Yohanes Uram 15
15
“Nira co anggur deyoknyi kunun ba, sun ninyi yuk-yuk ara co anggur te ato nang kurandum,” ebmou uram
15:1-8
1“Nira co anggur deyok kobdobnyi diboka kunun. Ba, Ni Nai Imtamnyi bira anggur du co wa inanyi kurur. 2Akiryi, du kum mourande co te nirya ara Ni Nai biryi sengkweterande. Ba, du mourande co te ara Erci kirirdeirirande. Ara, ‘Du moubtabakdur,’ tenen Erci a co te asi kirirdeirirande. 3Niryi sunsi dib en uram eterebmasise ati sun kanya ara kilibdob kanya borandum. 4Sunda Ni dam kun nang iya kubmurubdarur. Kubmurubmamunyi uca, Niryi sun dam kubkwan. Co anggur te ara nong dam tordongona kum uca te er yuk du ton kum mourur. Eda te ara nong bikanci uca anggur du mourande. Ato kuboka sunbabyi ni dam kum kubmunyi ura du kum moubkwansurur.
5Nira anggur du co deyoknyi kunun. Ba, sun yuk-yuk ara anggur co te ato kurandum. Unanyi-unaner ara Ni dam kuramingnyi uca, anyi a ner ara du ilinto moubkwande. Ni ab tonkwa kum kurandum cok, utotoa kum kubmatum. 6Unanyi-unaner ara Ni dam kum kubmurubtingnyi uca, Anyi-a ner ara du moun kum co te ato kuraming. A co ara bai donokmangnyi ura, koula dandobkwande. A co te ara doboka uk dongoraming. 7Sunci Ni dam kuramuncok, Ni uram asi sun kanya dam borandum cok, sunci sun tenebmamunyi tok molobmunyi uca, dobdobkwandum. 8Sunda du moubsir ba, sunci Ni milin nang kuramingnyi tok kunuramunyi uca, ninyi aryi Ni Nai si weik ebkwaming,” ebmou.
“Sunci sun mamun boukwe kibdandarur,” eboka arukmou uram
15:9-17
9“Ni Nai biryi Nisi boukwe weik kunurur to, Nibabyi sunti boukwe weik kusunun. Ati sunda Ni dam iya kubmurubdarur. 10Sunci Ni uram asi kunubmunyi uca, sun Ni boukwe weik dam iya kurandum. Ara, Niryi Ni Nai uram kununun uca, Ni Nai boukwe weik dam kunun ato, sunbabyi neiktoto Ni boukwe weik dam kurandum. 11Ati, Niryi, ‘Ni kanya kilkil weik kunurur to, sun kanya ababyi kilkil weik kubdur,’ tenen a dinyi sunsi eterebmasin. Tonda, ‘Mambul dinyi mitika babyi tenen kanya kum bobkwaming,’ tenen ato eboka eterebmasin. 12Ati, Niryi sunsi ato eboka arukdeibkwinsin. Sunci sun mamun boukwe kibdandarur. Ati, Niryi sunsi boukwe weik kunun ato, sunbabyi neiktoto boukwe weik kibdandarur. 13Iya boukwe weik kimna ara ato, ‘Ninyi aryi obnitingnyi ababyi Niryi Ni kwit yabwe lebdobkwan,’ tenen dinyi ara iya boukwe weik kimna dinyi kurur. 14Sunda Ni kwit yabwe kurandum. Ara, Ni uram kunubmunyi uca, sunda Ni kwit yabwe kurandum. 15Niryi sunti, ‘Ni wa arungna nang,’ tenen tuba kum namsunun. Eda, ‘Ni kwit yabwe,’ tenen namsunun. Wa arungna nang ara sun wa arungdeirinanyi tenebmaci tok kum bingnung bok, sun kwit yabwe ara sun kwit tenebmaci tok bingnung. Ni Nai Imtamnyi biryi Nisi eterebnici tok nirya asi Niryi sunbabyi eterebmasin ati ato ebman. A deyok aryi Niryi sunsi, ‘Ni kwit yabwe,’ esunun. 16Sunci Nisi kum wibdeibnindau. Eda, Niryi sunsi wibdeibmasise. Wibdeibmasisiryok, Niryi sunti, ‘Du moubkwansir,’ tenen tikeibmasise. Ara, ‘Du moun dinyi iya kubmurubkwande dinyi moubkwansir,’ tenen tikeibmasise. Ato kuboka du moubsir ba, Er Imtamnyi biryi sun Nisi deici aryi molobmamunyi tok kunubkwansir. 17Ati, Niryi sunsi arukdeibmasin uram ara ato eboka arukdeibmasin. Sun mamun boukwe weik kibdandarur,” ebmou.
“Sun malyi kun nang ara sunda Ni milin nang ati, ‘Nun li,’ tenebkwansing,” eboka eterebmou uram
15:18-27
18“Ura, sun malyi kun nang ara sunti, ‘Nun li,’ tenen dokdonoksingnyi ba, sunci ato tenen dinyi sun kanya dam bobdarur. Sun malyi kun nang ara nun Du biti, ‘Nun li,’ tenen yuma dokdonokmai. 19Sunda malyi kun nang kubmunyi uca, sun malyi kun nang aryi sunti, ‘Nun kwit yabwe,’ tenebmasiting. Bok, sunda malyi kun nang kum kurandum. Niryi sunsi wibdeibmasise ara, ‘Malyi nang kun dinyi asi takloboka Ni dam kun nang kubting,’ tenen wibdeibmasise. A deyok aryi, sun malyi kun nang aryi sunti, ‘Nun li,’ tenen dokdonokwansing. 20Niryi sunsi eterebmasise uram asi kisok bobdarur. Er wa arungnanyi ara er wa arungdeirinanyi biti Erebdobnyi kum kurur. Ninyi aryi Nira sun arungdeirisinanyi biti, ‘Obtibyi,’ tenen ingkiringnunung to, sunda Ni wa arungna nang ababyi, ‘Obtibyi,’ tenen domkiringsunung. Ba, ninyi aryi Ni uram asi kekebingnyi to, sun uram ababyi kekebkwaming. 21Ninyi aryi sunsi malyi kibkwansing ara Ni si deyok aryi, malyi kibkwansing. Ara, Ni Nai bokwetebnounyi bisi kum bingnung ati, ninyi aryi sunsi malyi kibkwansing. 22Niryi yuryandoka dib en uram lak ebman bok, dib kum tenebmang ati, sunci, ‘Bita kum bikamoubwe ati manmalibmoubwe,’ ebman kum kuraming. Ba, Niryi yuryangana kum kubmatinyi uca, dib en uram lak kum ebmatinyi uca, a nang ara tatab-tatab ebman to kum kubmating. 23Unanyi-unaner ara Niti, ‘Ni li,’ tenebmangnyi uca, a nang ara Ni Nai Imtamnyi bibabyi, ‘Ni li,’ teneraming. 24Niryi a nang kankan asi ilil tenen dinyi kum kiknibmatinyi uca, a nang ara, ‘Bita kum bikamoubwe ati manmalibmoubwe,’ ebmating. Ba, Niryi ilil tenen dinyi kikniranse asi asing eiriramiryok, Ni ab Ni Nai ab ati, ‘Nun li,’ tenen dokdonokmasing ati ebman. 25Er Imtamnyi Uram umbura aryi ato erur,
‘Deyok kum kubmou asi a nang aryi Niti, “Nun li,” teneraning,’ ebmou. (Mazmur 35:19)
Ara, Er Imtamnyi Uram umbura aryi minob kerek sekeiamwe to kunubkwande ati a nang aryi nunti, ‘Nun li,’ tenen Ni ab Ni Nai Imtamnyi ab dokdonokmasing.
26Ura, Niryi Ni Nai tam welebindoka Er Imtamnyi Kanya Roh Kudus asi bokwetebkwansin. Roh Kudus ara sun dam tingdurnyi kururcok, dib en uram eteresurur. Anyi biryi Niti dib en uram lak eboka sunsi eterebkwansir. 27Tonda, sunbabyi Ni deyok ati dib en uram lak ebdarur. Sunda yuma talak aryi kuboka Ni ab tonkwa kurandau deyok aryi, sunci Ni deyok ati dib en uram lak ebdarur ati ebman,” Er Yesus biryi ebmou.
Selectat acum:
Yohanes Uram 15: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
