Karikani B'aai 11
11
Te Taua are B'aabera
1Bon ti teuana ngkoa aia taetae aomata nako n te aonnaba, ao ti teuana naba aia taeka. 2Ao ngke a tabe ni m'am'ananga n taabo ake i mainiku, ao a roko n te tabo ae aoraoi i B'aburon, ao a tiku ni maeka iai. 3A kabooi nanoia ao a taku, “Bane mai b'a ti na karaoi buriki aika matoatoa. Ma ngaia are, a reke aia buriki are a na kateitei iai, ao te taa are a na kanimwi iai.” 4Ao a taku, “Ti nang karaoa ngkai te kaawa ae buubura ae iai tauana ae roota karawa, b'a ti na karekea atongara iai, ao ti na aki manga uamaae nako n te aonnaba.” 5Ma ngke E ruorikaaki te UEA n noora aia kaawa ae buubura are a tia ni karaoia ma tauana, 6ao E taku, “Aei bon moanakin baika a nang katai ni karaoi. 7Ti na ruorikaaki ngkai ni kaminoa aia taetae b'a aonga n aki atai nanon aia karaki i bon irouia.” 8Ao E kauamaenakoia te Atua ni kabutaa te aonnaba, ao e a toki karaoan aia kaawa ae buubura arei. 9E aranaki te kaawa ae buubura arei b'a B'abera i bukina ngke E kaminoi aia taetae aomata ni kabane te UEA iai, ao maikanne are E a kauamaenakoia aomata i aon te aonnaba.
Kanoan Tem
10Aikai kanoan Tem. E riki natin Tem te mm'aane ae arana Arebaketiata ngke ai 100 ana ririki ni maiu Tem, uoua te ririki i mwiin te ieka.
11Ao i mwiin anne, ao e a manga maiu riki i nanon 500 te ririki, ao a manga bungiaki natina riki tabeman. 12Ngke ai 35 ana ririki ni maiu Arebaketiata, ao e riki natina are Tiera; 13ao e a manga maiu riki i nanon 403 te ririki i mwiina, ao a manga bungiaki riki natina tabeman.
14Ao ngke ai 30 ana ririki ni maiu Tiera, ao e a riki natina te mm'aane ae Ebera, 15ao e a manga maiu riki i nanon 403 te ririki, ao a manga bungiaki riki natina tabeman. 16Ao ngke ai 34 ana ririki ni maiu Ebera, ao e riki natina te mm'aane ae Bereka; 17ao e a manga maiu riki i nanon 430 te ririki i mwiina, ao a manga bungiaki riki natina tabeman.
18Ao ngke ai 30 ana ririki ni maiu Bereka, ao e riki natina te mm'aane ae Reu; 19ao e a manga maiu riki i nanon 209 te ririki i mwiina, ao a manga bungiaki riki natina tabeman.
20Ao ngke ai 32 ana ririki ni maiu Reu, ao e riki natina te mm'aane ae Teruka; 21ao e a manga maiu riki i nanon 207 te ririki i mwiina, ao a manga bungiaki riki natina tabeman.
22Ao ngke ai 30 ana ririki ni maiu Teruka, ao e riki natina te mm'aane ae Naora; 23ao e manga maiu riki i nanon 200 te ririki i mwiina, ao a manga bungiaki riki natina tabeman. 24Ao ngke ai 29 ana ririki ni maiu Naora, ao e riki natina te mm'aane ae Teera; 25ao e a manga maiu riki i nanon 119 te ririki, ao a manga bungiaki riki natina tabeman.
26I mwiin koron 70 ana ririki ni maiu Teera, ao a bungiaki natina aika Aberam, Naora, ao Aran.
Kanoan Teera
27Ao aikai kanoan Teera are taman Aberam, Naora, ao Aran. Taman Roota bon Aran, 28Ao e mate Aran i bon i abana are Ura i Kareria, ngke e boni maiu tamana. 29E iein Aberam ma Nei Tarai, ao e iein Naora ma Nei Mireka, are natin Aran te aine, are tarin Itika. 30Ao e aki kakariki Nei Tarai.
31Ao e teirake ni m'ananga Teera man te kaawa ae buubura are Ura i Kareria b'a e na nakon te aba are Kanaan, ao e kaira natina te mm'aane are Aberam, ao tibuna are Roota are natin Aran te mm'aane, ao buun natina are Aberam, are Nei Tarai. Ao a m'ananga nako Aran,#11.31 Aran: Tao 855 te kiromiita i meangi maeaon Ura. ao a maeka iai. 32E mate Teera ngke ai 205 ana ririki ni maiu.
Selectat acum:
Karikani B'aai 11: KNVB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te