METIU 4
4
Jisugo kahem
(Mrk 1.12-13; Luk 4.1-13)
1Teito sara kashyiinii hemtang karam jangpii Jisugo rangiinii#Sara kashyii mah rangii sazyii kamarong kikii pangsii tat tutakle. 2Sateichii leimik rekdai tinghum tingna mpounii malotryii kaleitaito mpou moi majyii takle. 3Teito Seitan teinii mpouda gongsii “Nang Saraa nah Sapfii mpou lepochiinii, kuitu hang ai tiirok ndat tolosii kakhatlo,” sii tamtakle.
4Teito mpounii khekalatle, “Aitii- sii ryiibamle, ‘tiirok roinapiinii mei ringlakle, nlenii Saraa mah mwi kito kapat samkang hang teipiinii ringtangle.’ ”
5Sateichii seitan teinii mpougo Jerosalem kamatei namdiki pang- pisanii Saraa kamaning ki atoi toisangkii masatsanii, 6mpoudakii tamle, “Nang Saraa nah sapfii mpou lepochiinii, goroinapii saimanglo; kadapokii aitiisii ryiibamle, ‘Saraanii mpoumah sating gamluigo gojangpii lang m-mang pyiisii,’ kuitu gamkii gopi deng matulak tang karam jangpii ahnyiinii n-go ahnyii bahpiinii jum matupyii tangle.”
7Jisunii mpoudakii tamle, “Aitii- sii ryii bamloile, ‘Nangnii Bangpii go Saraa go ajai julakle.’ ”
8Nlailoisii seitan teinii mpougo hangkapiinii kasagoi zang hangni- niiki pangpisii Sazyii pouryii mah sagong sazyii hang ninado ahnyii mah pumtei kava tei mpoudakii mangousii, 9seitan teinii mpou dakii tamle, “Nangnii koumangsii n-gu mata lepochiinii, aihang ai Inii n-go pyiitangle.”
10Teito Jisunii mpou dakii tamle, “Tat tulo, Seitan; daponii aitiisii ryiibamle, ‘Nangnii Bangpii go Saraa gotei mata tang karamle, sateichii nangnii mpougo roinii nga-ngatangle!’ ”
11Teito seitan teinii mpougo toi aitakle, sateichii julo, sating gamlui- hangnii humsii mpougo tiihale.
Jisunii Galili kito mpou-tha tiikahou
(Mrk 1.14-15; Luk 4.14-15)
12Jon go jum wotakle katu Jisunii shii wosek-kii, mpounii Galili ki tat tutakle. 13Sateichii Nazaret kito ntaksupii Zebulun ninado Naptali mah sating sazyii, dwijai kuto kalei Kaiparnam ki lung tang karam jangpii tat tutakle, 14katunii Lung- kakalingpii Isaiyanii tam kabam:
15“Zebulun sazyii ninado Naptali sazyii,
dwijai lam pangto kalei Jordan majusii,
Jehudimei kasu lui kakimei mah sazyii, Galili!
16Kamyii kito lungkaleimei teinii kava kadi tei ngoutangle.
Katai mah kamyii sazyii kito lungsii kalei ahnyii phyiiryiito vaipyii tangle katu sam ai kasangpii gong matwi matutang karam jangpiile.
17“Lungkali wolo, Kadaponii sating gam sazyii tei natakle.” Sii tamsii Jisunii tei tinglang sekpii tam ralipyiihou tutakle.
Jisunii kaa kalimei madaigo kalat
(Mrk 1.16-20; Luk 5.1-11)
18Sateichii mpounii Galili dwijai liikuto tat kapi kak, Pitar sii kalat Simon ninado mpoutai-karhiipii Andru, ahnei sana hangna ai dwijai kito ralang rotsii kalei tei ngoutakle, kadapokii mpoupiina tei kaa ka- limeile. 19Sateichii mpounii ahnyii dakii tamle, “Patlo, gutai swi wolo, Inii gonyiigo mei kanum mei tiimatu tangle.” 20Teisek-kii mpoupiinanii ralang rat toi aisii mpou-tai swiwo takle.
21Sateichii bam teiki teito aitiisii tatjou pikii, mpounii kaki asanamei hangna, Zebedi nah sapfii mpou Jems sateichii mpou taikarhiipii Jon, ahnei hangna mpou pfii Zebedigo kaswisii malyii hangninii kito ahnyiimah ralang potsii kalei tei ngoutakle. Teito mpounii ahnyiigo lat takle. 22Teisek-kii ahnyiinii malyii ninado ahnei pfii go toimaraisii mpou-tai swi wotakle.
Jisunii tam ralikapyii ninado tii mbi kapyii
(Luk 6.17-19)
23Sateichii mpounii ahnyii mah ndwibam hang kito ralipyiisii, sateichii sating gam sazyii mah kabi rasam tam ralipyiisii sateichii ahnyii meihang kak kito arahang ninado katchiihang tei tii mbi pyiisii Galili sazyii hangki tatgong takle. 24Sateichii mpoumah zei katat tei Sairiya bamlyii hangki kahitu takle; sateichii ahnyiinii mpouda rakani- mei hang, ra katham kathampii goisii ninado tchiisii kalei, sara kashyiinii jum kalu, tai taipi katu, pumpei katai meihang go pang gong takle, sateichii mpounii ahnyiigo tii mbipyii takle. 25Sateichii Galili, Dekapolis, Jerosalem, Judiya ninado Jordan majusii doito meimoi moisang nii mpou-tai swiwotakle.
Selectat acum:
METIU 4: NAG2
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Maram Naga, KARANU KABI SAMTAM © Bible Society of India, 2007.
