Čơdơ̆ng Phŭn 5
5
Kơnŭng Djuai Ađam Mơ̆ng Set Truh Pơ Nôê
(I Čih 1:1-4)
1Anai jing kơnŭng djuai Ađam.#Čơd 1:27-28.
Tơ Ơi Adai hrih pơjing ană mơnuih, Ñu pơjing ană mơnuih kar hăng rup Ñu Pô. 2Ñu pơjing đah rơkơi hăng đah kơmơi, brơi tơlơi mơyun hiam kơ ƀing gơñu, laih anŭn pơanăn jing “mơnuih” hlăk Ñu hrih pơjing gơñu.#Mat 19:4; Mar 10:6.
3Ađam hmâo sa rơtuh klâo pluh thŭn, ñu jing ama kơ sa čô ană đah rơkơi, hmâo rup hơbŏ kar hăng ñu pô laih anŭn pơanăn gơ̆ Set. 4Giơ̆ng kơ tơkeng Set, Ađam hơdip sapăn rơtuh thŭn dơ̆ng, tơkeng ană đah rơkơi ană đah kơmơi. 5Tui anŭn Ađam hmâo hơdip dua rơpăn rơtuh klâo pluh thŭn, laih anŭn djai.
6Hlăk Set sa rơtuh rơma thŭn, ñu hmâo ană, anăn gơ̆ Ênos. 7Tơdơi kơ hmâo Ênos, Set hơdip sapăn rơtuh tơjuh thŭn dơ̆ng, tơkeng ană đah rơkơi ană đah kơmơi. 8Tui anŭn, Set hmâo hơdip dua rơpăn rơtuh pluh dua thŭn, laih anŭn djai.
9Hlăk Ênos dua rơpăn pluh thŭn, ñu hmâo sa čô ană đah rơkơi, anăn gơ̆ Kênan. 10Tơdơi kơ tơkeng Kênan, Ênos hơdip sapăn rơtuh pluh rơma thŭn dơ̆ng, tơkeng ană đah rơkơi ană đah kơmơi. 11Tui anŭn Ênos hmâo hơdip dua rơpăn rơtuh rơma thŭn, laih anŭn djai.
12Hlăk Kênan tơjuh pluh thŭn, ñu hmâo sa čô ană đah rơkơi, anăn gơ̆ Mahalalel. 13Tơdơi kơ tơkeng Mahalalel, Kênan hơdip sapăn rơtuh pă pluh thŭn dơ̆ng, tơkeng ană đah rơkơi ană đah kơmơi. 14Tui anŭn Kênan hmâo hơdip dua rơpăn rơtuh pluh thŭn, laih anŭn djai.
15Hlăk Mahalalel năm pluh rơma thŭn, ñu hmâo sa čô ană đah rơkơi, anăn gơ̆ Jaret. 16Tơdơi kơ tơkeng Jaret, Mahalalel hơdip sapăn rơtuh klâo pluh thŭn dơ̆ng, tơkeng ană đah rơkơi ană đah kơmơi. 17Tui anŭn Mahalalel hmâo hơdip sapăn rơtuh dua rơpăn pluh rơma thŭn, laih anŭn djai.
18Hlăk Jaret sa rơtuh năm pluh dua thŭn, ñu hmâo sa čô ană đah rơkơi, anăn gơ̆ Ênok. 19Tơdơi kơ tơkeng Ênok, Jaret hơdip sapăn rơtuh thŭn dơ̆ng, tơkeng ană đah rơkơi ană đah kơmơi. 20Tui anŭn Jaret hmâo hơdip dua rơpăn rơtuh năm pluh dua thŭn, laih anŭn djai.
21Hlăk Ênok năm pluh rơma thŭn, ñu hmâo sa čô ană đah rơkơi, anăn gơ̆ Mêthusêla. 22Tơdơi kơ tơkeng Mêthusêla, Ênok nao hrŏm hơbĭt hăng Ơi Adai amăng klâo rơtuh thŭn, tơkeng ană đah rơkơi ană đah kơmơi. 23Tui anŭn Ênok hmâo hơdip klâo rơtuh năm pluh rơma thŭn. 24Ênok nao hrŏm hơbĭt hăng Ơi Adai, giơ̆ng anŭn rơngiă hĭ thĕng, yua kơ Ơi Adai mă ba ñu laih.#Hêb 11:5; Yut 14.
25Hlăk Mêthusêla sa rơtuh sapăn pluh tơjuh thŭn, ñu hmâo sa čô ană đah rơkơi, anăn gơ̆ Lamek. 26Tơdơi kơ tơkeng Lamek, Mêthusêla dŏ hơdip tơjuh rơtuh sapăn pluh dua thŭn dơ̆ng, tơkeng ană đah rơkơi ană đah kơmơi. 27Tui anŭn Mêthusêla hmâo hơdip dua rơpăn rơtuh năm pluh dua rơpăn thŭn, laih anŭn djai.
28Hlăk Lamek sa rơtuh sapăn pluh dua thŭn, ñu hmâo sa čô ană đah rơkơi. 29Ñu pơanăn gơ̆ Nôê,#5:29 Nôê: Amăng boh hră Grek, boh hră anai hmâo dơnai pơđok hrup hăng arăng pơđok boh hră kiăng pia jing “tơlơi hrăp mơak”, “tơlơi pơalum”. laih anŭn laĭ: “Amăng bruă mă ƀing ta, amăng tơlơi tơnap tap gleh glăn kơ tơngan ƀing ta, ană anai či pha brơi kơ ƀing ta tơlơi pơalum tơbiă rai mơ̆ng lŏn Yêhôwa hmâo hơtơ̆m pah laih.” 30Tơdơi kơ tơkeng Nôê, Lamek dŏ hơdip rơma rơtuh dua rơpăn pluh rơma thŭn, tơkeng ană đah rơkơi ană đah kơmơi. 31Tui anŭn Lamek hmâo hơdip tơjuh rơtuh tơjuh pluh tơjuh thŭn, laih anŭn djai.
32Hlăk Nôê rơma rơtuh thŭn, ñu hmâo klâo čô ană đah rơkơi, Sem, Čam laih anŭn Japhet.
Selectat acum:
Čơdơ̆ng Phŭn 5: JRA2016
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2016 United Bible Societies. All rights reserved.