Lukas Uram 24
24
Er Yesus Kristus kam bukokmou uram
24:1-12
1Er Yesus dibmou talak uki winiryi tum kubmou. Ara, sun Yahudi yala nang aryi yuma uki tum eramnyi tum berekmou. A tum belekuna kobdob aryi Er Yesus bisi miliramnyi nerabwe mer anaboka, Er Yesus dibmoua tukwi dongobmou ai dirbinmai. Sunci, “Er Yesus dibmoua tukwi lubcei,” tenen ola luna kum co yung kiknibdeibmai aryi boboka binmai. 2Er Yesus dongobmai keil um dam bindoka diramnyi uca, keil bublan tirikmai asi kukdonokokmou ba, um angang enmou asi asing eibmai. 3Ura, sunci keil umbura wengbindoka dirdongoramnyi uca, Er Yesus dibmoua tukwe asing kum eibmai. 4Er Yesus tukwi kum eibmai deyok ati, sun kanya walwal kubmou ba, kanya teneibde tikmai asi asing kublabum ena aryi ninyi bitinyi kait aling ongobmarei nang sun dam tingyanmarei. 5Tingyanmarei ura, a nerabwe mer sun ilil kubmou ba, ngang dakokmai asi, Er Imtamnyi Uram eryuryangan nang bitinyi aryi uram ara ato ebmarei. “Sun unatoa ati din nang kankan aryi sirya kam bukokmaranyi biti ingkiringyanganmarum do? 6Er dibmoua tukwi ara a kum kubmar, sirya kam bukokmar! Erci Galilea kunmou talak aryi sunsi eamwe asi sunci kanya teneibdenkwandarur. 7Ara, ato, ‘Ni Ninyi Dasinyi bok, malyi kun nang taruk dam dobkarebkwaning. Ba, dibmanyi ani, uki winiryi tum ara kam bukokwan,’ eamwe to kunubmar,” ebmarei. 8Ura, sunci Er Yesus minob sun dam eamwe dinyi asi kanya teneibdenmaci bikmai. 9A nerabwe mer ara Er Yesus tukwe dongon dam aryi tamuboka yanmai ura, sun asing eibmai to Er miliramnyi nang koklombaryi nang dam ab ton sun kwit yabwe yuk nang dam ab asi nukmai. 10A nerabwe mer sun si ara Maria atei Magdala ner ab, Yohana ab, Maria Yakobus er kwin ab, ton yuk nerabwe ababyi tonkwa antaniboka Er Yesus miliramnyi nang koklombaryi nang dam eryanmai. 11Eryanmai bok, Er Yesus miliramnyi nang ara a nerabwe mer eryanmai uram ara tola ati ebmang teneboka diba kum tenebmai. 12Ato tenebmai cok, Petrus tikokmou ura, ola cungbindoka Er Yesus tukwe dongon dam dirbinmou. Bindoka keil umbura dam dirdongorderamwe uca, kaluna akubdeibmai dinyi akwe kubmou. Ura, tubto tamuboka banmouci, kanyatam aryi, “Ara, una kubmar aryi do?” eboka asibdandenin binmou.
Er Yesus biryi atei Emaus ban bisik aryi Er milirandei nang bitinyi dam asi lak kibdanmou uram
24:13-35
13Er Yesus kam bukokmou uki tum aryok Ersi milirandei nang bitinyi mitik atei si Emaus banmarei. Akatei ara Yerusalem atei aryi bana ara 10 kilometer baryi asi banmarei. 14A bitinyi nang banmareici, bisik ai ara Er Yesus obmai to ati nukde banmarei. 15Uram sisikde banmareici, sun kisok dam borandei to ebkarebdanin banmarei bok, Er Yesus yandoka sun dam tikdongobmou ura, sun tonkwa antaniboka binmai. 16Tonkwa banmai cok, a bitinyi nang sun asing ara er tenento keica aryi libmou ba, Er Yesus bira eibmarei cok, kum bikmarei.
17Asi, Er Yesus biryi sunsi teneboka ato asibdenmou, “Sunda bisik noutam ara una deyok sisikde yanganmarurum do?” eboka asibdenmou. Ura, a bitinyi nang ara tikloboka engen urasin bobdobmarei. 18A banmarei nang bitinyi ara tonyi si ara Kleopas biryi uram doboka ato ebmou, “Kan tentok ara Yerusalem atei dam ara ukuryok yanmarimnyi biryi ambutum ab arub ab kunubde yanganmar dinyi ara kum bikmarim darib?” ebkarebmou.
19Asi Erci tubto asibdenmou, “Ara, unatoa kunubmou do?” ebmou. Uca, a bitinyi nang aryi, “Ara, Yesus Nazaret ateinyi bisi kubmongwe to sisikde yanganmanim. Anyi bira Er Imtamnyi Uram ebdeibmaca bobananyi kururci, ilil tenen dinyi kikniboka Er Imtamnyi Uram etererur ara mikib mitik kum. Ba, Er Imtamnyi biryi teleb teneboka wa irmilirur asi ninyi ilinto ababyi teleb teneboka uram kisal dangnung. 20-21Nun Israel yala nang ara, ‘Anyi biryi lebdeibkwansir,’ tenen dibde kuramoubwe bok, Er Imtamnyi kan ninyi kan noutam kuboka antanirdeirin deyok nang ab nun nai yabwe weik nang ab aryi, ‘Anyi bira obmunyi ba, dibkwande,’ eboka dobkarebmongwe uca, Roma yin doun nang aryi co lase deici laboka bing dakmongwe. Ba, a kunubmou tum aryi kuboka arub ara uki winiryi tum berekmar. #24:20-21 A talak kuramnyi nang aryi, “Anyi biryi Roma nang nun mutuk talebsei asi lebdeibkwansir,” teneramnyi. 22Uca, nun kankan aryi nerabwe mer mikbaryi aryi nunsi dukanya yakmasing. Belekuna kobdob aryi tukwe dongobmongwe ai dirbinmang uca, Er Yesus tukwi ara kum eibmang. 23Ura, nun dam asi ato ebde yanmang ba, kekebmab, ‘Er Imtamnyi Uram eryuryangan nang bitinyi aryi, “Erda sirya kam bukokmar,” ebmaring,’ ebde yanmang asi kekebmab. 24Ura, nun kwit yabwe ninyi mikbaryi nang Er Yesus tukwe ungna dam dirbinmang. Bindoka diramongwe uca, a nerabwe mer ebmang to dib kunubmou bok, sunci Er Yesus bira kum ebdanmongwe.” Ato eboka a bitinyi nang aryi nukmarei.
25Ura, Er Yesus biryi sunsi ato ebmou, “Se sunda iya walwal nang kundarur deyok aryi, Er Imtamnyi Uram ebdeibmaci to lak etereramnyi nang aryi kerek sengdeiramnyi dinyi ara diboka diba tenena ara sun kanya ikin. 26Kerek sengdeiriramnyi uram umbura ara, ‘Kristus ninyi lebkwande Sienyi eboka tikeibunyi bira mambul nirya dobdiryok Er Imtamnyi milil kurura dam aryi Weik Sienyi kibkwande,’ eboka ara ton kum sekdeibwe do?” ebmou. 27Ura, Er Yesus biryi a bitinyi nang asi Er deyok ati, Er Imtamnyi biryi minob uram erdeiramwe ba, kerek sekamnyi to nirya lilibdeibmou. Ara, Musa kerek sengna aryi kuboka Er Imtamnyi biryi uram ebdeibmaci to lak etereramnyi nang kerek sengna umbura dam sekeiamnyi to lak lilibdeibmou.
28Banmai ani, sun binkwayeb tenen banmai atei dam bai ura, Er Yesus bira yuk atei binkwan ato kuboka barmurunmou. 29Uca, a bitinyi nang aryi Ersi tataboka ato ebmarei, “Sirya inibkwamarci, kiting wekur ati nun ab tonkwa a mabkwayeb,” ebmarei. Ura, a bitinyi nang ab mabkwamaici, ai wengbinmou. 30Ura, yina yibkwamaici, yina deibmai dikum bukoka arubdongobmai ura, Erci roti kwaning dobtaleboka Er Imtamnyi bisi, “Ei Nun Nai,” ebmou ura, toboka-toboka a bitinyi nang karebmou. 31A talak aryi a bitinyi nang asing kubdeibmou ani, elekdeibmou ura, Er Yesus eibmareici, bikmarei bok, sun kankan dam aryi kum dandobmou. 32Ba, sun mamun ebdanmarei, “Bisik noutam yanganmabuburyi uram eboka Er Imtamnyi biryi minob erdeiramwe uram lak enmasou ura, nun kanyatam ara, ‘Se nai e, bita enmasir iya kekenmatinimnyi,’ tenebde yanganmanoumwe bok, takokmou,” ebdanmarei.
33Ura, a bitinyi nang anabdobmareici, Yerusalem atei tam tubto tamuboka binmarei. Binmarei ura, Er Yesus miliramnyi nang koklombaryi nang ab yuk nang ab buluboka wekmai asi binmarei ura, ebdanmai. 34Ebdanmaici, sunci ato ebmai, “Er Yesus bira diba ati kam bukokmar aryi, Simon bisi lak kibdanmar,” ebmai. 35Uca, a bitinyi nang ababyi bisik noutam ukubmou dinyi eibmarei to ab Er Yesus biryi roti kwaning tobmou ba, yinmaici, asing eiboka bikmarei to ab nukmarei.
Er Yesus biryi Er miliramnyi nang nirya dam asi lak kibdanmou uram
24:36-49
36Er Yesus kam bukokmou tum sintam aryok Er kwit yabwe ara ai tentok buluboka wekmaici, a kubmou dinyi ati uram sisikde bunmai, asi asing kublabum ena aryi Er Yesus sun kankan dam tingyanmou. Tingyanmouci, Erci sunsi ato ebmou, “Sun kanya karyi kusina teleb,” ebmou.
37Ebmou bok, sun kanya ilil aryi kanya nirya bindobmou ura, “Ninyi din nang kanya asing eibmab,” tenebmai. 38Ato tenebmai asi, Er Yesus biryi sunsi ato ebmou, “Se, sun unatoa ati ilil kubmasirci, sun kanya kankana kubmasir do? Sunci, ‘Er nun Du a kunum,’ tenebnindarur! 39Ni taruk dilaka ab Ni yan dilaka ab asi dibdenindarur! Ara, Ni a kunum yanman! Din nang kanya ara er tub ab yok ab Ni eibmanurum to ara ton kum borur deyok aryi, sunci Nisi taleboka biti dibdenindarur,” ebmou.
40Ato enmou cok, sunsi Er yan dilaka ab taruk dilaka ab amubdeibmou. 41Ba, Er Yesus kam bukokmou ati sun kanya kilkil aryi diba kum teneabiryi, “Nai kobe,” tenerabyi talak aryi Erci sunsi ato ebmou. “Sunda yina ton deibmarum do?” ebmou. 42Ura, sunci Ersi mekinaia yuboka deibmaia karebmai. 43Ba, Erci dobdobmou ura, sun urasin dam yibmou.
44Ura, Erci sunsi tubto ato ebmou, “A deyok ara Niryi sun ab tonkwa kunmabuburyi sun dam sirya eanse, ‘Ni deyok ati, Musa kerek sengna umbura ab Er Imtamnyi Uram ebdeibmaca bobana nang kerek sengna umbura ab, Mazmur kerek sengna umbura ab, nirya kerek sekeiamnyi to kunubkwanir,’ eanse,” ebmou.
45Ebmou cok, Er Yesus biryi Er kwit yabwe asi Er Imtamnyi minob erdeiramwe uram deyok kerek sekamwe to lak lilibdeibmou ba, Er kwit yabwe bikmai. 46Bikmai ura, tubto Er Yesus biryi ato ebmou, “Teleb Uram umbura aryi ato kerek sekwe, ‘Ninyi lemna Weik Sienyi bira mambul deici aryi dibmaci ani, uki winiryi tum ara kam bukokwande,’ eboka kerek sekdeiamwe. 47-48Ati, sunda ninyi asi sun asing eibmarum to kuboka ebde bindarur! Yerusalem atei aryi deyok kouboka ani, im dangna tukwe dangna nang nirya asi Ni si deici aryi ato ebdarur. ‘Ninyi lemna Weik Sienyi biryi sun malyi kun dinyi lebmasirci, dibmar ani, kam bukokmar ati, sun malyi kun dinyi takloboka Er Imtamnyi bisi milibdarur!’ Tonda, ‘Er Imtamnyi biryi sun malyi kun dinyi kilibkwansir,’ ebde bindarur. 49Ato ebde bana kum kubmamunyi talak ara diramunyi ba, Niryi sunsi Ni Nai biryi ebdeiamwe dinyi Er Imtamnyi Kanya Roh Kudus sunsi karebsinyi bok, binkwandarur. Niryi sunsi kum karebmasinyi talak ara akatei akwe kunkwandarur. Kuramunyi ani, Niryi imtam aryi kuboka Er Imtamnyi Kanya Roh Kudus mikib aryi sunsi kalubdeibsinyi ura, ur binkwandarur,” ebmou.
Er Yesus imtam welebinmou uram
24:50-53
50Er Yesus biryi a sirya ebmou ura, weik atei aryi Er kwit yabwe iniboka Betania dam mutuk asi bobinmou. Bobinmou ura, adikum aryi Er Yesus biryi taruk ereboka sunsi kisal dakmou. 51Kisal dangmou cok, erebdoro welebanmouci, Er kwit yabwe ab bokdanmai ura, Erda imtam welebinmou. 52Ura, sunci kutam ikdongoboka Ersi si weik ebmai. Sirya si weik ebmai ura, sun kanya kilkil mitik kum kubmou ba, kilkil asa aryi tubto tamuboka Yerusalem atei binmai. 53Tamurbinmai ura, tuba-tuba Bait Allah ai ara Er Imtamnyi biti ninyi dama deirirban ai akwe kuramiryi, Er Imtamnyi bisi si weik ereboka mot semnamnyi.
Selectat acum:
Lukas Uram 24: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
