Lukas Uram 21
21
Utotoa kum sulyi ner aryi Er Imtamnyi biti er dama deirirdarbinmou uram
21:1-4
1Er Yesus bira Bait Allah ai ara Er Imtamnyi biti ninyi dama deirin ai dam aryi ninyi asi Teleb Uram eterenmou. Ani, urasin ereboka dirwelerderamwe uca, bona talena ilinto boramnyi nang aryi Er Imtamnyi biti sun dama deirirdanmaici, ninyi dama deirindan co sangkol umbura dongordongonmai asi asing eibmou. 2Ba, uku dirongkwe uca, utotoa kum sulyi ner tentok ababyi keil kat ato uang asi dengna mitik dinyi bitinyi neik co sangkol umbura dongobdongobmou. 3Ura, Er Yesus biryi ato ebmou, “Niryi sunsi diboka ebkwinsin, a utotoa kum sulyi ner aryi Er Imtamnyi biti er dama deibdanmarci, karebmar ara mitik kum karebmar ba, bona talena ilinto talenung nang aryi sun dama deibdanmangci, karebmang ara mitikanun karebmang. 4Ara, ato deyok ati ebman. Bona talen nang sun nirya aryi Er Imtamnyi biti sun dama karebmang dinyi ara sun boboka talenung dinyi ilinto asi meici kukoka karebmang bok, a utotoa kum sulyi ner aryi karebmar dinyi ara erbabyi utotoa kum bok, dekoka yibdobman dinyi nirya karebmar,” ebmou.
Er Yesus biryi Er Imtamnyi biti ninyi dama deirin ai dakwamnyi ati uram ebmou uram
21:5-6
5Yerusalem atei dam asi Bait Allah ai ara Er Imtamnyi biti ninyi dama deirin ai tentok doamnyi. Akai ara weik-weik keil ila aryi dukdandoka doamnyi ab, ninyi dama deirirbaramnyi dinyi aryi doamnyi ab deyok ati ninyi mikbaryi nang aryi, uram sisingmai asi Er Yesus biryi kekebmou ura, ato ebmou. 6“Sunda unatoa dinmarumci, uram sisingmarum do? Uki tentok berekwande tum ara sunci a dinmarum ba, keil dukdandoka dobyi asi asing einmarum tok iya kum kubkwande. A nirya ara dakoka tentok-tentok kibsinibkwaming,” ebmou.
Er Yesus ab Er miliramnyi nang ab asibdanmai uram
21:7-9
7Er Yesus biryi Bait Allah ai dakwaming deyok ati sirya ebmou ura, ai dona dinmai nang aryi ato eboka asibdenmai, “Nun eteresurumnyi, a ebmarim dinyi ara una talak aryi kunubkwande do? Tonda a talak kunubkwamaci ura, una dinyi asi kunubci uca, asing eibibiryi, ‘A dinyi kunubkwamar ati kubmar,’ tenebkwanub do?” eboka asibdenmai. 8Uca, Er Yesus biryi sun asibdenmai to uram kum dekeibmou, erda ato ebmou, “Sunda Bait Allah ai dakingnyi ati, Er Imtamnyi bokwetebunyi tamuryankwamar tenen kum, erda diboka kalikdandobdarur! Ninyi ilinto aryi tola ati, ‘Nira Er Imtamnyi biryi Bokwetebnounyi a kunum yanman,’ ton ebkwaming ura, tonda, ‘Sirya kobdob tum berekwamar talak damtoto kubmar,’ ebkwaming. Ati, sunci a nang asi, ‘Dib enmang,’ tenen milibmunyei ati sunda kalikdandobdarur! 9Ba, tonda kekenmamunyi ba, ‘Ninyi aryi mar bobdanmang,’ ebingnyi ab, ‘Ordanmang,’ ebingnyi ab ati, sunda ilil kusina mem! Ara, atoto dinyi aryi menekoka kunubkwande bok, a kunubkwande dinyi nirya aryi sirya kobdob berekwande tum ola kubkwamaci ati kum kubkwande,” ebmou.
Er Yesus biryi, “Sirya kobdob tum ara mambul weik dinyi kunubkwande,” ebmou uram
21:10-11
10Ato ebmou cok, sunsi ton ato ebdeibmou, “Im dangna tukwe dangna mutuk nang ara ton mutuk nang aryi ton mutuk nang ab mar bobdankwaming. Ba, im dangna mutuk tukwe dangna mutuk atei nang ara ton mutuk atei nang aryi ton mutuk atei nang ab mar bobdankwaming. 11Ba, mutuk eimna ababyi weikto dobkwande, tonda mutuk mia nirya yabnyi youn eibkwande, tonda kwaning atana li dobkwande. Ba, tonda ninyi sirim talebkwansir dinyi ababyi mitik kum kunubde binkwande ba, tonda imtam ababyi mambul weik dinyi mitik kum kubkwande,” ebmou.
Er Yesus biryi Er miliramnyi nang asi, “Sunda aminda ara mambul dobkwandum bok, Niryi lebkwansin,” ebmou uram
21:12-19
12Er Yesus biryi ton ato ebmou, “Ato kubde binkwande bok, a nirya kum kunuabci talak ara Ni si deyok ati, sun Yahudi nang sien nang ara Er Imtamnyi bisi dib tenenung cok, Nisi diba kum tenenunung nang aryi sunsi talebokabsingiryi, kulanmasingnyi ani, Musa Uram eteren ai umbura dongoboka deyok lilibkwansing. Tonda, ninyi wenen ai dongobde binkwansing ba, tonda weik sien nang urasin dam bobinkwansing ba, tonda Kaisar amwetam bun nang dam bobinkwansing. 13Ato kubkwansing talak ara sun uki teleb berekwansir ati, a talak aryok Er Imtamnyi biryi Bokwetebnounyi deyok eterebkwandarur. 14Ati, ato dinyi sun kankan dam kununmaci ura, ‘Una ebdobnyi uca, lebdandobkwan do?’ tenen kanya ingkirikmunyei ati sun kanya katabdeiboka kunkwandarur,” ebmou. 15Ato ebmou cok, ton ato ebmou, “Sunci, ‘Se niryi una eboka lebdandobkwaman do?’ tenebmunyi talak ara Niryi sunsi uram bingna dinyi karebsinyi ba, sunci ebmamunyi uram ara sunsi yu boransingnyi nang aryi uram lebkaboka dekeibman kum uram ebde binkwandum ati, ‘Se,’ tenena mem. 16-17Tonda Ni si deyok aryi, sun mining nong ninyi aryi, sun du weit yabwe aryi, sun mining ai ninyi aryi, sun mining kwit yabwe aryi mar moun yibkarebkwansing. Ato kuboka mar moun yibkarebsingnyi uca, ninyi nirya aryi sunsi ina ngilikoka kereboka sun kankan nang ara ninyi tentok kum bitinyi kum ara ton obkwansing. 18Ato kuransing ababyi, Er Imtamnyi biryi sunsi kalikwansir ba, sun kisok otong dungkal ababyi ton kum bubsakwansir. 19Ato kuransingnyi bok, Nisi kanya deiboka Er Imtamnyi bisi dib teneramunyi dinyi asi tanglona kum kuamunyi ura, iya kam kun dinyi dobdobkwandum,” ebmou.
Er Yesus biryi, “Aminda ara Yerusalem atei dakwaming,” ebmou uram
21:20-24
20Er Yesus biryi Er dam tikmai nang asi ato ebmou, “Sunci dinmamunyi ba, yuk atei yin doun nang aryi sun Yerusalem atei nang asi mar iyanmasingiryi aknabdongobsingnyi ara, ‘Ura, Yerusalem atei dakabokwaming talak kubmar,’ tenebkwandarur. 21Ba, a talak ara Yudea mutuk kurandum nang nirya ara mutuk dub cungbindoka inirdarorbinkwandarur ba, weik atei dam kuramingnyi nang ara yuk atei bindoka inirorbinkwanung ba, bara atei doboka kuramingnyi nang ara weik atei dam yangana mem! 22A talak ara Er Imtamnyi Uram ebdeibmaci to lak etereramnyi nang deici ebdeiamwe to nirya kunuboka Er Imtamnyi biryi, ‘Er Imtamnyi bira Weik Sienyi kimna ara nun li,’ eramingnyi nang asi kisok dakwande talak berekwande. 23Ba, Er Imtamnyi biryi Israel yala nang kuraming me um dam nirya ara mambul weik dinyi karebci ura, yu dinyi aryi sun Israel yala nang asi mar ibdeibkwande. Ba, mi mundu tuba boamingnyi nerabwe ab alok mabwe nermabwe mum dininmangnyi nerabwe ab ababyi iya mambul weik dobkwaming! 24Ba, sun Yahudi yala nang dinatam ara ya sekoka obingnyi uca, dibkwaming. Ton nang ara Er Imtamnyi Uram walwal atei nang aryi tabwe deboka sun atei bobinkwaming. Ba, Yerusalem atei kuramingnyi nang asi Er Imtamnyi Uram walwal atei nang aryi yanisitaryangaramingnyi uca, Er Imtamnyi Uram walwal nang ababyi Teleb Uram kekebkwaming,” ebmou.
Er Yesus biryi, “Ni Ninyi Dasinyi tamuryankwan talak ara ato dinyi-ato dinyi kunubkwande,” eboka lak eterebmou uram
21:25-28
25Er Yesus biryi Er Imtamnyi biryi bokweteamunyi tamuryuryankwande tum berekwamaci dam talak aryi kunubkwande dinyi ati enmouci, ton ato ebmou. “Aminda ara kiting ab wala ab kurya ab ara yukto kubkwande. Yukto kubci ura, im dangna tukwe dangna nang nirya ara weik me kwan kurunikwande lilim ab, kurunikoka yankwande ilil ab aryi kanya kankana kubkwande. 26Im dub kurande dinyi nirya lulukoka ilinto kuci ura, ninyi ara, ‘Nai, a kunmar dinyi ara tukwetam ababyi ato kubkwamar do?’ tenen sun kanya ilil aryi kanya birbir eboka diblalakwaming. 27Ato kubci talak ara ninyi aryi dinmangnyi bok, Ni Ninyi Dasinyi bira duwa deici aryi bukoka Ni mikib kibmaning ab, Ni milil umbura ab aryi yuryankwan asi asing eibkwaning. 28Ati, atoto dinyi kunubde baci asi asing eibmunyi ura, sun mambul doramunyi deyok ati lemsin talak dam kubkwamaci deyok aryi, kunmarur ati, sunda kanya teleb kubsiribok, dibde bukwamandarur,” ebmou.
Er Yesus biryi sirya kobdob berekwande tum dam talak kunubkwande to ati co keta kebdeiboka eterebmou uram
21:29-33
29Er Yesus biryi Er miliramnyi nang asi eterenmouci, ato ton kemdeiboka eterebmou, “Sunci co kwarang kum, yuk co kum asi bita dibdendarur! 30Sunci co yala asi dinmamunyi ba, kabwe silikoka bok lingmaci ura, ‘Co keta dobkwamar aryi co buryi lingmar,’ tenerandum. 31Ato kuboka, sunci dinmamunyi uca, ilil tenen dinyi kununmaci ura, ‘Er Imtamnyi bira Weik Sienyi kururci, ninyi ilinto Er amwetam kun nang kibkwande tum dam kubmar,’ tenebkwandarur. 32Niryi dib kobdob ati ebkwinsin, a talak kunmarum nang ara nirya kum dibsekmamunyi bok, sirya kobdob berekwande uki tum ati kikliboka Yerusalem atei dakwaming dinyi ara sun asing eibkwandum. 33Im ab tukwe ab ara kum dankwande bok, Ni erdeirin uram ara iya kubkwande, ton kum danana kum kubkwande,” ebmou.
Er Yesus biryi, “Kalikdandobkwandarur,” eboka yan memebmou uram
21:34-38
34Er Yesus biryi eterenmouci, ton ato eboka eterebmou, “Sun kanyatam ara kalikdandobkwandarur! Ba, sun kanya dam ara moua deyok ab, walina talen me yin deyok ab, sun tuba-tuba yibde kurorandum dinyi ati, mambul kirikoka ingkiringna deyok ab aryi ikin borminingdana mem! A dinyi kanya boramunyi bok, Er Imtamnyi uki tum lukdandoka sun dam kunubci ba, ebloamingnyi ba, yourande to kubsicei ati kalikdandobkwandarur. 35A berekwande uki tum ara im dangna nang tukwe dangna nang nirya wenebkwande tum berekwande ati ebman. 36Ati, sunda Er Imtamnyi bisi dib teneramunyi dinyi tanglona kum uca, iya ilil weik dinyi kunubkwande tum ara lebdandobkwamunyi mikib ati tuba-tuba Er Imtamnyi bisi moloronkwandarur. Er Imtamnyi bisi molororamunyi ba, malyi kuna deyok lilibkwansin tum Ni Ninyi Dasinyi urasin dam katabum eboka tikwandarur,” eboka eterebmou. 37Kitingtam ara Er Yesus bira Bait Allah ai ara Er Imtamnyi biti ninyi dama deirin ai dam bindoka eterenmou ani, lukunda ara anaboka mutuk kon si Zaitun bindoka mabmou. 38Ani, iya belekuna kobdob ara ninyi ilinto nirya aryi, “Er Yesus biryi eterebsute asi ton kekebdobtibyi,” tenen nang nirya Bait Allah ai asi wengyandoka Er dam yandobmai.
Selectat acum:
Lukas Uram 21: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
