Lukas Uram 7
7
Er Yesus biryi Kapernaum atei aryi Roma yin doun nang sienyi wa irmiliramunyi u yiramwe asi kwetebmou uram
7:1-10
1Er Yesus biryi ninyi urasin dam aryi uram enmou ani, sirya ebmou ura, Kapernaum atei dam wengbinmou. 2Akatei dam ara Roma nang yin doun nang seratus baryi arungnamwe sienyi tentok kuramwe. Anyi bira er ai wa irmiliramunyi bisi boukwe kimnamwe bok, a wa irmilinanyi bira u yiramwe ba, dibmanto kunmou. 3Ba, a yin doun nang sienyi biryi Er Yesus yanmar ena kekebmou ura, erci akatei Yahudi nang sien nang ninyi mikbaryi asi, “ ‘Yesus ni atei yandoka, ni wa irmilinanyi u yirur asi kweteryarur,’ eboka molobmar erbindarur!” eboka bokeibmou. 4Ato eboka bokeibmou ba, Er Yesus bisi yanmai ura, sunci Ersi olom-olom eboka molobmai, “ ‘Anyi bira iya teleb kanya bobwe ati, Kanci anyi molobmar to kunubkwamarim ara kikiman,’ tenebmab. 5Anyi bira Yahudinyi kuma bok, Erci nun atei nang boukwe kiboka milisurur. Erci nun Musa Uram eteren ai doramoubwe ura, mitik kum milibsou ba, dobdoboubwe ati ebmab,” ebmai. 6-7Ura, Er Yesus sun ab tonkwa binmai.
Barabyi ani, Er Yesus a yin doun nang sienyi ai damtoto wengbau ura, anyi biryi er kwit yabwe asi uram ebdeibmou. “Yesus Kan mambul kanya boyangan kum, ‘Nira Romanyi kunun deyok aryi, Kansi du dongona ara kikiman kum,’ tenebdanman ati, ni nong aryi Kan dam kum yankwaman. Ati, Nai Kanci uram bum tentok ebminyi aryok ni wa irmilinanyi u yirur ara lobdobkwamar ebmar erbindarur!” ebdeibmou. 8Ato ebdeibmou cok, anyi er dib tenen dinyi lak kibdanmouci, ato ebdeibmou, “Ni nong ara yuk nang amwetam bunanyi kunun. Ba, ni amwetam ara mar boban nang kunung. Niryi ni amwetam kunung nang asi ninyi tentok, ‘Birum!’ ebtinyi ura, kunuboka binkwamote ba, yuknyi bisi ara, ‘Yarum!’ ebtinyi ura, yankwamote. Tonda, ni wa irmilinanyi bisi, ‘A wa asi ibdum!’ ebtinyi ura, erci kunuboka ibkwamote,” ebdeibmou. Ara, anyi biryi, “Er Yesus bira Iya Erebdobnyi biryi uram dem ebci aryok ni wa irmilinanyi u yirur dinyi ara bindobkwamar,” tenebmou deyok aryi, ato ebmou.
9Asi, Er Yesus biryi anyi ebdeibmou uram kekebmou ura, “Nai e,” tenebmou cok, Er Yesus milibmai nang wekmai tam urasin dangubokmou ura, ato ebmou, “Niryi sunsi diboka ebkwinsin. Israel yala nang yoka ara, ‘Aminda ara Kristus Ninyi Lemnanyi yankwande,’ ena kekeramnyi nang ara Ni enun uram asi diba tenenun nang ton kum eirinun. Bok, arub aryi yuk atei Romanyi bira ato dinyi ton kekerdena kumnyi biryi, ‘Ni en uram asi diba kunubkwamar,’ tenebmar dinyi eibman,” ebmou. 10Ba, yin doun sienyi er kwit yabwe aitam tamuboka baramnyi uca, a wa irmilinanyi bira er u yiramwe dinyi sirya lobdobmou ba, kib bukmou asi asing bindoka eibmai.
Er Yesus biryi Nain atei sulyi ner mi dibmou asi kam bukeibmou uram
7:11-17
11Wa irmilinanyi sirya kwetebmou ura, Er Yesus anaboka Galilea mutuk atei si Nain binmou. Akatei banmou ura, Er miliramnyi nang ab ton yuk nang ababyi ninyi ilinto Ersi milibmaici, binmai. 12Banmai ani, Er Yesus akatei wengban lika bublan dam tingbau uca, atei tam aryi kuboka ninyi dibmou tukwe asi co maloua caboka baitam bobindoka tukwe ungbanmai asi asing eibmou. A boyanganmainyi bira sulyi ner er mi tentok a kunum deibdamwe bok asi, dibmou ba, tukwe dongobkwamai ati boyanganmai. Ba, akatei nang ababyi ninyi ilinto aryi a sulyi ner ati bobmilibmai. 13Asi, Er Yesus biryi a sulyi ner asi diramwe uca, a ner boukwe aryi Er boukwe sangkuruk-sangkuruk ebmou ba, a ner asi, “Kan engena mem!” ebmou.
14Ato ebmou ura, Er Yesus biryi co maloua caboka boyanganmaia dam tingbinmou. Ba, co maloua bobmai nang ara tiklobmai ura, a co maloua asi bol libdenmouci, Erci ato ebmou, “A kam mi, Niryi kansi, ‘Bukokdum,’ ebmakin!” ebmou. 15Ura, a mi bukalaboka buryibinmouci, uram ebkalibmou. Ura, Er Yesus biryi Er kwin bisi tamubkarebmou. 16Ba, a mi co maloua caboka boyanganmai ati milibmai nang nirya ara ilil kubmou ba, sunci ato ebmai, “Nun kankan dam aryi Er Imtamnyi Uram ebdeibmaca bobananyi weiknyi tentok yanmar. Ba, Er Imtamnyi biryi Er Uram keken nang ati, lebkwan tenen diryuryanmar!” eboka Er Imtamnyi bisi si weik erebmai. 17Ura, Er Yesus biryi a kubmou deyok ati, Yahudi yala nang kuramnyi mutuk atei nirya ebdanin yibinmai.
Er Yesus ab Yohanes ninyi me dongonanyi ab uram
7:18-35
18Yohanes ninyi me dongoramunyi bira ninyi wenen ai umbura dongoamnyi bok, Er Yesus kuramwe dinyi nirya Yohanes er miliramnyi nang aryi er dam nukmai asi kekebmou. 19Kekebmou ura, Yohanes biryi er milirandei nang ninyi bitinyi nabmouci, “Er Yesus bisi birurumnyi ura, ato eboka asibdenkwandururum! ‘Kanda, aminda yankwandanyi eboka dibde bukunubnyi a kunum yaumwe do? Kum aminda yuknyi ton do yankwandanyi bisi dibde bukwanub do?’ eboka asirderbirurum!” ebmou ura, bokdonokmou.
20Ba, a bitinyi nang aryi Er Yesus dam binmarei ura, sunci ato ebmarei, “Nunda Yohanes ninyi me dongonanyi biryi Kansi asirderbirurum eboka bokdonokmasir ati yanmanim. Ara, ato ebmar, ‘Kanda, aminda yankwandanyi eboka dibde bukunubnyi a kunum yaumwe do? Kum, yuknyi aminda ton do yankwandanyi bisi dibde bukwanub do?’ eboka asibmakir,” ebmarei.
21A talak ara Er Yesus bira u yiramwe nang ninyi ilinto kwetenmou ba, mambul kanya boramnyi nang ara kanya lengleng erdeirinmou ba, isa kanya wengnamwe nang ara yangdonongmou. Ba, asing kuramwe nang ninyi ilinto asi asing kerket dinyi karenmou ba, lak einmai bok, a bitinyi nang bindoka asibmarei. 22Ura, Er Yesus biryi a bitinyi nang asi ebmou, “Birurumnyi ura, sun asing aryi eibmarurum to ab kekebmarurum to ab Yohanes bisi bindoka ebdururum! Asing kurur nang ara elengdeirinman ba, asing einmang. Ba, yan denerur nang ara niningdeirinman ba, tikoka yibaronmang. Ba, susa talerur nang ara akarsangdonmar ba, amol kiningdur nang ara amol kungdeirinman ba, ninyi uram kekenmang. Ba, din nang ara kam burdeirinman ba, sun dam nang aryi sisikoka utotoa ukubman kum aryi, ‘Er Imtamnyi biryi lebsute,’ teneboka dibde buraming nang ati Teleb Uram eterenmanci, ‘Nira sun Lebkwansinanyi sirya yase,’ enman. Asi, sun asing eibmarurum to ab kekebmarurum to ab Yohanes dam bindoka ebkwandurum! 23Sun yuk nang aryi Nisi dirderaning uca, Ninyi Lemnanyi yaci ura, ato kubkwansir tenenung to kum bok, sunda, ‘Se,’ teneboka Nisi, ‘Ni li,’ tenenina kum nang ara Er Imtamnyi biryi kisal dangsurur,” ebmou.
24Ura, Yohanes bokdonokmou nang sirya tamuboka binmarei ura, Er Yesus biryi ninyi ilinto asi Yohanes deyok ati uram ebkalibmou. “Sun ninyi kun kum mutuk ara unatoa ati binkwamandaute do? Yohanes bira kumwe donmaci uca, mutuk otong asi co sungsunga lulungnande atonyi kum kurur. 25Yohanes ongon aling diboka liliboka ongobmaci asi eibtibyi tenen dirbinkwamandaute do? Erda ongon aling diboka liliboka ongororurnyi kum kurur. Ongon aling diboka liliboka ongoraming nang ara weik sien nang kuraming ai dam kuboka teleb-teleb dinyi akwe yibde kuraming. 26Sun unatoa ati dirbinkwamandaute do? ‘Er Imtamnyi Uram ebdeibmaca bobananyi bisi eibtibyi,’ tenen ati binkwamandaute do? A tenebmamunyi ura, diba. Niryi sunsi ebkwinsin ara anyi bira Er Imtamnyi Uram ebdeibmaca bobananyi iya bikdobnyi kurur. 27Ati, Yohanes er deyok ara minob uca Er Imtamnyi biryi Er uram ebdeibmaca bobaramunyi si Maleakhi deici ebdeiamwe ba, sirya kerek sekeibwe ara ato,
‘Dirandarur, Ni Imtamnyi biryi ninyi tentok Ni uram er deici ebdeibnyi ba, ebmurubkwandanyi bokdonokwan. Ba, anyi biryi ninyi Lebkwandanyi biti bisik yabde menekwande,’ eboka kerek sekdeibwe,” ebmou. (Maleakhi 3:1)
28Er Yesus biryi ato ebmou cok, ton ato ebmou, “Niryi sunsi ebkwinsin, ninyi nirya ara Yohanes deici tam kuboka erebdob nang ton kum kundarur. Erda unanyi biryi Er Imtamnyi bira ninyi leboka kalingna Weik Sienyi kurur amwetam kun nang kankan aryi luknubdongoboka kurandinyi bira Yohanes amwetam kibkweteboka Erebdobnyi kurandiryi,” ebmou.
29Ba, Er Yesus biryi a enmou ba, kekenmai nang kankan ara, “Roma weik sienyi Kaisar biti pajak dengna karebdarur,” en nang ababyi wekmaici, kekenmai aryi, Er Imtamnyi bira diba eboka sun tenen dinyi lak ebmai. Ara, Yohanes bisi me dongobsurum eboka bobinmai ba, me sirya dongobmou deyok aryi, ato ebmai. 30Bok, Farisi nang ab Musa kerek sengna etereramnyi nang ab ara Er Imtamnyi biryi sunti teneibmou dinyi ara kum bikmai deyok aryi, sunda, “Yohanes biryi me dongosina nun li,” tenebmai.
31Er Yesus biryi uram ton ebmou ara, “Niryi una dinyi aryi a talak kundarur nang sunti kikliboka lilibdeibsitinyi do? Tonda una dinyi asi sunda ato nang ebsitinyi do? 32A nang sunti kiklin dinyi ara mitik mabwe aryi dengna ai dam arikal donmangiryi bukoka uram dordaraming to kundarur,
‘ “Nunda sunbabyi mot sebmilibdobkwansindarur,” tenen ati mot semab bok, sunda mot kum sebmilibdobmasurum,’ erdaraming to kundarur nang.
Ba, ton erdaraming to ara,
‘ “Nunda sunbabyi ninyi dibmangnyi ba, urumna eboka engeraming to boukwe eiboka engebkwandarur,” tenen ninyi boukwe eimni tanyi enmab bok, sunbabyi kum engenmarum,’ ebde dordaraming to kundarur nang.
33Ato kuboka Yohanes ninyi me dongonanyi a yandoka kuramwe talak ara kum miliransouci, roti kwaning ab co anggur du yung ab kum yiramwe deyok aryi, sunci, ‘Anyi bira isa kanya wekunyi,’ erandau. 34Ani, ukuryok ara Ni Ninyi Dasinyi yandoka kununci, sunci, ‘Yesus bira nun kunmab to milibkwansir,’ tenerandum bok, Niryi sunsi kum miliransinci, Niryi kwaning ab me yinmanyi ura, sunci Nisi ato enindarur, ‘Dibdendarur e! Anyi bira kwaning yin louranyi ab walina talen me yin biryi, “Roma weik sienyi Kaisar biti pajak dengna karebdarur,” en nang ab malyi kun dinyi kunung nang ab sun kwit kibdoburyi tonkwa kunung,’ enindarur. 35Bok, Er Imtamnyi bingna yangan bisik lak kimnande ara Er Imtamnyi bingna dinyi bikoka kunuraming nang sun biriman aryi lak kimdeirande,” ebmou.
Malyi kun dinyi kuramwe ner tentok aryi Er Yesus bisi tong teleb co yung dikeibmou uram
7:36-50
36Uki tentok tum ara Musa kerek sengna dirniliramunyi nang Farisinyi si Simon biryi Er Yesus bisi, “Ni ai yina tonkwa yibkwanim,” eboka nabmou. Ba, Er Yesus biryi anyi ai yanmou ura, tonkwa bukoka yina yinmai. 37Akatei ara malyi kun dinyi ilinto kuramwe ani, taklobmou ner tentok kuramwe. A ner aryi kekenmou uca, “Er Yesus bira Farisinyi ai yanmar ba, yina tonkwa yibmaring,” ebmai asi kekebmou. Ura, a ner aryi mitikto keil moyok asi tong teleb co yung kibdeiamwe doubdobmou ura, akai wengbinmou. 38Akai wengbinmou ura, engenmou cok, Er Yesus bukoka yan donokmoua dam tingbinmou ura, Er Yesus yan asi asimaka aryi tubdeiboka a ner er otong aryi kilibmou. Ura, Er Yesus yan asi u kunkunubdobmouci, mitikto keil moyok tong teleb co yung kibdeimwe ara bublan tirikna dam bulakaboka Er Yesus yan deici asi lubdeibmou.
39Ba, a ner aryi kunmou to ara Er Yesus, “Ni ab tonkwa yibkwanim,” eboka nabmounyi biryi eibmou ura, er kanyatam aryi ato tenebmou, “Se nai kobe, anyi bira Er Imtamnyi Uram ebdeibmaca bobananyi kurante ura, a yandoka kunmanir ner ara, ‘Danto ner aryi kunmanir do? Tonda a ner ara una kurur ner aryi kunmanir do?’ tenebmote. A ner aryi malyi kun dinyi kurur ara bingdur cok, ‘Ni li,’ kum ebmar ati, anyi bira Er Imtamnyi biryi uram ebdeibmaca bobananyi kum kurur,” tenebmou. 40Asi, Er Yesus biryi anyi bisi ato ebmou, “Simon, Niryi kansi uram ton ebkwankin,” ebmou. Uca, Simon biryi, “Yo, ni Nai ninyi eterenanyi ur ebdum,” ebmou.
41Ato ebmou ura, Er Yesus biryi ato ebmou, “Ninyi bitinyi aryi ninyi tentoknyi co bok asi moloboka bobloantiring. Tonyi bira yubwa-yubwa amubaryi bobloante ba, tonyi bira sirik amubaryi bobloante. 42Ba, sunci a bobloantiring co bok ara dekdeibman kum aryi tuba bobloanting ura, a co bok damnyi biryi, ‘Malyi, dengdening kum, ur taklobdurum!’ eboka sun bobloantiring dinyi luba kibte. Ba, a bitinyi nang ara unanyi biryi co bok damnyi bisi, ‘Ni nai,’ tenebte do?” eboka asibdenmou.
43Uca, Simon biryi, “Ni tenebman ara, ‘Co bok yubwa-yubwa amubaryi bobloantunyi biryi, “Ni nai teleb,” tenebkwamote,’” ebmou. Ba, Er Yesus biryi, “Kan tenebmarim to ara diba,” ebmou.
44A sirya ebmou ura, Er Yesus biryi a ner tam urasin danguronguryok, Simon bisi, “A ner kubmar dinyi ara eibmarim do? Ni kan ai yanman ura, nun atei nang kunub to kanci Ni yan ilingna me ton kum ilikdeibmanirim. Bok, a ner ara er asimaka aryi Ni yan me ilikeiboka er otong aryi kilibmanir. 45Ba, tonda kanda nun atei nang kunub to, Ni katum ababyi u ton kum kunkunubmanirim bok, erda ton tanglona kum uca, yuma wengyanmou aryi Ni yan asi u kunkununmanir. 46Tonda, kanda nun atei nang kunub to, malyi tenen co yung ababyi ton Ni kisok dub ton kum dikeibmanirim bok, a ner ara erci Ni yan asi tong teleb co yung dikeibmanir. 47A deyok aryi, Niryi kansi ebkwinkin, a ner ara er malyi kun dinyi ilinto kurur dinyi sirya kilibman ba, a ner aryi Nisi mitik kum boukwe kibmanir. Bok, yuk nang ara sun malyi kun dinyi ababyi mitikanun kiliran ba, sunci Nisi mitikanun boukwe kimdaning,” ebmou.
48Ato ebmou ura, a ner asi, “Kan malyi kurum dinyi sirya kilibmakin,” ebmou. 49Ba, Er Yesus ab tonkwa bukoka yinmai nang aryi, ato tenebmai, “Se anyi bira unanyi bitonyi biryi a ner asi, ‘Niryi kan malyi kun dinyi kilibmakin,’ ebmar do? Nun tukwetam nang ara ninyi malyi kun dinyi kilibmanto nang ara ton kum kunub. Eda, ninyi malyi kun dinyi kilisururnyi bira Er Imtamnyi tentok asi ato ebmar,” tenebmai. 50Bok, Er Yesus biryi a ner asi, “Kanci, Nisi, ‘Diba Er Imtamnyi bokwetebunyi kurur aryi ni malyi kun dinyi sirya kilibmanir,’ tenebmarim deyok aryi, lebmakin ati, kilkil kanya boboka teleb akwe bindobkwamarim,” ebmou.
Selectat acum:
Lukas Uram 7: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
