នាវនតើម 33

1ជេសរីយាកោបងគើរមាត់អ្វាញ់ ឆៃអេឆាវហាន់ នអ៝ប់មាគែសឞាល់ពាង់ ៤០០ នុយ្សហាន់នទ្រែលពាង់ដ៝ង់ ជេសរីយាកោបតឹមពាៈក៝នអ៝ន់មាលេអា អ៝ន់មារាចែល នទ្រែលមាអ៝ន់មាឞូអូរឆើមកើលជានការឞារហៃនៃ។ 2យាកោបអ៝ន់ឞូអូរឆើមកើលជានការឞារហៃនៃ នទ្រែលមាទឹងលែៈក៝នខាន់ពាង់ហាន់ល៝រ ជេសរីលេអា នទ្រែលមាទឹងលែៈក៝នពាង់ ងគ្លែៈទុតឞូរីពាង់អ៝ន់រាចែលនទ្រែលមាយោឆែបហាន់។ 3យាកោបនើមរីពាង់ហាន់ឞើសនាប់ផូងនៃ ពាង់ហាន់ពាន់មឞាសអានែសឆូពើសតឹ នហ៝មាត៝ត់ទាច់អេឆាវនោពាង់រី។ 4អេឆាវញច្វាត់រានពាង់ អូតពាង់ អូតតាត៝ងក៝ពាង់ ចុមពាង់ ជេសរីញុមលែៈឞារហៃ។ 5អេឆាវអ្វាញ់ឆៃផូងឞូអូរ នទ្រែលមាផូងក៝នឆែ ពាង់អោប៖ “ឞូម៝សផូងគុនទ្រែលមៃអ្យា?” យាកោបអើស៖ “អ្យាក៝ន កោរាញឞ្រាសទែអ៝ន់មាគ៝ប់តាៈឞើសនាវអ្វែសពាង់នើម”។

6ជេសរីឞូអូរឆើមកើលជានការមាឞារហៃអូរពាង់រី នទ្រែលមាទឹងលែៈក៝នខាន់ពាង់ហាន់ពាន់មឞាសអេឆាវនៃ។ 7ជេសនៃលេអានទ្រែលមាទឹងលែៈក៝នពាង់ហាន់ពាន់មឞាស ងគ្លែៈទុតឞើសកើយយោឆែប នទ្រែលមារាចែលហាន់ពាន់មឞាសដ៝ង់។ 8ជេសរីអេឆាវអោបយាកោប៖ “ម៝សជាននទើមៃអីអ៝ន់ឞូលែវម៝ប់គ៝ប់នទើសនើស?” យាកោបអើស៖ “គ៝ប់លែវមាញជុនអ៝ន់មៃនោ គៃមានោយោៈគ៝ប់”។#៣២:១៤-១៧ 9អេឆាវលាសមាពាង់៖ “អើអ៝ស គ៝ប់ឞែលែៈគែសអ៝ក់ងាន់ មៃឆ៝ៈនទើមៃនៃព្រាប់អ៝ន់មាមៃនើមទោ”។ 10យាកោបអើស៖ “មោអោសនទ្រីនោ លាសមៃយោៈគ៝ប់ងាន់ មៃទើននទើគ៝ប់ញជុនអ៝ន់មាមៃនៃទោ។ ទោលគ៝ប់ឆៃមុសមាត់មៃតឹមឞានមាឆៃមុសមាត់កោរាញឞ្រាសដ៝ង់ យ៝រលាសលែៈមៃរ៝មគ៝ប់មានាវអ្វែសដាប់មពាន់។ 11លាសនទ្រីទាន់មៃឆ៝ៈទើនហ៝ម់នទើគ៝ប់ញជុនអ៝ន់មៃនៃ យ៝រលាសលែៈកោរាញឞ្រាសអ៝ន់គែសជេងមាគ៝ប់ អ៝ន់គ៝ប់គែសទ្រាប់នទើអ៝ក់រាមែស”។ ជេសរីអេឆាវឆ៝ៈទើននទើនៃ យ៝រមាយាកោបញច៝ប់ពាង់ងាន់។ 12អេឆាវលាស៖ “ហោៈ ហាន់ហ៝ម់ឞ៝ន់ គ៝ប់ហាន់នទ្រែលមៃ”។ 13យាកោបលាសមាពាង់៖ “អើនោ#៣៣:១៣៖ តានាវងើយហេឞ្រើញចីស៖ «អើកោរាញ» យ៝រលាសយាកោបអុចញជុរងាន់ឆាក់តានាប់នោពាង់។ មៃលែៈគឹត ឞ៝ន់ឞ្រោៈត្រ៝ងហាន់នទ្រែលក៝នឆែអ៝សឞេមោគែសអោសអ្វែស គ៝ប់គែសឞែឞ្យាប់ គែសឞែ នទ្រែលមាគែសនទ្រោកហោមអែក៝នពូត៝ស។ លាសឞ៝ន់ញច៝ប់អ៝ន់ហាន់ងាយអីរតាទូនារ ទឹងលែៈមពោមពា(ឆ្យុម)នៃខឹតលែៈផ្យៅរ៝។ 14លាសនទ្រីមៃហាន់ល៝រគ៝ប់អីឞូនុយ្សឆើមកើលជានការមាមៃទោសនោ គ៝ប់មាហាន់មព្លេមៗផូងក៝នឆែ នទ្រែលមាមពោមពា(ឆ្យុម) នហ៝មាត៝ត់គ៝ប់តឹមម៝ប់ដាសមៃតាឞ្រីឆេអីររី”។ 15អេឆាវលាសមាយាកោប៖ “លាសនទ្រីគ៝ប់អ៝ន់ឞាល់គ៝ប់ហាន់នទ្រែលមៃបាៈទោស”។ យាកោបអើស៖ “មោច្រាវអោសនោ មៃលែៈយោៈមាគ៝ប់កើតនៃលែៈគាប់ជេស”។ 16ជេសរីអេឆាវព្លឹឆឹតតាឞ្រីឆេអីររីនារនៃដ៝ង់។ 17យើនមាយាកោបមោអោសហាន់តាឞ្រីឆេអីរ ពាង់ហាន់ត៝ត់តាប៝នឆូកោតច្រាវ។ ពាង់ជានទូមល៝ម់ជៃមាគុពាង់នើម នទ្រែលមារាទ៝ក់ងកឺបមាអ៝ន់មពោមពា(ឆ្យុម)ពាង់នើមដ៝ង់។ កើតនទ្រីទឹងឞូក្វាល់នតុកនៃ «ឆូកោត» គែសនាវខ្លៃលាស«ចូន»។

18ឞើសកើយយាកោបឆឹតឞើសឞ្រីពាដាន-អារាមនៃ ពាង់ហាន់តាប៝នឆីកែមឞ្រីកានានមានាវដាប់មពាន់ ជេសរីពាង់រាទ៝ក់ចូនឞ៝កតឹមទាច់មាប៝ននៃ។ 19នែសនតុកពាង់ជានចូនឞ៝កនៃ ពាង់រាវាត់តាៈឞើសផូងអ៝សក៝នហាម៝រអីឞឹឆីកែម ខ្លៃ ១០០ កាក់ព្រាក់។#យោឆ ២៤:៣២; យហ ៤:៥ 20ជេសរីពាង់ជានទូនតុកមាជានឞ្រាសតានតុកនៃ ពាង់តេៈរាញា «អែល អែលោហេ អីឆ្រាអែល» គែសនាវខ្លៃលាស«កោរាញឞ្រាសជេងឞ្រាសអីឆ្រាអែលយើកមឞាស»។

Versete biblice populare din
នាវនតើម 33

Biblia:

Bunong

Versiune: Bunong - cmoK