Abatelipuna 11
11
Yehoba Gamagalau Analiya I Pasamwayagayaga
1Valila gamagalau gegewel panayawiya analiya maisena ya ge wali baaba i maisena. 2He gamagalau hi mimi heheya labi balimana, inoke abwab bwabwatana etega hi pwawa labi Babiloniya elana yaka hi minaa to. 3Yaka abwe hi pebaaba-agil hi ba, “Ehei! Bilibili ta ahe bilik ta ginolil yaka ta tonil ge nihi gasisi.” Inoke hi ginol ola to, yaka bilik hi ahe limi hi taliya, ge kolta#11:3 Abatelipuna 6:14 ana epwamwananal paiya nu kite. hi ahe bilik hi papihikagil. 4Yaka abwe hi ba, “Ehei! Wala panuwa bwabwatana etega ta ginol ge limi mihahaina hot etegana ta tal ni na ni tupa yaluyaluwa. Ta ginol ola o, inoke alala ni bwata ge bahi ta mimiwaliwali panayawi labena gegewena elal.”
5Yaa Yehoba i nem i lau panuwa bwabwatana ge limi mihahaina hot toto gamagalau hi taltal o i kitel. 6Inoke i ba, “Gamagalau ya heliya boda maisena ge anan maisena elana hi baaba. Sauga ya bugul ya hi giginol, he bwaliga abwe bugul ni gewi al nihi ginolil. Ebo bugul etega nihi nuwatuan, he bosowailiya ya te nihi awaawaginol ya. 7Ehei! Ta na ta lau analiya ta pasamwayagayaga inoke bahi avaliyau wali baaba ana sapu nihi aatena.”
8Inoke eliyana Yehoba gamagalau i waliwali-agil hi na panayawi labena gegewena elal, yaka panuwa o nige al hi tatal. 9Inoke panuwa alana hi tun Babiloni#11:9 Pana Hibilu elana alan “Babiloni” ana hago i ola “pasamwayagayaga.” kaiwena panuwa o elana Yehoba gamagalau gegewel analiya i pasamwayagayaga, yaka eliyana i waliwali-agil panayawi labena gegewena elal.
Semi ge Tubutubunau Liwaniliya
10Semi alonau natunau ge tubutubunau liwaniliya i ola hiwe.
Nub i mowasi enaa baliman eluwana elana, Semi wana baliman 100 yaka natuna i gan alana Alpakad. 11Alpakad hi ab enaa, Semi i minamina al baliman 500 yaka natunau bolau ge yowau enuna al hi gan.
12Alpakad wana baliman 35 yaka natuna i gan alana Sela. 13Sela hi ab enaa, Alpakad i minamina al baliman 403 yaka natunau bolau ge yowau enuna al hi gan.
14Sela wana baliman 30 yaka natuna i gan alana Ebe. 15Ebe hi ab enaa, Sela i minamina al baliman 403 yaka natunau bolau ge yowau enuna al hi gan.
16Ebe wana baliman 34 yaka natuna i gan alana Peleg. 17Peleg hi ab enaa, Ebe i minamina al baliman 430 yaka natunau bolau ge yowau enuna al hi gan.
18Peleg wana baliman 30 yaka natuna i gan alana Liu. 19Liu hi ab enaa, Peleg i minamina al baliman 209 yaka natunau bolau ge yowau enuna al hi gan.
20Liu wana baliman 32 yaka natuna i gan alana Selag. 21Selag hi ab enaa, Liu i minamina al baliman 207 yaka natunau bolau ge yowau enuna al hi gan.
22Selag wana baliman 30 yaka natuna i gan alana Naho. 23Naho hi ab enaa, Selag i minamina al baliman 200 yaka natunau bolau ge yowau enuna al hi gan.
24Naho wana baliman 29 yaka natuna i gan alana Tela. 25Tela hi ab enaa, Naho i minamina al baliman 119 yaka natunau bolau ge yowau enuna al hi gan.
26Tela wana baliman 70 yaka natunau hi gan alaliya Abalam, Naho ge Halan.
Abalahama Liwanina
(11:27–25:11)
Tela Alonau Abalam ge Lote Panuwa Ul Hi Eguluwan
27He Tela alonau natunau ge tubunau liwaniliya i ola hiwe.
Tela natunau hi gan alaliya Abalam, Naho ge Halan. Inoke Halan natuna i gan alana Lote. 28He Tela yawalina miminana, natuna Halan i aliga panuwa Ul, labi Koldiya elana, panuwa toto hi aba.
29Abalam i alolon lagona alana Selai ge Naho i alolon lagona alana Milika, iya Halan natuna. He Milika talina alana Iska. 30Yaa Selai i kobwas yaka nige i aab.
31Tela i lut natuna Abalam, tubuna Lote (Halan natuna) ge yawana Selai (Abalam lagona) i ahel, yaka panuwa Ul labi Koldiya elana hi eguluwan ge nihi nok nihi na Kenani. Yaa sauga hi vin panuwa Halani, yaka hi miminaa ga to.
32Tela wana baliman 205 i pwawa, yaka i aligaa panuwa Halani.
Selectat acum:
Abatelipuna 11: mpx
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2018, Wycliffe Bible Translators, Inc. All rights reserved.