Karikani B'aai Taekan te boki aei
Taekan te boki aei
Te ara ae Karikani b'aai e reke man rairan te taeka n Erene ae “Kenetiti” ae nanona “moan rikin b'aai.” Aio bon te boki i bukin moan rikin b'aai, i bukina ngke e taekinaki iai moan rikin b'angab'angan karawa, moan rikin te aomata, moan rikiia te botannaomata ae Iteraera ao b'aai nako.
Moani m'akoron Karikani b'aai (1—11) e taekinaki iai te karikib'ai, ao te moan reeti n aomata ni karokoa ana tai Aberaam. A bane n raoiroi b'aai nako aika E karaoi te Atua, ma a aki ongotaeka iroun te Atua moan aomata ake uoman ake Atam ao Ewa. Ngaiia ake a karokoa te buakaka nakon te aonnaba aei. E rikirake karaoan te bure irouia aomata n te aro are E a kanakoa te ieka te Atua b'a e na tiringiia aomata ni kabane, ma ti nikirana Nooa ma ana utu. A taromauria te Atua, ma ngaia are, E tuangiia te Atua b'a a na kabaa te kaibuke b'a a aonga ni maiu ma kakauoman maan man aekaki ni maan aika kawakawa ma mannikiba nako ni kabane. Ao i mwiin te ieka, a mae nako aomata ni kabutaa te aonnaba, ao angiia a katoka taromaurian te Atua.
Nikiran kanoan te boki ae Karikani b'aai (12—50) e kanoaaki n rongorongon Aberam ma ana utu. E rineia te Atua b'a ana moan Aomata aika a kaokoroaki. E bita naba aran Aberam te Atua nakon Aberaam, ao aran buuna are Nei Taarai nakon Nei Taara. Akea natiia Aberaam ma buuna are Nei Taara, ma E berita te Atua b'a e na riki natiia, ao n te bong teuana e na reke oin abaia ma kanoaia, ao a na riki b'a te b'ai ni kakab'aia nakoia botannaomata nako.
A manga m'aing Aberaam ma Nei Taara nako Kanaan, te aba are E berita i bukina te Atua b'a e na anganiia kanoaia. Ao e riki te nati te mm'aane ae natin Aberaam ma Nei Taara ngke a rangi ni kara, ao arana bon Itaaka. Rimwi, e a manga reke natin Itaaka aika Iakob'a ao Etau. Ao ni kabanean rongorongon te boki, e taekinaki b'a a riki natin Iakob'a aika tengaun ma uoman mm'aane, ao a maeka aia utu i Aikubita. Temanna mai buakoia taari aikai, are Ioteb'a, e a manga riki b'a te koowana i Aikubita. E ataia Ioteb'a b'a n te bong teuana e na boni kakoroa bukin ana Berita te Atua nakoia ana Aomata. I m'aain maten Ioteb'a, ao e tuangiia tarina ni kaangai:
E a aki rangi ni maan au tai ni maiu i rarikimi. Ma E na kaawakiningkami te Atua ma ni kairingkami ni kaotinakoingkami mai Aikubita, nakon te aba are E a tia ni berita iai nakon Aberaam, Itaaka ao Iakob'a.
(50.24)
Oi n iango i aon te boki aei
1. Rongorongon te Karikib'ai (1.1—2.25)
2. Te moan bure ao te moan tiritiri (3.1—4.16)
3. Ana kariki Atam i m'aain te ieka (4.17—5.32)
4. Nooa ma te ieka (6.1—9.28)
5. Ana Kariki Nooa i m'aain te Taua are B'aabera (10.1—11.32)
6. Rineakin Aberam i roun te UEA (12.1-20)
7. Aberam ao Roota (13.1—14.24)
8. Ana Berita te UEA nakon Aberam (15.1-21)
9. Aberam, Nei Aka, ao Itimaera (16.1-16)
10. E bita aran Aberam te Atua nakon Aberaam ma ni berita nako ina b'a e na reke natina te mm'aane (17.1—18.15)
11. Aberaam, Roota, Tootom, ao Komora (18.16—19.38)
12. Aberaam, Nei Taara, ao Itaaka (20.1—23.20)
13. Rebeka, buun Itaaka (24.1-67)
14. Maten Aberaam (25.1-18)
15. Itaaka ma ana utu (25.19—28.9)
16. Iakob'a ma ana utu (28.10—35.29)
17. Etau ma ana utu (36.1-43)
18. Kabonakoan Ioteb'a Irouia tarina b'a te toro (37.1-36)
19. Iuta ao Tam'aa (38.1-30)
20. Ioteb'a i Aikubita (39.1—41.57)
21. Ioteb'a ma tarina nako (42.1—45.28)
22. Ioteb'a ma ana utu i Aikubita (46.4—47.31)
23. E kakab'aiaia ana utu Iakob'a ao e mate (48.4—50.14)
24. Maten Ioteb'a (50.15-26)
Selectat acum:
Karikani B'aai Taekan te boki aei: KNVB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te