Amatie 15

Yaabdõma zãsŋɔ, la sɛla n botɩ nẽra dɛna dẽgrɔ

(Amarkɩ 7:1-23)

1Tɩ Farisi dõma, la lɔɔ karẽnsãandõma n ze'ele Zerizalɛm wa'am wa soke Azezi yetɩ: 2«Bẽm tɩ fõn karẽnbiisi la ka sakra tɩ yaabdõma malŋɔ la? Ba sãn yetɩ ba di, ba ka peerɩ nu'usi wʋ tɩ yaabdõma n ɩtɩ se'em na.» 3Tɩ a lebe soke ba yetɩ: «Bẽm ẽŋɛ tɩ yãma mẽ sɩ'ɩsra Nawẽnnɛ nõorɛ la, ya mẽŋa malŋɔ ĩyã? 4Nawẽnnɛ yetɩ: ‹Nanna fʋ sɔ, la fʋ ma.› Dee le yetɩ: ‹Sɛka n tɔgɛ a sɔ bɩɩ a ma be'em, dẽnɩ tɩ ba kʋ ẽ.› 5La yãma yetɩ, nẽra sãn yele a sɔ bɩɩ a ma yetɩ: ‹Mam n tarɩ nɩ bõn-sɛka tɩ m sõŋɛ fɔ la, de la Nawẽnnɛ bõnɔ›, la ka le dɛna tɩ a ẽŋɛ sɛla bɔ a sɔ. 6Bɛla, ya basrɩ tɩ Nawẽnnɛ yetɔga la lebge la zãŋa, dee dɔla ya mẽŋa malŋɔ. 7Pʋlibsum dõma wã, A'ezayi yʋʋn sɩrɩ to'oge Nawẽnnɛ yetɔga tɔgɛ ya yelle, tɩ Nawẽnnɛ yetɩ:

8‹Nẽr-bãna wã pẽgrɩ mam na ba nõorɛ yetɔga,

la ba sũure zãagɛ la mam mɛ.

9Ban nã'asrɩ mam na, la de la zãŋa.

Se'ere n soe la, ba zãsnɩ na zãsŋɔ n de nẽrsaalba lɔɔ.› »

10La Azezi wi nẽr-kʋʋŋɔ la, tɩ ba wa'am na a zẽ'am, tɩ a yele ba yetɩ: «Selse-ya sõŋa sõŋa wõm a võorɛ: 11La dagɩ sɛla n kẽ'erɩ nẽrsaala nõorʋm n botɩ a dɛna dẽgrɔ, la de la sɛla n ze'etɩ nẽrsaala nõorʋm yɛsra n botɩ a dɛna dẽgrɔ.»

12Bɛla tɩ a karẽnbiisi la lɛm ẽ, soke ẽ yetɩ: «Fõn mi tɩ Farisi dõma la n wõm fõn tɔgɛ bɛla la, la dõn ba sũure mɛ?» 13Tɩ Azezi lerge yetɩ: «Sɛla woo tɩ mam Sɔ Nawẽnnɛ ka bʋrɛ, ba wʋn võogɛ ẽ basɛ. 14Basɛ-ya ba, tɩ ba ãn wʋ fɔɔsɩ n ve'erɩ fɔɔsɩ. Fʋa sãn vɛ'ɛra fʋa, bãma bayi wuu wʋn lui la boko pʋam.»

15Tɩ Apɩyɛɛrɩ yele ẽ yetɩ: «Pa'alɛ tɔ makrɛ la võorɛ.» 16Tɩ Azezi soke ba yetɩ: «Yãma yɛm mẽ ka like? 17Yãma ka mi tɩ bõn-sɛka woo n kẽ'erɩ nẽrsaala nõorʋm tollɩ la a pʋʋrʋm, tɩ a yẽ'era ba basra? 18La sɛla n yesrɩ nẽrsaala nõorʋm ze'ele la a sũure pʋam, la de la bõn-bãma n botɩ a dɛna dẽgrɔ. 19Se'ere n soe la, pʋtẽ'e-yooro ze'etɩ la nẽrsaala sũure pʋam botɩ a bɔɔra tɩ a ẽŋɛ be'em: Nẽr-kʋa, la yalsɩ, la taaba pɔgba la taaba sɩrba gã'a, la nayigum, la põmpɔrŋɔ, la pɔ'ɔrɛ yetɔga. 20La de la bãna wã n dẽgrɩ nẽrsaala. La nẽra sãn di dee ka peege nu'usi, bɛla ka dẽgrɩ nẽra.»

Kanaan pɔka bɔ Azezi sɩra

(Amarkɩ 7:24-30)

21Azezi daan fõrgɛ bilam sẽŋɛ la Tiiri, la Sidõ so'olʋm. 22Tɩ Kanaan pɔka ze'ele tẽn-bãma wa'am a zẽ'am wa tɔgra ke'enke'em yetɩ: «Zuudãana, Adavidi yɩɩŋa, zoe m ninbãalga, mam pɔyʋa tɩ kʋlkã'arga nãmsra ẽ halɩ zozo'e.» 23Tɩ Azezi ka lerge ẽ se'ere. Tɩ a karẽnbiisi la paagɛ a zẽ'am yele ẽ yetɩ: «Ẽŋɛ bɔ ẽ tɩ a fõrgɛ, tɩ a kaasrɩ dɔla tɔ.» 24Tɩ Azezi lerge ba yetɩ: «Nawẽnnɛ tõm mam na Ɩsrayɛlɩ dõma n ãn wʋ piisi n bɔɩ la mã'a zẽ'am.» 25Tɩ pɔka la paagɛ ka dũma tẽŋa a nẽŋam yele ẽ yetɩ: «Zuudãana, sõŋɛ ma.» 26Tɩ Azezi lerge yetɩ: «La ka masɛ tɩ ba dɩkɛ kɔma dia bɔ baasɩ.» 27Tɩ pɔka la lerge yetɩ: «Zuudãana, la de la sɩra. La baasɩ diti la di-zõra n luti ba dãana taablɩ tilum.» 28Tɩ Azezi lerge ẽ yetɩ: «Pɔka, fʋ bɔ mam sɩra zo'oge mɛ. La wʋn ẽŋɛ wʋ fõn boorɩ se'em na bɔ fɔ.» La wakat-ẽŋa mẽŋa tɩ a pɔyʋa la yẽ ĩmã'asʋm.

Azezi botɩ nẽrba zozo'e yẽ ĩmã'asʋm

29Azezi daan ze'ele bilam sẽŋɛ la Galile mõgrɛ la nõorʋm, ka zom tãŋa zuo zẽa. 30Tɩ nẽr-kʋʋŋɔ zozo'e tarɩ kɔɔrnɔ, la fɔɔsɩ, la kobro, la mugro, la bã'adõma basɛba zozo'e wa'am Azezi nẽŋam. Tɩ Azezi botɩ ba yẽ ĩmã'asʋm. 31La nẽrba la n daan yẽ mugro la n tɔgrɩ, tɩ kobro la yeege, tɩ kɔɔrnɔ na sẽnna, tɩ fɔɔsɩ la yẽta la, la daan di'ige ba mɛ, tɩ ba pẽgra Nawẽnnɛ n de Ɩsrayɛlɩ dõma Zuudãana la.

Azezi le bɔ nẽr-kʋʋŋɔ dia

(Amarkɩ 8:1-10)

32Azezi daan wi a karẽnbiisi la mɛ yele ba yetɩ: «Nẽr-kʋʋŋɔ wã ninbãalga n tarɩ mam, se'ere n soe la, la de la dabsa atã n wãna tɩ ba boe mam zẽ'am, dee ka tara dia wʋn di. La mam ka boorɩ tɩ m basɛ ba tɩ ba kule la kɔm, ba tã wʋn ka vibe sore mɛ.» 33Tɩ a karẽnbiisi la soke ẽ yetɩ: «Tɩ wʋn yẽ dia la bɛ, zẽ'e-ẽna n de mõom wã, bɔ nẽr-kʋʋŋɔ wã wuu tɩ la seke ba?» 34Tɩ Azezi soke ba yetɩ: «Yãma tarɩ la borborɩ balɛ?» Tɩ ba lerge yetɩ: «Bayopɔɩ, la zũn-pɩgsɩ fẽe.» 35Tɩ Azezi yele nẽr-kʋʋŋɔ la yetɩ, ba zĩ'ire tẽŋa. 36Dee dɩkɛ borborɩ bayopɔɩ la, la zũma la pʋ'ʋsɛ Nawẽnnɛ, dee fiise bɔ a karẽnbiisi la, tɩ ba to'oge pʋɩ nẽr-kʋʋŋɔ la. 37Tɩ ba wuu di tɩgɛ, dee tɩ ba vaagɛ bõn-gito n deege pɩrɛ pɩtɔ bayopɔɩ. 38Sɛba n daan di dia la, bʋraasɩ de la tʋsa anaasɩ, tɩ pɔgsɩ la kɔma kãllɛ ka pa'asɛ. 39Bɛla poorʋm, Azezi basɛ nẽr-kʋʋŋɔ la tɩ ba kule mɛ, dee kẽ õorŋɔ sẽŋɛ Magdala.

Selectat acum:

Amatie 15: gurDBL

Evidențiere

Partajează

Copiază