Bruă Mơnuă 10
10
Pêtrôs Hăng Kôrnai
1Amăng plei Sêsarê hmâo sa čô mơnuih anăn ñu Kôrnai, ngă khua kơ sa rơtuh čô ƀing tơhan Itali. 2Ñu jing mơnuih khăp hur kơ tơlơi đaŏ, thâo hwĭ pơpŭ kơ Ơi Adai hrŏm hơbĭt hăng abih mơnuih amăng sang ñu. Hăng tơlơi čơmah ñu brơi lu mơnơ̆ng pap kơ ƀing ană plei pla, laih anŭn ñu iâu laĭ kơ Ơi Adai nanao. 3Hlăk klâo mông klam#10:3 Boh hră phŭn blŭng: mông tal dua rơpăn. ñu ƀuh rơđah amăng tơlơi pơƀuh sa čô ling jang Ơi Adai mŭt amăng sang ñu hăng laĭ kơ ñu: “Ơ Kôrnai.” 4Hăng tơlơi hwĭ tơtư̆ ñu lăng pơñen ling jang hăng laĭ: “Ơ Khua, hmâo tơlơi hơgĕt?” Ling jang laĭ kơ ñu: “Tơlơi ih iâu laĭ laih anŭn mơnơ̆ng ih brơi pap hmâo đĭ truh pơ Ơi Adai laih yơh, laih anŭn Ơi Adai hơdơr pioh tơlơi anŭn. 5Ră anai pơkiaŏ nao bĕ mơnuih pơ Jôpa iâu Simôn arăng pơanăn Pêtrôs. 6Ñu hlăk dŏ hrŏm hơbĭt hăng Simôn, sa čô mơnuih ngă bruă lok klĭ, sang ñu ƀơi hang ia rơsĭ.” 7Tơ ling jang pơhiăp hăng ñu đuaĭ hĭ laih, Kôrnai iâu dua čô ding kơna ñu hăng sa čô tơhan hmâo tơlơi đaŏ amăng ƀing tơhan mă bruă kơ ñu. 8Giơ̆ng ñu ră ruai abih tơlơi anŭn kơ ƀing gơ̆, ñu pơkiaŏ nao gơñu pơ plei Jôpa.
9Tơdơi kơ hrơi anŭn, tơdang gơñu nao giăm truh pơ plei Jôpa, hlăk yang hrơi dơ̆ng#10:9 Boh hră phŭn blŭng: mông tal năm. Pêtrôs đĭ pơ bơbŭng sang kiăng iâu laĭ. 10Ñu rơpa laih anŭn mơhao kiăng huă biă mă, samơ̆ tơdang arăng dŏ prăp pre mơnơ̆ng ƀơ̆ng huă kơ ñu, ñu hmâo sa tơlơi pơƀuh. 11Ñu ƀuh adai pŏk hĭ, laih anŭn hmâo mơnơ̆ng kar hăng sa blah khăn prŏng akă pă gah akiăng pơañreng trŭn truh pơ lŏn. 12Amăng anŭn hmâo djŏp mơta hlô mơnơ̆ng pă ƀĕ tơkai, hlô mơnơ̆ng hro rui, hăng čĭm brĭm amăng adai. 13Laih anŭn hmâo sa asăp pơhiăp laĭ kơ ñu: “Ơ Pêtrôs tơgŭ koh čuh ƀơ̆ng bĕ!” 14Samơ̆ Pêtrôs laĭ: “Ơ Khua Yang, ƀu dưi ôh; yua kơ kâo ƀu dưi ƀơ̆ng ôh mơnơ̆ng hơƀak drak tui hăng tơlơi juăt ƀôdah ƀu rơgoh.” 15Asăp pơhiăp anŭn laĭ kơ ñu tal dua dơ̆ng: “Hơgĕt mơnơ̆ng Ơi Adai hmâo pơrơgoh laih, anăm laĭ ñu grĭ grañ dơ̆ng ôh.” 16Tơlơi pơhiăp anŭn truh klâo wơ̆t, laih anŭn thĕng lơleh, khăn anŭn dui đĭ hĭ pơ adai.
17Tơdang Pêtrôs rŭng răng dŏ pơmĭn kơ hơgĕt tơlơi pơƀuh anŭn kiăng pia, ƀing mơnuih Kôrnai pơkiaŏ nao hmâo tơña ƀuh sang Simôn laih, laih anŭn gơñu hlăk dŏ ƀơi amăng jang. 18Gơñu iâu kiăng tơña lăng djơ̆ mơ̆ Simôn pô arăng pơanăn Pêtrôs hlăk dŏ pơ anai.
19Tơdang Pêtrôs dŏ pơmĭn kơ tơlơi pơƀuh anŭn, Yang Bơngăt Hiam laĭ kơ ñu: “Lăng adih, hmâo klâo čô#10:19 klâo čô; hmâo đơđa Hră Ơi Adai Pơhiăp so đưm čih hmâo ƀing; Hră pơkŏn dơ̆ng čih: dua čô. mơnuih dŏ sem ih. 20Tui anŭn tơgŭ bĕ hăng trŭn nao hrŏm hơbĭt hăng gơñu, anăm dŏ kĭ kơ̆ dơ̆ng ôh; yua kơ Kâo yơh pơkiaŏ gơñu rai.” 21Tui anŭn Pêtrôs trŭn nao pơ ƀing mơnuih anŭn hăng laĭ: “Kâo gơ̆ yơh pô ƀing gih sem. Hơgĕt bruă ƀing gih rai?”
22Gơñu laĭ: “Kôrnai sa čô khua tơhan kơ sa rơtuh čô, sa čô tơpă hiam hăng hwĭ pơpŭ kơ Ơi Adai, pô abih bang ƀing ană plei pla Yuđa pơpŭ leng kơ ngă gơ̆ng jơlan hiam. Hmâo sa čô ling jang Ơi Adai pơtă brơi rai iâu ih nao pơ sang ñu, kiăng hmư̆ tơlơi ih pơtô.” 23Tui anŭn Pêtrôs iâu gơñu mŭt amăng sang, brơi gơñu đih đơ̆m glaĭ pơ anŭn.
Hrơi pơgi Pêtrôs tơgŭ nao hrŏm hăng gơñu, hmâo đơđa adơi ayŏng mơ̆ng plei Jôpa nao hrŏm hơbĭt hăng gơñu mơ̆n. 24Hrơi tơdơi kơ anŭn gơñu truh pơ plei Sêsarê. Kôrnai hrŏm hăng ƀing gơ̆p djuai ñu, ƀing gơyut gơyâo ñu, pơƀŭt glaĭ amăng sang, hlăk dŏ tơguan gơñu. 25Tơ Pêtrôs mŭt, Kôrnai kluh nao čơkă hăng bon kơkuh ƀơi tơkai Pêtrôs. 26Samơ̆ Pêtrôs rŭ ñu tơgŭ hăng laĭ: “Tơgŭ dơ̆ng bĕ, kâo ăt jing sa čô mơnuih đôč.” 27Tơdang Pêtrôs dŏ pơhiăp hăng Kôrnai ñu mŭt amăng sang laih anŭn ƀuh lu mơnuih dŏ pơtŭm glaĭ. 28Pêtrôs pơhiăp hăng gơñu: “Ƀing gih pô thâo laih ƀing ană Yuđa ƀu phiăn lir pơgop ƀôdah čuă ngui hăng sa čô mơnuih tuai ôh. Samơ̆ Ơi Adai pơrơđah laih kơ kâo anăm yap sa čô mơnuih jing hơƀak drak ƀôdah ƀu rơgoh ôh. 29Yua kơ anŭn, tơ ƀing gih pơkiaŏ mơnuih nao iâu kâo, kâo ƀu hơngah rai ôh. Hnŭn yơh kâo tơña yua hơgĕt ƀing gih kiăng kâo rai?”
30Kôrnai laĭ: “Rơgao pă hrơi laih, ƀơi mông anai mơ̆n, hlăk klâo mông klam#10:30 Iâu laĭ; hmâo đơđa Hră Ơi Adai Pơhiăp so đưm čih: ư̆ ƀơ̆ng huă laih anŭn iâu laĭ. tơdang kâo dŏ iâu laĭ amăng sang plŭt mơtam hmâo sa čô mơnuih buh ao bơngač biă mă pơƀuh rai ƀơi anăp kâo, 31hăng laĭ: ‘Ơ Kôrnai, Ơi Adai hmâo hmư̆ laih tơlơi ih iâu laĭ, laih anŭn Ñu hơdơr pioh laih abih bruă ih brơi pap. 32Tui anŭn pơkiaŏ nao bĕ mơnuih pơ plei Jôpa laih anŭn iâu Simôn pơanăn dơ̆ng Pêtrôs rai pơ anai. Ñu hlăk dŏ amăng sang Simôn, sa čô mơnuih ngă bruă lok klĭ, dŏ ƀơi hang ia rơsĭ.’ 33Tui anŭn kâo pơkiaŏ nao mơtam mơnuih iâu ih, laih anŭn ih hmâo pran jua hiam rai pơ anai. Tui anŭn ră anai abih bang gơmơi dŏ ƀơi anăp Ơi Adai, kiăng hmư̆ abih tơlơi Khua Yang pơtă kơ ih pơhiăp.”
Tơlơi Pêtrôs Pơtô
34 #
Mơñă 10:17. Pêtrôs čơdơ̆ng pơhiăp: “Sĭt biă mă kâo thâo Ơi Adai ƀu yap mơnuih phara phara ôh, 35samơ̆ amăng abih bang djuai mơnuih, hlơi pô hwĭ pơpŭ kơ Ơi Adai laih anŭn ngă tơlơi tơpă, pô anŭn yơh Ơi Adai mơak kơ ñu. 36Ƀing gih thâo Ơi Adai hmâo brơi laih tơlơi pơhiăp Ñu kơ ƀing Israel, kiăng pơhaih Tơlơi Phrâo Hiam kơ tơlơi rơnŭk rơnua mơ̆ng Yêsu Krist (Ñu jing Khua Yang kơ abih bang). 37Ƀing gih thâo laih bruă anŭn hmâo truh čơdơ̆ng mơ̆ng Galilê lar hyu truh pơ djŏp tring Yuđa, tơdơi kơ Yôhan pơtô kơ tơlơi ƀatem; 38hyư̆m Ơi Adai hmâo truač ia jâu kơ Yêsu plei Nasaret hăng Yang Bơngăt Hiam laih anŭn tơlơi dưi mơyang; giơ̆ng anŭn Ñu nao djŏp anih ngă bruă hiam hăng pơsuaih abih bang ƀing mơnuih yang sat kơtư̆ juă, yua kơ Ơi Adai dŏ hăng Ñu. 39Ƀing gơmơi jing ƀing ngă gơ̆ng jơlan pơsĭt kơ abih bang tơlơi Ñu hmâo ngă laih amăng tring Yuđa laih anŭn amăng plei Yêrusalem. Ƀing Yuđa hmâo yol pơdjai Ñu ƀơi kơyâo bơrơkal. 40Samơ̆ hrơi tal klâo, Ơi Adai pơhơdip glaĭ Ñu hăng brơi Ñu pơrơđah rai, 41ƀu djơ̆ kơ abih bang ană plei pla ôh, samơ̆ kơnơ̆ng kơ ƀing gơmơi đôč, jing ƀing ngă gơ̆ng jơlan Ơi Adai hmâo ruah mă hlâo, jing ƀing mơnuih hmâo dŏ ƀơ̆ng huă laih anŭn mơñum hrŏm hăng Ñu giơ̆ng kơ Ñu hmâo hơdip glaĭ mơ̆ng mơnuih djai. 42Laih anŭn Ñu pơtă ƀing gơmơi khŏm pơtô laĭ kơ abih bang ană plei pla, hăng pơhaih pơsĭt kơ Ñu jing Pô Ơi Adai pơdŏ brơi kiăng phat kơđi kơ ƀing hơdip laih anŭn kơ ƀing mơnuih djai. 43Abih bang pô laĭ lui hlâo hmâo pơhaih laih hlơi pô đaŏ kơ Ñu hmâo tơlơi pap brơi tơlơi soh mơ̆ng anăn Ñu.”
Ƀing Tuai Mă Tŭ Yang Bơngăt Hiam
44Tơdang Pêtrôs dŏ pơhiăp, Yang Bơngăt Hiam trŭn ƀơi abih bang ƀing dŏ hmư̆ tơlơi pơhiăp anŭn. 45Ƀing đaŏ hmâo tŭ laih tơlơi khăt klĭ, jing ƀing rai hrŏm hơbĭt hăng Pêtrôs, dŏ kơtuă hling, yua kơ tơlơi pha brơi Yang Bơngăt Hiam Ơi Adai ăt tuh brơi wơ̆t kơ ƀing djuai tuai mơ̆n. 46Yua kơ gơñu hmư̆ ƀing anŭn pơhiăp tơlơi tuai laih anŭn bơni hơơč kơ Ơi Adai. Hlăk anŭn Pêtrôs laĭ, 47“Hlơi dưi hơngah hĭ tơlơi ƀatem hăng ia kơ ƀing ană plei hmâo mă tŭ laih Yang Bơngăt Hiam kar hăng ƀing ta mơ̆?” 48Giơ̆ng anŭn Pêtrôs pơtă brơi gơñu tŭ tơlơi ƀatem amăng anăn Yêsu Krist. Laih anŭn gơñu rơkâo kơ Pêtrôs dŏ glaĭ hăng gơñu ƀiă hrơi dơ̆ng.
Selectat acum:
Bruă Mơnuă 10: JRA2016
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2016 United Bible Societies. All rights reserved.
