San Juan 3

Jesús‑ni rinnebie len Nicodemo‑ni

1Udo ttu benne la'ania anke fariseo, lábie Nicodemo. Uke ttu nu loni ge ka benne Israel‑ni. 2Benneha ugíabie ttu lo rela gwalannie Jesús‑ni nna ree benneha:

―Maestru, ri'itu yutu deki Tata Do Yebáha‑ba udhelhe lu kini ule'enlu ri'itu, kumu lanú ttu benne gwaka gebie unie ka milagru ruinlu‑na ganna abíba du Tata Do Yebáha lenbie.

3Jesús‑ni nna bekabie ge benneha, ree:

―Netiru ria, benne abíba eyalie attu libe eyake benne kubi, benneha labí dhaabie isine ake benne innabia Tata Do Yebáha bie.

4Nicodemo‑ni nna ree Jesús‑ni:

―¿Gasina aka ge ttu benne chi anke yaxxu eyalie attu libe? ¿Si gwakaba ge benneha eta'abie lhe'e nan geeha nna eyalie attu libe?

5Jesús‑ni nna bekabie ree:

―Netiru ria, benne abíba eyalie len inda lhe eyalie len Espíritu ge Tata Do Yebáha lhe, benneha labí aka isine ake benne innabia Tata Do Yebáha bie. 6Kumu ttu benne ralie lhe'e xxudi ixnábie, xi'in ka benne se'e yiesi lo yu‑niba anka benneha, nna benne ake xi'in Tata Do Yebáha nna Espíritu ge Tata Do Yebáha‑ba unie kini ake xi'inie. 7Laxkala bittu aka tenlu de ria: “Raka doelha eyali ka benne attu libe.” 8Ttibanka be‑na, gatti laduba dana, gwa riyienibinlu tsi'ini, ttaka labí yulu gá udána dana lhe gá diana lhe. Aníha‑gaba runi Espíritu ge Tata Do Yebáha lhe'e lasto ka benne chi beyalike attu libe.

9Nicodemo‑ni nna bekabie, ree:

―¿Gasina aka nu ralu‑na?

10Jesús‑ni nna bekabie ge benneha, ree:

―Ki lu ankalalu maestru ge ka nu Israel‑ni nna a rite denlu nu ria‑ni. 11Netiru ria, ri'itu rinnebatu ge nu chi yutu lhe rigixxi'abatu ge nu chi bilentu lhe, ttaka lebi'i labí ria lele ge nu rigixxi'atu‑ni. 12Ki nu anka ge yiesi lo yu‑ni rigixxi'aya nna a ria lele, ¿titiala ganna ttixka kixxi'ania le nu anka ge yebáha?

13’Lanú nu chi ugwapina yebáha, sunruba neti benne daya yebáha ugwadia niha nna bisiaya nii. 14Ttigaba ben Moisés‑ni lo yu bisiha ulhidhana belhaha bedána nuha gwetsá, anágaba neti benne daya yebáha teeki ilhidhakana neti nna utákana gwetsá, 15kini anáchu iyába ka benne tsia leke neti, [abittu tsia nnittike], sinuki satíaba aka benke arlo Tata Do Yebáha.

Tata Do Yebáha raka xxattanie ge ka benne

16’Kumu de yalhá ukani Tata Do Yebáha ge ka benne se'e yiesi lo yu‑ni, de nuha nna udhelhe neti benne ankaa Xi'in ttu túbiru geeha, kini anáchu iyába ka benne tsia leke neti nna abittu tsia nnittike, sinuki satíaba aka benke arloe. 17Kumu Tata Do Yebáha laa udhelhage neti benne ankaa Xi'inie, laa udhelhage neti yiesi lo yu‑ni kini ukinnia ka benne, sinuki udhelhalee neti kini odiláya ke.

18’Laxkala benne tsia lebie kia, labí urixxi ukinni Tata Do Yebáha benneha, ttaka benne abíba tsia lebie kia, chiba ubixxi biginni benneha kumu de labí ugía lebie neti benne ankaa Xi'in ttu túbiru ge Tata Do Yebáha. 19Ka nu labí ria lekaniha ibixxi iginniba ka nuha, kumu neti benne ankaa xianiha gwa bisiabaa yiesi lo yu‑ni, ttaka lakana nna adírula ute lekani chulhaha attichula xianiha kumu de satsaba anka nu ruinkana. 20Kumu iyába ka nu runi nu satsa, labí raka uyúkana xianiha, labí ribigakana ata ruden nuha, kini abittu ilá nu ruinkanaha nna itisakana. 21Ttaka benne gwa ruinbe nu raxxína len nu anka gwalí, gwa ribigaba benneha ata rudani xianiha, kini ilá deki nu runieha gwankaba nuha nu ru'u le Tata Do Yebáha.

Juan benne rugadi indaha rigixxi'abie ge Jesús‑ni

22Iki de nuha nna ugía Jesús‑ni lenbie ka benne rudhetinieha isá to daka Judea. Niha‑ba ugweki lenie ke nna rugadie ka benne inda. 23Anágaba Juan‑ni rugadigabe ka benne inda daka Enón kumu niha yu'u idila inda. Enón rena gaxxaba Salim. Niha risin ka benne ki radike inda. 24Kumu Juan‑ni labí chi tena lisiyya la'ania.

25Ka benne rudhetini Juan‑ni, ttu lidú belisa luesike len ka benne Israel‑ni. Belisa luesike delo ni'a ge gasina eyari ka benne kini eyakake nari xú arlo Tata Do Yebáha. 26Nianna tti bisinke ata du Juan‑ni nna ráke benneha:

―Maestru, biyúruga. Nu du lenlu daka ro'o yoo Jordán‑ni, nu utixxi'agabinlu ri'itu geniha, nnanna nuha chigaba rugadina ka benne inda nna iyábake diake danalhake na.

27Juan‑ni nna bekabie ge ka benneha, ree:

―Labí aka ge ttu benne unie ttu bixa ganna abíba ute ná Tata Do Yebáha lenbie. 28Ki kwinaba lebi'i biyienin nagale ge nu xpeya le deki neti labí ankaa Cristu, sinuki sun tteruba ankaa ttu benne udhelha Tata Do Yebáha kini danerua rigixxi'aya deki chi daa benneha. 29Ttibanka lo ttu dha'a, nubiyú rutsá nániha, gebani anka nuila rutsá ná lennaha nna benne anka amigu ge nubiyú rutsá nániha, benneha dubie gaxxaba kwe'eni nna yalhá redeakanie tti riyieninie rinne nubiyúha. Neti nuha ankaa amigu ge nubiyú rutsá nániha, laxkala nnanna itta suba edú lasia. 30Benne rutsá neeha rakaru doelha tsie ake xxeniru, neti nna exxa gaalaa.

31’Benne daa gwetsáha, benneha nuha ankarue xxeni delo iyá ka benne. Benne anka ge yiesi lo yu‑ni nna ge yiesi lo yu‑niba anka benneha nna nu anka ge yiesi lo yu‑niba rinne benneha. Benne daa yebáha nna benneha nuha ankarue xxeni delo iyá ka benne. 32Ge nu bilábanie lhe ge nu biyienbanie rigixxi'abie, ttaka ni ttú ka benne a ria leke ge nu rigixxi'a benneha. 33Ttaka nu gwa ria leni ge benneha, lana nuha rigixxi'iana deki Tata Do Yebáha rinne nu anka gwalí. 34Kumu benne udhelha Tata Do Yebáha, ka tisa geeha‑ba rinne benneha kumu Tata Do Yebáha rute tame itú Espíritu geeha len benneha. 35Tataha rakanie ge Xi'inieha, laxkala iyába chi bedha'ane lasi ná benneha. 36Laxkala benne tsia lebie ge Xi'in Tata Do Yebáha, gwaka benba benneha ttu dia lii arlo Tata Do Yebáha, nna nu abittu tsia leni ge Xi'inieha labí aka ben nuha ttu dia lii, sinuki ralhaba nuha dhina elha disa ute Tata Do Yebáha.

Selectat acum:

San Juan 3: zae

Evidențiere

Partajează

Copiază