Лука 10

Ӏисайи гьикуная ярцӀурна Ӏу ученик

1Тегунанхаб Ӏисайи гӀаттивуна хъара ярцӀурна Ӏу ученик сара, гьикуная гебур Ӏу Ӏутти Учин удигьай, Уч вес ккея шагьураридина хӀурариди. 2Ӏисайи пуная гебурис:

– Уцаф ппара ая, амма уца инсанар чукь ая. ТӀалаб акье Эессис, хъара инсанар гьик пуна хуппуриди уцас. 3Ях! Магьа Зун гьикая чун, хӀучарин кӀаратӀигӀди ккелар суман. 4Чвав фай магъуяна я пӀапӀушник, я чанта, я лекар, сайихъайра рекъуьъ гьучархьуттарихъай магъургъа. 5Нае хулади ачушучира, сагелай уп: «МаслихӀет хьурай ме хулаъ». 6Эгер те хулаъ ешемиш веяф маслихӀеттин инсан ичин, чве маслихӀет тихъай илгвасе, нагагь давайчин – хаб чваалди адесе. 7Гьете хулаъ экьве, ӀуьтӀен, ух тебурин аяф, лихандеттис кьиматра рукьафе. Са хулаас джуьре хулади амайчӀва. 8Са шагьурдиди адина, чун тисаъ кьабул акьухаб, кӀилди чвас тисаъ ирцӀанттар ӀуьтӀен. 9Тебурин итталар кеяттара сагъ акьуна, уп тебурис: «Аллагьдин Паччагьвел чве багулив фая!» 10Эгер са шагьурдиди адина, чун тисаъ кьабул дакьухаб, куьчайиди айчӀуна уп: 11«Че лекарил алекьуна чве шагьурдин кумра кехӀей чин кеджикуна артая. Амма чвас ягӀарухь: Аллагьдин Паччагьвел багулив фая». 12Зун чвас агъая, Садамди ешемиш вея инсанарис рехӀетти ахьасе Кьияматин Ягъа те шагьурдин инсанарис дала!

Язукъ э Галилея дерейин шагьурарин

13Язукъ э чве Хазаринди ешемиш вея инсанар! Язукъ э чве Вифсаидайи ешемиш вея инсанар! Сидундина Тирди хьунахаб, те чве усаъ хьуна Ӏеламатар, тебур дахи димари чувалин кьумашикес акьуна кунара, аликӀуна чиппин кӀилил, руькъ алархъай#10:13 КӀилил руькъ алахъас – хӀа гъам алегуна те инсанари гиштти аркьай хьуная., руькъуьгӀ экьуна тахсирар чиппин гардандиъ гъушуна ахьаси. 14Амма Сидундина Тирди ешемиш вея инсанарис рехӀетти ахьасе Диван аркьагуна, чвас далара. 15Кафернагьумдиъ ешемиш вея инсанар, чвас чун завариккди аккетӀасттегьен вартт акьас пун кӀваъ аяв? Ваъ, чун джилин кӀенади ихьасе.

16Учин ученикарис Ӏисайи пуная:

– Гьина чваал юркӀв алихьаячин, ти заалла юркӀв алихьая. Гьина чун кьабул даркьаячин, ти Зунра кьабул аркьай адава. Гьина Зун кьабул даркьаячин, ти кьабул аркьай адава Варттал алефра, Зун джилилди гьикунаеф.

ЯрцӀурна Ӏу ученик адиная

17ЯрцӀурна Ӏу ученик шатти адина Ӏисайилди пуная:

– ХӀаф, шейтӀанара кехӀей мутӀеӀ ве час, чин Ве ттур гъургъай буюрмиш акьугуна.

18Ӏисайи пуная гебурис:

– Зас Иблис агуне, цӀарп суман, завариас адархьуна. 19Магьа, Зун чвас йиная хӀавел, чвас зарар кидавай, алишас иланарила Ӏекьрабарилла, хӀавел – кӀилди душманарин кьуватилла. 20Чун шейтӀанар чвас мутӀеӀ вея пуна шад мева, чун шад ухь чве ттурар заварил ликӀиная пуна!

Ӏисайин шадвел

21Гьеге сеӀетти Аллагьдин РуьхӀ архьуна Ӏисайи шатти пуная:

– Дад, заваринна джилинна ХӀаф! Зун шукур аркьая Вас, Ӏекьуллубиригьасна хурунаттаригьас джин акьуна, кар Вун ягӀар акьухӀела са бицӀи инсанарис. Э, Дад, Ве иджвелин амур и ле. 22Зе Дада кӀилди йиная Заалди. Сайисра ягӀай адава КӀиркӀ, са Дадас дала, сайисра ягӀай адава Дадра, са КӀиркӀасна КӀиркӀа гӀаттиваттарис дала, тебурис Дад ягӀар акьас пуна. 23Ӏиса алдаркуна Учин ученикарилди, гебурис дала ундихьагъилди, пуная:

– Те чвас аргваттар, аргва улар, бахттлубур э. 24Зун чвас агъая, ацӀуна пайгъамбарарисна паччагьарис агвас кканди уйи ле чвас аргваттар, амма агундава, унихьасра кканди ле чвас унихьаттар, амма унихьундава.

Самари дерейин идже юркӀуран инсандихъас мисала

25Са Ӏелима кьасустти хабар гъушуная Ӏисайифас, Ги фигъайчугас:

– МегӀелим, фикьуна кканде зун зас ккидиркӀва Ӏуьмур ес?

26Ӏисайи ге Ӏелимафас учифас хабар гъушуная:

– Закуниъ фиштти ликӀиная? Фи хурая вун лисакес?

27Ӏелима джуваб йиная:

– «Ккан ухь Аллагь ТегӀела лап юркӀураастти, лап гӀанаас, кӀилди ве кьудратилди, кӀилди ве фикирарилди». «Ккан ухь багу инсанна, вас вун суман».

28Ӏисайи пуная Ӏелимас:

– Вун дузди джуваб йине. Гьелиштти аркьай акье, вун ешемиш хьасе.

29Ӏелима, уч дузди агвар акьас кканди, хабар гъушуная Ӏисайифас:

– Фуш э зас багу идеф?

30Ӏисайи мисалайилди пуная гис:

– Вей хьуная са инсан Ерусалимдиас Эрихундиди. Фацуная ге къачагъари. Фаттивуна гин шейъера, йирхӀуна гис, къачагъар ушуная, фадихьуна атуна луькӀе хӀелдил файдина инсанна. 31Гьеге рекъди вей хьуная са малла. Маллайис фаттархьуна инсан агугуна, малла рекъуьн джуьре багуликди кейчӀуная. 32Гьегиштти акьуная Левин тухумдиас са инсандира: йирхӀунар але инсан агугуна, рекъуьн джуьре багуликди кейчӀуная. 33Ппай гьеге рекъди вея Самари дерейин са инсан гъузуная, йирхӀунар але инсан агугуна, ге Ӏегвал хьуна. 34Самари дерейин инсан, гьучушуна, мертт акьуна чехирилди йирхӀунара, китӀишина ччамра, алитӀуная гин йирхӀунар. Хуппай алихьуна учин дагил файдиная ми ге гасттиницайиди, гисаъра ахъаджихӀуная ме гихъас. 35Сасра ягъа, уч гисаас верегуна, йина гасттиницайин эесис арсуран Ӏу манатра пуная ми: «АхъаджихӀ ме иттаттихъ, нагагь ме гьудуркӀуна веф хардж хьучин, зун хаб верегуна есе ве пул».

36– Ве фикирдилди, фуш ге хьибуйикес багу хьуне къачагъарикк кичархьу инсандис?

37– Ге Ӏегвал хьуна, гис иджвел акьуф, – пуная Ӏелима.

– Ях, гьегиштти вунна акье, – пуная Ӏисайи.

Марфайин хулаъ

38Рекъди вей Учин ученикара хъай, Ӏиса адиная са хӀуриди. Тисаъ са Марфа агъа хьира хъаттфайшуная гебур учин хулади. 39Тихъ хъахьуная Майрам агъа чи. Майрама, экьуна Ӏисайин лекаригь, юркӀв алийина ахьуная Ги агъаттарил. 40Марфа Ӏайи гӀачӀугъуна ахьуная батӀар Ӏелеттар хӀезур аркьай. Марфайи гьучушуна пуная Ӏисайис:

– Е зе ХӀаф, Вас аргвай аду ччиччи кӀилди кар заал алчихьуна? Зас кумак акье уп лис!

41– Ай Марфа, Марфа, – пуная гис Ӏисайи, – вун кураригӀ гӀачӀугъуна ппара задарихъас фикир аркьая, 42амма кканди аяф сад э. Магьа Майрама учис иджвелин пай гӀаттивуная, ге гифас фаттивасттава.

Selectat acum:

Лука 10: AGU

Evidențiere

Partajează

Copiază