Regiones donde se habla: Departamento de La Paz, Oruro y una parte de Cochabamba. Este fue realizado por un equipo interconfesional de habla Aymara. Esta Biblia esta con la escritura tradicional, es mas de uso para la Iglesia evangélica. El proyecto ha sido financiado por SBU y administrado y dirigido por la Sociedad Bíblica Boliviana. Como Consultor estuvo el Hno. Enrique Spent y Coordinador de Proyecto Pr. Francisco Mamani. La versión con Deuterocanónico esta con el alfabeto único aprobado por el Gobierno, es una versión de uso esclusivo de la iglesia católica.

Biblia Aymara ©Sociedad Bíblica Boliviana 1997. Mapas ©Sociedades Bíblicas Unidas, 1996 Todos los derechos reservados. ISBN: 978-999954-67-95-3 Cubierta Vinil Catálogo: AY052P Sociedad Bíblica Boliviana Calle Bolívar E-0332 Casilla 329 E-mail:  info@sociedadbiblicaboliviana.org Website: www.sociedadbiblicaboliviana.org

Aymara, Qullan Arunaca

Aymara, Central - 1997 UBS (NT) Drama

Jan levaduran t'ant'a manq'añ urux jak'ankxänwa, jan ukax, Pascua uru sataraki. Sacerdotenakan jilïripampi, kamachi yatichirinakampix kunaymanit Jesusar jiwayañ thaqhapxäna, ukampis jaqiruw axsarapxäna.
Ukapachaw supayax Judas Iscarioten chuymapar mantäna, jupasti tunka payan yatiqirinakat maynïrïnwa. Judasasti sacerdotenakan jilïripan ukaru, Tatitun utapankkis uka jilïrinakan ukaruw saräna, ukatsti Jesusar katuyañatakiw jupanakamp arust'äna. Jupanakasti wal kusisipxäna, Judasarux qullqi churañ amtapxarakïna. Jupasti iyaw sasaw qullqi katuqasïna, ukat jupax jaqis jan utjki ukapachan kunjämatsa Jesusar katuyaspa uk thaqhäna.


Jan levaduran t'ant'a manq'añ jach'a uruw purinxäna, Pascua jayp'un mä maran urqu oveja luqtañäkän uka uru. Jesusasti Pedrompiru Juanampiruw khithäna akham sasa:
—Pascuan manq'añäkis uk wakichir sarapxam —sasa.
Jupanakasti jiskt'apxänwa:
—¿Kawkhar wakichañanakaxsa munta? —sasa.
Jesusasti jupanakarux sänwa:
—Markar mantapkät ukkhaxa, mä jaqiruw um wayuskir jikxatapxäta. Kawki utarutix mantkan ukar arkapxam, ukat utanirux sapxam: ‘Yatichiriw sistam: ¿Kawkhankis yatiqirinakaxampi Pascua aruman manq'kä uka utaxa?’ sasa. Jupasti amsta patxa utana, mä jach'a uta uñachayapxätam. Ukan manq'añ wakiyapxam.
Jupanakasti sarasin, kunjämtix Jesusax jupanakar siskatayna ukhampun jikxatapxäna, ukatsti ukan Pascua jayp'u manq'añ wakt'ayapxäna.
Manq'añ pacha purinxipansti, Jesusampi yatiqirinakapampix manq'añatakiw qunt'asipxäna. Ukatsti Jesusax jupanakarux sänwa:
—¡Walpun jumanakampix aka Pascua manq'a manq'añ munäyäta janïr jiwkasina! Nayax sapxsmawa, janiw mayampis aka Pascua manq'a manq'käti Diosan qhapaq markapan phuqhasiñapkama —sasa.
Ukat amparapamp mä qiru astasin Diosar yuspagaräna, sarakïnwa:
—Uka qiru astapxam, ukatsti taqinirak umt'apxam; nayasti sapxsmawa, jichhat uksarux janiw mayampisa uvan achupat umkäti, Diosan qhapaq markapan jutañapkama —sasa.
Ukatsti, t'ant'a irtasin Diosaruw yuspagaräna, pachjasinsti jupanakaruw churäna, sarakïnwa:
—Akax janchixawa, ukasti jumanak layku jiwayañatak katuyatawa. Uksti nayat amtasisin lurapxam —sasa.
Manq'añ tukuyatatsti, Jesusax yaqha qiru astäna, sarakïnwa:
—Aka qirux machaq arust'äwiwa, wilaxampi chimpuntata, ukasti jumanakan askimatakiw wartasi. Jichhasti khititix nayar aljantkitani ukax, nayamp chikaw aka manq'añawjan qunt'atäski. Jaqin Yuqapax kunjämtix Diosax siski ukhamaruw phuqhaskani, ukampis ¡kunakïkan aljantir jaqitakixa! —sasa.
Ukatsti jupanakkamaw jiskt'asipxäna: ¿Khitirak aljantanisti?, sasa.

Ukxarusti yatiqirinakax, khitis jupanakat juk'amp jilïrit uñt'atäspa ukxat ch'axwapxäna. Jesusasti jupanakarux sänwa: “Aka uraqinxa, reyinakax qhuru kankañampiw markanakarux jupanakankirjam apnaqapxi, jilïrinakarusti ‘suma lurir jaqinakaw’ sapxarakiwa. Jumanakasti janiw ukhamäpxañamäkiti. Jan ukasti, khititix jumanak taypin jilïrïki ukax sullkïrir tukuñapawa, irpirïki ukasti luqtirïñaparakiwa. Ukhamasti ¿khitirak juk'amp jilïristi, manq'añatak qunt'aski ukati, jan ukax manq'añ luqtki ukacha? ¿Janit manq'añatak qunt'aski ukäkisti? Ukampis nayax taqpachaniruw manq'a luqtapxsma.
“Jumanakax jan walt'añ urunakaxanxa, nayampi chikäsipkapuntawa. Ukat nayax jumanakar reyi kankañ churapxsma, kunjämatix Awkixax nayar churkitu ukhama, qhapaq markaxansti, jumanakax nayan manq'añaxat manq'apxäta, umapxarakïta, ukatsti Israelan tunka payan ayllupar taripañatakiw qunt'asipxarakïta.”


Jesusax sarakïnwa:
—Simón, Simón, sum ist'am, supayax jumanakar trigorjam jawq'suñatakiw mayi; ukampis nayaw jumatakix mayta iyawsañaman jan pist'añapataki. Jumasti, kunapachatix nayan ukar kuttanxät ukkhaxa, jilanakaman jan mayjt'asiñapatak jupanakar ch'amañcht'am —sasa.
Simonax Jesusar sänwa:
—Tatay, jumamp chik carcelar sarañatakisa, jan ukax jumamp chik jiwañatakis jank'akïtwa —sasa.
Jesusax juparux sänwa:
—Pedro, qhanak sisma, janïr wallpax art'kipan jichhürpachaw jumax kimsa kuti nayar jan uñt'ir tuküta —sasa.

Ukat Jesusax jiskt'äna:
—Kunapachatix jan wayaqani, jan qullqini, jan wiskhuni khithapkäyäsma ukkhax ¿kunarak pist'apxäyätamsti? —sasa.
Jupanakasti sapxänwa:
—Janiw kunasa —sasa.
Ukat Jesusax sarakïna:
—Jichhasti qullqinix, qullqip apasinpan, ukhamarak manq'añanaksa; khititix jan espadanïki ukax isip aljasisin espada alaspan. Nayasti sapxsmawa, kunatix Qillqatanakax nayat siski: ‘Ñanqha luririnakamp jakhutawa’ sasa ukax phuqhasiñapawa. Taqi kunatix nayat qillqatäki ukanakax phuqhasiñapawa —sasa.
Jupanakasti sapxänwa:
—Tatay, akan pä espadaw utji —sasa.
Jesusasti sarakïnwa:
—Jan juk'amp ukxat parlxañäniti —sasa.


Ukapachaw Jesusax markat mistuwayxäna, kunjämtix lurirïkän ukhama Olivos sat qulluruw sarxäna, yatiqirinakapasti arkapxarakïnwa. Uka chiqar purisinsti Jesusax jupanakarux sänwa:
—Diosat mayisipxam yant'ampi jan atipjayasiñataki —sasa.
Ukat Jesusax mä qala jaqt'arjamaw saräna, ukan Diosat mayisiñatakiw killt'asïna. Sarakïnwa: “Awkixay, munsta ukax, aka t'aqhisiñat qhispiyita; ukampis jan munañaxax luratäpati, jan ukasti juman munañamak luraspan” sasa.
Ukapachaw alaxpachat mä angelax jupar ch'amañchañatak uñstäna. Jach'a t'aqhisiñankasasti, juk'amp ch'amampiw Diosat mayisïna, jump'ipas wila ch'aqanakjamaw ch'aqaräna.
Mayisiñ tukuyatatsti, yatiqirinakapan ukaruw saräna, jupanakarusti llakimp atipjat ikiskir jikxatäna. Ukat yatiqirinakaparux säna:
—¿Kunatsa ikisipkta? Sartapxam, yant'ampi jan atipjayasiñatak Diosat mayisipxam —sasa.


Jesusax parlaskänwa, ukapachaw Judasax purinïna, khititix tunka payan yatiqirinakat maynïrïkan uka. Jupampi chikasti walja jaqinakaw purinipxarakïna, Judasasti Jesusar jamp'att'iriw jak'achasïna, ukampis Jesusax juparux sänwa:
—Judas, ¿mä jamp'att'ampiti Jaqin Yuqaparux aljanttaxa? —sasa.
Jesusampïpkän uka yatiqirinakapax uk uñjasax jiskt'apxänwa:
—Tatay, ¿espadampit katuntapxäxa? —sasa.
Ukat jupanakat maynïrix jilïr sacerdoten uywataparuw espadamp jisktasin kupi jinchup thuquqayäna. Jesusasti sänwa:
—Ukkhaki, jan kuns lurapxamti —sasa.
Ukat Jesusax uywatan jinchup llamkt'asin k'umaraptayäna. Jesusasti sacerdotenakan jilïrinakaparu, Tatitun utap uñjir soldadonakaru, khitinakatix jupar katuntir jutapkatayna uka jilïrinakaruw säna:
—¿Lunthatarjamati espadanakampi, lawanakampi nayar katuntir jutapxta? Tatitun utapan yatichas sapüruw jumanakampïskäyäta, ukkhay katuntapxitasamänxa. Ukampis jichhaw jumanakan pachamax purinxi, kunapachatix ch'amakax munañanïki ukapachaxa —sasa.


Jesusar katuntasinsti, sacerdotenakan jilïripan utaparuw irpapxäna. Pedrosti jayatak jupanakar arkäna. Uka uta anqäxan nina phichhasipxäna, ukar muyuntasaw qunt'asipxäna, Pedrosti jupanak chikarakiw qunt'asïna. Ukapachaw mä uywat tawaqux, Pedror nina jak'an qunt'atäskir uñjasax, wal wal uñkatäna, ukat sarakïna:
—Aka jaqix Jesusampi chikarakïnwa —sasa.
Pedrosti jan uñt'iriw tuküna:
—Warmi, janiw nayax uñt'kti —sasa.
Mä juk'ampjarusti yaqharakiw uñjäna, ukasti sarakïnwa:
—Jumax jupanakankirïtawa —sasa.
Pedrosti sänwa:
—Tata, janiw nayäkti —sasa.
Uka qhipatsti yaqhax saskakïnwa:
—Aka jaqix jupampipunïskänwa, jupasti Galileankir jaqiwa —sasa.
Pedrox sänwa:
—Tata, janiw yatkti kunat parlatamsa —sasa.
Pedron ukham arskipan wallpax art'äna. Tatitusti kutikipstasin Pedrorux uñtäna, Pedrosti kuntix Jesusax siskatayna uka arunakat amatasïna: “Jichhüru, wallpax janïr art'kipanwa nayarux kimsa kuti jan uñt'ir tuküta” sasa. Ukatsti Pedrox uka chiqat mistuwayasin wal jachäna.


Khitinakatix Jesusar uñjasipkän ukanakax jupat phiskasipxänwa, jawq'japxarakïnwa. Nayranakap ch'uqantasaw jupar jiskt'apxäna:
—Profeta, ¿khitis nuwtam uk yattati? —sasa.
Ukatsti walja jan wali arunakampiw tuqjapxäna.


Urüxän ukapachasti, judionakan jilïri jaqinakapampi, sacerdotenakan jilïrinakapampi, kamachi yatichirinakampiw tantachasipxäna, ukatsti Jesusarux uka Jach'a Tantachasïwi nayraqataruw irpapxäna. Ukansti akham sasaw jiskt'apxäna:
—Sapxita ¿jumätati Cristoxa? —sasa.
Jesusasti jupanakarux sänwa:
—Nayatix “jïsa” sapxämaxa, janiw iyawsapkitätati. Nayatix jiskt'apxämaxa, janiw jaysapkitätati. Jichhat uksarusti Jaqin Yuqapax taqi ch'aman Diosan kupïxapan qunt'atäniwa —sasa.
Ukatsti taqiniw jiskt'apxäna:
—Ukhamasti, ¿jumax Diosan Yuqapätati? —sasa.
Jesusasti jupanakarux sänwa:
—Jïsa, jumanakpachaw sasipktaxa —sasa.
Ukat jupanakax sapxäna:
—¿Kunat juk'amp irkatirsa jichhax muntanxa? Jiwas pachpaw kipka lakapat ist'tanxa —sasa.

Ascultă LUCAS 22