San Lucas 22
22
Awane Jesústa pizshiamtu
(Mt 26.1-5, 14-16; Mr 14.1-2, 10-11; Jn 11.45-53)
1Pascua pishta kasha pamtu. Sun pishtakin Judío awa pan sarane, kiña winkain. 2Katsa pariyaruzkas Moisés parɨt aizpa kamtamtuzkas Jesústa kain sayat kit pizashimtuazi, ussa piantana. Wan awaruza ishkuara akwa, uspane Jesústa pizarachi.
3Suasne Satanásne Judasta, Iscariote muntɨtmikasha, pizta. Usne kammumika nam kit mamaz once kammuruzkasa chara. 4Usne ɨt kit pariyaruzpa mikwaruzakasa Dios katsa yal izmuruzakasas kwinta kinara, Jesústa usparuza chɨhkanapa. 5Uspane wat kulat kit ussa pial taana namarɨt. 6Usparuza chɨhkan namtawane, usne wat payura saira, ussa akkwan awa tuchira chɨhkanpa.
Jesúskas paiña kammuruzkas kuamtu
(Mt 26.17-29; Mr 14.12-25; Jn 13.21-30; 1 Co 11.23-26)
7Suasne Pascua pishta taizta. Sun pishta izamtuasmin, pan samtu, kiña wintachin. Uspane pɨrikukas piantam. 8Jesúsne Pedrorakas Juantakas ɨnin kit ka kaizta:
—Ɨt kit Pascua pishta sarain, au kwan.
9Uspane ussa mɨmaara:
—Aune ¿Mɨntama pishta sanapai?
10Usne usparuza sɨnkanara:
—Mɨrain. Pɨpulura naptazasmin, une maza ampu kwazi kalpu kwamikasha wanmalpailnazi. Ussa kwizpa kanparain, paiña yalta napnakima. 11Yalpamikasha ka kiztain: “Kamtamne aumɨza ka mɨmana ɨninta: ¿Mɨnta up kalmal tui? Suane nane Pascua kumira ap kammuruzkasa kwanash.” 12Suasne usne umɨza yalkin kwashta katsa kalmal ananazi. Suane pishta sarain.
13Uspane ɨil kit us kaizta aizpa wanmalpail kit sua Pascua kumira sailta.
14Kumtu ura taizkane, Jesúsne misharɨ uzta, paiña ɨnintaruzkasa kwan. 15Usne usparuza kaiznara:
—Naiztuchasmin, nane ukasa an Pascua kumira kwashimtus. 16Apain mamaz Pascua kumira kumanash. Chiyura, Dios paiña kwaltuza ɨninnapa akane, nane mamasa Pascua kumira kwanash.
17Taza piztawane, Diosta aishtaish kiztawane, Jesúsne kaiznara:
—An taza sap kit vino pi uruza nailtain. 18Uruza kaiznamtus. Makis an sukin an vino pi kumanash, Dios ankima, Dios ɨnintukin, paiña kwaltuza ɨninnana. Suasne sua mamasa sun kwanash.
19Pankas saptawane, Diosta aishtaish kiztawane, Jesúsne pan kɨz kit usparuza nail kit kaiznara:
—An panne ap ña i. Na u akwa inash. Sun kirain, nawa nɨjkulanapa.
20Kapal kuarawane, usne taza piz kit kaiznara:
—An vino pi ap aimpi i. Ap aimpi puzkane, nane u akwa irɨnazi, u kwail kiarɨt aizpa wat kulnana. Sunkana ñamin Diosne kin namta, u kwail kiarɨt aizpa wat kulnana. 21Mane iztain. Nawa chɨhkamtumikane an misharɨ nakasa kumtu. 22Chiyuras Ampu namtɨtmika irɨnpa narɨtkas, nawa chɨhkamtumikane kwisha tayal kit naiztɨnazi.
23Uspane usparuzpain mɨmaat kit ka kizara: “¿Mɨnma sun kinsa?”
¿Mɨnmikama an tɨnta mika i?
24Uspane usparuzpain aliz kaizat kit mɨmaara: “¿Auruzpain mɨnmikama an tɨnta mika i?” kizara. 25Jesús usparuza kaiznara: “Mamaz suras katsa mikwane paiña suwara uztuza tɨnta ɨninnamtu. Mɨnpazha katsa mikwaruzne ka kizamtu: ‘Aune awara kiwain namtamakpas.’ 26Katsa mikwa sunkana uzamtukas, une sunkana uzman. An katsaruzne an ainkimikakana namtawa. Ɨnintaruzne kiwainmumikakana namtawa. 27¿Mɨnminkas an tɨnta i? ¿Misharɨ uzmumika an tɨnta mikaki? ¿Kumira karammika an tɨnta mikaki? Misharɨ uzmumika an katsakas, nane apain arau, awaruza kiwainnana.
28Awa nawa naiznintukas, une nakasa maamtu. 29Ap Taittane nawa nara, awaruza ɨninnanapa. Kawarain nane uruza nanamtus, nakasa ɨninnapa. 30Suane une ap ɨnintukin nakasa kuanazi. Suane ap ɨnintukin une uzanazi, doce Judío kwaltuza mɨmanapa, usparuza kaizapnapa.”
Jesúsne Pedrora kiztu: Nune nawa pianchish kiznazi
(Mt 26.31-35; Mr 14.27-31; Jn 13.36-38)
31Jesúsne sun kaizta:
—Simón, Simón. Izti. Satanásne Diosta paikwara, uruza ulmalnapa, Diosta an nɨjkulamanpa. 32Nane nu akwa Diosta paikwarau, nu Diosta nɨjkulnapa, Dios pit mainmanpa. Nu nawa kailtawane, up añaruza, ap kammuruza, kiwainnari, an tɨnta namanapa.
33Simónne ussa kaizta:
—Anpat. Nane nu akwa kajchira ɨnpain, inakima.
34Jesúsne ussa kaizta:
—Pedro, nane nua kaiztus. Ma payu aral kayu aztuchasmin, nune kutña pijikima “nane ussa pianchish” kiznazi.
Uspane ussa kwail kianapain
35Suasne Jesúsne usparuza kaiznara:
—An ñancha uruza ɨninnakane, nane uruza pial tuh mɨjchikasakas tuh mɨjchikasakas zapato nukchikasakas ɨninnara. ¿Une chiwazha wemakkiwas?
Uspane ussa sɨnkaara:
—Chinkas wechimakpas.
36Usne usparuza kaiznara:
—Makis, pial tuh mɨjne, kwarawa. Kawarain tuh kwarawa. Mashti mɨjkine, kwaksham painintawa, mashti paina. 37Mane nane Dios pɨnkɨhta na akwa parɨt aizpa ka kiznamtus: “Usne kwail awakana naizanazi.”#Is 53.12 Wan nawa parɨt aizpa kimtu.
38Uspane kaizara:
—Anpat. Izti. Apane paas mashti tu.
Usne kaiznara:
—Min kwinta kirain.
Jesúsne Olivos ɨzakin Diosta paikumtu
(Mt 26.36-46; Mr 14.32-42)
39Jesúsne pɨpuluras puz kit Olivos ɨzara nura. Sua sunkana ɨkamtɨt. Kammuruzne ussa kwizpa kanpaara. 40Sua pianakane, usne usparuza kaiznara: “Diosta paikwarain, kwail kishiamanpa.” 41Jesúsne usparuztas treinta sakima ɨt kit wakpuj wain kit Diosta kaizta: 42“Ap Taitta. Nu nawa naizninshitchine, nawa naizninmun. Nu kishit aizpa sari. Na kishit aizpa samun,” kizta. 43Maza ángelne chiyuras ara, ussa tɨnta kiwainna. 44Akkwan naiztuasmin, Jesúsne an tɨnta Diosta paikwara. Usne kwisha katsa pairara pi pairamɨzta. Kwisha katsa pairara pi aimpikana pilta taizara.
45Paikwatpane, kuhs kit kammuruz purakin kailta. Uspa tayaltu akwa, pittarɨt. 46Usne kaiznara:
—¿Chikishma pittamtuas? Kuhs kit Diosta paikwarain, u kwail kishiamanpa.
Jesústa pizamtu
(Mt 26.47-56; Mr 14.43-50; Jn 18.2-11)
47Jesús paiña kammuruzkasa kwinta kimtuasmin, akkwan awane ustukin aara. Judaskas, maza doce kammuruztas, an ñancha ɨra. Jesústa kasha ɨt kit paiña matsɨhkin putchunta. 48Jesús ussa kaizta:
—Judas. ¿Nawa putchuntuasmin, nune nawa kwail kimtukish? ¿Nawa kwail awaruza chɨhkamtukish?
49Wan kit aizpa izamtuasmin, Jesúskasa uztuzne ussa mɨmaara:
—Anpat. ¿Mashtikasa waya kimuskiwas?
50Mazane usparuztas katsa pariyawa kiwainmikasha pian kit numal kail yalta. 51Jesúsne kaizta:
—Sunkana kimun.
Jesúsne kiwainmikawa kail sɨn kit ussa namtara. 52Suasmesa Jesúsne katsa pariyaruzpa mikwaruzakas, Dios katsa yalpa izmuruzakas, Judío ɨlapa ɨnintuzakas kwinta kinara. Uspane ussa pizshiara, kajchira sɨpna. Usne usparuza mɨmanara:
—¿Une mashtikasa tɨ salakasa aamuskiwas, wiyakimmikara pizna? 53Nane pailta payukima Dios yalta ukasa tuarau. Suane une nawa pizarachi. Mane une nawa pizashimtu, Diablo tɨlkwilta ɨnintu akwa, paiña kwail kinpa.
Pedrone Jesústa pianchish kiztu
(Mt 26.57-58, 69-75; Mr 14.53-54, 66-72; Jn 18.12-18, 25-27)
54Suasne uspane Jesústa pizat kit katsa pariyawa yalta mɨlara. Pedrone attishta kanpara. 55Uspane yal pianamal ĩn usap kit uzara. Pedrokas usparuzkasa uzta. 56Suasmesa ashampa kiwainmikane Pedrora izta. Ĩn usaptukin uzta. Ussa iztawane, usne kaizta:
—An ampune uskasa tuarai.
57Pedrone ussa kaizta:
—Ashampa. Nane ussa pianchish, kizta.
58An kwizta mamazne ussa iz kit kaizta:
—Nukas Jesúspa kanpammika i, kizta.
Pedrone sɨnkara:
—Ampu. Nane ussa kanpammika chish, kizta.
59Maza ura pailtawane, mamazne an tɨnta kaizta:
—Watcha, an ampukas uskasa tuarai. Usne Galilea suras ara.
60Suasmesa Pedrone kaizta:
—Ampu. Nu kaiztu aizpa pianchish, kizta.
Sun urain Pedro paramtuasmin, aral kayu azta. 61Suasmesa Jesúsne puij kit Pedrora izta. Pedrone Anpat kaizta aizpa nɨjkulta. Anpatne ussa ñamin ka kiztɨt: “Mane aral kayu aztachasmin, nune nawa kutña pijikima ‘ussa pianchish’ kiznazi.” 62Yaltas puztawane, Pedrone tayal kit tɨnta azta.
Jesústa ishanamtu
(Mt 26.67-68; Mr 14.65)
63Jesústa watsamturuzne ussa ishanat kit aim kiara. 64Uspane Jesúspa kasukin pĩn pal kit mɨmaara:
—¿Nune Dios pian aizpa piankish? Nu iztuchi aizpa kainazhain. ¿Mɨnma nua aim kiazi? kizara.
65Uspane an akkwan kwail pit ussa kaizara. “Nune kwail awa i,” ussa paraara.
Jesúsne katsa mikwaruz izarakin kuntu
(Mt 26.59-66; Mr 14.55-64; Jn 18.19-24)
66Kɨnmɨzkane, wan Judío ɨlapa ɨnintuzne wanmakkara katsa pariyaruzkasa, Moisés pɨnkɨh parɨt aizpa kamtamturuzkasa. Uspane ussa katsa mikwaruzakima tain ɨara. Suane ussa mɨmaara:
67—¿Nune Dios nɨrɨtmika kish? Aumɨza kainazhain.
Jesúsne usparuza sɨnkanara:
—Na Dios nɨrɨtmika ish kiztane, une nawa nɨjkulamanazi. 68Na umɨza chiwazha mɨmanarane, une nawa sɨnkaamanazi. Une nawa chɨhamanazi. 69Makis nane, Ampu namtɨtmikane, katsa Dios ɨninmukin uznash.#Sal 110.1
70Uspane ussa mɨmaara:
—¿Nune Dios Painkul kish?
Jesúsne sɨnkanara:
—Umin nawa Dios Painkul i kizamtu.
71Uspane usparuza kaizara:
—Masas pit wachi akwa, aune mamaz kainammmikasha mɨshitchimakpas. Aune us kaizta aizpa mɨapuspas.
Selectat acum:
San Lucas 22: kwi
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2002, Wycliffe Bible Translators, Inc. All rights reserved.
