Эге дөс 15
15
Бурганның Аврам-биле чагыг-керээзи
1Ол болуушкуннар соонда элээн болганда, Дээрги-Чаяакчы Аврамга көстүүшкүннү чорудуп: «Кортпа, Аврам. Мен – сээң дозуг-камгалалың-дыр мен#2 Хаан. 22:3; Ыд. ыр. 3:4. Сээң шаңналың дыка улуг болур-дур» – деп сөзүн ажыткан.
2-3Аврам Аңаа: «Дээрги-Чаяакчы, Дээргим! Мен ажы-төл, үре-салгал чок болганымда, меңээ чүнү-даа бээриңге, канчаар деп мен? Мээң салгакчым болур кижи Дамаскыдан келген Элиезер ол-дур. Сен меңээ ажы-төл хайырлаваан болганыңда, аалымда кул кижи мээң салгакчым болур-ла ыйнаан» – дээн.
4Ынчан Дээрги-Чаяакчы Аврамга: «Чок, ол кул кижи сээң салгакчың болбас; сээң салгакчың бодуңнуң үреңден тыптып бодараар» – дээн. 5Дээрги-Чаяакчы Аврамны майгындан үндүрүп эккелгеш, чугаалаан: «Өрү дээрже көр! Шыдаар болзуңза, сылдыстарны сана. Ол хире эмге-тикчок хөй салгалдыг болур сен!»#Э. д. 22:17; Ы. х. к. 1:10; 10:22; Рим. 4:18 6Аврам Дээрги-Чаяакчыга бүзүрей бээрге, Ол ону актыг-шынныг деп санаан#Рим. 4:3; Гал. 3:6; Иак. 2:23.
7«Бо черни ээлеп чурттазын дээш, халдей чурттуң Ур хоорайындан сени бээр эккелген Дээрги-Чаяакчы-дыр мен» – деп, Бурган Аврамга чугаалаан.
8Аврам: «Дээрги-Чаяакчы, Дээргим! Бо черни ээлеп чурттап болурунуң демдээн кайыын билип аар мен?» – деп айтырган#Башт. 6:17; Лк. 1:18.
9Дээрги-Чаяакчы аңаа: «Меңээ хунан инектен, хунан өшкүден, хунан кошкардан, көге-бугадан база көгээзинден эккеп бер» – дээн. 10Аврам ол амытаннарның шуптузун эккелгеш, мөчүлерин ийи үзе шапкаш, бот-боттарынга удурланыштыр салгылап каан; чүгле куштарны ол үзе шаппаан#Лев. 1:17; Иер. 34:18-19. 11Ынчан ол мөчүлерге араатан куштар кээп хонгулапкан, ынчалза-даа Аврам оларны хоюскулапкан.
12Кызыл-хүнней бергенде, Аврам ханы уйгуже дүлнү берген#Э. д. 2:21; 1 Хаан. 26:12; Иов 33:15; ол өйде ону коргунчуг дүмбей аспактапкан. 13Дээрги-Чаяакчы ынчан мынча дээн: «Сээң үре-салгалың 400 чыл иштинде хары чуртка кулданыгның болгаш дарлалдың адаанга чурттап кээр деп чүвени ыяк сактып ал#Хост. 1:11; 12:40; Аж.-ч. 7:6. 14Ынчалза-даа Мен оларны дарлаан чонну шиидер мен. Ооң соонда сээң салгалың ол черден бай-шыдалдыг кижилер бооп үнерлер#Хост. 11:3; Аж.-ч. 7:7. 15А сен сагыш амыр, буурул баштыг кырган бооп, өгбелериңче аъттаныр сен. 16Сээң ажы-төлүңнүң дөрткү салгалы бо черже ээп кээр; ам-даа амор чоннуң бачыттыг үүлгедиглери аяан долбаан-дыр#Ы. х. к. 9:4; 3 Хаан. 21:26».
17Хүн ажа бээрге, дүмбей дүшкен. Ынчан үзе шаап каан мөчүлерниң аразы-биле ышталып турар сава база чалбырааштыг оттуг кезек эрте бергенин Аврам көрүп каан. 18Дээрги-Чаяакчы ол хүн Аврам-биле керээ кылып алган: «Сээң салгалыңга Египеттиң хеминден улуг Евфрат хемге чедир бо черни бээр мен#Хост. 23:31; Сан. 34:1-12; Иис. 21:43; 3 Хаан. 4:21; 2 Чыл. 9:26: 19-21кен, кенез, кедмон, хет, ферез, рефа, амор, хананей, гергес база иевус чоннарның черлерин бээр мен».
Selectat acum:
Эге дөс 15: TUV
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, Москва, 2011