Luke 21

Salpiy ni pi’ be’ ni bpin nike yim’ figirngin

(Mark 12:41–44)

1Me chachangar Jesus me guy e girdi’ ni pire’ ban’en rorad ni yad be yin’ e salpiy ngalan tafen e salpiy u Tempel, 2miki guy be’ ni bpin nrib gafgow ya ke yim’ figirngin nike yin’ l’agruw i kobre’ nrow nib achig ngalan fare tafen e salpiy. 3Me ga’ar, “Nggog ngomed nre pin ney nib gafgow ya ke yim’ figirngin, e ir e bo’or e salpiy nike yin’ ko tin ke yin’ urngin e girdi’. 4Ya yad e kar pi’ed e salpiy ni kar feked ko salpiy ni bay rorad ni pire’; machane ir e aram feni gafgow ma ke pi’ urngin e chi salpiy ni bay rok ni ir e nge abich riy.”

Jesus ni weliy murung’agen e Tempel ni bay ni buthug

(Matthew 24:1–2; Mark 13:1–2)

5Boch i yad e ur weliyed murung’agen fare Tempel ngarogon feni fel’ ya’an nge malang riy ni bfel’ nge pin’en ni kan pi’ riy ngak Got. Me ga’ar Jesus, 6“Urngin e pin’ey ni gimed be guy e bay taw nga ba ngiyal’ ndariy ta’reb e malang u roy ni yira pag u tagil’, ya gubin ni bay nin’ nga but’.”

Marus nge gafgow ni bay ntay ko girdi’

(Matthew 24:3–14; Mark 13:3–13)

7Miyad fith ngak ni lungurad, “Tamchib, wu’in e ra yodor? Ma mang e ra yib i m’ug ni pow riy nike taw nga nap’an ni nge m’ug?”

8Me ga’ar Jesus, “Mu ayuwgad ndab ni ban nagmed. Ya bo’or e girdi’ ni bay rabad ni yad be fek fithingag nra bagayad ma be ga’ar e ir gag, ma ku bayi lungurad, ‘Fare ngiyal’ i n’em e ke taw ngay!’ Dab manged bagayad. 9Dab mu rusgad ko ngiyal’ ni gimed ra rung’ag murung’agen e mael nge girdi’ ko pi nam ni yad be mael ko am rorad; ya pin’ey e thangri yib i m’ug ni ir e mm’on, machane gathi fan e pin’ey e eram e ke chugur nga tungun.”

10Me ul ul ngay nge ga’ar, “Ya bay reb e nam me cham ngak reb e nam, ma gin nsuwon reb e pilung e bayi mael ko gin nsuwon reb e pilung; 11ma gubin yang ni bay i yib e durru’ nib gel riy, nge uyongol, nge liliy nib machreg nma af ko girdi’ i yan, ma bayi m’ug bogi ban’en u lanelang nib gel e marus ni bay nta’ riy nge bogi pow ni ba ga’.

12“Machane u m’on ko ngiyal’ ndawori m’ug e pin’ey riy e bay ni kolmed ngan fekmed, ma bay un gafgow nagmed; ma bay ni pi’med ngan pufthin nagmed u lan tafen e mu’ulung i yan ma bay nta’med nga kalbus; ma bay ni fekmed nga p’eowchen e pi pilung ko nam nge pi’in yad be yog e thin ni bochan e gimed girdi’eg. 13Ireray e ngiyal’ ni aram e ke bung rogomed ni ngam weliyed fare Thin Ni Bfel’. 14Ere ngam dugliyed lanin’med u m’on riy ni dabi magafan’med ngarogon ni ngam ayuweged gimed ko thin ni nga mogned; 15ya bay gu pi’ e thin ni nga mogned nge gonop romed ndariy reb e pi to’ogor romed nrayag rok ni nge togopluw ngay ara yog nde riyul’. 16Ma bayi yag nagmed e gallibthir romed, nge pi walagmed ni pumo’on, nge pi’in girdi’ romed, nge pi tafager romed; ma bay ra thanged e fan rok boch i gimed. 17Ma gubin e girdi’ ni bay ra fanenikayed gimed ni bochag. 18Machane dariy ta’ab gaf i piyan lolugmed nra yan romed ngabang. 19Ere mpired ni gimed bmuduwgil, ya ireray rogon me yag e yafos ngomed.”

I Jesus ni weliy murung’agen yu Jerusalem ni bay ni kirebnag

(Matthew 24:15–21; Mark 13:14–19)

20“Fa’anra mu guyed yu Jerusalem nike longobiy yu raba’ i salthaw, ma aram e kam nanged ndab ki n’uw nap’an min kirebnag. 21Ma aram e pi’in yad bay u lan yu Judea e thingar ra milgad nga daken e pi burey; ma pi’in yad bay u lan e binaw e thingar ra chuwgad riy, ma pi’in yad bay u wuru’ e binaw e thingar dab ranod ngalan binaw. 22Ya ireray e ‘Pi Rran ko Gechig,’ ya nge yib i dag nib riyul’ urngin e tin keyog e babyor nib thothup. 23Rib gel e gafgow nra tay e pi’in nib diyen, nge pi’in ni ppin ni kabran fakrad e ngiyal’nem! Ma ba gel e gafgow ni bay yib nga daken e re nam ney, ma damumuw rok Got e bayi togopluw ngak e pi girdi’ ney. 24Ma bay nthang e fan rorad ko saydon, min fekrad ni kalbus nga urngin e nam, ma pi’in gathi yad piyu Israel e bay ur yot’ed daken yu Jerusalem nge mada’ ko ngiyal’ ni ngar musgad riy.”

Wub ni bayi tay e en ni Fak e Girdi’

(Matthew 24:29–31; Mark 13:24–27)

25“Ma bay e pow ni bayi m’ug u mit e yal’, ngu mit e pul, ngu mit e pi t’uf. Ma pi nam nu roy u fayleng e bay ra pired ndakur nanged e n’en ni ngar rin’ed, ya kar rusgad nga lingan e day ni be pil nge day nib gel nike yib. 26Ma bayi aw e girdi’ nga but’ ko marus ko ngiyal’ ni ba’aram ni yad be sonnag e n’en ni be yib i yib nga daken e fayleng ni polo’; ma gelngin e pin’en ni bay u lanelang e bay ni pingegrad ngranod ko gin ni gathi ir e yad be sor ngay. 27Ma aram me yib i m’ug e en ni Fak e Girdi’, ni be yib nga but’ u fithik’ bangi manileng ni bay gelngin nib gel ma be galgal ram’en. 28Fa’anra tabab i m’ug e pin’ey, mi gimed sak’iy ngam changargad ngalang, ya aram e ke chugur ni ngan chuwegmed u fithik’ e gafgow.”

Murung’agen e gek’iy ni fig

(Matthew 24:32–35; Mark 13:28–31)

29Ma aram me weliy Jesus e re fanathin ni ba’aray ngorad ni ga’ar, “Mu tafinay niged e gek’iy ni fig nge urngin e tin ni kabay e gek’iy. 30Fa’anra mu guyed yuwan ni be yib, ma aram e kam nanged nike chugur ni nge taw ngal’an e gowel. 31Ere ku errogon ni ngiyal’ ni gimed ra guy e pin’ey ni be m’ug, ma aram e ngam nanged ni gagiyeg rok Got e ke chugur ni nge taw.

32“Mu ted fanmediyan ko re bugithin ney! Bay yib urngin e pin’ey u m’on ko ngiyal’ ndawori yim’ urngin e girdi’ ni yad bay e chiney ni yad ba fos. 33Tharmiy nge fayleng e bay chuw; ma thin rog e ri dabi math bi’id.”

Fan ni ngan ayuw

34“Mu ayuwgad, ma dab mpaged gimed ngu’um pired ni ba ga’ ni mur nike pag rogon nge mu’un rrum e gimed be muruwliy, nge pin’en nma magafan’uy ngay ko biney e tamilang, ya richey mi gimed da’da’ ko re Rran nem nike taw ngomed. 35Ya ra taw ngak urngin e girdi’ nu fayleng ni bod rogon ba wup ni pangthal. 36Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yag ni mmarod u fithik’ urngin e pin’ey ni bayi m’ug ni dabi buch ban’en romed mi gimed yan mu sak’iygad nga p’eowchen e en ni Fak e Girdi’.”

37I par Jesus ko pi rran nem ni be machib u lan e Tempel, ma bayi aw e lumor me yan nga wuru’ e binaw nge yan i par nga daken e burey nu Olive. 38Ma urngin e girdi’ ni yugu ra kadbul miyad yan nga Tempel ni ngar motoyilgad ko machib rok.

Selectat acum:

Luke 21: YAP

Evidențiere

Partajează

Copiază