San Mateo 27
27
Awane Jesústa Pilatora chɨhkamtu
(Mr 15.1; Lc 23.1-2; Jn 18.28-32)
1Kɨnmɨzkane, wan pariya ɨninturuzkas Judío ɨlaparuzkas nɨjkulat kit Jesústa piantana minñara. 2Uspane Jesústa kuhat kit ussa Pilatora, Roma mikwara, chɨhkara.
Judasne imtu
3Judío ɨninturuzne awaruza paikwaara, Jesústa piantanapa. Sun piankamtawane, Judasne, Jesústa chɨhkatmikane, tayalmɨzta, awa Jesústa piantashit akwa. Usne pariya ɨninturuzakas Judío ɨlaparuzakas ɨt kit treinta pialkasa kail kit 4kaiznara:
—Nane kwail kirau, na kwail kitchimikasha innapa chɨhkat akwa.
Uspane sɨnkaara:
—Nu ussa chɨhkat akwa, nune nu kimtu aizpa mintawa. Nuin sun kirɨt.
5Suasne Judasne tas puz kit Dios yalkin pial pattara. Suasne ɨt kit usmin kwil tɨt kuh kit usmin kan kit ira. 6Pariya ɨninturuzne sun pial sakkat kit kaizara:
—Judas an pialkasa ampura piantana paininta akwa, aune Diospa pial sapmukin taasachimakpas.
7Suasne uspane sun pialkasa pil paina pashiara. Uspane pail sammikawa nanmal payara, mamaz suras awaruza kamnana. 8Katmizna makima “sun pilne aimpi nanmal” muntɨt, an pialkasa awa mazara piantanapa pait akwa. 9Jeremíasne, Dios kainammmikane, sun kirɨt aizpa ka pɨnkɨhta parɨt: “Uspane treinta pial sappara. Israel awane sunpawa pial taana nɨjkulara, awara paina. 10Uspane sun pialkasa pail sammikawa nanmal payara. Uspane chiwazha Anpat nawa ɨnintɨt aizpa kiara,” Jeremías kizta.#Zac 11.12-13
Pilatone Jesústa mɨmamtu
(Mr 15.2-5; Lc 23.3-5; Jn 18.33-38)
11Jesús Pilatokin panasmin, usne Jesústa mɨmara:
—¿Nune Judío awawa mikwa kish?
Jesúsne ussa kaizta:
—Nu kaizta aizpa watcha i.
12Pariya ɨninturuzkas Judío ɨlaparuzkas us kwail kirɨt kizmɨztuasmin, Jesúsne usparuza sɨnkanarachi. 13Pilatone ussa mɨmara:
—¿Uspa nua kwail kizamtu aizpa mɨmtuchikish?
14Jesúsne ussa chinkas sɨnkamɨztachi. Katsa ɨninmikane iztasparɨt.
Uspane Jesústa inapa kaizamtu
(Mr 15.6-20; Lc 23.13-25; Jn 18.38–19.19)
15Pascua pishta tuasmin, Romano mikwane maza kajchira wamikara chɨhtuazi. Usne awa narɨtmikara chɨhtshina. 16Suane maza kwisha kwailmikane kajchira wara. Usne Barrabás muntɨt. Akkwan awane paiña kwail kirɨt aizpa piankaamara. 17Awa wanmakkamtuasmin, Pilatone mɨmanara:
—¿Une chima pashiamtu, na kinpa? ¿Barrabásta chɨhtawasa? ¿Jesústa, chɨhtawasa? ¿Dios nɨrɨtmika muntɨtmikara chɨhtawasa?
18Pilatone sun mɨmara, Jesústa chɨhtshimtu akwa. Awa Jesúskasa aliz kulamtu akwa, uspane Jesústa chɨhkaara. Pilatone sun piankamta.
19Pilato paiña ɨnintukin uzasmin, paiña ashampane paiña pit ussa ɨnin kit kaizta: “An ampukasa kimun. Usne wat awa i. Amtawara kainkizpamtuasmin, nane us akwa kwisha naiztau.”
20Pariya ɨnintuzkas Judío ɨlaparuzkas wan awaruza tɨnta kurunnara, Pilatora paikwan, Barrabás chɨhtna, Jesústa piantanapa. 21Katsa mikwane mamasa usparuzkasa paranat kit mɨmanara:
—¿Sun paastas mɨnmikama chɨhtna pashiamtu?
Uspane sɨnkaara:
—Barrabásta chɨhtti.
22Pilatone mɨmanara:
—¿Jesúskasa chima kinpai? ¿Dios nɨrɨtmika muntɨtmikakasa chima kinpai? Cristora munamtu.
Wan awane sɨnkaara:
—Ussa kurishta pat piantarawa.
23Suasne Pilatone kaiznara:
—¿Usne chi kwail kirɨt?
Uspane an tɨnta kwianamɨzta:
—Ussa kurishta pat piantari.
24Pilato kaizta aizpa mɨarachi akwa, ussa kwisha pilchapuzara akwa, Pilatone kwazi kanapa ɨnin kit awa iztakin paiña chihtɨ kit kit kainanara:
—Nane an wat ampura piantanapa ɨninmanash. Umin ussa ininñaanazi.
25Wan awane sɨnkaara:
—Nu ussa inapa ɨnintane, aune au paikwat aizpa nɨjkulnamakpas. Au ussa kwail kiarɨtne, aukas au pashparuzkas us akwa naizshinamakpas.
26Suasne Pilatone Barrabásta chɨhtta. Jesústa ilna ɨnintawane, Pilatowa kiwainturuzne Jesústa Roma suldaruruza chɨhkanara, kurishta pat pian kit piantanapa.
27Suasne ɨninmikawa suldaruruzne Jesústa Roma ɨninmikawa yalta mɨlara. Wan suldaruruzne Jesúspa mamin pɨlsaarɨt. 28Suasne uspane paiña pĩn nakaat kit kwanamkana pĩn, mikwawa kwakshamkana, kwaninñaara. 29Uspane akkwan pu tɨt iptɨt kit mikwawa chuttakana saara. Suasne paiña kɨzpukin sɨnaara. Maza mikwawa tɨkana paiña numal chihtɨkin pizninara. Suasne uspane us iztakin wakpuj wainñat kit ussa ishanat kit kaizara:
—¡Nune Judío awara mikwa i! Wat kɨntɨre, kizara.
30Uspane ussa ilpi kiat kit sun mikwawa tɨkasa kɨzpukin pianara. 31Ussa ishanarawane, uspane kwanamkana pĩn nakaat kit paiña pĩn kwaninñara. Suasne ussa mɨlaara, ussa kurishta patpian piantanapa.
Ussa kurishta pat pian piantaamtu
(Mr 15.21-32; Lc 23.26-43; Jn 19.17-27)
32Puzamɨztuasmin, Roma suldaruruzne maza Cirene suras ampura wanmalara. Usne Simón mun. Uspane ussa Jesúspa us kurish munana ɨninara.
33Sunkanain uspane Gólgota ɨza munkin pianaara. Sun Gólgota ɨzane “irɨt kɨzpukana iz kit ka muntɨt.” 34Suane uspane Jesústa tain vino kwanpa kwinñara, ishmanpa. Kwaiztawane, usne chinkas kwashitchi.
35Ussa kurishta inapa pat piantawane, suldaruruzpain ukkasa salara, Jesúspa pĩn kana kin. Dios kainammmika kaizta aizpa sunkana kirɨt. Ka kizta: “Uspane salat kit ap watsal kwaksham kana kinazi. Uspane usparuza ap pĩnkas naiyanazi,” kizta. 36Suasne sua uspane uzara, Jesústa izana. 37Uspane tɨ akkalta paat kit Jesúspa kɨzpu ɨsal pattara. Sun pitne ka kizta: anne jesús i. usne judío awawa mikwa i.
38Uspane uskasa paas walkummikarakas tɨra pat pianara. Mazara paiña numal mamaz kurishta pattara. Mamazta paiña kwiyamal mamaz kurishta pattara. 39Pɨnturuzne ussa kwail pit kizara. Uspa kɨzpu kialtuasmin, uspane 40ka kaizamɨzta:
—Nune akkwan pit kaizta. Nune an Diospa yal kutña payura mamaza sanash kizta. Katmizna nuin kiwainti. Nuin Dios painkul kane, nuin kurishtas kihshti.
41Pariya ɨnintuzkas Moisés kaizta aizpa kamtamtuzkas, Fariseo awaruzkas Judío ɨlaparuzkas ussa ishanat kit usparuzpain kaizara:
42—Us mamaztuza watsat mɨlnarakas, usmin watsat mɨlsachi. Israel awa mikwa kane, usne kurishtas kihshshina, au us kaizta aizpa nɨjkulanapa. 43Diosta nɨjkultune, usne makis Diosta ussa watsat mɨlnapa paikwatpa. Dios ussa pashimtune, Diosne ussa kiwainshina, us “Dios painkul ish” kizta akwa.
44Jesúskasa kurishta pat piantɨtkas, an paas walkumtuzkas Jesústa kwail kaizpailta.
Jesúsne imtu
(Mr 15.33-41; Lc 23.44-49; Jn 19.28-30)
45Paizka payukis kutña urakima wan sura tɨlkwil paarɨt. 46Sun kutña urain Jesúsne paiña Hebreo pitkasain tɨnta ka kwianta: “Eli, Eli, ¿lema sabactani?” (Au pitkasain ka kizta: “Ap Dios, Ap Dios. ¿Chishma nawa kwairɨt?”)#Sal 22.1
47Mɨnpazha sua puraruzne mɨat kit kaizara:
—An ampune Elías kainammmikara akumtu.
48Sun urain mazane usparuztas ãĩn ɨt kit pimpuh kana ɨt. Pimpuhta tain vinokasa parantawane, an ampune pimpuh tɨkin tat kit Jesústa kashara nuninta, tuknapa. 49Mamaztuzne kaizara:
—Sun kimun. Elías kiwaina amtuka, izanapas.
50Jesús mamasa tɨnta kwiantawane, ira. 51Sun urain nain pĩn kantɨt Diospa yalkin kwashtas pihshara, piltakima. Sun nain pĩn akwa, mamaz kanmal sɨptɨt. Pilne ulta. Ukkas kɨzara. 52Pantiónpa yal azpianara. Akkwan Diosta piantuza irɨttas kuhsara. 53Kuhsarawane, pantión yalkis puzara. Jesús irɨttas kuhstawane, an kuhsararuzne Diospa watsal Jerusalén pɨpulura nappara. Suane akkwan awane usparuza izara.
54Suasne suldaru ɨninmikakas Jesústa izmuruzkas ulmu mazara. Wan kiarɨt aizpa izara akwa, uspane kwisha ishkuat kit kaizara:
—Watcha. An ampune Dios Painkul ara.
55Suane akkwan ashampane attishtas izara. Uspane Jesústa kiwainat kit Jesústa Galilea suras kanpaara. 56Maríakas Magdalena pɨpuluras ara. Mamaz Maríakas ara. An Maríane Santiagowa akkuhshkas Joséwa akkuhshkas ara. Zebedeowa painkultuzpa akkuhshkas ara.
Jesústa kaamtu
(Mr 15.42-47; Lc 23.50-56; Jn 19.38-42)
57Nashmɨzkane, maza kwazpa ampune ara. An Arimatea pɨpuluras awane José muntɨt. Uskas Jesústa kammumika azi. 58Suasne usne Pilatora izna ɨt kit Jesús irɨtta paikwara, ussa kamna. Suasne Pilatone ussa chɨhkanpa ɨninnara. 59Joséne irɨtmika kurishtas mushat kit muin sɨnam pĩn ip kit 60paiñain masas uk kulta kamta. Suasne usne ñamin sun kul kapal sarɨt, ussa sua kamnapa. Katsa ukkasa sun kulta sɨptawane, ɨrɨt. 61Suane Magdalena suras Maríakas mamaz Maríakas kamkin izawara uzara.
Pariyawa kiwainmuruzne Jesús kamkin izamtu
62Pascua pishta kapal watsarawane, tɨlawarane, kwaizkultu payura, Sábado payura, pariya ɨninturuzkas Fariseo awaruzkas Pilatora izna ɨat 63kit kaizara:
—Mikwa, aumɨza mɨzhain. Uzasmin, an pɨrail kaizmumikane “kutña payura irɨttas kakulnash” kizta. 64Katmizna up kiwaintuza kamkin izna ɨninnari kutña payurakima. Suasne paiña kammuruzne amtawara aamanazi, irɨtta walkwan. Jesús uzasmin, “nane Dios ɨnintamika ish” kizta. Paiña kammuruz “us irɨttas kakultɨre” kizarane, an minpa pɨrail an ñancha pɨrailkin anza kwail namnazi.
65Pilatone kaiznara:
—Une an kiwaim suldaruruza mɨltain, kamkin anza wat izanapa, mɨnminkas nappamanpa.
66Suasne uspane kamkin ɨat kit sɨpmu ukkin watsal sɨppara, mamaztuz nappamanpa. Suasne suldaru kiwaintuza chɨhkanarɨt, izanapa.
Selectat acum:
San Mateo 27: kwi
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2002, Wycliffe Bible Translators, Inc. All rights reserved.
