агъзур эскер хъай вея паччагьдихъай. 32Девехаб, паччагьди гьикасе учин вакилар маслихӀетар акьас те сасра паччагьдилди, те вархайи ами. 33Чун кӀилди чвахъ хъая шейъер ккандава дапедегьен гагьди, чвакес сайифасра хьасттава Зе ученик хьас.

Мисала къелахъас

34– Кьел – идже шейъ э. Амма кьел кьеланди идилгухаб, фиштти э кьел хаб кьелан аркьаф? 35Тегуна кьел фиттисра герек дава, джилил алахъасра кехӀей. Ге фадархъа. ЮркӀв алийинаттарис, унихьурай!

Selectat acum:

Лука 14: AGU

Evidențiere

Partajează

Copiază