Лука 13
13
Глава 13
Эми төнӈэкичур аталабукан, көкэдис
1Таракам хөнтэл эмритэн, Иисустэки Галилеянкарбу тэлэӈритэн, Хэвкиду бодми, Пилатту мавчавутан. Пилат мавчал хуӈэлутэн коримэлнюнтан хамрин. 2Иисус ноӈартакитан барагрин:
– Ху тачин мулгачис эрэл галилеянкар төнӈэкичитэн хөнтэлдук галилеянкардук эгдедьмэр бисидин, тачин ноӈартан хилӈавур бакракатан? 3Эсни, хунтэки гөнэм, тарбач мэр төнӈэкичур эми аталабукан, ху-дэ тачин-татта көкэдис. 4Эв ху мулгачис, тарал мян дяпкан хулэк бэил, мэрдулэвур Силоам гуд утэндун тыкэвчэл, нян таду көкэкэн тылбавчал, Иерусалимна бисилдук усалкасапчил биситэн? 5Эсни, хунтэки гөнэм, тарбач мэр төнӈэкичур эми аталабукан, ху-дэ тачинта-тта көкэдис.
Тэвтэв этыв исувкэн смоковницав тэлэӈ
6Нян эрэв тэлэӈу тэлэӈрин:
– Өмэн бэй тэвтэв исувкэчэклэн смоковницач гэрбутти тэвтэ исувкэччэ бисин, нян ноӈан тала эмрин, тэвтэв ирчэв гэлэтэдилрин, нян эч бакра. 7Нян тэвтэв исувкэттытки кэлмэтки гөнин: «Эр би укал иливутан анӈану эвуски эммотэм, эрэк смоковница тэвтэвэн бактай, туркурэм-дэ бакӈа, эрэв чикили, ядай төру кадатчин?» 8Тарбач тарак кэлмэ ноӈантакин барагрин: «Хунӈи, унэт өмэн анӈану бисодэн эмэли. Би эрэлин төру улдим, делгэнкэл нёсчэдитэн тарав төру хамдим, 9таракам тэвтэв исувкэндик; нян тэвтэв эсэкэн исувкэн, таракам-гал гяла анӈанна тарав чикидинри».
Иисус Христос субботала асив бэгдэттэн
10Иисус субботала өмэндулэ нэӈэдеклэ дюла хупкучиддин. 11Тала өмэн аси бисин, мян дяпкан хулэку анӈану ариӈкаду бутэнэври, хэмэрэӈчирин, ӈунрэмдэй туркуттин. 12Иисус, тарав иттыди, Мэнтэкий эририн, нян ноӈантакин гөнин:
– Аси! Хи мэн энэктукий бэгдэчэвунри.
13Иисус ноӈандулан ӈали каптарин, нян тарак тармадит ӈунрунин, тадук Хэвкив эскэдилрин. 14Нэӈэдек дю бэгэнни, Иисус субботала бэгдэрэкэн, тикулриди, бисилтэки бэилтэки гөнин:
– Гургэв некэдек нюӈэн инэӈ бисни, таракам бэгдэттэвур эмгэрэлрэ, субботала эникэн эмгэрэр.
15Нян Хунӈит ноӈантакин барагрин:
– Олэк! Эв ӈи-вул хундук субботала кэндэй, учики-вул эсни онелгэвэттэ, таралбу колуканавкандай? 16Эрэв-нян Авраам хунаддён, мян дяпкан хулэку анӈану хайтанду бутэнэч онечиврив, субботала экич усалгар?
17Нян таракам Иисус тачин гөндиддэкэн, эйду баргакални хадарилритан; чэлэн бичэл бэил Иисус хомилбу некчэлбэн хокаӈчиритан.
Хякита няӈтаван, дрожжив-да тэлэӈ
18Иисус гөнин:
– Як урэчин Хэвки Тэгэмэрэдекэн? Янюн тарав тэрэмкэтчим? 19Тарак хякита няӈтан дын, бэй тарав няӈтав гадыди исувкэндэй, төрлэ тэгукэнин, тарбач тарак исурин, эгден хякита один, нян тадук нянин дэгилни хякита хэгтэлдулэн хэвивэгур хэвивритэн.
20Унэт Иисус гөнин:
– Янюн Хэвки Тэгэмэрэдеккон тэрэмкэтчим? 21Дрожжи урэчин, аси тарав гадыди, иландула бурдук улкурдулан нэдин, нян тараӈан бурдукаӈан огэрэбдин.
Хэвки Тэгэмэрэдеклэн тыгэкун инмэй
22Нян Иерусалимтаки гиркадникан, Иисус эйдулин бисилдули городалдули, билэкэлдули ӈэнрин, хупкуптникэн. 23Өмэн бэй ноӈман улгэмрин:
– Хунӈит, эв абал-такан эйдудукун бэилдук айчибдир?
24Иисус ноӈартакитан гөнин:
– Тыгэкэндули уркэли манрутӈасан касагач идэвур, хунтэки гөнэм, хоял-да касагчидир идэвур, тарбач туркудир. 25Ок-ка дю хунӈин илдин, уркэв нипкэдин, ху толин эмэбдис, уркэлэ коӈкэдис, гөникэн: «Хунӈит, Хунӈит, мунду аӈали!» Нян Ноӈан хунтэки барагдин: «Би хуну эсэм хар, ӈи-дэ хун бисивусэн, авгич-та эмчэвусэн». 26Таракам ху төрэлдис: «Бу Хиннюн дептивун, колривун, Хину итывур дэпки биникэн, мун городалбун толлитэн Хи муну хупкуттис». 27Тарбач Ноӈан гөндин: «Хунтэки гөнэм, Би хуну эсэм хар, авгич-та бисивусэн, час миндук хөрлилрэ, кэнелив овканрил». 28Таракам ху хоӈалдис, итэлдюр кисалчиникан, Аврааму, Исааку, Иакову, эйдувэн-дэ мэтумӈэлбу, Хэвки Тэгэмэрэдеклэн бисилбу иттыдюр, ху-нян толин эмэпчэл бидис, эрэсэвчэл! 29Нян нёлтэн хенмэйгидин, тыкэнмэйгидин, иӈэньгидэгич, нян нямгидагич хөнтэл эмдир, тадук-нян Хэвки Тэгэмэрэдеклэн тоинэклэ тэгэлэндир. 30Таракам, ӈи тек амаргагал бис, дюлэгэл одир, нян дюлэгэл тек бисил, амаргагал одир.
Ирод ӈэлукэчинни, Иисус-та Иерусалиму хоӈанни
31Тала инэӈнэ хан фарисеил эмритэн, Ноӈантакин гөнитэн:
– Хи эдук хөрэннэс, Ирод Хину мадай некрэн.
32Нян Ноӈан ноӈартакитан барагрин:
– Ӈэннилрэ, тартаки хуличантаки гөлилрэ: «Тек ариӈкалбу нёвкандиддэм, эрэв инэӈу, тимина-да бэгдэчиддэм, нян илилатан инэӈнэ мудакчим». 33Тарбач эрэв инэӈу, тимина, илилатан-да инэӈэӈнэтэн Мин гирканнаву, мэтумӈэ Иерусалим аӈидалан көкэдекэн тачин эннэн бис. 34Иерусалим! Иерусалим, мэтумӈэлбу мари, хинтэки эмрилбу дёлач кусигрэри! Адыракан-да Би эйдучэмэн чэлэн бэиӈэлбус Мэни эрэли чактай некрив, он-ка дэги хурэлби дэтлэлби хэрдэлэтэн чаккоттан, ху-нян эчилсэн чакабамса. 35Тек-нян хун дюсан энтэрэн эмэбтэн. Хунтэки гөнэм, ху Мину тараклан инэӈэклэ этэс иттэ, ок гөндис: «Хунӈит гэрбэлин гиркари ирэмкэн бидэн».
Selectat acum:
Лука 13: eve
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
