Kisah Para Rasul Uram 1
1
“Er Imtamnyi biryi Er Kanya Roh Kudus asi sun dam dongobkwansir,” ebmou uram
1:1-5
1-2Yo ni kwit Teofilus.
Ni kerek sengna uram yuma dinyi asi kerek sekeiankise ani, ukuryok kerek sengna ton tabakoka kerek sekeibkwinkin. Ni yuma kerek sekeiankise uram deyok ara nun Du Yesus biryi ukuramwe dinyi ab Erci etereransou dinyi ab asi liliboka nirya kerek sekeiankise. Ara, nun Du Yesus biryi Er wa yuma deyok kouboka ibkalibmou tum aryi kuboka kuramwe ani, Erci wiamwe bokdonokwamwe nang asi, “Ato-ato kubdarur,” eboka takubdeibmou. Ara, Erci Er Imtamnyi Kanya Roh Kudus biriman aryi sun Teleb Uram deyok kouboka eteren nang asi, “Ato-ato kubdarur,” eboka takubdeibmou ura, nun Du Yesus bisi Er Imtamnyi biryi imtam bowelebinmou. A dinyi nirya liliboka kerek sekeibmakise ati ebman. 3Imtam bowelebana kabul talak ara, nun Du Yesus bira dibmou ani, Erda kam bukokmounyi biryi Er Teleb Uram eteren deyok nang Erci wibmou nang ab ebdandoka, “Ni kwit yabwe, Ni kam bukokman,” eboka Er baramnyi lak kimdaramwe. Ara, uki empat puluh baryi aryi Erci Er baramnyi sunsi diboka lak kimdaramuryi, Erci Er Imtamnyi biryi ninyi nirya asi kalikwansir deyok ati sunsi etereramwe. 4Ura, sun ab tonkwa tuba kuramiryok, nun Du Yesus biryi sunsi ato eboka takubdeibmou. “Sunci Yerusalem atei taklobimunyei. Eda, akatei a tuba kuramunci, Er Imtamnyi biryi ebdeibmou to kununa asi dibde bunkwandarur. Ara, Ni ebmurubmasin to dibde buramunyi ura, binkwandarur,” ebmou. 5Ebmou cok, Er Yesus biryi sunsi ato ebmou. “Yohanes biryi sunsi me dem dongobsou bok, uki mitikanun mabmamunyi ura, Er Imtamnyi biryi Er Kanya Roh Kudus sunsi karebsici ba, me dongona ato kubdeibkwansir,” ebmou.
Nun Du Yesus bisi Er Imtamnyi biryi imtam bowelebinmou uram
1:6-11
6Ura, sun Er Yesus ab a buluboka wekmai nang ara Teleb Uram eteren deyok nang aryi Ersi ato eboka asibdenmai. “Nai Du, nun Israel yala nang asi yuk atei nang aryi talebsei ati, a talak aryi Kanci ukuryok Weik Sienyi kibminci, kalikwansirim do?” eboka asibdenmai. 7Ato eboka asibdenmai bok, Er Yesus biryi sunsi ato ebmou, “Ni Nai Er yuk ato kubkwanci talak ab uki tum ab asi bikoka kubdeibkwandanyi kurur. Ati, sunda a uki tum ab talak ab asi sunda bingna kikib kum kundarur. 8Bok, Er Imtamnyi biryi Er Kanya Roh Kudus mikib asi sun dam karebkwansir. Karebsici ura, sunci Ni deyok asi lak eterena nang kubkwandum ati ebman. Ara, Yerusalem atei aryi kuboka Ni deyok etereboka, Yudea mutuk ab Samaria mutuk ab bindoka eterebmunyi ura, sunci sun im dangna tukwe dangna nang nirya asi Ni deyok ati eterebkwandum,” ebmou. 9Er Yesus biryi ato ebmou ba, Er ab tonkwa kubmai nang aryi asing dinmai bok, nun Du Yesus bisi bowelebinmou. Dinmai bok, duwa ton libdongobmou uca, sunci sun Du Yesus bisi asing eibman kum kubmai. 10Asing eibman kum kubmou ba, imtam asi tuba dinmai bok, “Nai e,” ninyi bitinyi ara kait aling ongobmarei nang asi sun dam lukdandoka yantikmarei. 11Yantikmarei cok, sunci, “Nun kwit yabwe Galilea mutuk nang o. Unato ati, sunda imtam dibwelebmarum do? Sun kanya mambul kuna mem se. Anyi Yesus bira sunsi takloboka imtam bowelebmar bok, aminda aryi tamuboka yuryankwande. Ara, imtam welebinmar asi asing eibmarum to, aminda ababyi ato kuboka yuryankwande,” ebmarei.
Er Yesus bisi miliramnyi nang aryi dibde buramnyi uram
1:12-14
12Ato ebmarei ura, sun Teleb Uram eteren deyok nang aryi mutuk kon si Zaitun aryi anaboka Yerusalem atei tamurbinmai. A Zaitun kon ara Yerusalem atei dam bukamwe mutuk kon. Ara, wa in kum uki tum kubni ura, weik bisik bina yana kimna ara ukuna kum dinyi kuramwe bok, Yerusalem atei aryi kuboka Zaitun kon asi bina yana ara mem kum kuramwe. 13Ura, Yerusalem atei binmai ura, sunci sun kuramnyi alib ai asi wekmai. Ara, Petrus ab Yohanes ab, Yakobus ab Andreas ab, Filipus ab Tomas ab, Bartolomeus ab Matius ab, Alfeus mi Yakobus ab, Zelotnyi si Simon ab, Yakobus mi Yudas ab wekoka tonkwa kuramnyi. 14A nang nirya ara Er Yesus bisi miliramnyi nerabwe ab, Yesus Er kwin si Maria ab er weit yabwe ab tonkwa buluramiryok, sunci antaniboka Er Imtamnyi bisi tanglona kum uca moloramnyi.
Yudas bisi unubmainyi bira Matias bisi tikeibmai uram
1:15-26
15Kuramnyi ani, moloramiryok, ninyi seratus dua puluh baryi sun dam bulubmai ura, er Petrus biryi er kwit yabwe kankan tikoka sun bulubmai nang asi ato ebmou. 16“Ni kwit yabwe nun ab tonkwa bulubmarum nang o. Nun Du Yesus bisi kikibmounyi Yudas biti uram ton ebkwinsin ati, kekendarur. Anyi bira nun Du Yesus bisi talebmai nang asi etereboka bobinmunyi bisi kubmou to, ara bisik sekman kum kubmou. Er Imtamnyi Kanya Roh Kudus aryi Er uram ermururamunyi Daud biriman aryi minob ebmou to kunubkwamwe ati, ato kubmou. 17Anyi Yudas bira nun ab tonkwa kuramubunyi kuramwe ba, nun Du Yesus biryi erbabyi wiboka nun ab tonkwa Teleb Uram eterebkwamoubwe ati, tikeiamwe. 18Tikeiamwe bok, Yudas bira er kikina co bok asi dobdobmou ura, wa ton dekmou ani, er dibmou. Ara, er wa dam binmou ura, er kot sakmou. Sakmou uca, er su nirya yokoka bukmou ba, dibmou. 19Ato kuboka dibmou ura, sun Yerusalem atei nang nirya aryi kekebmai cok, sunci Yudas dibmou wa asi si siboka, ‘Hakal-Dama,’ ara nun uram aryi, ‘Ninyi ona kira kareboka dekmou wa dam,’ eramnyi. 20A dinyi ara er Daud biryi Er Imtamnyi si weik en mot umbura aryi kerek sekmou. Ara, er Yudas biti eboka erci ato kerek sekmou.
‘Er ai ara ninyi nirya aryi deiblobkwanung,
Ninyi tentok ababyi akai aryi kum kubkwandur.’ (Mazmur 69:26)
Tonda, ‘Yuknyi biryi ersi unuboka ninyi kalingnanyi kibdur,’ kerek sekmou. (Mazmur 109:8)
21-22Ati, ni kwit yabwe o, nunci er Yudas bisi unubkwandanyi ton ingkiringkwanub o. Ati, nun ab tonkwa nun Du Yesus biti, ‘Diboka kam bukokmar,’ ebkwamibnyi bisi ingkiringkwanub. Anyi bira nun Du Yesus ab nun ab tonkwa tuba-tuba buluramubunyi kubdur. Ara, er Yohanes me dongoramwe talak aryi kuboka Er Imtamnyi biryi nun Du Yesus bisi imtam bowelebmou uki tum ababyi nun ab tonkwa buluramubunyi bisi wibkwanub,” eboka Petrus biryi ebmou.
23Er Petrus biryi ato ebmou ura, sun bulubmai nang aryi ninyi bitinyi wibmai. Ton wibmainyi si ara Yusuf uruma si Barsabas ton Yustus doaminyi kuramwe. Ba, yuk wibmainyi si Matias kuramwe. 24-25Sirya wibmai ura, sun bulubmai nang aryi Er Imtamnyi bisi ato molobmai. “Nun Nai Imtamnyi, Kanda ninyi kanya nirya bingsurumnyi kurum. Ati, Kanci nunsi eterebsiminci, ‘A nang bitinyi aryi kuboka anyi bisi wibkwan,’ eboka lak kibsurum. Ara, Yudas bisi unubkwandanyi Teleb Uram deyok kouboka eterebde bananyi bisi Kanci wibdum. A sokon ara er Yudas biryi ersi kikib kurande dam binmou ba, deiblobmou ati, Kanci unubdum,” eboka molobmai. 26Ato eboka molobmai ura, sunci keil asi im sukoka diblilibmai ura, “Er Imtamnyi biryi Matias bisi wibdeibmar,” tenen bikmai. Ura, sun dib tenen nang aryi er Matias biti, “Anyi bira sun koklombaryi nang ab tonkwa Teleb Uram deyok kouboka eteren nang kubkwaming,” tenen ersi tikeibmai.
Selectat acum:
Kisah Para Rasul Uram 1: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
