Luke 17
17
Denen
(Matthew 18:6–7, 21–22; Mark 9:42)
1Me ga’ar Jesus ngak pi gachalpen, “Pin’en nma waliy e girdi’ nge mul nga fithik’ e denen e bmuduwgil nra yib; machane ri ra gafgow e en ni ir e ra fek i yib! 2Kabfel’ ni yira the’ gafan ba manang ni ba ga’ nga belel’ugun nganin’ nga maday, ko bin ni nge waliy bagayad e pi bitir ney nge denen. 3Ere mu ayuwgad!
“Fa’anra denen walagem ni girdi’en Kristus ma ga puwan’ ngak, ma fa’anra yib i wenig ngom, ma ga n’ag fan u wun’um e tin ke rin’. 4Ma fa’anra ngongliy e kireb ngom ni medlip yay u lan ta’reb e rran, ma urngin yay nra rin’ me yib i wenig ngom, ma thingar mu n’ag fan u wun’um.”
Michan’ ngak Got
5Me ga’ar fapi apostel ngak Somol, “Mu gelnag e michan’ romad ngak Got.”
6Me fulweg Somol ni ga’ar, “Fa’anra bay e michan’ romed ngak Got ni bod ga’ngin ba awochngin e mustard, mrayag ni nge lungumed ko re ke gek’iy ney ni mulberry, ‘Mpuw ngalang ngam man mu tugul nga maday!’ mra rin’ e tin kamogned.”
Maruwel rok ba tapigpig
7“Susun e aray rogon ma bay bigimed ni bay ba tapigpig rok ni be gi’ e but’ ma be gafaliy e saf. Ma gur fa’anra sul u milay’, mra lungum ngak mu gur nigem ngam abich? 8Bmuduwgil ndanga’! Ya ra lungum ngak, ‘Mu ngongliy rogon e ggan rog ko blayal’, ma ga m’ag madan e ta’ang nga daken e mad rom ngu’um pi’ ganag ngu’ug abich ma gu be garbod; nge mu’ ma aram e fin rayag ni ngam koy ban’en ma ga garbod.’ 9Re tapigpig nem e dariy rogon ni ngan pining e magaer ngak ni bochan e be fol ko tin yibe yog ngak, errogon fa danga’? 10Ere ku er rogomed, fa’anra mmu’gad i rin’ e tin kanog ngomed ni ngam rin’ed ma nge lungumed, ‘Gamad bogi tapigpig; ni kemus ni maruwel romad e kug ngongliyed.’ ”
Jesus ni golnag ragag i pumo’on
11Nap’an ni be yan Jesus i yan nga Jerusalem me yan u thilin yu Samaria nge yu Galile. 12Be sor i yan ngalan bbinaw miyad mada’ ragag i pumo’on ni bay e daraw u dowrad. Miyad par u orel 13ngar tolulgad ni lungurad, “Jesus! Masta! Mu runguymad!”
14Me guyrad Jesus me ga’ar ngorad, “Mmarod nge guy e pi prist dowmed ko kabay e daraw riy fa dakuriy.”
Ma nap’an ni yad be yan me chuw e daraw rorad miyad be’ech.#17:14 MIYAD BE’ECH: Mu guy e 5:12. 15Ma bagayad e fa’ani guy nike gol, me sul ni be pining e sorok ngak Got ni ba ga’ laman. 16Me yib i paraw nga but’ u to’oben i ay Jesus ni be pining e magaer ngak. Re mo’on nem e be’ u Samaria. 17Me non Jesus ni ga’ar, “Ragag e pumo’on ni kan chuweg e daraw rorad; me ere bu uw mereb i yad? 18Mangfan ni kemus ni cha’ney ni be’ u yugu reb e nam e ke sul ni nge pining e magaer ngak Got?” 19Me ga’ar Jesus ngak, “Mu sak’iy ngam man; michan’ rom ngak Got e ke gol nigem.”
Gagiyeg rok Got ni bay taw
(Matthew 24:23–28, 37–41)
20Me fith boch e pi Farise ngak Jesus ko ngiyal’ nra taw e gagiyeg rok Got. Ma fulweg riy ni pi’ e ga’ar, “Gagiyeg rok Got e dabi yib ni bod rogon ban’en ni yira guy. 21Dariy be’ nra ga’ar, ‘Mu sap, ba’aray!’ ara ga’ar, ‘Ba’aram!’ Ya gagiyeg rok Got e bay u fithik’ i lanin’med.”#17:21 fithik’ i lanin’med; ara fithik’med, ara bay yib nib tomgin nge yib i m’ug u fithik’med.
22Me ga’ar ngak pi gachalpen, “Bayi taw nga ba ngiyal’ ni bay mfineyed ni manga yugu mu guyed ta’reb e rran ko pi rran rok e en ni Fak e Girdi’, machane dabiyag ni mu guyed. 23Bay e pi’in bayi lungurad ngomed, ‘Mu sapgad aram!’ ara ra ga’argad, ‘Mu sapgad aray!’ Machane dab marod ni gimed be changarnag e n’en ke yog. 24Ya rogon e uluch nma mat u baraba’ e lang nge yan nga baraba’, e aram rogon e n’en nra rin’ e en ni Fak e Girdi’ ko chirofen ni ir e rran rok. 25Machane som’on e ngari gafgow me dabuy e girdi’ ko bin daba’ e rran daken. 26Rogon e re ngiyal’ i n’en ni ba’aram nnap’an Noah e ra aram rogon ko pi rran rok e en ni Fak e Girdi’. 27Un par ni yibe abich ma yibe garbod, ma be mabgol e pumo’on nge ppin nge yan i mada’ ko re rran ni ba’aram ni yan Noah riy ngalan fare ark me yib e ran i tharey e binaw nge li’rad ni yad gubin. 28Ra yan i bod fa ngiyal’ i n’em nnap’an Lot. Urngin e girdi’ nra pired ni yad be abich ma yad be garbod, ma yad be chuway’ ma yad be folchuway’ ko chugum, ma yad be woldug ma yad be dimow naun. 29Ma chirofen ni chuw Lot u lan e binaw nu Sodom, e yib e nifiy nge sulfur u lang nga daken yu Sodom ni aw ni bod e n’uw nge li’ e girdi’ riy ni yad gubin. 30Ireram rogon nra yan i aw ko chirofen ni nge m’ug e en ni Fak e Girdi’ riy.
31“Re mo’on ni bay u daken e naun rok e chirofen nem e thangri dabi sul nga but’ ngalan e naun rok nge fek e chugum rok ni bay riy; ma ku er i tay e re mo’on ni bay u milay’ ni thangri dabi sul ko naun. 32Dab mpaged talin e bpin rok Lot! 33En nra guy rogon ni nge ayuweg e pogofan rok e ra thay rok; ma en nra thay e pogofan rok e ra ayuweg. 34Nggog ngomed nre neap’ i n’em e ra bay l’agruw e pumo’on ni yow be mol u daken ta’bang i bet, ma bay ni fek bagayow nge yan, mi ni pag bagyow. 35Mra bay l’agruw i ppin ni yow be bilig e flowa u ta’bang, ma bay ni fek bagyow nge yan, mi ni pag bagayow.” 36#17:36 Boch e babyor e ni puthuy ngay e verse 36: Mra bay l’agruw i pumo’on u milay’, ma bay ni fek bagayow nge yan, mi ni pag bagayow (muguy e Mat 24:40).
37Me fith pi gachalpen ngak ni lungurad, “Ngan, Somol?”
Me fulweg Jesus ni ga’ar, “Gin ni bay ba yam’ riy e ra mu’ulung e arche’ ni vulture ngay nma longuy e yam’.”
Selectat acum:
Luke 17: YAP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2007 Bible Society of Micronesia. Released under the Creative Commons CC-BY-SA license 4.0.
