Matie 22

Eyrì-koran ci-zî vri nyandrɛn mɛ̀n ankà-dɔ̀

(Nyɛ́n nyan Lükɛ̀n 14:15-24 wrú lɔ mɛ̀n)

1Zhezü vru bɩ́ nyandrɛn kɛ dɔ́ anwrɔn hɔ̀n léyi ke die nɛ̀n nukùɛ nɔn ankà. Nɛ dɔ́ yɔ le: 2“Nyàn eci léyi Anhobɩ́ nɛ̀ncüì-dúyri kɛ cá nɔn: Ɛnnɛ̀ncüì tɔ̀n gbrɛ́ ɛci vri n'ɛnẅì yrì-koran lɔ mɛ̀n. 3Nɛ̀n wá n'ɛci-bɩtan-bɔ̀ ɔkɔ̀hɔ̀n kɛ̀ hɔ̀n kè bi anwrɔn hɔ̀n léyi ye bi ɛci-zî ndɔ lɔ mɛ̀n nɔn, tɛ́n anwrɔn hɔ̀n lɔ kè sɩ̀ shrì kɛ̀ và. 4Zɛtɛn nɛ̀n wá ɛci-bɩtan-bɔ̀ nyàntɛn hɔ̀n ɔkɔ̀hɔ̀n, nɛ̀n wá ɛnyànmàn ndɔ lɔ nɛ̀n tán yɔ: ‘Nyɛ́n dɔ́ anwrɔn hɔ̀n léyi ye bi ɛci-zîemɛ̀n nɔn le: M'ɛci-zî lɔ yɛ gbrɛ̀ trɔa, m'ɛnnànmán hɔ̀n mán m'ɛnzhì-wá-nɔ̀n hɔ̀n lɔ fɛn ye wrì, ɛci lɔ fɛn krɔn kpehɛ́n. Nyɛ́n vá eyrì-koran-ci-zîemɛ̀n!’ 5Tɛ́n anwrɔn hɔ̀n léyi ye bi ɛci nɔn, kè sɩ̀ bɔ̀ ɛshi, kɩ hɔ́n y'ɛci-hán-yri: ɔtɔ̀n hɔ́n n'ankɛ̀tɛmɛ̀n, ndɔ lɔ hɔ́n n'anhàn-zhrɛ́-yri; 6anwrɔn ndɔ hɔ̀n ẅɛn ɛci-bɩtan-bɔ̀ léyi yɛ wá ɔkɔ̀hɔ̀n nɔn, wri yɔ eci edù, kɩ wri ndɔ hɔ̀n. 7Ɛnnɛ̀ncüì lɔ bɩ́ ɛmɛ̀nhyì: nɛ wá nɛ́n gɔliɛ-bɔ̀ ɔkɔ̀hɔ̀n wri anwrɔn wri-bɔ̀ lɔ kɩ wá y'anmàn lɔ ɛnhyà. 8Zɛtɛn nɛ dɔ́ n'ɛci-bɩtan-bɔ̀ lɔ le: ‘Eyrì-koran ci-zî lɔ krɔn kpehɛ́n, tɛ́n anwrɔn hɔ̀n léyi ye bi ɛci nɔn, ke sɩ̀ vɛ́n yɔ. 9Nyɛ́n hɔ́n anmàn drɛnmɔɛ́n lɔ fɛn mɛ̀n, ô nyɛ́n bi ɛci-zî lɔ mɛ̀n, anwrɔn hɔ̀n léyi nyɛ lɛ cɔ̀ nɔn.’ 10Ɛci-bɩtan-bɔ̀ lɔ, hɔ́n *andrɛnmɔɛ́n lɔ fɛn mɛ̀n kɩ borɛ anwrɔn lɔ fɛn léyi yɛ cɔ̀ nɔn ɛkru, angbàngbàn hɔ̀n mán ankrànkràn hɔ̀n; kɩ ɔmu lɔ, ɛci-zî-yri lɔ anwrɔn yɩ̀. 11Ɛnnɛ̀ncüì lɔ bru ɛci-zî-yri lɔ, ô kɛ̀ nyan ɛci-zî-bɔ̀ kɩ nɛ̀n kán ɔwrɔn tɔ̀n léyi kè sɩ̀ bɩ ɔkoran ceci nɔn. 12Ne yrɛ ɔwrɔn lɔ le: ‘Annyran anvrɛn, anhɔntan ɛ̀ hán è bru ɛnu lɔ, kɩ è sɩ̀ bɩ ɔkoran ceci hɛ́?’ Tɛ́n, ɔwrɔn lɔ ke sɩ́ dɔ́ ankà zriɛmɛ́n. 13Zɛtɛn ɛnnɛ̀ncüì lɔ kɛ dɔ́ ɛci-bɩtan-bɔ̀ lɔ le: ‘Nyɛ́n kora nɛ̀n annan mán ankɔ̀rɛ̀, ô nyɛ́n kɔ́n nɛ̀n die ɛntrɛ, ɛyri yɔwɔ mɛ̀n. Nanvrɛn lɔ de ɛnnyî-rá mán eyú-wù ke le dú nɛ tɛn nɔn.’ 14Zɛtɛn Zhezü kɛ dɔ̀ le: Bobrebe ye bi ɛci, tɛ́n ɛẅiɛ kɩ yɛ cɔ̀.”

Anmàn wɔɛ̀n léyi ye di govràn nɔn

(Nyɛ́n nyan Markɛ̀n 12:13-17; mán Lükɛ̀n 20:20-26 wrú lɔ mɛ̀n)

15Ɔwɔ-nyànmàn-sùva-wá-bɔ̀ krɔn ɔmùan, ô yɔ nyri ɔmu le yɔ lɛ hán, yɔ krɔn Zhezü antanwrɔn ankà-yrɛ mɛ̀n, ô yɔ ẅɛn nɛ̀n nɔn. 16Yɔ wá y'ɛsɛ̀nkɛn-bɔ̀ mán Herɔdɛ̀n zìwú bɔ̀ jan ɔkɔ̀hɔ̀n kɛ̀ hɔ̀n dɔ́ Zhezü le: “Ankà-yé-wrɔn, bɔ́ nyri ɔmu le ɛ dɔ́ ankàẅì ankà: E yé annànwɔrɛ ankà léyi Ɔwɔ ke ji nɔn, ɔwrɔn ankà ke sɩ́ ẅɛn mɛ́n ɛnjansù, kɩ e sɩ́ ci ɔwrɔn zriɛmɛ́n anvɛwú mrɛ̀n. 17Ɛ̀ dɔ́ bɔ̀, ankà-tro léyi ɛ̀ ẅɛn ankà ndɔ lɔ wú: Bɔ́ ɛnyànmàn lɔ kɛ tán bɔ̀ ɛkɔrɛ̀levri bɔ́ dì, kàle bɔ́ bɩ́ di govràn anmàn wɔɛ̀n hàn?” 18Tɛ́n Zhezü nyri y'ankà-tro gbàngbàn hɔ̀n; zɛtɛn nɛ dɔ́ yɔ le: “Anmùan-anhyrɛ̀-bɔ̀, cɛci kruhú kɛ nyɛ krɔn mɛ̀n antanwrɔn hán? 19Nyɛ́n yé mɛ̀n ɔkùa léyi nye bɩ nye di anmàn ɔwɔɛ̀n nɔn.” Yɔ bɩ́ ɔkùa-ẅì zri yɔ yé nɛ̀n, 20kɩ Zhezü ke yrɛ yɔ le: “Picɛ̀ ndɔ lɔ mán ebɩ́ ndɔ lɔ antɔnwrɔn tɛn hán?” 21Yɔ mrɛ́n nɛ̀n ɔmùan le: “Govràn tɛn.” Zɛtɛn Zhezü kɛ dɔ́ yɔ le: “Nyɛ́n di govràn wɔɛ̀n léyi dú nɛ tɛn nɔn, kɩ Ɔwɔ mán nyɛ́n tán eci léyi dú nɛ tɛn nɔn.” 22Ɛnvra léyi yɔ yá ankà ndɔ lɔ nɔn, yɔ dú anvɛmɛ̀n-frɛ́n-mɛ̀n. Yɔ teze nɛ̀n kɩ yɔ hɔ̀n.

Owúemɛ̀n-dù-frɔ́ ankà-yrɛ tɔ̀n

(Nyɛ́n nyan Markɛ̀n 12:18-27; mán Lükɛ̀n 20:27-40 wrú lɔ mɛ̀n)

23Ɛnbì zri lɔ anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn vá Zhezü ɛtɛ̀sɛ̀n. Yɔ dú ɔwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn. Nyàn ɔmu le 24yɔ hán yɔ yrɛ nɛ̀n ankà nɔn: “Ankà-yé-wrɔn, nyàn ankà léyi Mohizì dɔ̀ nɔn: ‘Ke dú kɛ ɔwrɔn tɔ̀n ke wù, kè sɩ̀ bî ɛnẅì, ke ji le nɛ́n muan-ẅì kè bɩ́ ɛngrɔn-hi lɔ, ô kè bî ɛnẅì kɛ̀ tán nɛ́n muan-ẅì léyi nwù nɔn.’ 25Tɛ́n, bɔ́ ɛmɛ̀n lɔ, anwrɔn-nɛ́n-muan-ẅì hɔ̀n ɔbɔɛ̀n de dù nɔn. Ɛnvrakpà wrɔn lɔ yri ɛnnyɔnwrɔn, ke sɩ̀ bî ɛnẅì, nwù kɩ teze ɛngrɔn-hi lɔ, kɩ anhyrɛmɛ̀n wrɔn lɔ bɩ́ ɛngrɔn-hi lɔ. 26Eci zri lɔ wɔɛ́n anhyrɛmɛ̀n wrɔn lɔ, ɔmu zri lɔ de dú tán anhɔnmɛ̀n wrɔn lɔ, hàn kɩ kɛ́n yɔ anwrɔn ɔbɔɛ̀n lɔ fɛn, yɔ wù, yɔ sɩ̀ bî ɛnẅì. 27Ɔtrɔmɛ̀n lɔ, ɛnnyɔnwrɔn lɔ mán wù. 28Ɛnbì léyi owú-bɔ̀ ke le vru kɛ̀ vá ɔkɔrɛ-bɔ̀ mɛ̀n nɔn, ɛnnyɔnwrɔn ndɔ lɔ, antɔn de ke le dú nɛ́n cüì nɛ́n? Ɔmuhi anwrɔn-nɛ́n-muan-ẅì hɔ̀n ɔbɔɛ̀n lɔ fɛn dú nɛ́n cüì hɔ̀n nɔn!” 29Zhezü mrɛ́n yɔ ɔmùan le: “Nyɛ́n dú ɛzɛ́n mɛ̀n, ɔmuhi nyɛ́n sɩ̀ nyrì Ɔwɔ wrú hɔ̀n lɔ mán Ɔwɔ kɔrɛ̀srɔn lɔ nɔn. 30Annànwɔrɛ mɛ̀n lɔ, ɛnvra léyi owú-bɔ̀ ke le vru kɛ vá ɔkɔrɛ-bɔ̀ mɛ̀n nɔn, wúcɔ̀ mán wúyɔ̀ kè sɩ̀ yri y'edomɛ̀n, tɛ́n yɔ le dù kɛ lɛ hán Ɔwɔ-kùyüre-bɔ̀ léyi dú anhobɩ́ nɔn hɔ́. 31Owúemɛ̀n-dù-frɔ́ ankà lɔ, ɛnbì zriɛmɛ́n nyɛ vá krɛ́ mrìmrì Ɔwɔ wrú lɔ mɛ̀n ankà léyi Ɔwɔ dɔ̀ nɛ́n? Nɛ́n dɔ̀ le: 32‘Mɛ́n dú Abrahamɛ̀n Wɔ, Izaakɛ̀n Wɔ mán Zhakɔbɛ̀n Wɔ.’ Zhezü vru dɔ̀ le: Ɔwɔ dú ɔkɔrɛ-bɔ̀ Wɔ, kɩ nɛ̀n sɩ̀ dù owú-bɔ̀ Wɔ.” 33Anwrɔn hɔ̀n lɔ fɛn léyi yá n'ankà-dɔ̀ lɔ nɔn, dú anvɛmɛ̀n-frɛ́n-mɛ̀n n'ankà-yé lɔ kruhú.

Ɛnyànmàn léyi ẅɛn vɔ̀nshɛ́ nɔn

(Nyɛ́n nyan Markɛ̀n 12:28-34; mán Lükɛ̀n 10:25-28 wrú lɔ mɛ̀n)

34Ɛnvra léyi ɛnyànmàn-sùva-wá-bɔ̀ yá le Zhezü dɔ́ ankà kɛ́n anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì ɔmùan hɛ́n nɔn, yɔ borɛ y'edomɛ̀n ɛkru. 35Kɩ y'ɛmɛ̀n lɔ ɔwrɔn tɔ̀n, nɛ̀n dú ɛnyànmàn-gbànvri-ankà-yé-wrɔn, ne ji nɛ̀n krɔn Zhezü antanwrɔn; ne yrɛ yi le: 36“Ankà-yé-wrɔn, ɛnyànmàn tán de dú ecüìcüì, ɛnyànmàn hɔ̀n lɔ fɛn wú nɛ́n?” 37Zhezü mrɛ́n nɛ̀n ɔmùan le: “ ‘Ke ji le ɛ̀ cüɛn Ɛẅɛnwrɔn v'Ɔwɔ v'ɛnbɔrɛ lɔ fɛn mɛ̀n, vɛ́n wàwùyɛ lɔ fɛn mɛ̀n mán v'ɛhɛ́n lɔ fɛn mɛ̀n.’ 38Ndɔ lɔ de dú ɛnyànmàn cüìcüì mán hɩ léyi ẅɛn vɔ̀nshɛ́ nɔn. 39Kɩ nyàn anhyrɛmɛ̀n tɛn léyi cá nɛ̀n nɔn: ‘Ke ji le ɛ̀ cüɛn ɛnyran-wrɔnẅì kɛ̀ hán vɛ́n mumù hɔ́.’ 40Mohizì nyànmàn lɔ fɛn mán ankà-yé léyi Ɔwɔ-mùanwú-ankà-dɔ́-bɔ̀ tán nɔn, kɛ crɛ nyan ɛnyànmàn anhyrɛ̀ ndɔ hɔ̀n lɔ.”

Ebɩdie-wrɔn mán Davidɛ̀n

(Nyɛ́n nyan Markɛ̀n 12:35-37; mán Lükɛ̀n 20:41-44 wrú lɔ mɛ̀n)

41Ɔwɔ-nyànmàn-sùva-wá-bɔ̀ borɛkru kɩ Zhezü ke yrɛ yɔ ankà ndɔ lɔ: 42“Ankà tán de nye tro Ebɩdie-wrɔn lɔ wú nɛ́n? Antɔnwrɔn mɛẅi-wrɔn dú nɛ̀n?” Yɔ mrɛ́n nɛ̀n ɔmùan le: “Nɛ̀n dú Davidɛ̀n mɛẅi-wrɔn.” 43Zhezü kɛ dɔ́ yɔ le: “Anhɔntan de Davidɛ̀n léyi Ɛnhɛ́n Prɔnprɔn kɛ nyrɔn, vru ke bi nɛ̀n ‘Ɛẅɛnwrɔn’ nɛ́n? Ɔmuhi Davidɛ̀n dɔ̀ le:

44‘Ɛẅɛnwrɔn Ɔwɔ dɔ́ m'Ɛẅɛnwrɔn le:

và yɛ́ mɛ̀n ezì-kɔrɛ̀ kɔrɛ̀a,

hàn mán kɛ̀ krɔn ɛnvra léyi mɛ lɛ hán v'egbri-bɔ̀ kè cüe mɛ́n annantrɛ̀ mɛ̀n hán.’

45Ke dú kɛ Davidɛ̀n ke bi nɛ̀n ‘Ɛẅɛnwrɔn’, anhɔntan de Ebɩdie-wrɔn ke vru ke dú Davidɛ̀n mɛẅi-wrɔn nɛ́n?” 46Ɔwrɔn zriɛmɛ́n kè sɩ̀ cɔ̀ ankà-dɔ́-yri, kɩ bukru hɩ vra lɔ, yɔ sɩ́ vru yrɛ nɛ̀n ankà.

Selectat acum:

Matie 22: ƐAA03

Evidențiere

Partajează

Copiază