Лука 13

Чве гунагьар чве гардандиъ гъушен

1Те вахттуни са Ӏу инсанари ахъакьуная Ӏисайис, Пилата кӀина Галилея дерейин инсанарихъас. Пилата те инсанарин иъ гӀачатуная тебурин садакьайин маларин иихъай. 2Ӏисайи пуная ге инсанарис:

– Чун фикир аркьаяв, те Галилея дерейин инсанар джуьре инсанарилас ппара гунагьар кеяттар и пуна, тебурис тиштти хьухӀела? 3Зун чвас агъая, дава! Нагагь чун чвак тахсирар кеяф мутӀеӀ хьуна, чве гунагьар чве гардандиъ дагъушухаб, джалла чунна тебур суман кӀесе! 4Я Силамдиъ минара арчӀуна, тисакк ккикъуна кӀе те цӀемуя инсан? Чун фикир аркьаяв, тебур джаллабурилас Ерусалимдиъ ешемиш веяттарилас ппара тахсирар кеяттар и пуна? 5Зун чвас агъая, дава! Амма чун чвак тахсирар кеяф мутӀеӀ хьуна, чве гунагьар чве гардандиъ дагъушухаб, джалла чунна кӀесе, тебур суман!

Мисала, емиш алгъадеве инджиран кӀуранихъас

6Хуппай Ӏисайи ахъакьуная гебурис мисала:

– Са инсандин тӀибитӀарин багъдиъ узуна ахьуная инджирин кӀур. Эесси адиная кӀуранил емишар алчугас хъуттурфанас, емишар алхьуна адава. 7Емишар алдавай агуф, ги пуная учин багъдихъ ахъаджихӀа инсандис: «Магьа хьибу ис э зун мисади вей хъуттурфанас, емишар алгъадина айчугас ме кӀуранил, емишар вей адава. АтӀ ме кур. Фас муфиӀет кидавай фацанасе ми мукь». 8Багьдихъ ахъаджихӀатти пуная гис: «Е эесси, са иса сара ате ме кӀур. Зун мис ругра есе, джилла гӀане акьасе. 9Сасра иса хьас идеф хьасе емишар, нагагь дахьучин, атӀ».

Киш ягъа са дишагьли сагъ акьуная Ӏисайи

10Ӏисайи киш ягъа Аллагьдин гаф ягӀар аркьай хьуная инсанарис са дуьгӀебур хура хулаъ. 11Тисаъ ахьуная гӀанаъ шейтӀан учӀуна, иттали цӀакас акьуна са дишагьли. ЦӀемуя ис хьуная гифас утун дуз акьуна, вартт гъайшас девей. 12Ге дишагьли агугуна, Ӏисайи учигьди унахъуна пуная гис:

– Вун сагъ хьуная.

13Ӏисайи алихьуная ге дишагьлил гъилар, дишагьли гьеге сеӀетти дуз хьуна гъайшина, шукур акьуная Аллагьдис. 14ДуьгӀебур хура хулан хӀатти, хъел адина Ӏисайикес, Ги киш ягъа сагъ акьухӀела, пуная халкьдис:

– Кар акьас ерхьи ягъ ая. Гьете ягъари шаб чве итталар сагъ акьас, киш ягъа сагъ маркьа. 15Ӏисайи джуваб йиная гис:

– Ӏу сурат гӀаттар! Чвакес гьертти, хъатуна тӀунахъас е вец, е даги киш ягъа гъайду хьед ес? 16Ме дишагьли Ибригьиман тухумдиас э. ЦӀемуя истти шейтӀанди итӀуна уйи ме, гьал киш ягъ э пунегъай, ахттигьар аду, мис рехӀет акьуна, ме атас?

17Ӏисайи гиштти пегуна, Ӏиса дакканттарис неч хьуная, ппай кӀилди халкь шатти ахьуная Ӏисайи аркьа адлу курарил.

Фиттихъай фачикӀас хьасе Аллагьдин Паччагьвел

18Ӏисайи пуная:

– Фи суманф э Аллагьдин Паччагьвел? Фиттихъай фачикӀа Зун Ле? 19Аллагьдин Паччагьвел фачикӀас хьасе, инсанди учин багъди узу бицӀи кӀуранин тумунин удухъай. Ге уд кегъучӀуна, заварикк аккертӀадегьен кӀур хьуне. Ле кӀуранин куларигӀ завун нахширари чиппис мугар акьуне.

20Ӏисайи сагелай сара пуная:

– Фиттихъай фачикӀа Зун Аллагьдин Паччагьвел? 21Ле дишагьли хьибу кӀватт гӀуригӀ гӀихьуна химир хӀисаб э. Са чукь химирилди кӀилди гӀур акефуруная.

Исал къапубур

22Ӏиса вей хьуная Учин рекъди Ерусалимдиди шагьураригӀас, хӀураригӀас, ягӀар аркьай инсанарисра. 23Са инсанди хабар гъушуная Ӏисайифас:

– Е ХӀаф, са чукь инсанар дала ухӀастту Аллагьди?

Ӏисайи пуная халкьдис:

24– Ачадес алучӀ исал раккариас, хъугъ Захъ, ацӀунаттар ачадес алучӀасе ге раккариас, амма хьасттава. 25Хулан эесси гъайшина ракк алакъугуна, чун раккан къабахъ илгванасе, чун раккахъ хъирхӀай ахьасе, агъай: «Е ХӀаф, дахъ час». Ли пасе чвас: «Зас ягӀайдава чун фушар ичира, нандиас ичира». 26Хуппай чун агъай ахьасе: «Чин вахъай Ӏелди ухай ай уйи. Вун час Аллагьдин гаф ягӀар аркьайи куьчабуриъ». 27Ппай Ли чвас пасе: «Зас ягӀайдава чун фушар ичира, нандиас ичира. Ях Загьас, джалла Ӏайвелар аркьаттар!» 28Чун Ӏешасе, силебар ругӀасе, чвас Ибригьимра, ИсхӀекьра, Якьубра, джалла пайгъамбарара Аллагьдин Паччагьвелдиъ агуна, чун лисаас адикугуна! 29Инсанар адесе дуьнйайин якьудар багварихъас, экьвасе маджлисин усттулихъ Аллагьдин Паччагьвелдиъ. 30Агьал кьабахъ хъаяттар, лисаъ удигь хьасе, агьал удигь гьаяттар, лисаъ къабахъ хьасе.

Ерусалимдихъас Ӏисайин дардар

31Те вахттуни са Ӏу фарисеяр адина пуная Ӏисайис:

– Вун ушуна ккандея мисаас. Ях, Иродас Вун кӀес ккандея.

32Ӏисайи гебурис пуная:

– Ушуна уп те сулас: «Зун шейтӀанара адикасе, инсанара сагъ акьасе ягӀара, багагьра, хьибудпе ягъас Зун ккиркӀвасе Зе кар. 33Амма ягӀара, багагьра, сае ягъара Зун Зе рекъди ушуна ккандея, пайгъамбар луькӀеф Ерусалимдиъ идехӀела, сасра усаъ дава». 34Агь Ерусалим! Ерусалим, пайгъамбарар луькӀеф, училди гьикунаттарис гъвандинф аркьаф! Хьимугелай кканди уйи Зас кӀилди халкь Зе багуливди завал акьас, пеӀела учин чаркквар завал аркьаф суман учин хилариккди, амма чвас кканхьундава! 35Магьа Аллагьдин хал Ӏар хьуне! Зун чвас агъая, чвас Зун агвасттава, чун дапедегьен гагьди: «Бахттлу э Аллагь бадала Веяф!»

Selectat acum:

Лука 13: AGU

Evidențiere

Partajează

Copiază